ज्याल्गा 22 - ह्योल्मोमिहलीगी चाङबु 1-2 ओ़ह तिङले स्यिहङगामकी स्याहप्च्यीगी ङाहला स्फटिक ल़ेहमुराङ येहपा छ्या़गे मिहलीकी छ्युगी चाङबु तेन नाङसीन। ओ़ह चाङबु किन्ज्यो दाङ ल़ूह स्ये़बुकी ज़्य़ूॱठिलेगी थेन्दी क्याहसाकी लाहम पाहरक्यीले स्याहल्दे डोॱराङ येहकें। ओ़ह चाङबु सुहरला मिहली तेर्केन्गी तोहङबो तेहकें ओ़ह तोहङबोला लो़ह च्यी़ला सेदो ना च्यिङ्यी़ या़हउ येहकें। ओहले ओ़ह तोहङबोकी लाहप्तीया़गी क्यिहपा-क्यिहपाया़गी मिहया़ला टा़ह च्य़ूगे। 3 किन्ज्योगी मे़मु क्याहप नाङग्योकी से़हया़ ता़ह यिहन्ज्यु ओ़ह क्याहसाला च्यिॱआङ लिहच्ये म़ेह। किन्ज्यो दाङ ल़ूह स्ये़बुकी ज़्य़ू-ठि ओ़ह क्याहसाला ओहङज्ये येह, ओहले मिहरोला स्याहप्तो स्युएँया़गी मिहरोला छ्येपा फुल्ज्ये येह। 4 खुङया़गी किन्ज्योकी स्याहल्दोङ थोङज्ये येह ओहले मिहरोकी छेन खुङया़गी प्रालाला ओहङज्ये येह। 5 ओ़हला येहपाराङ नाहम से़ज्ये म़ेह, ओ़हला लो दाङ ङ्यिहमाकी क्या-साङे कोहच्ये म़ेह, च्यिबेमाना चो़वो छ्येवा किन्ज्योॱराङ खुङया़गी क्या-साङे ओहङज्ये येह ओहले खुङया़गी नाहम्स्यी किन्दुॱराङ ओङ छ्य़ेज्ये येह। येशू फेप नाङगेराङ येह 6 दि तिङले स्यिहङगामकी स्याहप्च्यीगी ङाहला सुङ नाङसीन, “दि सुङया़ सेमले खाल ख़ूएँ दाङ तेहन्दाम येह। लुहङतेम्बाया़ला नाम्पार-ताहक्पा थु नाङगेन्गी चो़वो छ्येवा किन्ज्योगी राहङगी स्याहप्च्यीया़ला दि ग्यो़बाराङ ओहङज्ये पेहक्योगी तामया़ तेन्ज्येला राहङगी स्यिहङगामकी स्याहप्च्यी ताङ नाङदी येह।” 7 “त़ेदोङ, ङाह ग्यो़बा ओहङगेॱराङ येह। दि छ्य़ेला लुहङतेम्बाया़गी प्रुहक्योगी सुङ ची़गेया़ काहजे सोनाम-साक्पु।” 8 दि केच्या थे़गेन दाङ थोङगेन ङाह यूहन्ना यिहम्बा। ङाहगी दि केच्याया़ थ़े फान्ज्यो ओहले थोङ फान्ज्यो ङाहला दि थाम्ज्यी तेन नाङगेन स्यिहङगामकी स्याहप्च्यीगी स्याहपला खेप्चु क्याहप्ती छ्या़ छाल्सीन। 9 यिहॱनाङ मिहरोगी ङाहला सुङ नाङसीन, “त़ेदोङ, ख्येगी ङाहला दि ल़ेहमु पेहच्ये मेहयोहङगे। ङाहनी ख्ये दाङ ख्येगी लुहङतेम्बा आदा-नो़हया़ ओहले दि छ्य़ेला प्रुहक्योगी सुङया़ ची़गेन मिहया़ ल़ेहमुराङ किन्ज्योगी स्याहप्च्यी च्यी़राङ यिहम्बा। किन्ज्योला छ्या़ छाल्सोङ।” 10 ओहले मिहरोगी येहपाराङ ङाहला सुङ नाङसीन, “दि छ्य़ेला लुहङतेम्बाया़गी प्रुहक्योगी सुङ पे़हदी मा़हज्या च्यिबेमाना दि थाम्ज्यी तेहन्दा डुप्केन्गी ती़हजी पोहलाराङ येह। 11 ल़ेह ङ्येहम्बा पेहकेनया़गी ल़ेह ङ्येहम्बा पेहतीराङ तेहच्यु, ङोहजागी ल़ेह पेहकेनया़गी ङोहजागी ल़ेह पेहतीराङ तेहच्यु, टाहङबु ल़ेह पेहकेनया़गी टाहङबु ल़ेह पेहतीराङ तेहच्यु, ओहले नाम्पार-ताहक्पा येहकें मिहया़ नाम्पार-ताहक्पाराङ ओहङज्यु।” 12 “त़ेदोङ, ङाह ग्यो़बा ओहङगेॱराङ येह, मिह थाम्ज्यीला खोगी पेहक्योगी ल़ेहला ते़बे च्याहगा तेर्च्ये येह। 13 अल्फा दाङ ओमेगा, तोहङस्यो दाङ तिङस्यो ओहले छ़ूगे दाङ सिहन्दा च्येकेनॱआङ ङाहराङ यिहन।” 14 “मिहलीगी तोहङबोकी ओङ ज्योर्च्येला ओहले क्याहसाकी कोहलेगी नाहङला स्य़ूह ङ्युहङज्यु म़ेदी राहङगी काप्च्या ठी़दी चाङमा ज़्या़गेया़ काहजे सोनाम-साक्पु। 15 यिहॱनाङ ख्यिदी ल़ेहमु छारा पेहताङ येहकेनया़, ङेहन क्याहप्केनया़, छ्येउ-छ्येंमु पेहकेनया़, मिह सेकेंनया़, कुला छ्येपा फुल्गेनया़, चिहन क्याहप च्य़ूगेनया़ क्याहसा फिला ओहङज्ये येह।” 16 “ङाह येशूगी ङाहती स्यिहङगामकी स्याहप्च्यीला छेन्छोकला येहकेन्की मिह थाम्ज्यीगी दि तामया़ क्यी़ह ज्योर्च्यु म़ेदी ङाहगी खोला ख्येसाला ताङ चाहङदी येह। क्याहल्बु दाऊदकी चाङर्यी दाङ छार्क्यीनॱआङ ङाहराङ यिहन ओहले येहपा छ्या़गे थोराङ कार्च्येनॱआङ ङाहराङ यिहन।” 17 नाम्पार-ताहक्पा थु दाङ नामा साम्बागी दि ल़ेहमु सुङ नाङगु दु, “फेप नाङदोङ।” सुगी ङ्यिहन्गे खोगी माज्यु, “फेप नाङदोङ।” सु कोम्गे खो ओहङज्यु, ओहले सुगी सेम्बा पेहकें खोगी मिहलीगी छ्यु आहन्डाराङ थुङज्यु। 18 दि छ्य़ेला लुहङतेम्बाया़गी प्रुहक्योकी सुङ ङ्यिहन्गे मिह थाम्ज्यीला ङाह दि ताम माएँ: का़हलेॱआङ सुज्यीगी दि छ्य़ेला ल्हाक्पु तामया़ पा़हसीन माना दि छ्य़ेला प्रुहक्योगी तुहक्पु छ्यिम्बुया़ खो थो़ला किन्ज्योगी पा़हदी नाङज्ये येह। 19 ओहले सुज्यीगीॱआङ दि छ्य़ेला लुहङतेम्बाया़गी प्रुहक्योगी तामया़ नाहङला च्यिॱआङ च्येसीनमाना, दि छ्य़ेला प्रुहक्योगी मिहलीकी तोहङबो दाङ नाम्पार-ताहक्पा क्याहसाले ज्योर्केन्गी बो खोलेगी किन्ज्योगी फ्रो़ नाङज्ये येह। 20 दि तामगी पाङबु नाङगेन्दीगी सुङ नाङगु दु, “तेहम्बाराङ, ङाह ओहङगेॱराङ येह।” आमेन, फेप नाङदोङ, ओ़ चो़वो येशू। 21 चो़वो येशूकी काटीन थाम्ज्यी ङ्याम्बु ज़्य़ू नाङज्यु। आमेन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.