रोमी 11 - ह्योल्मोइस्राएलीया़ थो़ला किन्ज्योकी काटीन 1 आहन्डा यिहन्सीमानानी ङाहगी टी़हएँ, “च्यि किन्ज्योगी इस्राएलीया़ला क्युर ज़्या़ नाङग्यो यिहम्बा ले? मिहम्बा, च्यिबेमाना ङाह राहङॱआङ अब्राहामकी छार्क्यीन, बेन्यामीन छाङकी इस्राएली यिहम्बा। 2 किन्ज्योगी तोहङलेराङ दाम नाङग्योकी क्यिहपाला क्युर ज़्या़ माहनाङ। सुङरापगी लुहङतेम्बा एलियाकी तेहन्दाला सुङ नाङग्योकी स्याहलनी ख्याया़ला क्यी़हराङ येह। एलियागी इस्राएलीया़ला टाह पेहती किन्ज्योला दि ल़ेहमु माक्यो येहकें, 3 ओ़ चो़वो, खुङया़गी राहङगी लुहङतेम्बाया़ला सेसीन ओहले राहङगी छ्योसोमया़ला रोम तेर्सीन, थारक्योदी ङाह च्यी़राङ यिहन ओहले ङाहॱलाङ सेच्ये म़ेदी खुङया़गी छोल्गेराङ येह।” 4 यिहॱनाङ किन्ज्योगी खोला च्यि ल़ेहन क्याहप नाङबा? “बा़ल ल्हागी दिनला पी़मु मी़हचू़गे तोङरा तिहन मिहला ङाहगी राहङगी तेहन्दाला सी़दे ज़्या़दी येहबा।” 5 दि ल़ेहमुराङ पेहती ताहन्दाॱआङ किन्ज्योकी काटीनगी दाम नाङग्यो लाहला इस्राएलीया़ लिहक्यो येहबा। 6 दि काटीन लाहमले काहल्ग्यो यिहम्बा, ल़ेह पेहती मिहम्बा, मिहन्सीमानानी काटीन काटीनॱराङ ओहङज्ये म़ेहबा येहकें। 7 ओ़हठी यिहन्सीमाना दिगी तेहन्दा च्यि काहल्बा ले? थाम्ज्यी इस्राएलीया़गी राहङगी छोल्ग्यो स़ेह ज्योर मा़हखु यिहॱनाङ ओ़ह स़ेह किन्ज्योगी दाम नाङग्यो ङ्युहङसे़ इस्राएलीया़गी च्यी़राङ ज्योर्सीन। लेहमेन लिहक्यो इस्राएलीया़दी सेम सान्दी पेहती तेहसीन। 8 छ्य़ेला दि ल़ेहमु प्री़हदी येहबा, “किन्ज्योगी खुङला लेम्बा नाम्स्यी नाङसीन। ओहले मे़हथोङगेन्की मी़ दाङ मे़हथे़गेन्की नाम्ज्यो नाङसीन ओहले खुङ ताहन्दा थुराङ ओ़हठीॱराङ येह।” 9 ओ़हठीॱराङ पेहती क्याहल्बु दाऊदगीॱआङ दि ल़ेहमु सुङ नाङदी येह, “खुङगी डेनगी खुङया़लाॱराङ ज़ुङज्यु ओहले मिताला छ्यि च्यू़ज्यु। ओहले ओ़ह डेन नार्तो क्याहप्केन्गी तोह दाङ ङ्य़ेहबा फो़गे स़ेह डोज्यु। 10 खुङया़गी मी़ मे़ह-थोङज्येला स्याहर्ना डोज्यु, ओहले खुङया़गी क्येपा नाहम-मानागी तेहन्दाला कुहर्ती डोज्यु।” 11 ओ़ह सोङबे ङाह माएँ, खुङया़ तोङज्येलाॱराङ नार्तो क्याहप्ती रिहल्ग्यो यिहम्बा ले? ओ़ह ल़ेहमु मिहम्बा। इस्राएलीया़गी किन्ज्योकी का मा़हचीबा सोङबे खुङया़गी ज्योर कोहएँगी थार्पा लेहमेन क्यिहपाकी मिहया़गी ज्योर्सीन। दि थोङदी इस्राएलीया़गी खुङ ङ्याम्बु ठादो पेहच्यु। 12 यिहॱनाङ यहूदीया़गी तिहक्पा पेहक्यो सोङबे जाम्बुलीङला चा़ छ्यिम्बु मेलाम थोप्सीन, ओहले खुङया़ तोरक्यो सोङबे लेहमेन क्यिहपाकी मिहया़गी मेलाम ज्योर्सीन माना यहूदीया़गी किन्ज्योकी का ची़सीमानानी तोहरोङ काहजे छ्यिम्बु मेलाम ज्योर्वा? लेहमेन क्यिहपाकी थार्पा 13 ता़ह ङाह लेहमेन क्यिहपाकी मिहया़ला माएँराङ येह। ङाह लेहमेन क्यिहपाया़की तेहन्दाला दाम्ग्यो मास्यीकाकी ल़ेह-पेन यिहम्बा ओ़ह सोङबे ङाह दि स्याहप्तो स्युहएँ ल़ेहला तेहम्बाराङ चा़ छ्यिम्बु ने़दी ल़ेह पेहकें। 14 दि ल़ेहगी पेहती ङाहती राहङदीराङ क्यिहपाकी मिहया़गीॱआङ ख्या ङ्याम्बु ठादो पेहती लाहला किन्ज्यो ङो़ले ग्युर्के गा यिहम्बानी माएँ ङाहला रेहवा येहबा। 15 च्यिबेमाना किन्ज्योगी इस्राएली क्यिहपाया़ला क्युर ज़्या़ नाङ फान्ज्यो जाम्बुलीङकी मिह किन्ज्यो ङ्याम्बु रो़ह काहल्सीन माना येहपाराङ किन्ज्योगी खुङया़ला राहङदीराङ ज़ो नाङगेमुनी च्यि खुङ स्यिवालेगी मिहली ज़ाङबु ज़्योरक्यो ङ्याम्बा माहकाहल ले? 16 का़हलेॱआङ खुरा ज़ोज्येला च्योप्क्यो चाम्बालेगी बो सिपाज्यी तेन्दीमाराङ तोहङस्यो किन्ज्योला फी़ फुल्सीन माना ओ़ह च्योप्क्यो चाम्बा थाम्ज्यी चाङमा डोएँ। का़हलेॱआङ चार्ङ्यी या़हबु येहसीमाना याहल्गाॱया़ङ या़हबु ओहङगे। 17 ओ़ह ल़ेहमुराङ काहजे याहल्गाया़ छ्या़दी काहल्ग्यो ल़ेहमुराङ काहजे यहूदीया़गीॱआङ किन्ज्योला क्युर ज़्या़दी काहल्सीन। यिहॱनाङ ख्या लेहमेन क्यिहपाकी मिहया़ती रिहगी जैतून तोहङबो यिहन यिहॱनाङ ता़ह ख्या ओ़ह छ्या़दी काहल्ग्यो याहल्गाया़की छापला कलमी काहल्दी येह। ता़ह ख्यागी ओ़ह या़हबु जैतून तोहङबोकी चार्ङ्यीलेगी सेदो दाङ मिहली ज्योर्च्ये येह। 18 ओ़ह सोङबे ओ़ह छ्या़दी काहल्ग्यो याहल्गाया़की तेहन्दाला (इस्राएलीया़गी तेहन्दाला) छ्य़ेन्दो माहतेन। का़हलेॱआङ ख्येगी छ्य़ेन्दो तेनॱराङ तेन्सीन माना, दि ताम टेहम्बा ज़्यो़, चार्ङ्यीला खुर्केन्दीनी ख्या मिहन यिहॱनाङ चार्ङ्यीगी गा ख्याला खुर्के। 19 यिहॱनाङ ख्यागी दि ल़ेहमुज्यीॱआङ मारो, “ङाह ओ़ह या़हबु तोहङबोला कलमी पेहती ताहम ख़ूज्यु म़ेदीराङ ओ़ह याहल्गाया़ला तुप्क्यो यिहम्बा।” 20 दि केच्या तेहन्दामॱआङ यिहन, खुङया़गी यिह मा़हछ्येबा सोङबेॱराङ खुङया़ला तुप्क्यो यिहम्बा, यिहॱनाङ ओ़हगी छापला ख्याया़गी यिह छ्य़ेसीन ओहले किन्ज्योगी ख्याला कलमी जेती ताहम नाङदी येह। दि केच्याला ख्या छ्य़ेन्दो माहतेन, यिहॱनाङ किन्ज्योगी ज्यिक्पा खुर्तोङ। 21 किन्ज्योगी तोहङ यिहन्ज्युराङ येहकेन्गी याहल्गाया़लानी ल़े माहताङ माना ख्याया़ॱलाङ ल़े ताङ नाङज्ये म़ेह। 22 ओ़ह सोङबे किन्ज्योकी निङज्यी दाङ मिहरोकी थु सान्दीला ख्यागी साम्लु ताङदोङ। तोङदी डोएँया़गी तेहन्दाला मिहरोगी राहङगी थु सान्दी जे नाङगे ओहले मिहरोगी निङज्यी चो़ला तेहकेया़लाती मिहरोगी निङज्यी जे नाङगे, मिहन्सीमानानी ख्याया़ॱलाङ तुप्ती क्युर नाङज्ये येह। 23 का़हलेॱआङ इस्राएलीया़गी यिह मा़हछ्येबा पेहती मेहतेहसीमाना किन्ज्योगी खुङला कलमी जेती ताहम नाङज्ये येह। च्यिबेमाना किन्ज्योगी खुङया़ला येहपाराङॱआङ कलमी जेती ताहम नाङ ख़ूएँ। 24 च्यिबेमाना का़हलेॱआङ ख्या पेहताङला ते़बे रिहगी जैतून तोहङबो ल़ेहमुराङ यिहन यिहॱनाङ किन्ज्योगी ओ़ह तोहङबोलेगी याहल्गाया़ तुप्ती नोम फेप्सीन। दि स्यिहङला च्य़ूक्यो या़हबु जैतूनकी तोहङबो ङ्याम्बु मी़हटी़हॱनाङ किन्ज्योगी ओ़ह ङ्याम्बु कलमी जेती थि नाङसीन माना दि याहल्गाया़ राहङदीराङ स्यिहङकी या़हबु जैतूनकी तोहङबोला कलमी जे नाङज्येलानी किन्ज्योला काहजे तेहमु ओहङडो? थाम्ज्यी थो़ला किन्ज्योकी काटीन 25 आदा-नो़ह दाङ आज्यी-नुहमुया़, ख्यागी तिहङ रिहङबु केच्या च्यी़ ङोह स्ये़ज्यु माएँ ङाहती सेम्बा येहबा। ओ़ह ख्याला क्यी़ह ज्योर्सीन माना ख्यागी राहङगी तेहन्दाला छ्य़ेन्दो तेन्ज्ये म़ेह। दि तिहङ रिहङबु केच्या दि ल़ेहमु येहबा, ओहङ कोहएँगी लेहमेन क्यिहपाकी मिहया़ मास्यीकाला माहयोहङ थु च्यी़राङ इस्राएलीया़गी यिह सान्दी ओहङज्ये येह। 26 दि ल़ेहमु पेहती थाम्ज्यी इस्राएलीया़गी थार्पा थोप्च्ये येह, दिगी तेहन्दाला छ्य़ेला दि ल़ेहमु प्री़हदी येहबा: थार्पा नाङगेन्दी सियोन लाहमले फेप नाङज्ये येह, याकूबकी क्यिहया़ला ल़ेह चोक्पालेगी सेम ग्युर च्य़ू नाङज्ये येह। 27 ओहले चो़वोगी सुङ नाङगे, “दि खुङया़ ङ्याम्बु ङाहती ताहम्ज्या यिहम्बा, ओहले ङाह खुङया़गी तिहक्पा ता़ह च्य़ूज्ये येह।” 28 च्यिबेमाना खुङया़गी या़हबु लेहङगुला यिह मा़हछ्येबा सोङबेॱराङ खुङ ख्याया़गी तेहन्दाला किन्ज्योकी टाहया़ काहल्सीन, यिहॱनाङ किन्ज्यो राहङगीराङ खुङया़ला दाम नाङग्यो सोङबे ओहले खुङया़दी चावाया़की तेहन्दागी पेहती खुङया़ किन्ज्योगी च्य़ेबुया़ यिहन। 29 च्यिबेमाना किन्ज्यो राहङगी नाङग्यो काबापया़ नाहमॱआङ लो़दी नोम मेहनाङगे ओहले क़े क्याहप नाङग्योया़ला नाहमॱआङ क्युर ज़्या़ मेहनाङगे। 30 तोहङले ख्याया़ॱआङ लेहमा च्यी़ किन्ज्योकी काया़ मिहची़उ येहकें यिहॱनाङ ताहन्दा इस्राएलीया़गी किन्ज्योकी का मा़हचीबा सोङबे च्यी़राङ किन्ज्योगी ख्याया़ला थुज्यी ज़ी़ नाङसीन। 31 ख्याया़ला थुज्यी ज़ी़ नाङग्यो सोङबे खुङया़गीॱआङ किन्ज्योकी थुज्यी ज्योर ख़ूज्यु म़ेदी खुङ ताहन्दा का मी़हचीगेन काहल्दी येह। 32 च्यिबेमाना किन्ज्योकी थुज्यी मिह थाम्ज्यीला ज़ी़ थोप्च्यु म़ेदीराङ मिहरोगी थाम्ज्यीला का ची़ मी़हखुएँ योक्पु ज़ो नाङसीन। त़ेरा तेच्या फुल्गेन्गी छ्ये़-लु 33 ओहो! किन्ज्योकी क्युह, रिहक्स्यी दाङ येहन्देन काहजे तिहङ रिहङबु! मिहरोगी ठिम ताङ नाङगेन्गी केच्याया़ सुगी ह्अ कोह ख़ूज्ये? ओहले मिहरोगी फेप-लाहम सुगी ङोह स्य़े ख़ूज्ये? 34 “च्यिबेमाना चो़वोकी थुला सुगी ङोह स्य़ेदी येहबा ले? ओहले मिहरोला सुगी लोप्ताम क्याहप ख़ूएँ ले?” 35 सुगी किन्ज्योला च्यिरा तेर खू़दी येहबा ले? ओहले किन्ज्योगी सुला च्यिरा लो़दी नाङ कोहज्ये येहबा ले? 36 च्यिबेमाना ना थाम्ज्यी मिहरोगीॱराङ छ्या़ च्य़ू नाङग्यो यिहन ओहले ओ़ह थाम्ज्यी मिहरो लाहमले ओहले मिहरोगी तेहन्दालाराङ यिहन। मिहरोला नाहम्स्यी किन्दुॱराङ ज़िज्यिद ओहङज्यु! आमेन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.