ज्याल्गा 7 - ह्योल्मोबुम च्यी़ दाङ तोङरा ज़्यिप-च्यु ज़्यि थो़ला थे़जी क्याहप्क्यो 1 दि तिङले जाम्बुलीङला, छो-क्याहम्जोला ओहले का़हन्दीॱआङ तोहङबोया़ला ल्हा़बा लुङजी माह-क्याहप्च्यु म़ेदी स्यिहङगामकी स्याहप्च्यी ज़्यिगी जाम्बुलीङकी छ्यो़ ज़्यिगी ल्हा़बाला का़दी जाम्बुलीङकी छ्यो़ ज़्यिला लाहङदी तेहक्यो ङाहगी थोङसीन। 2 ओहजेला सोम्बो ज़्य़ू नाङगेन किन्ज्योकी थे़जी नोम्दी स्यिहङगामकी स्याहप्च्यी च्यी़ स्यार ङो़ले याहर जा़गेॱराङ जेक्यो ङाहगी थोङसीन। जाम्बुलीङ दाङ छो-क्याहम्जोला नोम्गेन्गी ओङ ज़्योरक्यो स्यिहङगामकी स्याहप्च्यी ज़्यिला खोगी क़े छ्यिम्बु तेन्दी दि ल़ेहमु सुङ नाङसीन, 3 “किन्ज्योला स्याहप्तो स्युहएँगी मिहया़की प्रालाला ङ्यिहगी थे़जी माहक्याहप थु जाम्बुलीङ, छो-क्याहम्जो दाङ तोहङबोया़ला च्यिॱआङ ऩे माहक्याल।” 4 ओहजेला ङाहगी थे़जी क्याहप्क्यो मिहया़गी टाहङजी थ़ेसीन। खुङ बुम च्यी़ दाङ तोङरा ज़्यिप-च्यु ज़्यि येहकें, ओहले खुङ इस्राएली क्यिहपाकी छाङ च्यिङ्यी़ नाहङलेगी यिहन्गे। 5 यहूदा छाङलेगी ॱठि च्यी़ दाङ तोङरा ङ्यी़ला थे़जी क्याहप्क्यो येहकें, रुबेन छाङलेगी ॱठि च्यी़ दाङ तोङरा ङ्यी़ला, गादकी छाङलेगी ॱठि च्यी़ दाङ तोङरा ङ्यी़ला 6 आशेरकी छाङलेगी ॱठि च्यी़ दाङ तोङरा ङ्यी़ला नप्तालीकी छाङलेगी ॱठि च्यी़ दाङ तोङरा ङ्यी़ला मनश्शेकी छाङलेगी ॱठि च्यी़ दाङ तोङरा ङ्यी़ला 7 शिमियोनकी छाङलेगी ॱठि च्यी़ दाङ तोङरा ङ्यी़ला लेवीकी छाङलेगी ॱठि च्यी़ दाङ तोङरा ङ्यी़ला इस्साखारकी छाङलेगी ॱठि च्यी़ दाङ तोङरा ङ्यी़ला 8 जबूलूनकी छाङलेगी ॱठि च्यी़ दाङ तोङरा ङ्यी़ला योसेफकी छाङलेगी ॱठि च्यी़ दाङ तोङरा ङ्यी़ला बिन्यामीनकी छाङलेगी ॱठि च्यी़ दाङ तोङरा ङ्यी़ला थे़जी क्याहप्क्यो येहकें। काप्च्या कार्पु केहन्ग्योकी मिह मिह-माहङ 9 ओ़ह तिङले ङाहगी तासीन ओहले सुगीॱआङ टाहङजी क्याहपॱराङ मी़हखुएँ मिह मिह-माहङ छ्यिम्बुच्यी थोङसीन। खुङ रेबेॱराङ क्यिहपा, छाङ, मिहया़ ओहले लेहमेन लेहमेन ताम माएँ मिहया़लेगी ओहङग्यो येहकें। खुङ काप्च्या कार्पु केहन्दी लाहक्पाला खजूर तोहङबोकी याहल्गा थो़दी ज़्य़ू-ठि दाङ ल़ूह स्ये़बुकी दिनला लाहङदी तेहक्यो येहकें। 10 खुङया़गी क़े छ्यिम्बु तेन्दी दि ल़ेहमु मासीन: “ज़्य़ू-ठिला ज़्य़ू नाङगे ओहराङ किन्ज्यो दाङ ल़ूह स्ये़बुला़ॱराङ थार्पा येहबा।” 11 ओहले ज़्य़ू-ठि, छ्य़ेकी खेम्बुया़ ओहले सोम्बो सेम्ज्येन ज़्यिगी कोर-क्यिहलेॱराङ थाम्ज्यी स्यिहङगामकी स्याहप्च्यीया़ लाहङदी तेहक्यो येहकें, ओहले खुङ ज़्य़ू-ठिकी दिनला खेप्चु क्याहप्ती दि ल़ेहमु माएँराङ किन्ज्योला छ्या़ छाल्सीन। 12 “आमेन। ओहराङ किन्ज्योला त़ेरा, ज़िज्यिद, रिहक्स्यी, थुज्यी-छ्ये़, चा़, स्युक, ओङ नाहम्स्यी किन्दु ओहङज्यु। आमेन!” 13 छ्य़े-ठिमकी लोबेन च्यी़गी ङाहला टी़हसीन, “दि काप्च्या कार्पु केहन्ग्यो मिहया़ सु यिहम्बा ओहले का़हले ओहङग्यो यिहम्बा?” 14 ओहले ङाहगी खोला मासीन, “लाहसो, ङाहला क्यी़ह म़ेह लाह। ओ़हनी राहङगीराङ ङोह ख्येन नाङगे।” ओहले खोगी ङाहला मासीन, “खुङ तुहक्पु छ्यिम्बु ना़दे ओहङग्योगी मिहया़ यिहम्बा ओहले खुङगी राहङ-राहङगी काप्च्याया़ ल़ूह स्ये़बुकी ठा़गी ठी़दी कार्पु जे़दी येह।” 15 ओ़ह सोङबे खुङ किन्ज्योकी कुम्देनला येह ओहले खुङगी ङ्यिहन-नुहप किन्ज्योकी नाम्पार-ताहक्पा छ्योखाङला मिहरोला स्याहप्तो स्युहएँ। ओहले ज़्य़ू-ठिला ज़्य़ू नाङगेन्दी खुङया़गी पाहरक्यीला ज्यू़दे खुङया़ला जेम्बु जेती ज़्या़ नाङज्ये येह। 16 “खुङ नाहमॱआङ तो़ज्ये म़ेह ओहले कोम्ज्ये म़ेह, ओहले ङ्यिहमा दाङ का़हन्दीॱआङ टे़ह छान्दी से़हया़गी खुङया़ला छी़ज्ये म़ेह। 17 च्यिबेमाना ज़्य़ू-ठिकी पाहरक्यीला ज़्य़ू नाङगेन ल़ूह स्ये़बु खुङया़गी कोहरोवा ओहङज्ये येह, ओहले खुङया़ला ठिती छ्यु क्येज्यु थु नोम फेप नाङज्ये येह ओहले किन्ज्योगी खुङगी मी़गी मिज्यु थाम्ज्यीराङ फी़ नाङज्ये येह।” |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.