ज्याल्गा 15 - ह्योल्मोस्यिहङगामकी स्याहप्च्यी दाङ तिङस्यो ती़हजीला बाप ओहङगेन्गी तुहक्पुया़ 1 ङाहगी स्यिहङगामला छ्यिम्बु दाङ याहम्जेम्बाकी लेहमेन ता़स्यी च्यी़ थोङसीन: स्यिहङगामकी स्याहप्च्यी तिहनगी ज्युक्स्योलला बाप्केन्गी तुहक्पुया़ नोम्दे येहकें, च्यिबेमाना खुङया़लाॱराङ किन्ज्योकी थुयाल छाङबु डोज्ये येह। 2 दि तिङले ङाहगी मेह ङ्याम्बु से़क्योकी स्येलगी छो-क्याहम्जो ल़ेहमुज्यी थोङसीन। ओ़ह सेम्ज्येन, खोगी कु दाङ खोगी मिहनकी टाहङजी थो़ला क्याहल्गेनया़ राहङ लाहक्पाला किन्ज्योगी नाङग्यो वीणा थो़दी ओ़ह स्येलकी छो-क्याहम्जो सुहरला लाहङ तेहती येहकें। 3 खुङया़गी दि ल़ेहमु म़ेदी किन्ज्योला स्याहप्तो स्युहएँ मोशा दाङ ल़ूह स्ये़बुकी लु लेहन्गेनॱराङ येहकें, “ए वाङज्या छ्यिम्बु नोम नाङगेन्गी चो़वो छ्येवा किन्ज्यो, राहङगी जे नाङगेन्गी छ्या़लेया़ काहजे छ्यिम्बु दाङ याहम्जेन छ्येवाच्यी दु! काल्बा-काल्बा थुराङ ज़्य़ू नाङगेन्गी थाम्ज्यी म़ेदी चा छ्यिम्बुगी क्याहल्बु, राहङगी फेप-लाहमया़ टाहङदेन दाङ तेहन्दाम येह। 4 ओ़ चो़वो छ्येवा, राहङगी ज्यिक्पा मिहखुर्केन्गी मिह सुॱआङ येहटो ले? राहङ छेनकी ज़िज्यिद सुगी मे़हपेहटो ले? च्यिबेमाना राहङ च्यी़राङ नाम्पार-ताहक्पा ज़्य़ू नाङदी येह। क्यिहपा थाम्ज्यी ओहङदी राहङला ज्याल्ज्ये येह। च्यिबेमाना राहङगी छ्या़लेया़ टाहङदेन दु म़ेदी ता़ह मिहया़गी थोङ सिहन्दी येह।” 5 दि तिङले ङाहगी स्यिहङगामला येहकेन किन्ज्योकी छ्योखाङ खा फे़क्यो दाङ ओ़ह नाहङगी नाम्पार-ताहक्पा ग्या़ॱआङ थोङसीन। 6 चाङमा दाङ येहपा छ्याएँ थु नाहम्सा नोम्दी प्राहङगोला सेरकी थाक्पा ल़ेहमुज्यी ताहम्ग्यो स्यिहङगामकी स्याहप्च्यी तिहन ज्युक्स्योलला बाप ओहङगेन्गी तुहक्पु तिहन नोम्दी छ्योखाङले फिला थेन फेप्सीन। 7 ओहजेला ओ़ह सोम्बो सेम्ज्येन ज़्यि नाहङले सेम्ज्येन च्यी़गी नाहम्स्यी किन्दु ज़्य़ू नाङगेन किन्ज्योकी थुयालकी काहङग्यो सेरकी फार्को तिहन ओ़ह स्यिहङगामकी स्याहप्च्यी तिहनला तेर्सीन। 8 ओहले किन्ज्योकी ज़िज्यिद दाङ मिहरोकी स्युककी पेहते छ्योखाङ तिहपाकी काहङसीन। ओ़ह स्यिहङगामकी स्याहप्च्यी तिहनकी नोम्ग्यो तुहक्पु तिहन तेहन्दा माहन्डुप थु सुज्यीॱआङ छ्योखाङ नाहङला स्य़ूह मा़हखु। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.