ज्याल्गा 14 - ह्योल्मोल़ूह स्ये़बु दाङ मिह बुम च्यी़ दाङ तोङरा ज़्यिप्च्यु ज़्यि 1 ओहले ङाहगी येहपाराङ ताएँमु सियोन काहङला ल़ूह स्ये़बु ज़्याङदी ज़्य़ूक्यो थोङसीन। मिहरो ङ्याम्बु मिह बुम च्यी़ दाङ तोङरा ज़्यिप्च्यु ज़्यि येहकें ओहले खुङया़गी प्रालाला ल़ूह स्ये़बुकी छेन दाङ मिहरोकी याहपकी छेन प्रुहक्यो येहकें। 2 छ्यु छ्युम्ग्यार दाङ नाम गड्याङ-गुडुङ पेहती क़े तेन्ग्यो ल़ेहमु स्यिहङगामले ओहङग्योगी क़े च्यी़ ङाहगी थ़ेसीन। ओ़ह क़े वीणा तुहङगेनया़गी तुहङगेनॱराङ पेहक्योगी वीणाकी क़े ल़ेहमु येहकें। 3 ओ़ह बुम च्यी़ दाङ ज़्यिप्च्यु ज़्यि मिहया़ ज़्य़ू-ठिकी दिनला ओहले ओ़ह सोम्बो सेम्ज्येन ज़्यि दाङ छ्य़ेकी खेम्बुया़गी दिनला लाहङदी ल़ू साम्बा च्यी़ लेहन्गेनॱराङ येहकें। जाम्बुलीङले रिहन च्याल्दी खा फे़क्यो बुम च्यी़ दाङ ज़्यिप्च्यु ज़्यि मिहया़गी मिहम्बा लेहमेन सुज्यीगीॱआङ ओ़ह छ्ये़-लु लोप मी़हखुएँ येहकें। 4 खुङगी पी़हमी-पेहजाया़ ङ्याम्बु ल़ेह चोक्पा माहबेबा पेहती राहङला चाङमा ज़्या़दी येहकें। ल़ूह स्ये़बु का़ह-का़हला फेप नाङगे मिहरोकी तिङदा तिङ ताहदा क्याहप्ती डोएँया़ दिया़राङ यिहन्गे। खुङया़ किन्ज्यो दाङ ल़ूह स्ये़बुकी तेहन्दाला मिहया़गी पाहरक्यीले रिहन च्याल्दी खा फ़ेदी ज़्या़क्योगी फी़ ल़ेहमु यिहम्बा। 5 खुङया़गी खाले नाहमॱआङ स्योप क्याहप्केन्गी तामया़ माहथेन। खुङला च्यिॱआङ क्येन म़ेह। स्यिहङगामकी स्याहप्च्यी सुम 6 दि तिङले ङाहगी नामला उहर्ती तेहक्यो लेहमेन स्यिहङगामकी स्याहप्च्यी च्यी़ थोङसीन। थाम्ज्यी क्यिहपा, छाङ, ताम दाङ लुहङबाकी मिहया़ला था़ म़ेहबा या़हबु लेहङगु स्येच्येला खो ओहङगेॱराङ येहकें। 7 खोगी क़े छ्यिम्बु च्यी़ तेन्दी मासीन, “किन्ज्यो ङ्याम्बु ज्यी़दोङ ओहले मिहरोला ज़िज्यिद फुल्दोङ च्यिबेमाना ता़ह किन्ज्योगी मिहया़ला ठिम ताङ नाङगेन्गी ती़हजी लेप सिहन्दी येह। स्यिहङगाम, जाम्बुलीङ, छो-क्याहम्जो दाङ छ्यु क्येज्युया़ ज़ो नाङगेन्गी किन्ज्योला त़ेरा तेच्या फुल्दोङ।” 8 ओहले येहपाराङ लेहमेन स्यिहङगामकी स्याहप्च्यी च्यी़ दि ल़ेहमु म़ेदी ओहङसीन, “ता़ह चो़हसीन! क्याहसा छ्यिम्बु बेबिलोन चो़हसीन। ओ़हदीगी जाम्बुलीङकी थाम्ज्यी क्यिहपाया़ला मोहगी छ्येउ-छ्येंमुकी मेहन्ज्याले थुङ च्य़ूदी खुङया़ला ज़ि च्य़ूसीन।” 9 ओ़ह स्यिहङगामकी स्याहप्च्यी ङ्यी़ तिङले लेहमेन स्यिहङगामकी स्याहप्च्यी च्यी़ दि ल़ेहमु म़ेदी ओहङसीन, “का़हलेॱआङ सुज्यीगी ओ़ह सेम्ज्येन दाङ खोगी कुला छ्येपा फुल्दी प्राला दाङ लाहक्पाला खोगी पार क्याहप्सीन माना, 10 खोगीॱआङ किन्ज्योगी थुयालकी फार्कोला च्यिॱआङ मा़हसेहबा पेहती ठाबे पेहक्यो किन्ज्योकी थुयालकी छ्याङ काहर्पा थुङज्ये येह। ओहले नाम्पार-ताहक्पा स्यिहङगामकी स्याहप्च्यीया़ दाङ ल़ूह स्ये़बुकी दिनला मेह दाङ मेहबुङ नाहङला ङ्य़ेहबा काल नाङज्ये येह। 11 ओहले खुङया़ला तुहक्पु तेर्केन्की तिहपा नाहम्माॱनाङ याहर ङो़ले उहर्ती डोज्ये येह। सु सुगी ओ़ह सेम्ज्येन दाङ खोगी कुला छ्येपा फुल्दी खोगी मिहनगी पार क्याहप्कें खुङया़गी ङ्यिहन-नुहप नाहमॱआङ थाङ सो ङ्युहङज्ये म़ेह।” 12 ओ़ह सोङबे किन्ज्योकी का ची़गे दाङ येशूला तेहपा पेहकें किन्ज्योकी नाम्पार-ताहक्पा मिहया़ ना़स्यीङ छ्यिम्बु पेहती तेह कोहएँ। 13 दि तिङले ङाहगी स्यिहङगामले दि ल़ेहमु सुङग्यो सुङ-क़े च्यी़ थ़ेसीन, “दि ताम प्री़हदोङ: ता़ह यिहन्ज्यु चो़वोला यिह छ्य़ेदी स्यिएँया़ काहजे सोनाम-साक्पु।” नाम्पार-ताहक्पा थुगी दि ल़ेहमु सुङ नाङगु दु, “यिहम्बा, च्यिबेमाना ता़ह यिहन्ज्यु खुङया़गी राहङगी तुहक्पु दाङ कादुपले थाङ सो ङ्युहङज्ये येह ओहले खुङया़गी ल़ेह खुङ ङ्याम्बुराङ ओहङज्ये येह।” जाम्बुलीङकी कामे तुहएँगी ती़हजी 14 दि तिङले ङाहगी तासीन ओहले मुक्पा कार्पु च्यी़ दाङ ओ़ह थो़ला ज़्य़ू नाङग्यो मिहगी स़ेबु ल़ेहमु मेहन्दा च्यी़ला थोङसीन। मिहरोगी उला सेरकी पेस्यो दाङ छ्या़ला सोहरा नुम्बु च्यी़ नोम्ग्यो येहकें। 15 ओहले लेहमेन स्यिहङगामकी स्याहप्च्यी च्यी़ छ्योखाङले थेन्दी मुक्पा थो़ला ज़्य़ू नाङगेन्दीला क़े छ्यिम्बु तेन्दी दि ल़ेहमु मासीन, “राहङगी सोहरा नोम्दी कामे तुह नाङदोङ च्यिबेमाना ता़ह ती़हजी काहल सिहन्सीन। जाम्बुलीङकी कामे छ़े सिहन्दी येह।” 16 दि ल़ेहमु पेहती मुक्पा थो़ला ज़्य़ू नाङगेन्दीगी राहङगी सोहरा नोम्दी जाम्बुलीङगी कामेया़ तुह नाङसीन। 17 दि तिङले ङाहगी स्यिहङगामला किन्ज्योकी छ्योखाङले फेप्क्यो लेहमेन स्यिहङगामकी स्याहप्च्यी च्यी़ थोङसीन। मिहरोकी छ्या़लाॱआङ सोहरा नुम्बु च्यी़ येहकें। 18 ओहले मेह थो़ला ओङ येहकेन लेहमेन स्यिहङगामकी स्याहप्च्यी च्यी़ छ्येकाङले फेप्सीन। मिहरोगी सोहरा नोम्गे स्यिहङगामकी स्याहप्च्यीला क़े छ्यिम्बु तेन्दी दि ल़ेहमु सुङ नाङसीन, ख्ये लाहक्पाला येहकेन सोहरा नुम्बु लेहन्दी जाम्बुलीङकी कुहन्डुमया़ तिहदोङ, च्यिबेमाना ता़ह जाम्बुलीङकी कुहन्डुमया़ या़हबु पेहती छ़े सिहन्दी येह। 19 ओहले ओ़ह स्यिहङगामकी स्याहप्च्यीगी राहङगी सोहरा नोम्दी जाम्बुलीङकी कुहन्डुमया़ तुह नाङसीन ओहले ओ़ह कुहन्डुमया़ला किन्ज्योगी थुयाल ज़्याङ नाङगे छ्यिम्बु कुहन्डुम च्यिर्के ग्या़ला क्युर नाङसीन। 20 ओहले क्याहसा फिला येहकेन्की कुहन्डुम च्यिर्सा ग्या़ला ओ़ह कुहन्डुमया़ च्यिर्सीन ओहले ओहलेगी ठा़गी स्योलो थेन्सीन। ओ़ह ठा़, ताबुगी खाला क्याहप्क्योकी खम्देर थु थोम्बु ओहले नेसा क्याह सुमचे थु रिहङबु फेल्दी येहकें। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.