ज्याल्गा 16 - ह्योल्मोकिन्ज्योकी थुयालगी फार्को तिहन 1 ओहजेला ङाहगी किन्ज्योकी छ्योखाङले स्यिहङगामकी स्याहप्च्यी तिहनला दि ल़ेहमु सुङगेनॱराङ जेक्यो सुङ-क़े छ्यिम्बुच्यी थ़ेसीन, “ख्याया़ सोङ ओहले किन्ज्योकी थुयालगी फार्को तिहन जाम्बुलीङला पुङ तेर।” 2 दि तिङले तोहङस्यो स्यिहङगामकी स्याहप्च्यी फेप्ती राहङगी फार्को जाम्बुलीङला पुङ नाङसीन, ओहले दिगी पेहती ओ़ह सेम्ज्येनकी पार क्याहप्क्यो दाङ खोगी कुला छ्येपा फुल्गे मिहया़ला नाम्दो लाहङज्ये ल़ेहमु ज्यिबुराङ सुह क्याहप्केन्गी स्योवा दाङ बेल्देरया़ थेन्ज्ये छ़ूसीन। 3 दि तिङले ङ्यिपा स्यिहङगामकी स्याहप्च्यीगी राहङगी फार्को छो-क्याहम्जोला पुङ नाङसीन ओहले छो-क्याहम्जोकी छ्यु स्यिक्यो मिहगी ठा़ ल़ेहमुराङ काहल्सीन ओहले छो-क्याहम्जोला येहकेन्गी सोम्बो सेम्ज्येनया़ थाम्ज्यीराङ स्यिसीन। 4 दि तिङले सुम्बा स्यिहङगामकी स्याहप्च्यीगी राहङगी फार्को चाङबु दाङ छ्यु क्येसा ग्या़या़ला पुङ नाङसीन ओहले ओ़ह थाम्ज्यीराङ ठा़ काहल्सीन। 5 ओहले छ्युला ख्ये लेहन्गे स्यिहङगामकी स्याहप्च्यीगी दि ल़ेहमु सुङग्यो ङाहगी थ़ेसीन, “ओ़ नाम्पार-ताहक्पा किन्ज्यो राहङ ताहन्दा ज़्य़ू नाङदी येह ओहले तोहङ यिहन्ज्युराङ ज़्य़ू नाङदे येहकें, राहङगी ताङ नाङग्योकी ठिम तेहम्बा यिहन। 6 च्यिबेमाना खुङया़गी किन्ज्योकी मिहया़ दाङ लुहङतेम्बाया़ला सेसीन ओहले राहङगी खुङया़ला ठा़ थुङ च्य़ू नाङदी येह। खुङया़गी ज्योर कोहएँगी ङ्य़ेहबाॱराङ ज्योर्सीन।” 7 दि तिङले ङाहगी छ्येकाङले दि ल़ेहमु सुङग्यो सुङ-क़े च्यी़ थ़ेसीन, “वाङज्या छ्यिम्बु नोम्गेन चो़वो छ्येवा किन्ज्यो, तेहम्बाराङ राहङगी ताङ नाङगेन्गी ठिम ठाबे दाङ तेहन्दाम येह!” 8 दि तिङले ज़्यिबा स्यिहङगामकी स्याहप्च्यीगी राहङगी फार्को ङ्यिहमा थो़ला पुङ नाङसीन ओहले ङ्यिहमागी मिहया़ला डा़ च्य़ूएँगी ओङ ज्योर्सीन। 9 ङ्यिहमा टे़ह छान्दीगी मिहया़ला डा़सीन। दि तुहक्पु छ्यिम्बुया़ नोम नाङ थुप्कें किन्ज्योकी छेनला खुङया़गी स्ये़हन्डील पेहसीन। यिहॱनाङ खुङया़गी राहङगी पेहक्योकी तिहक्पाकी तेहन्दाला स्या़बा माहन्डुप ओहले किन्ज्योॱलाङ ज़िज्यिद माहफुल। 10 ओहले ङाबा स्यिहङगामकी स्याहप्च्यीगी राहङगी फार्को सेम्ज्येनकी ठिला पुङ नाङसीन। ओहले खोगी क्याहल्सी ना़-जुबे काहल्सीन। ओहले तुहक्पु-तुहङालगी पेहती मिहया़गी सो मुहर्सीन। 11 खुङ राहङगी स्योवा दाङ बेल्देरकी तुहक्पुगी पेहती खुङया़गी स्यिहङगामकी किन्ज्योला मे़मु क्याहप्सीन। यिहॱनाङ खुङगी राहङगी पेहक्योगी तिहक्पाकी ल़ेहया़ले स्या़बा माहन्डुप। 12 ओहले टुहप्पा स्यिहङगामकी स्याहप्च्यीगी राहङगी फार्को ओ़ह चाङबु छ्यिम्बु यूफ्रेटिसला पुङ नाङसीन, ओहले चाङबुकी छ्यु फुकॱराङ काम्सीन। ओहले स्यारले फेप नाङगेन्गी क्याहल्बुया़की तेहन्दाला फेप-लाहम ठाबे काहल्सीन। 13 ओहजेला ङाहगी डुक, सेम्ज्येन दाङ चिहन क्याहप्के लुहङतेम्बाकी खाले पाहल्बा ल़ेहमु थोङगेन मेहचाङा नाम्स्यी सुम थेन्ग्यो थोङसीन। 14 दिया़ याहम्जेन-याहम्जेनकी ताक्छेनया़ तेन्गेन्गी ल्हेन्डीगी नाम्स्यीया़ यिहम्बा। दिया़ थाम्ज्यी जाम्बुलीङकी क्याहल्बुया़ साला डोएँ, ओहले वाङज्या छ्यिम्बु नोम नाङगेन किन्ज्योकी चा़ छ्यिम्बु ङ्यिहमाला मा़ क्याहप्च्येला दिया़ला रुहप पेहकें। 15 “त़ेदोङ, ङाह कुमेन ल़ेहमुराङ पेहती ओहङज्ये येह। ङ्यि छ़ेती तेहकें दाङ राहङ काप्च्या सी़दे ज़्या़गेया़ काहजे सोनाम-साक्पु। मिहन्सीमाना खो च्येहन्डामुॱराङ डो कोहच्ये येह ओहले खो ङोह छा कोहच्ये येह।” 16 ओहले हिब्रू तामला आर-मागेड्डोन माएँ ग्या़ला ओ़ह ङ्येहम्बा नाम्स्यीया़गी ओ़ह क्याहल्बुया़ला रुहप पेहसीन। 17 ओहले तिहम्बा स्यिहङगामकी स्याहप्च्यीगी राहङगी फार्को ल्हा़बाला पुङ नाङसीन। ओहले छ्येकाङकी ज़्य़ूॱठिलेगी सुङ-क़े छ्यिम्बुच्यीगी दि ल़ेहमु सुङ नाङग्यो थ़ेसीन, “ता़ह सिहन्सीन।” 18 ओहजेला चिलाम क्याहप्सीन, नाम गड्याङ-गुडुङ पेहती क़े तेन्सीन ओहले ज्यिबुराङ छ्यिम्बु साङगुल काहल्सीन। ओहजे छ्यिम्बु साङगुलनी जाम्बुलीङ छ्या़ले यिहन्ज्यु ताहन्दा थु नाहमॱआङ ओहङदी म़ेहबा येहकें। दि साङगुल थाम्ज्यी म़ेदी ज्यी़ज्ये ल़ेहमु येहकें। 19 ओहले ओहजे छ्यिम्बु क्याहसानी बो सुम काहल्सीन। ओहले थाम्ज्यी क्याहल-खापकी क्याहसाया़ रोहम्दी तोङसीन। किन्ज्योगी ओ़ह छ्यिम्बु बेबिलोन माएँ क्याहसाला टेहम्बा साल नाङसीन ओहले मिहरो राहङगी ज्यी़ज्ये ल़ेहमु थुयालगी काहङग्यो फार्कोलेगी खोला थुङज्येला नाङसीन। ओ़ह फार्को, मिहरोगी थुयालकी छ्याङगी काहङग्यो येहकें। 20 छोलीङया़ थाम्ज्यीराङ तोर्ती काहल्सीन ओहले लाह-काहङया़ तोङदे काहल्सीन 21 ओहले नामले माहर किलो खाल ङ्यी़गी सेराया़ मिहया़ थो़ला क्याहप्च्ये छ़ूसीन। ज्यिबुराङ छ्यिम्बु सेरा क्याहप्ती मिहया़ तुहक्पुला छ्यिक्यो सोङबे मिहया़गी किन्ज्योला मे़मु क्याहप्च्ये छ़ूसीन च्यिबेमाना तेहम्बाराङ दि छे़राङ म़ेहबा तुहक्पु येहकें। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.