ज्याल्गा 3 - ह्योल्मोसार्डिसकी छेन्छोकला लेहङगु 1 “सार्डिस छेन्छोकला चारा पेहकेन्गी स्यिहङगामकी स्याहप्च्यीला दि ताम प्री़हदोङ: ‘कार्मा तिहन दाङ किन्ज्योकी थु तिहन नोम्गेन्दीगी दि ल़ेहमु सुङ नाङगु दु। ख्याती ल़ेहया़ ङाहला क्यी़ह येह, ख्याया़ सोम्बो येह म़ेदी लोहङटी काहल्दी येहबा, यिहन्ज्येनी माज्येराङ माना ख्याया़ स्यि सिहन्दी येह। 2 ओ़ह सोङबे ता़ह ङ्यि छेतोङ, सिपाज्यी लिहक्यो से़हया़ला तोङ मा़हच्यु ओहले ओ़ह से़हया़ला सान्दी पेहती ज़ुङदी ज़्यो़ च्यिबेमाना किन्ज्योकी दिनला ख्येती ल़ेहया़ ङाहगी याहङ-ताहक्पा माहथोङ। 3 ओ़ह सोङबे ख्येगी च्यि ज्योर्पा ओहले च्यि थे़बा, ओ़ह टेहम्बा साल्दोङ, ओ़हला थिक-चि पेहती तेह ओहले स्या़बा डुप्तोङ। का़हलेॱआङ ख्ये ङ्यि माहछे़बा पेहती मेहतेहसीमानानी ङाह कुमेन ल़ेहमु पेहती ओहङज्ये येह, ओहले ङाह काहजे ती़हजीला ओहङज्ये येह म़ेदी ख्येगी क्यी़ह ज्योर्च्ये म़ेह। 4 यिहॱनाङ सार्डिसकी छेन्छोकला लाहला दि रोहवा मिहया़ॱआङ येहबा, खुङगी राहङगी काप्च्या चाङमा ज़्या़दी येह। खुङ ङाह ङ्याम्बु काप्च्या कार्पु केहन्दी डोज्ये येह, च्यिबेमाना खुङ दि ल़ेहमु पेहच्येला सी़हज्ये येह। 5 का़हन्दीगी क्याहल्गे, खोगी दि ल़ेहमु काप्च्या कार्पु केहन्ज्ये येह ओहले खोगी मिहन ङाह मिहलीकी छ्य़ेलेगी नाहमॱआङ सेच्ये म़ेह। यिहॱनाङ खो ङाहती यिहन म़ेदी ङाहगी याहप दाङ मिहरोगी थाम्ज्यी स्यिहङगामकी स्याहप्च्यीया़गी दिनला लोक पेहच्ये येह। 6 सुती नाम्ज्यो येहबा खोगी ङ्यिहन्ज्यु, किन्ज्योकी थुगी छेन्छोकया़ला च्यि सुङ नाङगेराङ येहबा।’” फिलाडेल्फियाकी छेन्छोकला लेहङगु 7 “फिलाडेल्फियाकी छेन्छोकला चारा पेहकेन्गी स्यिहङगामकी स्याहप्च्यीला दि ताम प्री़हदोङ: ‘किन्ज्योॱराङ नाम्पार-ताहक्पा दाङ तेहन्दाम यिहन, मिहरो ङ्याम्बुराङ क्याहल्बु दाऊदकी दिमी येहबा, मिहरोगी खा फे़ नाङग्योकी कोह सुज्यीगीॱआङ क्याहप मी़हखुएँ ओहले मिहरोगी क्याहप नाङग्योकी कोह सुज्यीगीॱआङ खा फे़ मी़हखुएँ मिहरोगी दि ल़ेहमु सुङ नाङगु दु। 8 ङाहला ख्येगी ल़ेहया़ क्यी़ह येह। त़ेदोङ, ङाहगी ख्येगी दिनला कोह खा फे़ ज़्या़दी येह, ओ़हदी सुज्यीगीॱआङ क्याहप ख़ूज्ये म़ेह। ओहले ख्ये ङ्याम्बु स्युक ङ्ये़हमु येहॱनाङ ख्येगी ङाहगी थाम्ज्यी काया़ ची़दे येह, ओहले ङाहगी मिहन मा-लोक पेहती म़ेह। 9 ङ्यिह यहूदी यिहम्बा म़ेदी स्योप क्याहप्केन्गी ती़ह गो-छ्येवाकी छो़बा ओ़हला सु सु येहबा, खुङला ङाह ख्येगी काङबाला ज्याल च्य़ूज्ये येह, ओहले ङाहगी ख्येला चेवा पेहकें माएँ ताम खुङगी ह्अ कोहज्ये येह। 10 ख्येगी ना़स्यीङ छ्यिम्बु पेहती ङाहगी काया़ ची़क्यो सोङबे, ता़ह थाम्ज्यी क्यिहपाया़ला ङ्याहम च्येच्येला दि जाम्बुलीङ थो़ला बाप ओहङज्ये पेहक्यो तुहक्पुलेगी ङाह ख्येला थार च्य़ूज्ये येह। 11 त़ेदोङ, ङाह ग्यो़बाराङ ओहङज्ये येह। ख्ये ङ्याम्बु च्यि येहबा, ओ़हदीला या़हबु पेहती ज़ुङदी ज़्यो़, ओहले ख्येती पेस्यो सुज्यीगीॱआङ फ्रो़ज्ये म़ेह। 12 सुगी क्याहल्गे, ओ़हदीला ङाह किन्ज्योकी छ्योखाङला काप्स्यी ज़ोज्ये येह, ओहले खो ओ़ह छ्योखाङ नाहङले फिला नाहमॱआङ थेन्ज्ये म़ेह। ओ़ह काप्स्यीला ङाहती किन्ज्योकी छेन ओहले स्यिहङगामलेगी फेप नाङगेन मिहरोगी क्याहसा साम्बा यरूशलेमकी छेन प्रुहज्ये येह ओहले ओ़ह काप्स्यीलाॱराङ ङाहती मिहन साम्बा प्रुहज्ये येह। 13 सुती नाम्ज्यो येहबा खोगी ङ्यिहन्ज्यु, किन्ज्योकी थुगी छेन्छोकया़ला च्यि सुङ नाङगेराङ येहबा।’” लाउडिकियाकी छेन्छोकला लेहङगु 14 “लाउडिकियाकी छेन्छोकला चारा पेहकेन स्यिहङगामकी स्याहप्च्यीला दि ताम प्री़हदोङ: ‘दि ताम आमेन, यिह-छ्य़ेबु दाङ तेहन्दामकी पाङबुगी दि ल़ेहमु सुङ नाङगु दु। किन्ज्योगी छ्या़ नाङग्योकी रेबेॱराङ से़हया़ थो़ला मिहरोगीॱराङ ओङ छ्ये नाङगे। 15 ङाहला ख्येगी ल़ेहया़ क्यी़ह येहबा। ख्येनी टोहमुॱआङ मिहम्बा, टाहङमुॱआङ मिहम्बा काहल दु! क्यिनी टोहमु क्यिनी टाहङमु येहना ओहङज्ये येहकें! 16 च्यिबेमाना ख्येनी टोहमुॱआङ मिहम्बा, टाहङमुॱआङ मिहम्बा टे़ह हाला-होले गा काहल दु। ओ़ह सोङबे ङाह ख्याला ङाहती खालेगी क्यू़नी क्याहप्च्ये येह। 17 ङाह छ्युक्पु येह, ओहले ङाह ङ्याम्बु क्युह-नोहर येह, ओहले ङाहला च्यि से़हदीॱआङ कोम्बु म़ेह म़ेदी ख्येगी माएँ, यिहॱनाङ ख्ये काहजे थाप-तुहक्पा, निङ-च्योहवा, प्राङबु, स्याहर्ना दाङ च्येहन्डामु दु। यिहॱनाङ ख्येगी छोरॱटाङ मेहछोर दु। 18 ओ़ह सोङबे छ्युक्पु डोज्येला मेहला सा़क्योकी सेर ओहले राहङदी च्येहन्डामु ज़ुबु उप्च्येला काप्च्या कार्पु ओहले ख्येगी थोङ ख़ूज्यु म़ेदी ख्येती मी़ला कुज्येला मालाम, दि थाम्ज्यी ङाह ङ्याम्बु ङ्ये़हदोङ म़ेदी ङाह ख्येला टे़ह-रिहम तेर्के। 19 का़हन्दीला ङाहगी चेवा पेहकें ओ़हदीला ङाहगी बार्ताॱआङ लाङगे ओहले च्युरॱआङ च्युर्कें। ओ़ह सोङबे सेम काहसो पेहतोङ ओहले तिहक्पा पाङदी स्या़बा डुप्तोङ। 20 त़ेदोङ, ङाह कोहला लाहङदी कोह तुहङगेनॱराङ येह। सुज्यीगी ङाहगी क़े थे़दे कोह खा फे़ तेर्सीमाना ङाह नाहङला ओहङज्ये येह ओहले ङाह खो ङ्याम्बु डेन साहज्ये येह ओहले खोॱआङ ङाह ङ्याङबुराङ साहज्ये येह। 21 का़हन्दीगी क्याहल्गे, खोला ङाह ङ्याम्बु ङाहती ठिला तेहच्येला ओङ तेर्के। ङाह राहङगीॱआङ क्याहल्ग्यो सोङबे ङाहती याहप ङ्याम्बु मिहरोगी ज़्य़ू-ठिला ङाह तेहती येहबा। 22 सुती नाम्ज्यो येहबा खोगी ङ्यिहन्ज्यु, किन्ज्योकी थुगी छेन्छोकया़ला च्यि सुङ नाङगेराङ येहबा।’” |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.