ज्याल्गा 5 - ह्योल्मोटिल्दी ज़्या़क्योगी पेज्या दाङ ल़ूह स्ये़बु 1 ज़्य़ू-ठिला ज़्य़ू नाङगेन्दीती योबा छ्या़ला ङाहगी छ्य़े टिहल्मा च्यी़ थोङसीन। ओ़ह छ्य़े टिहल्माला लेहप ङ्यिकाराङ ङो़ले यिहगी प्रुहक्यो येहकें, ओ़ह छ्य़ेला थे़जी तिहन थाल क्याहप्ती ज़्या़ नाङग्यो येहकें। 2 ओहले स्युक छ्यिम्बु स्यिहङगामकी स्याहप्च्यी च्यी़ला क़े छ्यिम्बुच्यीगी दि ल़ेहमु सुङगेनॱराङ जेक्यो ङाहगी थोङसीन, “दि टिहल्दी थे़जी क्याहप्क्योगी यिहगी खा फ़ेज्ये सी़हज्ये सु येहबा?” 3 यिहॱनाङ स्यिहङगामला, जाम्बुलीङला ओहले साप्स्यी तिहङला दि टिहल्दी ज़्या़क्यो को़बाकी यिहगी खा फ़ेदी नाहङला ता ख़ूएँदी सुॱआङ म़ेहबा येहकें। 4 ओ़ह को़बाला प्रुहक्योगी यिहगी खा फ़ेदी ताज्येला सी़हएँदी सुज्यीॱआङ म़ेहबा सोङबे ङाह ज्यिबुराङ ङुहसीन। 5 ओहले छ्य़ेकी खेम्बु च्यी़गी ङाहला मासीन, “माहङुह! त़ेदोङ, यहूदा छाङकी सिङग्यी दाऊदकी चावागी दि छ्य़े टिहल्मा दाङ दि थे़जी तिहन खा फे़ज्येला क्याहल नाङदी येहबा।” 6 ओ़ह तिङले सोम्बो सेम्ज्येन ज़्यि दाङ टाहङबु छ्य़े-ठिमकी लोबेनया़गी ति-खिरे कोर्ते ज़्य़ूक्यो ओ़ह ज़्य़ू-ठिकी पाहरक्यीला ल़ूह स्ये़बु च्यी़ ज़्याङदी ज़्य़ूक्यो थोङसीन। दि ल़ूह स्ये़बुदी सेत्ती ज़्या़क्यो ल़ेहमु थोङगो येहकें। मिहरोगी रोहवा तिहन दाङ मी़ॱआङ तिहन येहकें ओ़हदी जाम्बुलीङ थाम्ज्यीला ताङग्योगी किन्ज्योगी थु तिहन यिहन्गे। 7 ल़ूह स्ये़बु तोहङले फेप्ते ज़्य़ू-ठिला ज़्य़ू नाङग्योकी योबा छ्या़ लाहमले ओ़ह स्युगुकी टिहल्मा ल़ेहन नाङसीन। 8 ओ़हजेलाराङ सोम्बो सेम्ज्येन ज़्यि दाङ टाहङबु छ्य़े-ठिम ताङगे लोबेन खाल च्यी़ ज़्यिगी ल़ूह स्ये़बुकी कुम्देनला छ्या़ छाल्सीन। ओहले खुङ रे़ह-रे़हगी लाहक्पाला वीणा दाङ टिहमा स्यिहम्बु स्युक्पागी काहङग्यो सेरकी साङबुर येहकें। ओ़ह स्युक्पाकी टिहस्यिहमदी किन्ज्योला स्याहप्तो स्युहएँया़गी ओहर-छ्य़े स्य़ूहक्योकी सोल्वाङया़ यिहम्बा। 9 खुङया़गी दि ल़ेहमु म़ेदी लु साम्बा च्यी़ लेहन्सीन, “दि स्युगु टिहल्मा लेहन्ज्ये दाङ दि थे़जी रोप्ती खा फे़ज्येला राहङज्यीॱराङ सी़हज्ये येह च्यिबेमाना राहङला मिहया़गी सेसीन ओहले राहङ ठा़गी थाम्ज्यी क्यिहपा, ताम, लुहङबा दाङ जाम्बुलीङगी मिहया़ला किन्ज्योगी तेहन्दाला ङ्योह नाङसीन। 10 ओ़ह लाहमले ओहराङ किन्ज्योला स्याहप्तो स्युहज्येला पूजाहारीगी क्याहल्सी च्यी़ ज़ो नाङसीन ओहले खुङया़गी जाम्बुलीङ थो़ला ओङ छ्य़ेज्ये येह।” 11 येहपाराङ ङाहगी तासीन ओहले ठि-बुम म़ेदीॱआङ माहङबु स्यिहङगामकी स्याहप्च्यीया़गी छ्ये़-लु लेहन्ग्यो ङाहगी थ़ेसीन। 12 खुङ ज़्य़ू-ठि, सोम्बो सेम्ज्येन ज़्यि दाङ छ्य़े-ठिमकी लोबेनया़गी कोर ग्यिले लाहङदे छ्ये़-लु लेहन्गेनॱराङ येहकें: “राहङला मिहया़गी सेक्योगी ल़ूह स्ये़बु वाङज्या, क्युह, स्युक, चा, ची़नाङ दाङ क्याहल्स्यो-क्याहल्स्यो नोम्ज्ये सी़हज्ये येह।” 13 स्यिहङगाम, जाम्बुलीङ, साप्स्यी तिहङ दाङ छो-क्याहम्जोला येहकेन रेबेॱराङ सेम्ज्येनया़गी दि छ्ये़-लु लेहन्गेनॱराङ पेहक्यो ङाहगी थ़ेसीन, “ज़्य़ू-ठिला ज़्य़ू नाङगेन दाङ ल़ूह स्ये़बुला नाहम्स्यी किन्दु क्याहल्स्यो-क्याहल्स्यो, ची़नाङ, चा दाङ वाङज्या ओहङज्यु!” 14 ओहले ओ़ह सोम्बो सेम्ज्येन ज़्यिगी, “आमेन” म़ेदी ल़ेहन क्याहप्सीन ओहले छ्य़े-ठिमकी लोबेनया़गी छ्या़ छाल्गेनॱराङ त़ेरा तेच्या फुल्सीन! |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.