ज्याल्गा 13 - ह्योल्मोछो-क्याहम्जो नाहङले थेन्दी ओहङग्योगी सेम्ज्येन 1 दि तिङले ङाहगी छो-क्याहम्जो नाहङले सेम्ज्येन च्यी़ थेन्दी ओहङगेॱराङ पेहक्यो थोङसीन। खोती रोहवा च्यु दाङ गो़ तिहन थाल येहकें ओहले रोहवा च्युलाॱराङ पेस्यो येहकें ओहले खोती गो़ तिहनला किन्ज्योला स्ये़हन्डील पेहकेन्गी मिहन च्यी़ प्रुहक्यो येहकें। 2 ङाहगी थोङग्योकी ओ़ह सेम्ज्येन प्रा़ह-च्येन ल़ेहमु येहकें। खोगी काङबाया़ तोहमदी ल़ेहमु येहकें ओहले खादी सिङग्यीदी ल़ेहमु येहकें। ओ़ह डुकगी राहङदी स्युक, ॱठी दाङ ओङ छ्यिम्बु ओ़ह सेम्ज्येनला तेर्सीन। 3 खोती गो़ च्यी़लादी ज्यिबुराङ छ्यिम्बु नाहन्दी काहल्ग्यो ल़ेहमु थोङगो येहकें, यिहॱनाङ खोगी नाहन्दी टा़हक्यो येहकें। ओहले जाम्बुलीङ थाम्ज्यी ह्अ ल़ेहदी ओ़ह सेम्ज्येन तिङला ताहदा क्याहप्ती काहल्सीन। 4 मिहया़गी डुकला छ्येपा फुल्गो येहकें, च्यिबेमाना खोगी राहङदी ओङ ओ़ह सेम्ज्येनला तेरक्यो येहकें। खुङया़गी दि ल़ेहमु म़ेदी ओ़ह सेम्ज्येनला छ्येपा फुल्सीन, “दि सेम्ज्येन ल़ेहमु लेहमेन सु येहबा? खो ङ्याम्बु मा़ क्याहप ख़ूएँ सु येहबा?” 5 ओहले किन्ज्योला छ्य़ेन्दो तेन्दी स्ये़हन्डील पेहकेन्गी ताम छिकाया़ खोला मा च्य़ूसीन। ओहले दावा ज़्यिप-च्यु ङ्यी़ थु खोला ओङ छ्य़ेज्येला तेर्सीन। 6 ओहले खोगी किन्ज्योला टाह पेहती मिहरोकी छेन, ज़्य़ूसा ग्या़ दाङ स्यिहङगामला ज़्य़ू नाङगेन थाम्ज्यीला स्ये़हन्डील पेहच्ये छ़ूसीन। 7 ओहले खोला किन्ज्योकी मिहया़ ङ्याम्बु मा़ क्याहप्ते क्याहल्ज्येला ओङ तेर्ते येहकें। थाम्ज्यी छाङ, लुहङबा, ताम दाङ क्यिहपाया़ थो़ला ओङ छ्य़ेज्येला खोला ओङ तेर्सीन। 8 सेक्यो ल़ूह स्ये़बुकी मिहलीकी छ्य़ेला जाम्बुलीङ छ्या़ नाङगे म़ेदी तोहङलेराङ किन्ज्योगी मिहन प्रुह नाङग्यो मिहया़गी च्यी़राङ ओ़ह सेम्ज्येनला छ्येपा फुल्ज्ये म़ेह यिहॱनाङ ओ़ह म़ेदी लेहमेन, जाम्बुलीङला तेहकें थाम्ज्यी मिहया़गीनी ओ़ह सेम्ज्येनला छ्येपा फुल्ज्ये येह। 9 सुती नाम्ज्यो येहबा खोगी ङ्यिहन्ज्यु! 10 चोन-खाङला डो कोहएँदी चोन-खाङलाराङ डोज्ये येह, पादाङगी तुप्ती स्यि कोहएँया़ पादाङगीॱराङ तुप्ती स्यिज्ये येह। ओ़ह सोङबे किन्ज्योकी मिहया़ ङ्याम्बु ना़स्यीङ छ्यिम्बु दाङ तेहपा ओहङ कोहएँ। जाम्बुलीङले थेन्ग्योगी सेम्ज्येन 11 दि तिङले ङाहगी जाम्बुलीङले थेन्दी ओहङग्योगी लेहमेन सेम्ज्येन च्यी़ थोङसीन। ल़ूह स्ये़बुदी ल़ेहमु खोती रोहवा ङ्यी़ येहकें ओहले खोती क़ेदी डुकती ल़ेहमु येहकें। 12 खोगी तोहङस्यो सेम्ज्येनकी ओङ लाहमलेॱराङ ओ़ह सेम्ज्येनकी छापला ओङ छ्य़ेसीन ओहले जाम्बुलीङ दाङ ओ़हला तेहकेन्गी मिह थाम्ज्यीला खोगी तोहङस्यो सेम्ज्येनला छ्येपा फुल च्य़ूसीन। ओ़ह सेम्ज्येनदी नाहन्दी छ्यिम्बु टा़ह सिहन्ग्यो येहकें। 13 दि ङ्यिपा सेम्ज्येनगी याहम्जेन छ्येवाकी ताक्छेनया़ तेन्सीन। मिह थाम्ज्यीगी थोङगे पेहती खोगी नामले माहर जाम्बुलीङला मेह ताहप च्य़ूसीन। 14 ओ़ह तोहङस्यो सेम्ज्येनकी छापला दि ल़ेहमु याहम्जेम्बाकी ताक्छेनया़ तेन्गेन्गी स्युक खोला तेर्ते येहकें। दिगी पेहतीराङ खोगी जाम्बुलीङकी मिह थाम्ज्यीला गो़ कोर च्य़ूसीन। पादाङगी नाहन्दी काहल्देॱआङ थारक्यो ओ़ह सेम्ज्येनला ची़नाङ पेहच्येला थाम्ज्यीगी खोगी कु जे़दोङ म़ेदी ओ़ह ङ्यिपा सेम्ज्येनगी मिहया़ला कुल्सीन। 15 तोहङस्यो सेम्ज्येनगी कुगी ताम मा ख़ूज्यु ओहले ओ़ह कुला छ्येपा मेहफुल्गेनया़ला स़े तेर्च्यु म़ेदी ओ़ह सेम्ज्येनकी कुला ऊ फी़ तेर्केन ओङ ङ्यिपा सेम्ज्येनला तेर्ते येहकें। 16 ओहले खोगी फेमा दाङ छ्यिम्बु, छ्युक्पु दाङ प्राङबु, योक्पु दाङ योक्पु माहबेबा थाम्ज्यीला राहङदी योबा लाहक्पाला क्यिनी प्रालाला पार क्याहप च्य़ूसीन। 17 ओ़ह पार माहक्याहप्पा पेहती सुज्यीगीॱआङ ङ्योहएँ दाङ चोङगेन पेह मी़हखुएँ काहल्सीन। ओ़ह पार-ती ओ़ह सेम्ज्येनकी मिहन यिहम्बा क्यिनी ओ़ह मिहनगी टाहङजी यिहम्बा। 18 दिला रिहक्स्यी कोहएँ, काहदी ख्येम्बा-ताहक्पु येहबा खोगी ओ़ह सेम्ज्येनकी टाहङजी ङोह स्ये़ज्यु च्यिबेमाना ओ़ह टाहङजीगी मिह च्यी़गी मिहन प्रा साल्गे ओहले खोती टाहङजीदी टुहप्क्या टुहप्च्यु ट़ूह यिहम्बा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.