ज्याल्गा 19 - ह्योल्मोक्याहल्ग्योगी छ्ये़-लु 1 दि तिङले ङाहगी स्यिहङगामले मिह मिह-माहङ छ्यिम्बुच्यीगी क़े छ्यिम्बु तेन्दी दि ल़ेहमु माएँ थ़ेसीन, “हाल्लेलूयाह! थार्पा, ची़नाङ दाङ स्युक किन्ज्योदीॱराङ यिहन, 2 च्यिबेमाना मिहरोगी ठिम ठाबे दाङ तेहम्बा-तेहन्सुम येह। जाम्बुलीङ थाम्ज्यीला राहङ छ्येउ-छ्येंमुगी गो़ कोर च्य़ूगे ओ़ह स्याहङ-छो़मुला मिहरोगी ङ्य़ेहबा नाङदी येह, ओहले राहङला स्याहप्तो स्युहएँ मिहया़गी ठा़गी क्यिम्बा मिहरोगी ल़ेहन नाङ सिहन्दी येह।” 3 येहपाराङ खुङया़गी क़े छ्यिम्बु तेन्दी दि ल़ेहमु मासीन, “हाल्लेलूयाह! ओ़ह क्याहसा छ्यिम्बु छी़क्योगी तिहपा नाहम-माना याहर नामला डे़देराङ तेहच्ये येह।” 4 ओहले ओ़ह छ्य़े-ठिमकी लोबेनया़ मेहन्दा खाल च्यी़ ज़्यि ओहले ओ़ह सोम्बो सेम्ज्येन ज़्यिगी खेप्चु क्याहप्ती ज़्य़ू-ठिला ज़्य़ू नाङग्योकी किन्ज्योला दि ल़ेहमु म़ेदी छ्या़ छाल्सीन, “आमेन, हाल्लेलूयाह!” ल़ूह स्ये़बुकी पा़हमागी डेन 5 ओहले ज़्य़ूॱठिलेगी दि ल़ेहमु सुङगेनॱराङ जेक्यो सुङ-क़े च्यी़ थ़ेसीन, “किन्ज्योला स्याहप्तो स्युहएँया़ दाङ मिहरोगी ज्यिक्पा खुर्केन ख्या फेमा छ्यिम्बु थाम्ज्यीगी मिहरोला त़ेरा तेच्या फुल्दोङ।” 6 दि तिङले छ्यिम्बु मिह बुङजीया़गी क़े दाङ छ्युम्ग्यारगी क़े ल़ेहमु ओहले मुक्पा नाहङले नाम क़े तेन्दी दिर्कें ल़ेहमुराङ क़े च्यी़गी दि ल़ेहमु माक्यो थ़ेसीन: “हाल्लेलूयाह! च्यिबेमाना चो़वो छ्येवा ओहराङगी किन्ज्योगी नाहम्स्यी किन्दुॱराङ ओङ छ्य़े नाङज्ये येह। 7 ओहराङ क़ेहनाङ पेहतोङ ओहले सेम सोनाम-साक्पु पेहतोङ, ओहले मिहरोला ज़िज्यिद फुल्दोङ! च्यिबेमाना ल़ूह स्ये़बुगी पा़हमागी ङ्यिहमा लेप सिहन्दी येह, ओहले मिहरोकी नामा साम्बा ज़ाप्ती ठाबे पेह सिहन्दी येह। 8 चाङमा दाङ येहपा छ्याएँ थु रे़हगी काप्च्या मोहला केहन्ज्येला नाङसीन।” दि येहपा छ्याएँ थु रे़हगी काप्च्यादी किन्ज्योगी मिहया़गी पेहक्योगी या़हबु ल़ेहया़ यिहम्बा। 9 दि तिङले स्यिहङगामकी स्याहप्च्यीगी ङाहला दि ल़ेहमु सुङ नाङसीन, “दि ताम प्री़हदोङ, ल़ूह स्ये़बुकी पा़हमागी डेनला पाहङज्येन क्याहप्क्योगी मिहया़ काहजे सोनाम-साक्पु!” येहपाराङ ङाहला स्यिहङगामकी स्याहप्च्यीगी सुङ नाङसीन, “दि स्याहल किन्ज्योगी सुङ नाङग्योकी तेहन्दामगी सुङ यिहम्बा।” 10 ओहले ओ़ह स्यिहङगामकी स्याहप्च्यीला छ्या़ छाल्ज्येला ङाह मिहरोगी स्याहपला खेप्चु क्याहप्सीन। यिहॱनाङ मिहरोगी ङाहला दि ल़ेहमु सुङ नाङसीन, ख्येगी ङाहला दि ल़ेहमु पेहच्ये मेहयोहङगे। ङाहॱआङ येशूगी तेहन्दाला पाङबु तेर्केन्गी ख्ये दाङ ख्येगी नो़हया़ ङ्याम्बु-ङ्याम्बुराङकी रो़ह दाङ योक्पुज्यीराङ यिहम्बा। किन्ज्योला छ्या़ छाल्दोङ! च्यिबेमाना चो़वो येशू मास्यीकागी तेन नाङग्यो तेहन्दामगीॱराङ लुहङतेम्बाया़ला स्युक क्ये च्य़ूएँ। ताबु कार्पु खाला स्येहन्ग्योगी मिह 11 ओहले ङाहगी स्यिहङगाम खा फे़क्यो थोङसीन ओहले ओ़हला ताबु कार्पु च्यी़ थोङसीन। ओ़ह ताबु खाला स्येहन नाङग्योगी छेनदी “यिह-छ्य़ेबु दाङ तेहन्दाम” दुबा। मिहरोगी टाहङदेनला ठिम दाङ मा़ क्याहप नाङगे। 12 मिहरोगी च्येन मेहबुङ ल़ेहमु येहकें ओहले मिहरोगी उला माहङबुराङ पेस्योया़ येहकें। मिहरोदी छेन च्यी़ प्री़हदी येहकें यिहॱनाङ ओ़ह छेन मिहरोला च्यी़राङ थुयी़ येहकें। 13 मिहरोगी नोम नाङग्योकी नाहम्सा ठा़ॱराङ ठा़गी पाहङग्यो येहकें। मिहरोगी छेनदी “किन्ज्योगी सुङ” यिहम्बा। 14 स्यिहङगामकी माक्मीया़ कार्पु दाङ चाङमा रे़हगी काप्च्या नोम्दी कार्पु ताबु खाला स्येहन्दी मिहरोगी तिङदा तिङ फेप्सीन। 15 क्यिहपा-क्यिहपागी मिहया़ला सेच्येला मिहरोगी स्याहलले पादाङ नुम्बु च्यी़ थेन्सीन, ओहले मिहरोगी च्या़गी प्रेहकागी खुङया़ थो़ला ठिम ताङ नाङज्ये येह। ओहले कोलला कुहन्डुम च्यिर्ते खुइ तेन्ग्यो ल़ेहमु मिहरोगी ओङज्या छ्यिम्बु नोम नाङगे किन्ज्योगी थुयालगी कोलला खुङया़ला च्यिर नाङज्ये येह। 16 मिहरोगी नाहम्सा दाङ पिलाङला “क्याहल्बुया़की क्याहल्बु दाङ चो़वोया़की चो़वो” म़ेदी छेन प्री़हदे येहकें। 17 दि तिङले ङाहगी ङ्यिहमा थो़ला स्यिहङगामकी स्याहप्च्यी च्यी़ लाहङदी ज़्य़ू नाङग्यो थोङसीन। ओ़ह स्यिहङगामकी स्याहप्च्यीगी नामला उहर्केन्गी थाम्ज्यी च्याह-च्यिहवाया़ला सुङ-क़े छ्यिम्बु तेन्दी दि ल़ेहमु सुङ नाङसीन, “स्यो, किन्ज्योगी डेन छ्यिम्बु साहज्येला जोम स्यो। 18 ख्याया़गी क्याहल्बुया़, माक्पेन छ्यिम्बुया़, स्युक छ्यिम्बुगी मिहया़, ताबुया़, ताबु खाला स्येहन्गेन्गी मिहया़, योक्पु पेहक्यो दाङ राहङवाङ (योक्पु माहबेबागी) मिहया़ ओहले फेमा छ्यिम्बु थाम्ज्यीदी स्या साहज्ये येह।” 19 ओहले ओ़ह सेम्ज्येन दाङ जाम्बुलीङगी क्याहल्बुया़ राहङ-राहङगी माक्मीया़ ख्योङदी कार्पु ताबु खाला स्येहन नाङगे दाङ मिहरोगी माक्मीया़ला टाह पेहती मा़ क्याहप्च्येला जोम्ग्यो ङाहगी थोङसीन। 20 ओहले ओ़ह सेम्ज्येन दाङ खोगी छापला याहम्जेम्बाकी ताक्छेनया़ तेन्गे ओ़ह चिहन क्याहप्के लुहङतेम्बालाॱआङ ज़ुङसीन। दि याहम्जेम्बागी ल़ेहया़ लाहमले ओ़ह चिहन क्याहप्कें लुहङतेम्बागी ओ़ह सेम्ज्येनगी पार क्याहप्कें दाङ खोगी कुला छ्येपा फुल्गे थाम्ज्यीला गो़ कोर च्य़ूदी येहकें। ओ़ह ङ्यिकालाराङ ती़हदी तेहक्यो मेहबुङगी छो नाहङला सोम्बोराङ क्युर चाहङसीन। 21 ओहले खुङया़गी माक्मीया़लादी कार्पु ताबु खाला स्येहन नाङग्योकी स्याहललेगी थेन्ग्यो पादाङगी सेसीन। ओहले च्याह-च्यिहवा थाम्ज्यीगी खोगी स्या टेहपा काहङगे थु साहसीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.