ज्याल्गा 18 - ह्योल्मोबेबिलोन क्याहसा तोङदी काहल्ग्यो 1 दि तिङले ङाहगी लेहमेन स्यिहङगामकी स्याहप्च्यी च्यी़ स्यिहङगामले माहर फेप्केराङ जेक्यो थोङसीन। मिहरो ङ्याम्बु ओङ छ्यिम्बु येहकें ओहले मिहरोगी येहसेरकी पेहती जाम्बुलीङ थाम्ज्यी क्या-साङे काहल्सीन। 2 मिहरोगी सुङ-क़े छ्यिम्बु तेन्दी दि ल़ेहमु सुङ नाङसीन, छ्यिम्बु क्याहसा बेबिलोन ता़ह तोङसीन, ता़ह ल्हान्डा-ल्हेन्डी दाङ मेहचाङा नाम्स्यीया़, नामे नाजोकी नाम्दो लाहङज्ये ल़ेहमु दाङ चाङमा म़ेहबाकी च्याह-च्यिहवाया़ ओ़हला तेहच्ये येह। 3 च्यिबेमाना क्यिहपा थाम्ज्यीगी मोह ङ्याम्बु छ्येउ-छ्येंमु पेहक्यो सोङबे खुङ थाम्ज्यी छ्याङगी ल़ेहमु ज़ी़दी येह। जाम्बुलीङगी क्याहल्बुया़गी मोह ङ्याम्बु छ्येउ-छ्येंमु पेहसीन। ओहले मोहगी खाम्साङ-ङ्याहम्साङ पेहती मिहजी ताङग्यो सोङबे जाम्बुलीङकी छोङबाया़ ज्यिबुराङ छ्युक्पु काहल्सीन। 4 दि तिङले ङाहगी स्यिहङगामले दि ल़ेहमु सुङगेनॱराङ जेक्यो लेहमेन सुङ-क़े च्यी़ थ़ेसीन, “ए ङाहगी मिहया़! ओ़ह क्याहसालेगी फिला थेन्दी स्यो, ओ़ह पी़हमी ङ्याम्बु थुल्दी तिहक्पा माहबे! मोहगी ङ्य़ेहबा ख्याया़ थो़ला माहयोहङज्यु, 5 च्यिबेमाना मोहगी तिहक्पाया़ ता़ह माहङदे नामलाराङ दे़दी येह ओहले मोहगी पेहक्योगी तिहक्पा थाम्ज्यी किन्ज्योगी टेहम्बा साल नाङदी येह। 6 ख्याला काह-ठि पेहक्यो येहकें ओ़हठीॱराङ ख्यागीॱआङ मोहला पेहतोङ मोहगी ख्याया़गी तेहन्दाला च्यि च्यि पेहते येहबा मोहला ओ़हगी डापाल लो़दी तेर। मोहगी ख्याया़गी तेहन्दाला ठाबे पेहक्योगी ज़िगे स़ेह ता़ह ख्यागी ओ़ह म़ेदीॱआङ काहर्पा जे़दी मोहगी फार्कोला काङ तेर। 7 मोहगी काहजे चा़-ची़नाङ दाङ खाम्साङ-ङ्याहम्साङ पेहक्यो येहबा, ओहजेराङ तुहक्पु दाङ तुहङाल मोहला तेर। च्यिबेमाना मोहगी राहङ सेम सेमलाॱराङ माएँ, ‘ङाहनी क्याहल्मु छ्यिम्बु पेहते देला तेहकें। ङाह ह्युग्मो मिहन। ङाहगी नाहमॱआङ तुहङाल पेह कोहच्ये म़ेह।’ 8 ओ़ह सोङबे ङ्यिहमा च्यी़लाॱराङ मोह थो़ला तुहङाल, नाहजा दाङ मुहयीगी तुहक्पुया़ बाप ओहङज्ये येह ओहले मोहला मेहगी सा़ज्ये येह, च्यिबेमाना मोहला ठिम ताङ नाङगेन्गी चो़वो छ्येवा किन्ज्यो स्युक छ्यिम्बु जेते ज़्य़ू नाङदी येह।” 9 मोह ङ्याम्बु छ्येउ-छ्येंमु पेहकें दाङ खाम्साङ-ङ्याहम्साङ पेहकें जाम्बुलीङकी क्याहल्बुया़ मोहला सा़क्योगी तिहपा थोङदी मोहगी तेहन्दाला ज्यिबुराङ तुहङाल पेहती ङुहज्ये येह। 10 खुङया़गी मोहगी ङ्य़ेहबा राहङला माह फो़ज्यु म़ेदी था़-रिहङबुराङ लाहङदी दि ल़ेहमु माज्ये येह, “ओहो! ओहो! ख्ये क्याहसा छ्यिम्बु, ख्ये स्युक छ्यिम्बु बेबिलोन! याहम्बीज्यीलाराङ ख्येगी ङ्य़ेहबा ख्ये थो़ला बाप ओहङसीन।” 11 जाम्बुलीङकी छोङबाया़ मोहगी तेहन्दाला ज्यिबुराङ तुहङाल पेहती ङुहज्ये येह, च्यिबेमाना खुङगी चोङज्येला ज़्या़क्योगी पेलाया़ येहपाराङ सुज्यीगीॱआङ ङ्योहज्ये म़ेह, 12 पे यिहन्सीमाना सेर, ङुल, मणि, मोती, या़हबु काप्च्याया़, के़हज्येन काप्च्याया़, रेशम दाङ छ़े माहर्मु क्याहप्क्योगी काप्च्याया़, ओहले नामे नाजोकी टिहमा स्यिहम्बु खाएँगी स्यिङ, लाङबुर-छ्ये़की सोगी ज़ोक्योगी नामे नाजोकी पेलाया़, निङबु स्यिङगी पेलाया़, पित्तल दाङ च्या़गी पेलाया़ ओहले मर्बल, 13 स्यिङजा, मसाला, टिहमा स्यिहम्बु खाएँगी स्युक्पा, मूर्र, कार्पु स्युक्पा, कुहन्डुमकी-निङगु, नुम, मैदा, ने़ह, बासो दाङ ल़ूहया़, ताबुया़, स्यिङता-खोर्लोया़, योक्पु दाङ मिहया़ॱआङ ङ्योहज्ये म़ेह। 14 ओहले छोङबाया़गी मोहला माज्ये येह, “ए बेबिलोन, ख्येगी सेमला ने़क्यो या़हबु से़हया़ ता़ह तोर्सीन। ख्येगी क्युह-नोहर दाङ चा़-ची़नाङया़ थाम्ज्यीराङ तोङ सिहन्सीन, ता़ह दि से़हया़ नाहमाॱआङ ज्योर्च्ये म़ेह।” 15 दि पेलागी छोङबाया़ ओ़ह क्याहसाला छोङ पेहते क्युह ज़ोक्यो येहकें ता़ह दि थो़ला तुहक्पु बाप ओहङगे ज्यी़सुगी खुङया़ था़-रिहङबुराङ लाहङदी दि ल़ेहमु म़ेदी तुहङाल पेहती ङुहज्ये येह, 16 “‘दि क्याहसाकी तेहन्दाला काहजे ज्यी़ज्ये ल़ेहमु ती़हजी ओहङसीन!’ मोहगी या़हबु रे़हगी काप्च्या, के़हज्येन दाङ माहर्मु छ़े क्याहप्क्योगी काप्च्याया़ केहन्गो येहकें ओहले सेर, निङबु मणि दाङ मोतीगी केहन्ज्या ता़दी तेहको येहकें 17 याहम्बीज्यीलाराङ मोहती देजे माहङा क्युह नोहरया़ तोङसीन। छ्यु-टुहकी कप्तान, छ्यु-टुहला डोएँगी मिहया़, छ्यु-टुह चा़लतीएँगी मिहया़ ओहले छो-क्याहम्जोला ल़ेह पेहती टेहपा सोएँगी थाम्ज्यी मिहया़ था़-रिहङबुराङ लाहङदी तेहसीन।” 18 खुङया़गी ओ़ह क्याहसा छ्यिम्बु छी़दे तिहपा थेन्ग्यो थोङसीम्बाॱराङ दि ल़ेहमु म़ेदी क़े तेन्सीन, “दि ल़ेहमु छ्यिम्बु क्याहसा लेहमेन का़हॱलाङ म़ेहबा येहकें!” 19 ओहले खुङया़गी राहङ-राहङगी गो़ला सासा टाम्दी दि ल़ेहमु म़ेदी तुहङाल पेहती ङी़हदी क़े तेन्सीन, “दि क्याहसाला काहन्डुमु तुहक्पु बाप ओहङसीन। दि क्याहसाकी क्युह-नोहरगी पेहती छ्यु-टुहगी ताहक्पुया़ छ्युक्पु काहल्दी येहकें यिहॱनाङ याहम्बीज्यीलाराङ ओ़ह थाम्ज्यी तोङसीन।” 20 ए स्यिहङगामला ज़्य़ू नाङगेया़ थाम्ज्यी, मोह तोङदी काहल्ग्यो सोङबे क़ेहनाङ पेहतोङ! ए किन्ज्योगी मिहया़, ल़ेह-पेनया़ ओहले लुहङतेम्बाया़ ख्या थाम्ज्यी क़ेहनाङ पेहतोङ च्यिबेमाना मोहगी ख्याया़ला च्यि पेहपा, ओ़हगी छापला किन्ज्योगी मोहला ङ्य़ेहबा काल नाङदी येह। 21 ओहले स्युक छ्यिम्बु स्यिहङगामकी स्याहप्च्यी च्यी़गी ला़हवोर छ्येवा तोह च्यी़ क्या़दी दि ल़ेहमु सुङदी छो-क्याहम्जोला क्युर नाङसीन, “दि ल़ेहमुराङ पेहती दि क्याहसा छ्यिम्बु बेबिलोनॱआङ स्युकगी क्युर चाहङज्ये येह ओहले ओ़हदी येहपाराङ नाहमॱआङ थोङज्ये म़ेह। 22 वीणा, लेमु, दाङ रोहवा-लीङ फुएँया़गी क़े ओहले लु लेहन्गेया़गी क़े ता़ह यिहन्ज्यु ख्येगी नाहमॱआङ थे़ज्ये म़ेह ओहले का़हन्दीॱआङ ल़ेह-ल़ेहज्युला स्य़ूहक्योकी मिहया़ ख्येगी ज्योर्च्ये म़ेह। ला़हवोर था़क्यो क़े ओ़हला येहपाराङ नाहमॱआङ थे़ज्ये म़ेह। 23 लोकी क्या-साङे ता़ह यिहन्ज्यु ख्येला येहपा छ्या़ज्ये म़ेह ओहले माहक्पा साम्बा दाङ नामा साम्बाकी क़े ख्येला थे़ज्ये म़ेह। च्यिबेमाना ख्येगी छोङबाया़ जाम्बुलीङगी छ्यिम्बु-छ्यिम्बु मिहया़ येहकें, ओहले ख्येगी ङ्येहन क्याहप्ती क्यिहपा-क्यिहपागी मिहया़ला गो़ कोर च्य़ूसीन!” 24 ता़ह बेबिलोन क्याहसाला ङ्य़ेहबा फो़ सिहन्दी येह च्यिबेमाना लुहङतेम्बा दाङ किन्ज्योकी मिहया़ ओहले जाम्बुलीङला सेक्यो मिहया़गी ठा़ दि क्याहसालाराङ स्याहल्ग्यो च्य़ेह सिहन्ग्यो येहकें। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.