ज्याल्गा 17 - ह्योल्मोछ्यिम्बु स्याहङ-छो़मु 1 ओ़ह फार्को तिहन नोम्गेन स्यिहङगामकी स्याहप्च्यी तिहन नाहङले मेहन्दा च्यी़ ङाहसाला फेप्ती सुङ नाङसीन, “देला स्यो, माहङबुराङ चाङबुया़गी पोहला तेहकेन ओ़ह छ्यिम्बु स्याहङ छो़मुगी काह-ठि पेहती ङ्य़ेहबा खुर कोहच्ये येह म़ेदी ङाह ख्येला तेन्गे। 2 जाम्बुलीङकी क्याहल्बुया़गी मोह साला काहल्दे छ्येउ-छ्येंमु पेहको येहकें ओहले जाम्बुलीङकी मिहया़ छ्याङगी ज़िक्यो ल़ेहमु ओ़ह स्याहङ-छो़मु ङ्याम्बु छ्येउ-छ्येंमु पेहते ज़ी़दी तेहक्यो येहकें।” 3 ओहले ङाह नाम्पार-ताहक्पा थुगी काहङदे बोलो-छ्योलो काहल्सीन ओहले स्यिहङगामकी स्याहप्च्यीगी ङाहला रिह-काम्बुला नोम फेप्सीन। माहर्मु सेम्ज्येन थो़ला स्येहन्ग्योगी पी़हमी-पेहजा च्यी़ ङाहगी ओ़हला थोङसीन। ओ़ह सेम्ज्येनदी गो़ तिहन दाङ रोहवा च्यु थाल येहकें ओहले किन्ज्योला स्ये़हन्डील पेहकेन्गी मिहनया़ ओ़ह सेम्ज्येनगी ज़ुबु काहङग्याराङ प्री़हदे येहकें। 4 ओ़ह पी़हमीगी मुहक्पु दाङ माहर्मु क्या-साङे काप्च्या केहन्दी येहकें ओहले सेर, निङबु मणि दाङ मोतीकी क्येहन्ज्याया़गी ज़ुबु काहङग्याराङ ज़ाप्ते येहकें। मोहगी लाहक्पाला सेरकी फार्को च्यी़ थो़दी येहकें। ओ़ह फार्कोदी नाम्दो लाङज्ये ल़ेहमु से़हया़ दाङ मोहगी छ्येउ-छ्येंमुकी मेहचाङा से़हया़गी काहङग्यो येहकें। 5 मोहगी प्रालाला साङदे ज़्या़क्योगी मिहन च्यी़ प्री़हदे येहकें, “छ्यिम्बु बेबिलोन, थाम्ज्यी जाम्बुलीङकी स्याहङ-छो़मु दाङ नाम्दो लाहङज्ये ल़ेहमु ल़ेहया़ पेहकेनया़गी आमा!” 6 ओहले ङाहगी ओ़ह पी़हमीला किन्ज्योकी मिहया़गी ठा़ दाङ येशूगी तेहन्दाला पाङबु तेर्केनया़गी ठा़ थुङदी ज़िक्यो थोङसीन। मोहला थोङदी ङाह ज्यिबुराङ ह्अ ल़ेहसीन। 7 ओहजेला ओ़ह स्यिहङगामकी स्याहप्च्यीगी ङाहला सुङ नाङसीन, “ख्ये च्यिबे ह्अ ल़ेहक्यो?” ओ़ह पी़हमी दाङ मोहला खुर्केन गो़ तिहन दाङ रोहवा च्यु थो़क्यो सेम्ज्येनगी तेहन्दाला साङदे ज़्या़क्यो तामगी तेहन्दा ङाह ख्येला स्येकें। 8 ओ़ह सेम्ज्येन तोहङले सोम्बो येहकें यिहॱनाङ ताहन्दादी म़ेह। ओ़हदी साप्स्यी तिहङले थेन्ज्ये येह ओहले तोङज्ये येह। ओहले जाम्बुलीङ छ्या़ले यिहन्ज्यु मिहलीगी छ्य़ेला मिहन मा़हप्रीहबा जाम्बुलीङगी मिहया़गी ओ़ह सेम्ज्येनला थोङदी ह्अ ल़ेहज्ये येह च्यिबेमाना खो सोम्बो येहकें, ताहन्दा स्यिदी येह। यिहॱनाङ खो येहपाराङ ओहङज्ये येह। 9 दि केच्या ङोह स्य़ेज्येला येहन्देन दाङ रिहक्स्यी कोहएँ। सेम्ज्येनकी गो़ तिहनदी लाह तिहन यिहम्बा ओहले ओ़ह लाह खाला ओ़ह पी़हमी तेहती येह। 10 ओ़ह गो़ तिहनदी क्याहल्बु तिहनॱआङ यिहम्बा। मेहन्दा ङा तोङ सिहन्दी येह, च्यी़दी येहॱराङ येहबा, ओहले लेहमेन च्यी़दी तोहरोङॱआङ ओहङदी म़ेह। खो ओहङ फान्ज्यो ङ्यिहमा ङ्युहङसे़ च्यी़राङ खोगी ओङ छ्य़ेज्ये येह। 11 ओहले ओ़ह सेम्ज्येन, खो तोहङले सोम्बो येहकें यिहॱनाङ ता़ह म़ेह, खो क्याहल्बु क्येहपा यिहम्बा यिहॱनाङ खो तिहन नाहङले च्यी़ यिहम्बा ओहले खो तोङज्ये येह। 12 “ख्येगी थोङग्योकी रोहवा च्य़ूदी क्याहल्बु च्यु यिहम्बा, खुङया़गी ताहन्दा थु क्याहल्बु पेहच्येला ओङ ज्योर्ती म़ेह। यिहॱनाङ खुङया़गी ओ़ह सेम्ज्येन ङ्याम्बु ङ्यिहमा ङ्युहङसेगी तेहन्दाला क्याहल्बुगी ओङ ज्योर्च्ये येह। 13 खुङया़गी सेम च्यी़ पेहती राहङगी स्युक दाङ ओङ ओ़ह सेम्ज्येनला च्योल्ज्ये येह। 14 खुङया़गी ल़ूह स्ये़बुला टाह पेहते मा़ क्याहप्च्ये येह, यिहॱनाङ ल़ूह स्ये़बुगी खुङया़ला क्याहल्ज्ये येह, च्यिबेमाना मिहरो चो़वोया़गी चो़वो ओहले क्याहल्बुया़दीॱआङ क्याहल्बु यिहम्बा। ओहले मिहरोगी क़े क्याहप नाङग्यो दाम नाङग्यो दाङ यिह-छ्य़ेबाया़ॱआङ मिहरो ङ्याम्बुराङ ओहङज्ये येह।” 15 ओहले ओ़ह स्यिहङगामकी स्याहप्च्यीगी ङाहला सुङ नाङसीन, “ख्येगी थोङग्योकी ओ़ह स्याहङ-छो़मु तेहक्योगी छ्युया़दी लेहमेन लेहमेन क्यिहपा, लेहमेन लेहमेन क्याहल-खाप दाङ लेहमेन लेहमेन ताम माएँगी मिहया़ यिहम्बा।” 16 ख्येगी थोङग्योकी रोहवा च्यु दाङ ओ़ह सेम्ज्येनगी ओ़ह स्याहङ-छो़मुला नाम्दो पेहच्ये येह ओहले मोह ङ्याम्बु येहकेन्गी थाम्ज्यी फ्रो़दी मोहला च्येहन्डामु जे़दी मोहती स्या साहज्ये येह ओहले मोहला मेहला सा़ज्ये येह। 17 च्यिबेमाना किन्ज्योगी सुङ तेहन्दा माहन्डुप थु सेम च्यी़ डी़दी खुङया़गी राहङगी क्याहल्बुकी ओङ ओ़ह सेम्ज्येनला तेर्ती किन्ज्योगी थु-सेम छाङबु पेहच्येला मिहरोगी खुङगी सेमला दि स्याहल ज़्या़ नाङसीन 18 ख्येगी थोङग्योकी ओ़ह स्याहङ-छो़मु जाम्बुलीङगी थाम्ज्यी क्याहल्बुया़ थो़ला ओङ छ्य़ेएँगी क्याहसा छ्यिम्बु यिहम्बा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.