ज्याल्गा 21 - ह्योल्मोसाम्बा स्यिहङगाम दाङ साम्बा नाम 1 दि तिङले ङाहगी साम्बा स्यिहङगाम दाङ साम्बा जाम्बुलीङ थोङसीन, च्यिबेमाना तोहङस्यो स्यिहङगाम दाङ जाम्बुलीङ योहल सिहन्ग्यो येहकें। छो-क्याहम्जो नि ता़ह येहॱराङ म़ेहबा काहल्सीन। 2 ओहले ङाहगी नाम्पार-ताहक्पा यरूशलेम क्याहसा किन्ज्योलेगी स्यिहङगाम यिहन्ज्यु माहर फेप्केराङ जेक्यो थोङसीन। ओ़ह क्याहसा नि माहक्पा साम्बा ङ्याम्बु थुज्येला ज़ाप्ते ठाबे पेह ज़्या़क्योगी नामा साम्बा ल़ेहमुराङ येहकें। ओ़हदी साम्बा यरूशलेम यिहम्बा। 3 ज़्य़ूॱठिलेगी सुङ-क़े छ्यिम्बु तेन्दी दि ल़ेहमु सुङ नाङग्यो ङाहगी थ़ेसीन, “ते़! ता़ह यिहन्ज्यु किन्ज्यो मिहया़ ङ्याम्बु ज़्य़ू नाङदी येह। मिहरो खुङ ङ्याम्बु ज़्य़ू नाङज्ये येह ओहले खुङ मिहरोदीॱराङ मिहया़ ओहङज्ये येह। किन्ज्यो राहङराङ खुङ ङ्याम्बु ओहङज्ये येह ओहले मिहरो खुङया़गी किन्ज्यो ओहङज्ये येह।” 4 ओहले मिहरोगी खुङया़गी मी़गी मिज्यु थाम्ज्यीराङ फी़ नाङज्ये येह। ता़ह यिहन्ज्यु सुॱआङ स्यि कोहच्ये म़ेह। सुगीॱआङ तुहङाल पेहती ङुह कोहच्ये म़ेह, ओहले तुहक्पुॱआङ ओहङज्ये म़ेह। च्यिबेमाना तोहङमागी केच्याया़ योहल सिहन्दी येह। 5 ओहले ज़्य़ू-ठिला ज़्य़ू नाङगेन किन्ज्योगी ङाहला सुङ नाङसीन, “त़ेदोङ, ता़ह ङाह थाम्ज्यीराङ से़हया़ साम्बा ज़ोएँ।” मिहरोगी ङाहला दि ल़ेहमुॱआङ सुङ नाङसीन, “दि प्री़हदोङ, च्यिबेमाना दि तेहन्दाम दाङ सेमले खाल ख़ूएँगी ताम यिहम्बा।” 6 ओहले मिहरोगी ङाहला सुङ नाङसीन, “ता़ह चो़हसीन। ङाह अल्फा दाङ ओमेगा यिहम्बा, तोहङस्यो दाङ तिङस्यो ङाहराङ यिहन। खा कोम्ग्यो मिहया़ला ङाह मिहलीगी छ्यु क्येज्युलेगी आहन्डाराङ थुङ च्य़ूज्ये येह। 7 सु सुगी क्याहल्गे, खोगी ङाहलेगी दि ओङ ज्योर्च्ये येह। ङाह खोती किन्ज्यो ओहङज्ये येह ओहले खो ङाहगी पुह-पोहमो ओहङज्ये येह। 8 यिहॱनाङ ज्यी़गेया़, यिह मे़ह-छ्ये़गेया़, नाम्दो लाहङज्ये ल़ेहमु ल़ेह पेहकेनया़, मिह सेकेनया़, छ्येउ-छ्येंमु पेहकेनया़, ङ्येहन क्याहप्केनया़, कुला छ्येपा फुल्गेया़ ओहले स्योप क्याहप्केनया़ थाम्ज्यी मेह दाङ मेहबुङगी छो नाहङला डोज्ये येह। दि ङ्यिपा स्यिवा यिहम्बा।” साम्बा यरूशलेम 9 ज्युक्स्योलला ओ़ह छ्यिम्बु तुहक्पु तिहनगी काहङग्यो फार्को तिहन नोम्ग्यो स्यिहङगामकी स्याहप्च्यी तिहन नाहङले च्यी़ ङाहसाला फेप्ती दि ल़ेहमु सुङ नाङसीन, “स्यो, ङाह ख्येला ल़ूह स्ये़बुकी पी़हमी, मिहरोगी नामा साम्बा तेन तेर्के।” 10 ओ़ह तिङले ओ़ह स्यिहङगामकी स्याहप्च्यीगी ङाहला नाम्पार-ताहक्पा थुला छ्यिम्बु दाङ थुम्बु लाह काहङदो च्यी़ला नोम फेप नाङसीन ओहले किन्ज्यो लाहमले स्यिहङगामलेगी माहर फेप्केराङ जेक्योगी नाम्पार-ताहक्पा यरूशलेम क्याहसा ङाहला तेन नाङसीन। 11 ओ़ह क्याहसा किन्ज्योगी ज़िज्यिदगी काहङदे येहकें ओहले निङबु तोह, बिल्लौर ल़ेहमुराङ येहपा छ्या़उ येहकें। ओ़हदी स्फटिक चेबाॱराङ क़ेह-चाङमा येहकें। 12 ओ़ह क्याहसा कोर-क्यिहलेॱराङ छ्यिम्बु दाङ थोम्बु चिक्पाया़ ची़क्यो येहकें। ओ़हला कोह च्यिङ्यी़ येहकें। ओहले ओ़ह कोह च्यिङ्यी़लाराङ स्यिहङगामकी स्याहप्च्यी रे़ह-रे़ह ज़्य़ू नाङदी येहकें। ओ़ह कोहया़ला इस्राएलकी क्यिहपा च्यिङ्यी़दीॱराङ मिहन प्री़हदी येहकें। 13 स्यार ङो़ले कोह सुम, नुहप ङो़ले कोह सुम, च्याहङ ङो़ले कोह सुम ओहले ल्हो ङो़ले कोह सुम येहकें। 14 ओ़ह क्याहसाकी चिक्पागी ब्रामया़ च्यिङ्यी़ येहकें। ओ़ह थो़ला ल़ूह स्ये़बुकी ल़ेह-पेन च्यिङ्यी़दीॱराङ मिहनया़ प्री़हदे येहकें। 15 क्याहसा दाङ कोह ओहले चिक्पा ताहप्च्येला ङाह ङ्याम्बु स्याहल सुङ नाङगे स्यिहङगामकी स्याहप्च्यीगी छ्या़ला सेरकी प्रेहका च्यी़ येहकें। 16 ओ़ह क्याहसा टुहप्स्यी येहकें। ओहले ओ़हगी स्याहङ दाङ रिहङबुदी ङ्याम्बा येहकें। स्यिहङगामकी स्याहप्च्यीगी सेरकी प्रेहकागी ताहप नाङगेमु ओ़ह क्याहसा नेसा तोङरा ङ्यी़ दाङ क्याह ज़्यि येहकें। ओ़हगी रिहङबु, स्याहङ ओहले थोम्बुॱआङ ङ्याम्बा येहकें। 17 ओहले स्यिहङगामकी स्याहप्च्यीगी क्याहसाकी चिक्पाॱआङ ताहप नाङसीन। मिहगी ताहप्लुला ते़बे ओ़ह चिक्पा टुहप्च्यु ट़ूह मिटर थोम्बु येहकें। 18 ओ़ह चिक्पा बिल्लौरगी ज़ोक्यो येहकें, ओहले क्याहसाती ताहङमा सेरगी ज़ोक्यो येहकें ओहले ओ़हदी सिङ-सिङ-सिङ स्येल ल़ेहमु येहपा छ्या़उ येहकें। 19 चिक्पाकी ब्रामया़ नामे-नाजोगी निङबु तोहया़गी ज़ाप्ते येहकें। तोहङस्यो ब्राम बिल्लौरगी ज़ोक्यो येहकें, ङ्यिपा ब्राम थीङ्गा तोहगी, सुम्बा ब्राम ङुम्बु तोहगी, ज़्यिबा ब्राम थीङ्गा दाङ ङुम्बु स़ेमा येहकेन तोहगी 20 ङाबा ब्राम आनिक्सगी, टुहपा ब्राम माहर्मु तोहगी, तिहम्बा ब्राम सेर्पु तोहगी, क्येहपा ब्राम बेरुजगी, कुहबा ब्राम सेर-हुर तोहगी, च्युबा ब्राम ङुम्बु तोहगी, च्य़ूज्यीबा ब्राम थीङ्गा तोहगी, ओहले च्यिङ्यी़बा ब्रामती ङुम्बु तोहगी ज़ोक्यो येहकें। 21 ओ़ह कोह च्यिङ्यी़दी मोती च्यिङ्यी़गी ज़ोक्यो येहकें। कोह रे़ह-रे़ह मोती रे़ह-रे़हकी ज़ोक्यो येहकें। ओ़ह क्याहसाकी लाहम मेहलोङ ल़ेहमु साङ-साङ साङ थोङगेन सेर ताहङमागी ज़ोक्यो येहकें। 22 ओ़ह क्याहसा नाहङला ङाहगी छ्योखाङ च्यी़ॱआङ माहथोङ, च्यिबेमाना ओङज्या छ्यिम्बु नोम्गेन्गी चो़वो किन्ज्यो दाङ ल़ूह स्ये़बुॱराङ ओ़ह क्याहसाती छ्योखाङ यिहम्बा। 23 ओ़ह क्याहसाला क्या-साङे ज़ोज्येला ङ्यिहमा दाङ दायुम मेहकोहएँ च्यिबेमाना किन्ज्योकी ज़िज्यिदॱराङ ओ़ह क्याहसाती क्या-साङे यिहम्बा। ओहले ओ़ह क्याहसाती लो़दी ल़ूह स्ये़बु राहङराङ यिहम्बा। 24 जाम्बुलीङकी मिह थाम्ज्यी मिहरोकी क्या-साङेलाॱराङ डोज्ये येह ओहले जाम्बुलीङकी क्याहल्बुया़गी राहङगी क्युह-नोहर चा़-ची़नाङ ओ़हलाराङ ख्योङज्ये येह। 25 ङ्यिहमाला क्याहसाकी कोहया़ नाहमॱआङ क्याहप्च्ये म़ेह ओहले ओ़हला नाहमॱआङ नाहम से़ज्ये म़ेह। 26 क्यिहपा-क्यिहपाकी मिहया़गी राहङ-राहङगी क्युह-नोहर दाङ चा़-ची़नाङया़ थाम्ज्यी ओ़हला ख्योङज्ये येह। 27 ल़ूह स्ये़बुकी मिहलीकी छ्य़ेला मिहन प्रुहक्योया़ च्यी़राङ ओ़ह क्याहसा नाहङला स्य़ूह ङ्युहङज्ये येह। मेहचाङा से़हया़, ङोहजागी ल़ेह पेहकेनया़ ओहले चिहन क्याहप च्य़ूगेनया़ ओ़ह नाहङला स्य़ूह ङ्युहङज्ये म़ेह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.