ज्याल्गा 20 - ह्योल्मोलोह तोङरा च्यी़ 1 दि तिङले साप्स्यी तिहङगी दिमी दाङ च्याल्दा छ्यिम्बु च्यी़ छ्या़ला नोम्दी स्यिहङगामकी स्याहप्च्यी च्यी़ स्यिहङगामले माहर फेप्केराङ जेक्यो ङाहगी थोङसीन। 2 ओहले मिहरोगी ओ़ह डुकला ज़ुङदी लो़ह तोङरा च्यी़ थु ताहम्दी ज़्या़ नाङसीन। ओ़ह डुकदी ताहङबो प्रुहल, ङ्येहम्बा नाम्स्यीगी क्याहल्बु दाङ ती़ह गो-छ्येवा यिहन्गे। 3 मिहरोगी ओ़ह डुकला लोह तोङरा च्यी़ माहसीहन थु क्यिहपा-क्यिहपागी मिहया़ला गो़ कोर माहङ्युहङज्यु म़ेदी खोला साप्स्यी तिहङला क्युर चाहङ नाङदी ओ़ह साप्स्यी तिहङला कोह क्याहप्ती थे़जी क्याहप नाङसीन। ओ़ह तिङले ङ्यिहमा तोबाज्यीगी तेहन्दाला खोला ताङ तेर कोहएँ। 4 ओहले ङाहगी ज्यू़-ठिया़ दाङ ओ़ह खाला ज़्य़ू नाङगेनया़ला थोङसीन, खुङया़ला ठिम ताङगेन्गी ओङ नाङदी येहकें। येशूगी पाङबु तेहक्यो सोङबे ओहले किन्ज्योगी सुङ प्रा साल्ग्यो सोङबे मिहगी लाहक्पाले पेहती स्यि कोहक्यो मिहगी नाम्स्यीया़ॱआङ ङाहगी थोङसीन। खुङया़गी ओ़ह सेम्ज्येन दाङ खोगी कुला छ्येपा माहफुल येहकें ओहले राहङगी प्राला दाङ लाहक्पाला ओ़ह सेम्ज्येनदी पार माहक्याहप येहकें। खुङ येहपाराङ सोम्बो लो़हदी लाहङसीन ओहले लोह तोङरा च्यी़ थु मास्यीका ङ्याम्बु ओङ छ्य़ेसीन। 5 ओहले लेहमेन स्यिक्योया़दी ओ़ह लो़ह तोङरा च्यी़ माहसीहन थु सोम्बो माहकाहल। स्यिक्योया़ लाहङग्योदी दिराङ तोहङस्यो यिहम्बा। 6 तोहङस्यो सोम्बो लो़हदी लाहङगेया़ काहजे सोनाम-साक्पु दाङ नाम्पार-ताहक्पा। खुङया़ला ङ्यिपा स्यिवागी च्यिॱआङ पेह मी़हखुएँ, यिहॱनाङ खुङ किन्ज्यो दाङ मास्यीकाकी पूजाहारी काहल्दी मिहरो ङ्याम्बु लो़ह तोङरा च्यी़ थु ओङ छ्य़े ङ्युहङज्ये येह। ती़ह गो-छ्येवा फाम्ग्यो 7 लो़ह तोङरा च्यी़ सिहन फान्ज्यो ती़ह गो-छ्येवाला ताहम्दी ज़्या़क्यो ग्या़लेगी ताङज्ये येह, 8 ओहले जाम्बुलीङगी छ्यो़ ज़्यिलाराङ येहकेन्गी क्यिहपा-क्यिहपागी मिहया़ला पे यिहॱना़: “गोग” दाङ “मागोगला” गो़ कोर च्य़ूदी मा़ क्याहप्च्येला रुज्ये येह। खुङ छो-क्याहम्जोकी पेहमाजेराङ ओहङज्ये येह। 9 खुङ जाम्बुलीङ काहङग्याराङ टाहम्दे काहल्सीन ओहले किन्ज्योगी मिहया़गी छाउनी दाङ मिहरोगी चेवा जे नाङग्योकी क्याहसाला कोर-क्यिहलेॱराङ का़सीन यिहॱनाङ स्यिहङगामले माहर मेह ताहप्ते खुङ थाम्ज्यीराङ चो़हसीन। 10 क्यिहपा-क्यिहपाला गो़ कोर च्य़ूगेन्गी ओ़ह दियाबलसला मेह दाङ मेहबुङ नाहङला क्युर चाहङसीन, ओ़हला ओ़ह सेम्ज्येन दाङ चिहन क्याहप्केन्गी लुहङतेम्बाॱआङ येहकें। ओ़ह ग्या़ला खुङया़गी ङ्यिहन-नुहप नाहम्स्यी किन्दुॱराङ तुहक्पु खुर्च्ये येह। तिङस्यो ङ्यिहमागी ठिम 11 ओहले ङाहगी कार्पु छ्यिम्बु ज़्य़ू-ठि च्यी़ दाङ ओ़ह ज़्य़ू-ठि खाला ज़्य़ू नाङगेन्दीला थोङसीन। मिहरो दिनले जाम्बुलीङ दाङ नाम प्रे़हदी काहल्सीन, ओहले खुङया़ला का़हॱलाङ ग्या़ माहन्ज्योर। 12 ओहले स्यिक्यो मिह फेमा दाङ छ्यिम्बु थाम्ज्यीराङ ज़्य़ू-ठिकी दिनला लाहङदी तेहक्योदी ङाहगी थोङसीन ओहले छ्य़ेया़ खा फ़ेसीन। लेहमेन छ्य़े च्यी़ॱआङ खा फ़ेसीन, ओ़हदी मिहलीगी छ्य़े यिहन्गे। ओ़ह छ्य़ेला प्रुहक्यो खुङया़गी ल़ेहला ते़बे स्यिक्यो मिहया़ला ठिम ताङसीन। 13 छो-क्याहम्जोगी ओ़हला येहकेन्गी स्यिक्यो मिहया़ तेर्सीन, ओहले स्यिवा दाङ साप्स्यी तिहङगीॱआङ राहङ ङ्याम्बु येहकेन्गी स्यिक्यो मिहया़ तेर्सीन। खुङ थाम्ज्यीला राहङ-राहङगी पेहक्यो ल़ेहला ते़बे ठिम ताङसीन। 14 दि तिङले स्यिवा दाङ साप्स्यी तिहङ ती़हदी तेहक्योगी मेहबुङ नाहङला क्युर चाहङसीन। दि मेहबुङगी छो़दी ङ्यिपा स्यिवा यिहम्बा। 15 मिहलीगी छ्य़ेला मिहन मा़हप्रीहबा मिहया़ला ओ़ह मेहबुङगी छो नाहङला क्युर चाहङसीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.