रोमी 16 - ह्योल्मोरोमला तेहकेन किन्ज्योकी मिहया़ला टास्यी-देले सुङ नाङग्यो 1 ता़ह ङाह ख्याया़ला ओहराङगी आज्यी फिबी ज्यिबुराङ या़हबु येह म़ेदी माउ येहबा। ओ़ह आज्यीदी किंक्रिया क्याहसाकी छेन्छोकला स्याहप्तो स्युहउ येहबा। 2 ओ़ह आज्यीगी मिह माहङबुलाराङ रो़हराम जे-नाङदी येह ओहले ङाहॱलाङ ज्यिबुराङ छ्यिम्बु रो़हराम जे नाङसीन। ओ़ह सोङबे ख्याया़गीॱआङ किन्ज्योकी मिहया़गी ल़ेहमुराङ पेहती चो़वोकी छेनला आज्यीला फेप स्यी़हदोङ ओहले कोम्बु डोएँमु ख्याया़गी ला़ खाएँ थु आज्यीला रो़हरामॱआङ पेहतोङ। 3 मास्यीका येशूकी छ्या़लेला ङाह ङ्याम्बु-ङ्याम्बु ल़ेह पेहकेन प्रिस्का दाङ अकिलासला ङाहती टास्यी-देले येहबा। 4 ङाहला थार च्य़ूज्येला खुङ ङ्यी़ ङाहती तेहन्दाला स्यिज्येलाॱआङ ठाबे काहल्सीन। ओ़ह सोङबे ङाहगी च्यी़राङ मिहम्बा, लेहमेन क्यिहपाकी थाम्ज्यी छेन्छोकया़गीॱआङ खुङया़ला थुज्यी-छ्ये़ फुल्सीन। 5 खुङया़गी खाङबाला छो़गेन छेन्छोकलाॱआङ ङाहगी टास्यी-देले माउ दु म़ेदी म़े तेर। ओहले ङाहगी च्याहम्बु रो़ह इपेनितसॱलाङ ङाहती टास्यी-देले म़े तेर। खो एशिया क्याहल-खाप छ्यिम्बुलाॱराङ तोहङस्यो मास्यीकाला यिह-छ्य़ेक्योकी मिह यिहम्बा। 6 ख्याया़गी तेहन्दाला ज्यिबुराङ कादुप च्येती ल़ेह पेहकेन मरियमलाॱआङ टास्यी-देले म़े तेर। 7 ङाह ङ्याम्बुराङ चोन-खाङला छ्यिक्यो ङाहती यहूदी नो़हया़ एन्ड्रोनिकस दाङ युनियसलाॱआङ टास्यी-देले म़े तेर। (एन्ड्रोनिकस दाङ युनियस ङाहती ङ्येहवाया़ यिहम्बा।) खुङ फे़बेया़की छेन ल़ेह-पेनया़गी पाहरक्यीला ज्यिबुराङ चा़ छ्यिम्बु येहकें ओहले ङाहगी मास्यीकाला यिह छ्य़ेगे म़ेदी तोहङलेराङ खुङ फे़बेया़गी मास्यीकाला यिह-छ्य़े नाङग्यो येहकें। 8 ङाहती च्याहम्बु रो़ह एम्प्लीआतसला टास्यी-देले म़े तेर। खोगी चो़वोला यिह छ्य़ेक्यो सोङबे ङाह खोला निङज्यी पेहकें। 9 मास्यीकाकी छ्या़लेला ङाह ङ्याम्बुराङ ल़ेह पेहकें उर्बानसला टास्यी-देले म़े तेर ओहले ङाहगी च्याहम्बु रो़ह स्ताखुसलाॱआङ टास्यी-देले म़े तेर। 10 मास्यीका ङ्याम्बु येहकें थार्पाकी तेहन्दाला दास्यी तेर्केन अपेल्लेसला टास्यी-देले म़े तेर। अरिस्तोबुलसकी खाङबा म़ेहमे थाम्ज्यीला टास्यी-देले म़े तेर। 11 ङाहती यहूदी नो़ह हेरोदियनला टास्यी-देले म़े तेर। चो़वोला यिह-छ्य़े पेहक्यो नर्किससकी खाङबा मे़हमेया़ला टास्यी-देले म़े तेर। 12 चो़वोकी छ्या़ले जे नाङगे नुहमु त्रुफेना दाङ त्रोफोसाला टास्यी-देले म़े तेर। चो़वोकी तेहन्दाला माहङबुराङ छ्या़ले जे नाङगे ङाहगी च्याहम्बु नुहमु परसीसला टास्यी-देले म़े तेर। 13 चो़वोगी दाम नाङग्यो रुफस दाङ खोगी आमाॱलाङ टास्यी-देले म़े तेर। मोह ङाहती आमा ल़ेहमुराङ यिहन। 14 असिंक्रितस, फ्लेगन, हर्मेस, पत्रोबास, हर्मास दाङ खुङ फे़बे ङ्याम्बु येहकेन्गी आदा नो़हया़ॱलाङ टी़हउ दु म़ेदी सुङ नाङदोङ। 15 फिलोलोगस, युलिया, नेरियस दाङ खोगी नुहमु, ओलिम्पास, ओहले खुङ ङ्याम्बु येहकेन किन्ज्योगी दाम नाङग्योकी मिहया़ थाम्ज्यीॱलाङ टी़हउ दु म़ेदी सुङ नाङदोङ। 16 नाम्पार-ताहक्पा यिहगी च्यी़गी च्यी़ला च्युक पेहतोङ। मास्यीकाकी छेन्छोक थाम्ज्यीगीराङ ख्याला टी़हदी येहबा। ज्युक्स्योलगी लोप्ताम 17 ए ङाहगी आदा-नो़ह दाङ आज्यी-नुहमुया़, ङाह ख्याला ओहर-छ्य़े स्युहउ येह, ख्याया़गी पाहरक्यीला ठू़ च्य़ूदी खा फ़ेदी डो च्य़ूएँगी मिहया़ दाङ यिह छ्य़ेलुला गो़ कोर्केन मिहया़ यिहन्ज्यु जेम्बु पेहतोङ। ख्याया़गी ज़्योरक्यो लोप्च्युङला खुङगी टाह पेहकें। ओ़ह ल़ेहमु मिहया़ ङ्याम्बु च्यामॱराङ माहच्याम। 18 च्यिबेमाना दि ल़ेहमु मिहया़गी मास्यीका ओहराङ चो़वोला स्याहप्तो मी़हस्युहएँ, यिहॱनाङ खुङ राहङदीराङ फोवाकी तेहन्दाला ल़ेह पेहकें। ओहले खुङया़गी ङ्येम्बु-ङ्येम्बु तामया़ म़ेदी ज्याप्ला तेन्दी मिह थेकाया़ला ठाग तीएँ। 19 ख्याया़गी किन्ज्योकी का या़हबु पेहती ची़उ दु माएँ तामनी मिह थाम्ज्यीला क्यी़हराङ येह, दि तामला ङाह ज्यिबुराङ सेम काहसो येह। यिहॱनाङ ङाह ख्याया़गी दि पेहच्यु माएँ सेम्बा येहबा, का़हन्दी या़हबु येहबा, ओ़हगी तेहन्दाला ख्या ख्येम्बा-ताहक्पु डो कोहएँ, ओहले का़हन्दी चोक्पा येहबा ओ़हला ख्या च्यिॱआङ क्येन म़ेहबा ओहङ कोहएँ। 20 स्य़िहदे नाङगेन किन्ज्योगी ग्यो़बाराङ ती़ह गो-छ्येवाला ख्याया़की काङबा चो़ला नेम च्य़ू नाङज्ये येह। ओहराङ चो़वो येशू मास्यीकाकी काटीन ख्या ङ्याम्बु ज़्य़ू नाङज्यु। 21 ङाह ङ्याम्बुराङ ल़ेह पेहकेन्की तिमोथीगी ख्याया़ला टास्यी-देले म़ेदी येह। ओ़हठीॱराङ पेहती ङाहती यहूदी नो़हया़ लुकियस, यासोन दाङ सोसिपात्रोसगीॱआङ ख्याया़ला टास्यी-देले म़ेदी येह। 22 पावलगी तेहन्दाला दि यिहगी प्रुहएँ ङाह तर्तियसगी चो़वोकी छेनला ख्या थाम्ज्यीला टास्यी-देले माउ येह। 23 ङ्यिह तेहकेन खाङबा ताहक्पु गायस ताङ खाङबाला जोम्गेन्गी छो़बाया़गीॱआङ ख्याला टास्यी-देले म़ेदी येह। ओहले दि क्याहसाकी टाङगा चिदुङ ज़्या़गे गोबा नो़ह इरास्तस दाङ क्वार्टसगीॱआङ ख्याया़ला टास्यी-देले ताङदी येह। 24 [ओहराङ चो़वो येशू मास्यीकाकी काटीन ख्या थाम्ज्यी ङ्याम्बु ज़्य़ू नाङज्यु। आमेन।] 25 ओहराङ थाम्ज्यीगीराङ किन्ज्योला थुज्यी-छ्ये़ फुल्दोङ। ङाहगी स्य़ेक्यो या़हबु लेहङगु दाङ मास्यीकाकी तेहन्दाला स्ये़क्योकी केच्याया़ लाहमले मिहरोगी ख्याया़ला राहङदी यिह-छ्य़ेला थिक-चि दाङ सान्दी ज़ो थुप्कें। काल्बा-काल्बा यिहन्ज्यु साङदी ज़्या़ नाङग्योकी केच्या ताहन्दा येशू मास्यीकागी छ्यिसाल-नाहङसाल जेती तेन नाङसीन। 26 यिहॱनाङ ता़ह नाहम्स्यी किन्दु ज़्य़ू नाङगेन्गी किन्ज्योगी का नाङदी लुहङतेम्बाया़गी छ्य़े प्रुह नाङसीन। ओहले दि सुङराप लाहमले थाम्ज्यी क्यिहपाकी मिहया़गी यिह छ्य़ेदी किन्ज्योकी काया़ ची़ज्यु म़ेदी दि साङदी ज़्या़ नाङग्योकी या़हबु लेहङगु क्याहल-खाप थाम्ज्यीला स्येकेराङ येहबा। 27 च्यिमे च्यी़राङ रिहक्स्यी छ्यिम्बु नोम्ग्यो किन्ज्योला येशू मास्यीका लाहमले नाहम्स्यी किन्दुॱराङ ज़िज्यिद ओहङज्यु। आमेन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.