रोमी 2 - ह्योल्मोकिन्ज्योकी ठिम 1 ओ़ह सोङबे लेहमेनला फातुर च़ूगे ए रो़ह, ख्ये सु यिहॱनाङ, ख्येला तेलेन तेन्गे ग्या़ॱराङ म़ेह, च्यिबेमाना ख्येगी लेहमेनला च्यि तामला फातुर च़ूगे, ओ़ह तामलाॱराङ ख्येॱलाङ ङ्य़ेहबा फो़ज्ये येह, च्यिबेमाना ख्ये फातुर च़ूगेन्दीगीॱआङ ओ़ह ल़ेहराङ पेहकें। 2 दि ल़ेहमु ल़ेह पेहकेन मिहया़ला किन्ज्योगीॱआङ तेहन्दामला ते़बे ङ्य़ेहबा काल्दी ठिम ताङ नाङज्ये येह। 3 ए रो़ह, ख्येगी दि ल़ेहमु ल़ेह पेहकेनया़ला फातुर च़ूगे ओहले राहङगीॱआङ ओ़ह ल़ेहराङ पेहसीनमाना, च्यि ख्ये किन्ज्योगी ताङ नाङगेन्गी ठिमलेगी थार ख़ूएँ म़ेदी ने़उ दु? 4 किन्ज्योगी ख्येला माहङबुराङ थुज्यी ज़ी़ नाङसीन ओहले मिहरोगी ख्येला ना़स्यीङ छ्यिम्बु जेती माहङबुराङ कू़हदी ज़्य़ू नाङसीन ता़ह ख्ये च्यि किन्ज्योला क्युक्टो पेहकें? किन्ज्योकी थुज्यीगी तिहक्पा पाङ च्य़ूदी स्या़बा पेह च्य़ूगे माएँ ताम च्यि ख्येला क्यी़ह म़ेहबा? 5 यिहॱनाङ ख्याया़गी राहङगी सेम सान्दी पेहती स्या़बा माहन्डुपा सोङबे किन्ज्योकी थुयालकी ङ्यिहमाला ख्याया़ला जेन छ्यिम्बु ङ्य़ेहबा फो़ज्ये येह, ओहजेला किन्ज्योगी ठिम टाहङबु जेती ताङ नाङग्योदी मिह थाम्ज्यीगी थोङज्ये येह। 6 च्यिबेमाना किन्ज्योगी मिह थाम्ज्यीला खोगी पेहक्यो ल़ेहला ते़बे च्याहगा नाङज्ये येह। 7 या़हबु ल़ेहया़ पेहती ज़िज्यिद, चा दाङ था़ म़ेहबाकी मिहली ज़ाङबु छोल्गेया़ला किन्ज्योगी था़ म़ेहबाकी मिहली ज़ाङबु नाङज्ये येह। 8 लाहला मिहया़गी राहङला च्यी़राङ निङज्यी पेहकें, तेहन्दामला मी़हचीएँ ओहले ल़ेह ङ्येहम्बाया़ पेहती डोएँ। ओ़ह ल़ेहमु मिहया़ किन्ज्योकी राहङगी मेह पाहरक्यो ल़ेहमु थुयालला छ्यिच्ये येह। 9 ल़ेह चोक्पा पेहकें मिह थाम्ज्यी छ़े म़ेहबा तुहक्पु दाङ खेन्दा-का़हबुला छ्यिच्ये येह, तोहङस्यो यहूदीया़ ओहले लेहमेन क्यिहपाकी मिहया़ॱआङ। 10 यिहॱनाङ ल़ेह या़हबु पेहकें थाम्ज्यीला ज़िज्यिद, चा़ दाङ स्य़िहदे नाङज्ये येह तोहङस्यो यहूदीया़ला ओहले लेहमेन क्यिहपाकी मिहया़ॱलाङ। 11 च्यिबेमाना किन्ज्योगी सुलाॱआङ ङ्येम्बा-ङ्य़ेहरी जे मेहनाङगे। 12 किन्ज्योगी नाङग्यो छ्य़े-ठिम माहन्ज्योर्पाला सु सुगी तिहक्पा पेहपा, खुङ ओ़ह छ्य़े-ठिम माहन्ज्योर्पालाॱराङ तोङदी डोज्ये येह। ओहले छ्य़े-ठिम चो़ला तेहतीॱआङ तिहक्पा पेहकेनया़ला छ्य़े-ठिम लाहमलेॱराङ ठिम ताङज्ये येह। 13 च्यिबेमाना छ्य़े-ठिम ङ्यिहन्गेया़ किन्ज्योकी दिनला टाहङबु मी़हसीहएँ, यिहॱनाङ छ्य़े-ठिम ची़गेया़ टाहङबु सी़हज्ये येह। 14 लेहमेन क्यिहपाकी मिहया़ ङ्याम्बु छ्य़े-ठिम म़ेह। यिहॱनाङ खुङगी च्यि या़हबु यिहम्बा च्यि चोक्पा यिहम्बा माएँ ताम खा फे़ ख़ूएँ ओहले ओ़हला ते़बे खुङगी ल़ेह पेहसीमाना, खुङ ङ्याम्बु छ्य़े-ठिम मे़हॱनाङ खुङ राहङगी तेहन्दाला राहङराङ छ्य़े-ठिम ओहङगे। 15 छ्य़े-ठिमला येहकेन्की तामया़ खुङ राहङगी सेमला प्रुहक्यो येहबा म़ेदी खुङ राहङगी डोलु तेहलुगीॱराङ तेन्गे। ओ़ह सोङबे खुङगी नावागी नाहम राहङला फातुर च्य़ूगे, नाहम टाहङबु यिहन म़ेदी तेन्गे। 16 ङाहगी या़हबु लेहङगुगी ताम प्रा साल्ग्यो ल़ेहमुराङ दि केच्या किन्ज्योगी येशू मास्यीका लाहमले, मिहगी राहङ सेम नाहङला साङदे ज़्या़क्योकी तामया़ला ठिम ताङ नाङगे ङ्यिहमाला ओहङज्ये येह। यहूदीया़ दाङ छ्य़े-ठिम 17 यिहॱनाङ ख्ये राहङला यहूदी यिहन म़ेदी छ्य़े-ठिम थो़ला यिह-छ्य़े पेहकें। ओहले ङाह किन्ज्योला ङोह स्य़ेएँ म़ेदी ख्येगी छ्य़ेन्दो तेन्गु दु। 18 किन्ज्योगी च्यि थु-सेम जे नाङगे माएँ ताम ख्येला क्यी़ह येह, ओहले ख्येगी का़हन्दी ल़ेह या़हबु यिहम्बा का़हन्दी चोक्पा यिहम्बा माएँ ताम छ्य़े-ठिम लाहमले लोप्क्यो सोङबे ओ़हदीॱआङ ख्येगी खा फे़ ख़ूएँ, 19 मी़ मेहथोङगेनया़ला ठीकेन्गी मिह दाङ ना़-जुबेला येहकेनया़की येहसेर ङाहराङ यिहन म़ेदी ख्येला तेहम्बाराङ क्यी़ह येह। 20 ओहले ख्येगी उल्दुम्बाया़ला लोप्ताम क्याहप ख़ूएँ ओहले च्यिॱआङ मे़हस्येगेनया़ला लोप्च्युङ तेर ख़ूएँ, च्यिबेमाना ख्येगी छ्य़े-ठिम लाहमले थाम्ज्यी येहन्देन दाङ तेहन्दाम ङोह स्य़े सिहन्दी येह। 21 ता़ह ओ़हठी यिहन्सीमाना ख्येगी लेहमेन मिहया़लाती लोप्कें ओहले च्यि राहङलादी मेहलोप्कें ले? ओहले ख्ये लेहमेनया़लादी कुमेन क्याहप्च्ये मेहयोहङगे म़ेदी लोप्कें, ओहले ख्ये राहङगीदी कुमेन क्याहप्कें? 22 ओहले ख्ये, लेहमेनया़ला छ्येउ-छ्येंमु पेहच्ये मेहयोहङगे म़ेदी माएँ, यिहॱनाङ ख्ये राहङगीदी छ्येउ-छ्येंमु पेहकें? कुला छ्येपा फुल्ज्येला क्युक्टो पेहकेन ख्येगी ता़ह च्यि कुला छ्येपा फुल्दीॱराङ क्युह ज़ोएँ? 23 ख्ये छ्य़े-ठिमकी तेहन्दाला छ्य़ेन्दो तेन्ज्येनी तेन्गु दु यिहॱनाङ च्यि ख्ये, छ्य़े-ठिमॱराङ गोम्दी किन्ज्योला स्ये़हन्डील पेहकें? 24 च्यिबेमाना छ्य़ेला दि ल़ेहमु म़ेदी प्री़हदी येह, “ख्ये यहूदीया़गी पेहतीराङ लेहमेन क्यिहपाकी मिहया़की पाहरक्यीला किन्ज्योकी छेन नोहङदी काहल्दी येह।” 25 का़हलेॱआङ ख्येगी छ्य़े-ठिम ची़सीमाना स्या-ताक पेहक्यो ठाबेराङ यिहम्बा, यिहॱनाङ ख्येगी छ्य़े-ठिम मी़हचीसीमानाती ख्येगी स्या-ताक पेहक्यो यिहॱनाङ ओ़हला च्यिॱआङ ख्येप्साङ म़ेह। 26 का़हलेॱआङ स्या-ताक माहबेबा मिहगी छ्य़े-ठिम ची़सीमाना च्यि खो किन्ज्योकी दिनला स्या-ताक पेहक्यो मिह ङ्याम्बा माहकाहल ले? 27 स्या-ताक माहबेबाया़गी ख्या स्या-ताक पेहक्यो यहूदीया़ला क्येन केन्ज्ये येह च्यिबेमाना ख्या ङ्याम्बु प्रुहक्योकी छ्य़े-ठिम येहकें यिहॱनाङ ख्यागी ओ़ह मा़हची ओहले लेहमेन क्यिहपाकी मिहया़गी स्या-ताक माहबेबा येहकें यिहॱनाङ खुङगी छ्य़े-ठिम ची़सीन। 28 फि ज़ोप्तागी च्यी़राङ यहूदी ज़ोएँया़ तेहन्दामकी यहूदी मिहम्बा। ओ़ह ल़ेहमुराङ पेहती मिहया़ला तेन्ज्येला ज़ुबुला पेहक्योगी स्या-ताकॱआङ ओ़ह तेहन्दामकी स्या-ताक मिहम्बा। 29 नाहङ ज़ोप्तागी च्यी़राङ तेहन्दामकी यहूदी ओहङ ख़ूएँ, ओहले तेहन्दामकी स्या-ताकती सेम नाहङगी ताम यिहम्बा, दि यिहक्तेन ताम यिहम्बा, प्रुहक्यो छ्य़े-ठिमकी ताम मिहम्बा। दि ल़ेहमु मिहला मिहया़गी मिहम्बा किन्ज्योगी च्यी़राङ या़हबु सुङदी क्या़ नाङगे। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.