ज्याल्गा 6 - ह्योल्मोथे़जीया़ रोप्क्यो 1 दि तिङले ल़ूह स्ये़बुगी थे़जी तिहन नाहङले तोहङस्यो थे़जीला खा फे़ नाङग्यो ङाहगी थोङसीन, ओहजेला सोम्बो सेम्ज्येन ज़्यि नाहङले च्यी़गी नाम क़े तेन्गे ल़ेहमुराङ क़े छ्यिम्बुच्यी तेन्दी “स्यो!” माएँदी ङाहगी थ़ेसीन। 2 ओहले ङाहगी दिनला ताबु कार्पु च्यी़ थोङसीन, ओहले ओ़ह थो़ला स्येहन्ग्यो मिहगी दा च्यी़ थो़क्यो येहकें, ओहले खोला पेस्यो च्यी़ नाङग्यो येहकें ओहले खो लेहमेनया़ला क्याहल्गेॱराङ क्याहल्ज्येगी तेहन्दाला थेन्दी काहल्सीन। 3 ओ़ह तिङले ल़ूह स्ये़बुगी ङ्यिपा थे़जी खा फे़ नाङसीन ओहले ङ्यिपा सोम्बो सेम्ज्येनगी “स्यो” माएँदी ङाहगी थ़ेसीन। 4 ओहले ताबु माहर्मु च्यी़ फिला थेन्दी ओहङसीन ओहले मिहया़गी च्यी़गी च्यी़ला से-से तुप-तुप पेहती जाम्बुलीङला सेम लो तेहमु माहयोहङज्यु म़ेदी ओ़ह ताबु माहर्मु थो़ला स्येहन्ग्यो मिहला ओङ नाङदी येहकें। खोला पादाङ छ्यिम्बुज्यीॱआङ नाङग्यो येहकें। 5 ओ़ह तिङले ल़ूह स्ये़बुगी सुम्बा थे़जी खा फे़ नाङसीन ओहले सुम्बा सोम्बो सेम्ज्येनगी “स्यो!” माक्योदी ङाहगी थ़ेसीन। ङाहगी ताबु नाहक्पुज्यी थोङसीन। ओ़ह ताबु नाहक्पु थो़ला स्येहन्ग्यो मिहगी लाहक्पाला उमाली च्यी़ येहकें। 6 ओ़ह सेम्ज्येन ज़्यि पाहरक्यीले क़े च्यी़गी दि ल़ेहमु माक्यो ङाहगी थ़ेसीन, “ङ्यिहमा काहङगी ल़ेगाला ने़ह माना ङ्यी़ क्यिनी जौ माना ट़ूह ज्योर ख़ूएँ यिहॱनाङ जैतूनकी नुम दाङ कुहन्डुमकी-निङगुला थोरो डो मा़हच्यु।” 7 ओहले ल़ूह स्ये़बुगी ज़्यिबा थे़जी खा फे़ नाङसीन ओहले ज़्यिबा सोम्बो सेम्ज्येनगी “स्यो!” माक्योदी ङाहगी थ़ेसीन। 8 ओहले ङाहगी सेर-हुर ताबु च्यी़ थोङसीन, ओहले ओ़ह थो़ला स्येहन्ग्योकी मिहन “स्यिजा” येहकें ओहले “साप्स्यी तिहङदी” खोगी तिङदा तिङ ताहदा क्याहप्को येहकें। ओहले जाम्बुलीङकी मिह बो ज़्यिला बो च्यी़ पादाङ, मुहयी, याहम, दाङ रिहदाया़लेगी सेकेन्गी ओङ खुङया़ला नाङग्यो येहकें। 9 ओ़ह तिङले ल़ूह स्ये़बुगी ङाबा थे़जी खा फे़ नाङसीन ओहजेला किन्ज्योकी सुङ स्येक्यो दाङ मिहरोगी तेहन्दाला तेहम्बा-तेहन्सुम पाङबु तेहक्यो सोङबे मिहया़गी सेक्यो यिह-छ्य़ेबाकी नाम्स्यीया़ ङाहगी छ्येकाङ चो़ला थोङसीन। 10 ओहले खुङया़गी दि ल़ेहमु म़ेदी क़े छ्यिम्बु तेन्सीन, “ओ़ नाम्पार-ताहक्पा, तेहन्दाम दाङ ओङज्या छ्यिम्बु नोम नाङगेन्गी चो़वो छ्येवा! ङ्यिहला सेक्यो सोङबे जाम्बुलीङकी मिहया़ला नाहम थु ठिम ताङदे ङ्य़ेहबा काल नाङगे?” 11 खुङ ऱेह-ऱेहला काप्च्या कार्पु च्यी़ नाङसीन, ओहले खुङया़ला दि ल़ेहमु सुङ नाङसीन, “ख्या ङ्याम्बुराङ ल़ेह पेहकेन्गी ख्यागी रो़ह दाङ नो़हया़ला ख्याया़ला ल़ेहमुराङ पेहती माहसे थु ख्या तोहरोङॱआङ तोबा थु थाङ से़दोङ।” 12 ओहले ल़ूह स्ये़बुगी टुहपा थे़जी खा फे़ नाङसीन। ओहजेला ङाहगी साङगुल स्युक छ्यिम्बुच्यी काहल्ग्यो थोङसीन। ओहले ङ्यिहमा फाजी ल़ेहमु नाहक्पु काहल्सीन, छ़ेबा च्य़ेङागी दायुम ठा़ ल़ेहमुराङ माहर्मु काहल्सीन। 13 ओहले ल्हा़बा लुङजीगी को़स्यीङ तोहङबो युङगेमु मा़हछेबागी को़स्यीङया़ प्रुहप्कें ल़ेहमुराङ नामगी कार्माया़ जाम्बुलीङला ताहप्सीन। 14 को़बाला प्रुहक्योकी छ्य़े टिहल्मा ल़ेहमुराङ टिहल्दी नाम तोर्ती काहल्सीन ओहले थाम्ज्यी छोलिङ दाङ लाहया़ खुङ राहङ-राहङगी ग्या़लेगी तोर्ती काहल्सीन। 15 ओहले जाम्बुलीङकी क्याहल्बुया़, ओङ छ्य़ेगेया़, गो़ छ्येस्यो माक्मीया़, छ्युक्पु मिहया़, स्युक छ्यिम्बु मिहया़, रेबेॱराङ योक्पुया़ ओहले राहङवाङ मिहया़ लाहगी फुक्पाया़ दाङ तोह-पा़राया़ चो़ला यिहप्सीन। 16 खुङया़गी लाहया़ दाङ तोह-पा़राया़ला मासीन, “ङ्यिह थो़ला रोहम स्यो, ओहले ज़्य़ू-ठिला ज़्य़ू नाङगेन्गी स्याहल्दोङ दाङ ल़ूह स्ये़बुकी थुयाललेगी ङ्यिहला पे़ह नाङदोङ, 17 च्यिबेमाना ता़ह मिहरोया़की थुयाल बाप ओहङगेन्गी ङ्यिहमा छ्यिम्बु ओहङ सिहन्दी येह, ओहले ओ़ह थुयालगी दिनला सु लाहङ खू़रो?” |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.