ज्याल्गा 4 - ह्योल्मोस्यिहङगामला त़ेरा तेच्या 1 दि तिङले ङाहगी तासीन, ओहले स्यिहङगामला खा फे़क्यो कोह च्यी़ थोङसीन। ङाहगी तोहङले थे़क्यो क़ेदी रोहवा-लीङगी क़े ल़ेहमु येहकें ओहले ओ़ह क़े लाहमलेॱराङ ङाह ङ्याम्बु दि ल़ेहमु जेती स्याहल सुङ नाङगेराङ येहकें, “याहर जा़दे स्यो ओहले दि तिङले ओहङगेन्गी केच्याया़ ङाहगी ख्येला तेन्ज्ये येह।” 2 ओ़हजेलाराङ ङाह थो़ला थु फेप नाङसीन। ओहले स्यिहङगामला ज़्य़ू-ठि च्यी़ ज़्या़दी येहकें ओहले ओ़ह ज़्य़ू-ठिला ङाहगी मेहन्दा च्यी़ ज़्य़ू नाङग्यो थोङसीन। 3 मिहरोगी स्याहल्दोङ बिल्लौर दाङ माहर्मु मणि ल़ेहमुराङ येहकें ओहले ज़्य़ू-ठिकी कोर-क्यिहलेॱराङ युङ ल़ेहमु ज़ा येहकें। 4 ओ़ह ज़्य़ू-ठिकी कोर-क्यिहले लेहमेन ङ्यिहस्यु िज़्य ज्यू़-ठिया़ येहकें, ओहले ओ़ह ज्यू़-ठिया़ला सेरकी पेस्यो दाङ नाहम्सा कार्पु नोम्ग्यो ङ्यिहस्यु िज़्य छ्य़े-ठिमकी लोबेनया़ ज़्य़ू नाङग्यो ङाहगी थोङसीन। 5 ओ़ह ज़्य़ूॱठिलेगी चिलाम ल़ेहमु येहपा छ्या़उ येहकें ओहले दिर्ती नाम क़े तेन्गेन ल़ेहमु क़ेया़ थेन्दी ओहङगो येहकें, ओहले ओ़ह ज़्य़ू-ठिकी दिनला मेहगी लो तिहन थाल ती़हदी तेहक्यो येहकें। ओ़हदी किन्ज्योकी थु तिहन यिहन्गे। 6 ज़्य़ू-ठिकी दिनला फार्केन-छुर्केन थोङगेन्गी स्येलकी छो-क्याहम्जो ल़ेहमु येहकें। क्याहप दाङ दिन लेहप ङ्यी़काॱराङ ङो़ले जुबु काहङ्येॱराङ मी़ॱराङ मी़ थो़क्यो सोम्बो सेम्ज्येन ज़्यि ज़्य़ू-ठिकी कोर-क्यिहलेॱराङ तेहती येहकें। 7 तोहङस्यो सेम्ज्येन सिङग्यी ल़ेहमु थोङगो येहकें, ङ्यिपा सेम्ज्येन लाङगो ल़ेहमु येहकें, सुम्बा सेम्ज्येनकी तोहङबा मिहती ल़ेहमु येहकें, ओहले ज़्यिबा सेम्ज्येनदी उहर्केनॱराङ पेहक्योगी ख्युङ ल़ेहमु येहकें। 8 ओ़ह सेम्ज्येन ज्य़िगादीॱराङ स्योक्पा ट़ूह ट़ूह येहकें ओहले ओ़ह स्योक्पाया़ फी़ दाङ नाहङ ङ्यिकाराङ ङो़ले मी़या़गी काहङग्यो येहकें। ङ्यिहन-नुहप खुङया़ थाङ मा़हसेहबा पेहते दि ल़ेहमु म़ेदी छ्ये़-लु ल़ेहन तेहक्यो येहकें, “ओङज्या छ्यिम्बु नोम्गेन चो़वो छ्येवा किन्ज्यो नाम्पार-ताहक्पा, नाम्पार-ताहक्पा, नाम्पार-ताहक्पा ज़्य़ू नाङदी येहबा। मिहरो तोहङ यिहन्ज्युराङ ज़्य़ू नाङदी येहकें, ताहन्दाॱआङ ज़्य़ू नाङदी येहबा ओहले फेप नाङज्ये येह।” 9 नाहम्स्यी किन्दु सोम्बो ज़्य़ू नाङगेन ओहले ज़्य़ू-ठिला ज़्य़ू नाङगेन्दीला ओ़ह सेम्ज्येन ज्य़िगागीॱराङ ज़िज्यिद, चा दाङ थुज्यी छ्य़ेगी छ्ये़-लुया़ लेहन्गेनॱराङ येहकें। 10 ओहले खुङया़गी छ्ये़-लु लेहन्गेनॱराङ पेहकेमु नाहम्स्यी किन्दु सोम्बो दाङ ज़्य़ू-ठिला ज़्य़ू नाङगेन्दीगी दिनला ओ़ह ङ्यिहस्यु िज़्य छ्य़े-ठिमकी लोबेनया़ खेप्चु क्याहप्ती छ्या़ छाल्सीन ओहले खुङया़गी राहङ-राहङगी पेस्यो ज़्य़ू-ठिकी दिनला ज़्या़दी दि ल़ेहमु मासीन, 11 “ए ओहराङगी चो़वो दाङ किन्ज्यो, राहङ ज़िज्यिद, ची़नाङ दाङ ओङ नोम्ज्ये सी़हगेन्दी ज़्य़ू नाङदी येहबा च्यिबेमाना ना थाम्ज्यी राहङगीराङ छ्या़ च्य़ू नाङग्यो यिहम्बा, ओहले राहङगी थुला ठुङग्यो ल़ेहमुराङ ओ़हदी ओहङसीन ओहले ओ़ह से़हया़ छ्या़सीन।” |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.