ज्याल्गा 9 - ह्योल्मो1 दि तिङले स्यिहङगामकी स्याहप्च्यी ङाबागी राहङ ङ्याम्बु येहकेन्की रोहवा-लीङ फुसीन ओहले ङाहगी नामले माहर कार्मा च्यी़ जाम्बुलीङला ताहप्क्यो थोङसीन। ओ़ह कार्माला साप्स्यी तिहङगी दिमी नाङग्यो येहकें। 2 ओ़ह कार्मागी साप्स्यी तिहङ खा फ़ेसीन ओहले ज्यिबुराङ छ्यिम्बु मेहबुङ नाहङले थेन्ग्योकी तिहपा ल़ेहमु ओ़ह साप्स्यी तिहङले तिहपा थेन्सीन। ओहले ओ़ह तिहपागी पेहती ङ्यिहमा दाङ ल्हा़बा ना़-जुबे काहल्सीन। 3 ओ़ह तिहपा नाहङले पे़बेया़ जाम्बुलीङला थेन्दी ओहङसीन ओहले खुङया़ला तिहक्पा-राचाकी ल़ेहमु आ़ ताप्केन्गी ओङ तेर्ते येहकें। 4 ओहले जाम्बुलीङला येहकेन्की चा़ दाङ तोहङबोया़ला च्यी़ॱआङ ऩे माहक्याल, यिहॱनाङ प्रालाला किन्ज्योकी थे़जी माहक्याहपकी मिहया़ला च्यी़राङ ने क्याल्दोङ म़ेदी का नाङसीन। 5 ओ़ह मिहया़ला सेच्येनी माहसे, यिहॱनाङ दावा ङा थु छे-मे़हबा तुहक्पु तेर म़ेदीमाॱराङ पे़बेया़ला ओङ नाङसीन। ओ़ह ल़ेहमु पेहते तुहक्पु तेर्केमु ओ़ह मिहया़ला तिहक्पा-राचागी आ़ ताप्क्यो ल़ेहमु सुह क्याहप्को येहकें। 6 ओ़ह दावा ङाला मिहया़ स्यिज्ये छोल्ज्ये येह यिहॱनाङ स्यि ङ्युहङज्ये म़ेह। खुङया़ स्यिज्ये छोल्गेन यिहॱनाङ स्यिवादी खुङया़लेगी प्रे़हज्ये येह। 7 ओ़ह पे़बेया़ मा़ क्याहप डोज्येला ठाबे पेहती ज़्या़क्योकी ताबुया़ ल़ेहमु थोङगो येहकें। खुङया़की गो़ला सेरकी पेस्यो ल़ेहमु च्यिरा थोङगो येहकें ओहले खुङगी तोहङबादी मिहगी तोहङबा ल़ेहमुराङ येहकें। 8 खुङया़की टा पी़हमी-पेहजागी टा ल़ेहमु ओहले खुङया़की सोदी सिङग्यीया़दी ल़ेहमु येहकें। 9 खुङया़की प्राहङगो च्या़गी ठाबया़ ल़ेहमु थोङगेन से़हया़गी उप्ते येहकें ओहले खुङया़की स्योक्पागी क़ेदी मा़ क्याहप्के ग्या़ला छ्योङगेन्गी माहङबुराङ कोरखाङया़ दाङ ताबुया़गी स्यिङता-खोर्लोया़की क़े ल़ेहमुराङ येहकें। 10 खुङया़गी ङामादी तिहक्पा-राचादी ल़ेहमुराङ येहकें, ओहले दावा ङा थु मिहया़ला सू़ह क्याहप च्य़ूगेन्गी स्युक खुङया़गी ङामाला येहकें। 11 साप्स्यी तिहङकी स्यिहङगामकी स्याहप्च्यीदी खुङया़गी क्याहल्बु येहकें। हिब्रू तामला खोगी मिहन “एबाड्डोन” दाङ ग्रीक तामला “अपोल्लियोन” यिहन्गे। दिगी तेहन्दा “तोङ च्य़ूगेन” म़ेदी माक्यो यिहम्बा। 12 तोहङस्यो ज्यिक्पा काहल सिहन्सीन। तोहरोङॱआङ ज्यिक्पा ङ्यी़ ओहङज्येला खादीॱराङ येह। 13 दि तिङले टुहपा स्यिहङगामकी स्याहप्च्यीगी राहङ ङ्याम्बु येहकेन्की रोहवा-लीङ फुसीन ओहले किन्ज्यो दिनला येहकेन्की सेरकी छ्येकाङ छ्यो़ ज़्यिगालेराङ सुङ के़ज्यी तेन्गेन ङाहगी थ़ेसीन। 14 दि सुङ-क़े टुहपागी स्यिहङगामकी स्याहप्च्यीला दि ल़ेहमु सुङग्यो ङाहगी थ़ेसीन, “यूफ्रेटिस माएँगी चाङबु छ्यिम्बुला ताहम ज़्या़क्योगी स्यिहङगामकी स्याहप्च्यी ज़्यिला ताङ तेर।” 15 ओहले ओ़ह स्यिहङगामकी स्याहप्च्यी ज़्यिला ताङ तेर्सीन, खुङला जाम्बुलीङगी मिह क्यिहपाकी बो सुमला बो च्यी़ तोङ च्य़ूज्येला ओ़ह ती़हजी, ओ़ह ङ्यिहमा, ओ़ह दावा दाङ ओ़ह लो़हकी तेहन्दाला ठाबे पेहते ज़्या़क्यो येहकें। 16 ओ़हला तुहङग्युर खाल च्यी़ ताबु स्येहन्गेन्गी मिहया़ येहकें म़ेदी माक्यो ङाहगी थ़ेसीन। 17 ङाहगी ज्याल्गाला थोङग्योकी ताबु दाङ ताबु थो़ला स्येहन्गेन्गी मिहया़ दि ल़ेहमु येहकें: खुङ प्राहङगोला येहकेन्गी ठाबया़ मेह ल़ेहमु माहर्मु, ओहले नीलम ल़ेहमु थीङ्गा ओहले मेहलो ल़ेहमु सेर्पु येहकें। ताबुया़की गो़ सिङग्यीकी गो़ ल़ेहमु येहकें ओहले खुङया़की खाले मेह, तिहपा दाङ मेहलो थेन्गो येहकें। 18 जाम्बुलीङकी मिहया़ला बो सुमला बो च्यी़ याहमगी सेसीन। ओ़ह याहमदी ताबु खाले थेन्ग्योगी मेह, तिहपा दाङ मेहलो येहकें। 19 च्यिबेमाना ओ़ह ताबुकी खा दाङ ङामाॱलाङ सेकेंन्की ओङ येहकें। खुङया़की ङामा तू़हगी काहङग्यो प्रुहलकी गो़ ल़ेहमु येहकें ओहले ओ़ह ङामादी मिहया़ला ने क्याल्ज्येला याप्को येहकें। 20 दि याहमगी पेहतीॱआङ मा़हस्यीबा बाँकी मिहया़गी राहङ लाहक्पागी ल़ेहया़ लाहमलेॱआङ स्या़बा माहन्डुप। खुङया़गी ल्हेन्डीया़ला ओहले थोङ मी़हखुएँ, थ़े मी़हखुएँ दाङ डो मी़हखुएँ सेर, ङुल, पित्तल, तोह दाङ स्यिङकी कुया़ला छ्येपा फुल्ज्ये माहक्युर। 21 ओहले खुङ मिह सेकेन, ङ्येहन पेहकेन, छ्येउ-छ्येंमु पेहकेन ओहले कुमेन क्याहप्केन ल़ेहया़लेगी स्या़बा माहन्डुप। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.