रोमी 12 - ह्योल्मोकिन्ज्योकी सोम्बो मार्च्ये 1 ङाहगी निङज्यी पेहक्योगी आदा-नो़ह दाङ आज्यी-नुहमुया़, किन्ज्योकी थुज्यी माहङबुराङ ख्या थो़ला येहबा। ओ़ह सोङबे राहङगी ज़ुबुला नाम्पार-ताहक्पा दाङ किन्ज्योगी थु-सेम जे नाङगेन्गी सोम्बो मार्च्ये जे़दी किन्ज्योला स्याहप्तो स्य़ूहज्येला मिहरोगी दिनला फुल्दोङ म़ेदी ङाह ख्याया़ला ओहर-छ्य़े स्युहउ येह। ख्यागी यिहगी फुल कोहएँगी तेहन्दामगी मार्च्येॱआङ दिराङ यिहम्बा। 2 ख्या जाम्बुलीङकी मिहया़ला पे त़ेदी खुङ ल़ेहमुराङ पेहच्ये माहछोल, यिहॱनाङ ख्या राहङ सेमला साम्बा काहल्दी सेम तिहङ यिहन्ज्युराङ किन्ज्यो ङो़ले ग्युर्तोङ। ओहले किन्ज्योकी ज़ी़लुला च्यि या़हबु यिहम्बा, च्यि से़हगी किन्ज्योकी थु काहसो ज़ोएँ ओहले किन्ज्योकी याहङ-ताहक्पा थु-सेम च्यि यिहम्बा, ओ़ह ख्याया़गी ङ्याहम च्ये ख़ूज्यु। 3 च्यिबेमाना किन्ज्योगी ङाहला नाङग्यो काटीन लाहमले ख्या थाम्ज्यीला ङाह ओहर-छ्य़े स्युहउ येह, का़हन्दीगी राहङला काहन्डुमु ऩे कोहएँ यिहम्बा ओ़ह म़ेदी ल्हाक्पु मा़हनेज्यु, यिहॱनाङ ख्याला किन्ज्योगी काहजे यिह-छ्य़े नाङग्यो येहबा ओ़हला ते़बेकी साम्लु ताङदोङ। 4 ओहराङगी ज़ुबु च्यी़ला माहङबुराङ ओङबुया़ येहबा यिहॱनाङ खुङया़गी ल़ेहया़ लेहमेन लेहमेनॱराङ येहबा। 5 ओ़हठीॱराङ पेहती ओहराङ माहङबु येहॱनाङ मास्यीकाला ओहराङ ज़ुबु च्यी़राङ यिहन ओहले ओहराङ थाम्ज्यीगी च्यी़गी च्यी़ला स्याहप्तो स्युहएँ। 6 किन्ज्योगी राहङगी काटीनगी जेती ओहराङला लेहमेन लेहमेन काबापया़ नाङदी येह। ओ़ह सोङबे ओहराङगी दि काबापया़ लाहमले किन्ज्योकी छ्या़लेया़ पेह कोहएँ। लुहङदेन स्येकेन्गी काबाप यिहन्सीमाना, राहङगी यिह-छ्य़ेला ते़बे, 7 स्याहप्तो स्युहएँकी काबाप यिहन्सीमाना, स्याहप्तो स्युहएँकी छ्या़लेला, लोप्च्युङ तेर्केन्गी काबाप यिहन्सीमाना लोप्च्युङ तेर्केन्गी छ्या़लेला, 8 लोप्ताम क्याहप्केन्गी काबाप यिहन्सीमाना, लोप्ताम क्याहप्केन्गी छ्या़लेला, तेर्केन्की काबाप यिहन्सीमाना, सेम तिहङ यिहन्ज्युराङ तेर्च्यु, ओङ छ्य़ेगेन्गी काबाप यिहन्सीमाना, खोगी या़हबु पेहती ओङ छ्य़ेज्यु, निङज्यी पेहकेन्की काबाप यिहन्सीमाना, खोगी काहसो पेहती निङज्यी पेहच्यु। 9 ख्याया़गी निङज्यी पेहक्योदी मिहया़ला तेन्ज्येगी तेहन्दाला मिहम्बा यिहॱनाङ ओ़ह निङज्यी तेहन्दाम ओहङ कोहएँ। ल़ेह चोक्पाया़ क्युर्ती या़हबु ल़ेहला स्य़ूहदोङ। 10 यिह छ्य़ेबा काहल्ग्यो सोङबे च्यी़गी च्यी़ला राहङ आदा-नो़हया़ला ल़ेहमुराङ चेवा पेहतोङ ओहले राहङला म़ेदी माहङबु च्यी़गी च्यी़ला ची़नाङ पेहतोङ। 11 ल़ेहमी-लाहम माहबेबा पेहती कादुप च्येती ल़ेह पेहतोङ। यिहला स्युक छ्यिम्बु पेहती चो़वोला स्याहप्तो स्यी़हदोङ। 12 राहङ रेहवाला काहसो पेह, तुहक्पु-तुहङालला ना़स्यीङ छ्यिम्बु पेहतोङ, सोल्वाङ ताप्तेॱराङ तेहतोङ। 13 किन्ज्योगी दाम नाङग्योकी मिहया़ला कोम्बु डोएँमु रो़ह पेहतोङ, ओहले खाङबाला ओहङग्यो टोहम्बोया़ला ता़हनाङ-ताहम्जी पेहतोङ। 14 ख्याला तुहक्पु तेर्केन मिहला मे़मु माहक्याहप, खुङला मेलाम क्याहप्तोङ। 15 क़ेहनाङ पेहकेनया़ ङ्याम्बु क़ेहनाङराङ पेहतोङ, ङुहएँया़ ङ्याम्बु ङी़हदोङ। 16 थाम्ज्यी ङ्याम्बु थिम्बु पेह। ठासक माहतेन, यिहॱनाङ मिह ङ्येम्बुया़ ङ्याम्बु च्याम्दोङ। ओहले ङाहराङ स्य़ेगे यिहन मा़हने। 17 मिहगी ख्येला चोक्पा पेहसीन म़ेदी ख्येगी खोला चोक्पा पेहच्ये माहछोल। मिह थाम्ज्यीगी दिनला च्यि या़हबु येहबा ओ़हला सेम ताङदोङ। 18 ला़ खाजे मिह थाम्ज्यी ङ्याम्बु थिम्बु पेहती तेहतोङ। 19 ङाहगी च्याहम्बु रो़हया़, सु ङ्याम्बुॱआङ नाहमॱआङ स्यिहताङगी क्यिम्बा माहच्याल। यिहॱनाङ दि ल़ेह किन्ज्योकी थुयालला ज़्या़दोङ। च्यिबेमाना, छ्य़ेला दि ल़ेहमु प्री़हदी येहबा, “क्यिम्बा लेहन्गेन्गी ल़ेह ङाहती यिहन, ङाहगीराङ क्यिम्बा लेहन्ज्ये येह।” 20 तोहरोङ, “ख्येती टाह तो़क्यो येहसीमाना खोला साहज्ये तेर, खो कोम्ग्यो येहसीमाना खोला छ्यु तेर। दि ल़ेहमु पेहसीमाना ख्येगी खोती गो़ला मेहबुङ सोज्ये येह।” 21 चोक्पागी ख्येला माहक्याहल्ज्यु यिहॱनाङ या़हबुगी चोक्पाला क्याहल ख़ूज्यु। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.