रोमी 8 - ह्योल्मोनाम्पार-ताहक्पा थु लाहमले ज्योर्केन्की मिहली 1 ओ़ह सोङबे मास्यीका येशूला येहकेन मिह थाम्ज्यीला किन्ज्योगी ङ्य़ेहबा काल नाङज्ये म़ेह। 2 तिहक्पा दाङ स्यिवाकी छ्य़े-ठिम लाहमले ङाहला मिहली नाङगेन थुगी, छ्य़े-ठिमगी मास्यीका येशूला खा फे़ नाङदी येह। 3 तिहक्पागी पेहताङगी काहङग्यो ज़ुबुगी मिहला ज्यिबुराङ मा-फाम्बु ज़ोक्यो सोङबे छ्य़े-ठिमगी पेह मी़हखुएँ ल़ेह किन्ज्योगी जे नाङसीन। काह-ठि पेहती माना, मिहरोगी राहङगी स़ेबु च्यिमे च्यी़ला दि जाम्बुलीङला ताङ नाङसीन। ओहले स़ेबु तिहक्च्येम्बा मिह ल़ेहमुराङ जेती मिहगी कुसो नोम्दी ठुङ नाङसीन ओहले मिह थाम्ज्यीगी पेहक्यो तिहक्पाकी तेहन्दाला किन्ज्योगी स़ेबुला क्याहङस्यीङला मार्च्ये फुल नाङसीन। दि ल़ेहमु जेती स़ेबुगी कुसो लाहमले किन्ज्योगी तिहक्पाकी ओङला दुल नाङसीन। 4 ज़ुबु लाहमले पेहकेन तिहक्पाकी पेहताङया़ खुर्ती मिहम्बा यिहॱनाङ नाम्पार-ताहक्पा थु लाहमले मिहजी ताङगेया़गी तेहन्दाला छ्य़े-ठिमगी जे नाङज्ये जेक्योकी छ्या़ले ता़ह तेहन्दा डुप्ती येह। 5 च्यिबेमाना तिहक्पाकी पेहताङला ते़बे मिहजी ताङगेया़गी ज़ुबुगी से़हया़ला सेम ताङगे, यिहॱनाङ नाम्पार-ताहक्पा थु लाहमले मिहजी ताङगेया़गी नाम्पार-ताहक्पा थुगी से़हया़ला सेम ताङगे। 6 च्यिबेमाना ज़ुबु लाहमले पेहकेन तिहक्पाकी पेताङया़ला सेम ताङसीन माना दिगी मिहला स्यिवाला क्याहल्गे। यिहॱनाङ नाम्पार-ताहक्पा थुला सेम ताङसीन माना दिगी मिहला मिहली दाङ स्य़िहदे तेर्के। 7 च्यिबेमाना ज़ुबु लाहमले पेहकेन तिहक्पाकी पेहताङया़ थो़ला सेम ताङगे मिह किन्ज्योगी टाह यिहम्बा। खो किन्ज्योकी छ्य़े-ठिमगी ओङ चो़ला तेह मी़हखुएँ ओहले खोगी छ्य़े-ठिमॱआङ ची़ मी़हखुएँ। 8 तिहक्पाकी पेहताङगी ओङ चो़ला तेहकेया़गी किन्ज्योकी थुला नाहमॱआङ काहसो ज़ो मी़हखुएँ। 9 का़हलेॱआङ तेहम्बाराङ किन्ज्योकी थु ख्या नाहङला ज़्य़ू नाङसीमाना, ख्या तिहक्पाकी पेहताङकी ओङ चो़ला मेहयोहङगे यिहॱनाङ ख्या नाम्पार-ताहक्पा थुगी ओङ चो़ला ओहङगे। मास्यीकाकी थु मे़हबाया़ मास्यीकाती मिहम्बा 10 का़हलेॱआङ मास्यीकाकी थु ख्या नाहङला ज़्य़ू नाङग्यो येहसीनमाना तिहक्पागी पेहती ख्यागी ज़ुबु स्यिॱना़ङ किन्ज्योगी ख्याला टाहङबु ज़ो नाङग्यो सोङबे ख्याया़ यिहला थार्च्ये येह। 11 का़हलेॱआङ येशूला टोहङग्योलेगी सोम्बो ज़्याङ च्य़ू नाङगेन किन्ज्योगी थु ख्या ङ्याम्बुॱआङ ज़्य़ू नाङसीन मानानी, मास्यीका येशूला टोहङग्योलेगी सोम्बो ज़्याङ च्य़ू नाङगेन्दीगीराङ ख्या ङ्याम्बु ज़्य़ू नाङगेन मिहरोगी थु लाहमले ख्यादी स्यिदी डोएँ ज़ुबुलाॱआङ मिहली नाङज्ये येह। 12 ओ़ह सोङबे आदा-नो़ह दाङ आज्यी-नुहमुया़, ओहराङ मिह-ज़ुबुगी नाहम्माॱनाङ तिहक्पा च्यी़राङ तिहक्पाकी ल़ेहया़ पेहच्ये छोल्गे यिहॱनाङ ओहराङगी ओ़हठीॱराङ तिहक्पाकी ल़ेहया़ पेहती राहङगी मिहजी ताङ कोहएँ म़ेदीनी ओहराङला उर्चु म़ेह। 13 च्यिबेमाना ख्याया़गी तिहक्च्येम्बा पेहताङला ते़बे राहङगी मिहजी ताङसीन माना ख्याया़ स्यिज्ये येह, यिहॱनाङ का़हलेॱआङ नाम्पार-ताहक्पा थुकी ओङ लाहमले तिहक्पाकी पेहताङया़ला सेसीन माना ख्याया़ थार्च्ये येह। 14 च्यिबेमाना थाम्ज्यी, का़हन्दी किन्ज्योकी थुगी ॱठिक्यो ओहङगे, खुङया़ॱराङ किन्ज्योकी छार्क्यीन यिहम्बा। 15 च्यिबेमाना ख्येला योक्पु ज़ोएँकी ओ़ह नाम्स्यी नाङदी म़ेह, का़हन्दीगी ख्येला येहपाराङ ज्यी़सु ङो़ले ख्येर्के, यिहॱनाङ ख्येला राहङदीराङ पुह-पोहमो ज़ोएँकी नाम्पार-ताहक्पा थु नाङदी येह। दि लाहमलेॱराङ ओहराङगी किन्ज्योला “अब्बा, आबा” म़ेदी क़े क्याहप्केन। 16 नाम्पार-ताहक्पा थु मिह-रो़हराङ ओहराङकी यिह ङ्याम्बु डी़दी “ओहराङ किन्ज्योकी पुह-पोहमो यिहम्बा” सुङदी पाङबु नाङगे। 17 ओहराङ किन्ज्योकी पुह-पोहमो काहल फान्ज्योनी थोप-थाङकी मिहॱआङ ओहङगे, किन्ज्योकी फास्यी ज्योर्केन्गी मिह ओहले मास्यीका ङ्याम्बुदी पी़माला फास्यी ज्योर्केन्गी मिह। ओहराङ मास्यीका ङ्याम्बुराङ तुहक्पु खुर्सीमाना मिहरो ङ्याम्बुराङ ज़िज्यिद ज्योर्च्ये येह। तिङला ज्योर्केन्गी ज़िज्यिद 18 च्यिबेमाना ङाहती सेमला दि ल़ेहमु ने़उ दु, ओहराङ थो़ला तेन नाङगे ज़िज्यिद ङ्याम्बु ताहन्दाकी तुहक्पुया़ तुहर मी़हखुएँ। 19 किन्ज्योगी राहङगी पुह-पोहमो तेन नाङगेन्गी ङ्यिहमा ताज्येला मिहरोगी छ्या़ च्य़ू नाङग्योगी रेबेॱराङ से़हया़गी ज्यिबुराङ छ्यिम्बु रेहवा पेहती कू़हदी तेहती येहबा। 20 च्यिबेमाना मिहरोगी छ्या़ च्य़ू नाङग्योगी रेबेॱराङ से़हया़ फेनराङ मे़हथोएँ काहल्दी येहकें यिहॱनाङ दि ल़ेहमु काहल्ग्योदी खो राहङ सेमगी मिहम्बा यिहन्गे यिहॱनाङ दि ल़ेहमु जे नाङज्ये किन्ज्योकी थु-सेम येहकें। मिहरोगी छ्या़ च्य़ू नाङग्योगी रेबेॱराङ से़हया़गी रेहवा पेहती तेहच्यु म़ेदी किन्ज्योगीॱराङ दि ल़ेहमु जे नाङग्यो येहकें। 21 ङ्यिहमा च्यी़ किन्ज्योगी छ्या़ च्य़ू नाङग्योगी रेबेॱराङ स़ेहया़ राहङदीराङ तोङदी डोएँकी ताहमलेगी ताङज्ये येह, ओहले खोगीॱआङ किन्ज्योकी छार्क्यीनगी ज़िज्यिदकी राहङवाङ नाहङला स्य़ूह ङ्युहङज्ये येह। 22 ओहराङला क्यी़ह येह, किन्ज्योगी छ्या़ च्य़ू नाङग्योगी रेबेॱराङ से़हया़ ताहन्दा थु पेहजा क्येएँगी नाहजा क्याहप्क्योगी पी़हमी-पेहजा ल़ेहमुराङ बोल तेहती येहबा। 23 किन्ज्योगी छ्या़ च्य़ू नाङग्योगी से़हया़ च्यी़राङ मिहम्बा, ओहराङ राहङॱआङ नाम्पार-ताहक्पा थुला तोहङस्यो सेदो यिहन्गे सोङबे, मिहरोगी राहङदीराङ पुह-पोहमो ज़ो नाङज्येला, पे यिहॱना़: ओहराङ ज़ुबुकी थार्पाकी तेहन्दाला कू़हदी ओहराङ राहङॱआङ नाहङदा-नाहङॱराङ बोल तेहती येहबा। 24 च्यिबेमाना दि रेहवालाॱराङ किन्ज्योगी ओहराङला थार्पा नाङसीन। ता़ह थोङगे से़हला रेहवा पेहकेन्दीनी ओ़ह रेहवा पेहक्यो मिहम्बा। च्यिबेमाना थोङग्यो से़हला सुगी रेहवा पेहकें ले? 25 यिहॱनाङ का़हलेॱआङ ओहराङगी माहथोङबाकी से़हला रेहवा पेहकें माना, ओहराङ ओ़हगी तेहन्दाला ना़स्यीङ छ्यिम्बु पेहती कू़हदी तेहकें। 26 ओ़हठीॱराङ पेहती नाम्पार-ताहक्पा थुगीॱआङ ओहराङ मा-फाम्बु काहल्ग्यो ती़हजीला रो़हराम जे नाङगे। काह-ठि पेहती सोल्वाङ ताप कोहएँ यिहम्बा ओ़ह ओहराङला क्यी़ह मे़हॱनाङ नाम्पार-ताहक्पा थु राहङगीराङ मिहगी मालुला स्येॱराङ मी़हखुएँ तिहङ रिहङबु खुम्बु ताङ नाङदी ओहराङगी तेहन्दाला सोल्वाङ ताप तेर नाङगे। 27 मिहया़ती यिह ङोह ख्येन नाङगे किन्ज्योगी नाम्पार-ताहक्पा थुगी थु-सेम च्यि येहबा ओ़ह ङोह ख्येन नाङगे च्यिबेमाना किन्ज्योकी थुला ठुङग्यो ल़ेहमु नाम्पार-ताहक्पा थुगी किन्ज्योला यिह-छ्य़े पेहक्यो मिहया़की तेहन्दाला ओहर-छ्य़े स्युह नाङगे। 28 ङ्यिहला क्यी़ह येह, किन्ज्योला चेवा पेहकेनया़ दाङ मिहरोगी थु-सेम जेती क़े क्याहप नाङग्यो मिहया़गी तेहन्दाला च्यिला-माना मिहरोगी या़हबुॱराङ जे नाङगे। 29 किन्ज्योगी राहङगी मिहया़ला तोहङलेराङ ङोह ख्येन नाङसीन ओहले राहङगी स़ेबु ल़ेहमुराङ डोज्येला दाम नाङसीन च्यिबेमाना मिहरोगी स़ेबु आदा-नो़ह दाङ आज्यी-नुहमुया़ नाहङला थाम्ज्यी म़ेदी छ्येस्यो ओहङ ख़ूज्यु। 30 सु सुला किन्ज्योगी तोहङलेराङ दाम नाङबा, खुङया़ला मिहरोगी क़ेॱआङ क्याहप नाङसीन, ओहले सु सुला मिहरोगी क़े क्याहप नाङबा, खुङया़ला मिहरोगी टाहङबुॱआङ सी़ह च्य़ू नाङसीन, ओहले सु सुला मिहरोगी टाहङबु सी़ह च्य़ू नाङबा, खुङया़ला मिहरोगी ज़िज्यिदॱआङ नाङसीन। मास्यीका येशूला किन्ज्योकी चेवा 31 ता़ह दि केच्याला साम्लु ताङगेमु ओहराङगी च्यि माज्ये ले? का़हलेॱआङ किन्ज्यो ओहराङ छ्यो़ले ज़्य़ू नाङदी येहसीमानानी ओहराङला सुगी टाह पेह खू़रो ले? 32 मिहरोगी राहङगी च्यिमे च्यी़राङ स़ेबुलानी सी़दी ज़्या़ माहनाङ, यिहॱनाङ ओहराङ थाम्ज्यीगी तेहन्दाला नाङसीन। ओहराङगी तेहन्दाला राहङगी स़ेबु नाङगे किन्ज्योगी तोहरोङ मास्यीका ङ्याम्बुराङ लेहमेन थाम्ज्यीराङ से़हया़ ओहराङला मेहनाङडो ले? 33 किन्ज्योगी दाम नाङग्यो मिहया़ला सुगी फातुर च़ू ख़ूएँ? किन्ज्यो राहङगीराङ खुङया़ला टाहङबु सी़ह च्य़ू नाङग्यो येहबा। 34 ता़ह खुङला सुगी ङ्य़ेहबा काल ख़ूज्ये? मास्यीका येशू टोहङ नाङसीन यिहॱनाङ टोहङग्योया़ नाहङला मिहरो येहपाराङ सोम्बो ज़्याङ नाङसीन, ओहले ताहन्दा मिहरो किन्ज्योकी योबा ङो़ले ज़्य़ू नाङदी येहबा, ओहले मिहरोगी ओहराङगी तेहन्दाला किन्ज्यो ङ्याम्बु ओहर-छ्य़े स्युह नाङगे। 35 ता़ह सुगी ओहराङला मास्यीकाकी चेवालेगी खा फे़ ख़ूज्ये? च्यि छे म़ेहबा तुहक्पु दाङ खेन्दा का़हबुया़गी, च्यि मिहया़गी ङ्येन्ज्येनगी, च्यि मुहयीगी, च्यि ओहराङ ज़ुबुला केहन्ज्येला काप्च्या म़ेहबा सोङबे, च्यि ज्यिक्पा छ्यिम्बुला छ्यिटो म़ेदी, च्यि पादाङगी? 36 छ्य़ेला दि ल़ेहमु प्री़हदी येहबा, “राहङगी तेहन्दाला ङ्यिह ङ्यिहमा-टाहङमाराङ स्यिएँ, ङ्यिह सेच्येला ठाबे पेहक्योकी ल़ूह ल़ेहमुराङ यिहम्बा।” 37 यिहॱनाङ ङ्यिहला चेवा जे नाङगे मास्यीका लाहमले ङ्यिह दि थाम्ज्यीला क्याहल्दी येह। 38 च्यिबेमाना ङाहला दि या़हबु पेहती क्यी़ह येह, च्यि से़हगीॱआङ मास्यीकाकी चेवालेगी ओहराङला खा फे़ मी़हखुएँ। ओ़ह स्यिवागी यिहॱना़ यिहन, मिहलीगी यिहॱना़ यिहन, स्यिहङगामगी स्याहप्च्यीया़गी यिहॱना़ यिहन, ती़ह गो-छ्येवागी यिहॱना़ यिहन, ताहन्दागी तामया़गी यिहॱना़ यिहन, तिङला ओहङगेन्गी तामया़गी यिहॱना़ यिहन, ओङज्याया़गी यिहॱना़ यिहन, 39 याहरकी तामया़गी यिहॱना़ यिहन, चो़गी तामया़गी यिहॱना़ यिहन, लिङस्यीला येहकेन थाम्ज्यीराङ से़हया़गी यिहॱना़ यिहन मास्यीका येशू ओहराङ चो़वोला येहकेन किन्ज्योकी चेवा लाहमले ओहराङला च्यि से़हगीॱआङ खा फे़ ख़ूज्ये म़ेह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.