ज्याल्गा 12 - ह्योल्मोपी़हमी-पेहजा दाङ डुक 1 दि तिङले नामला याहम्जेम्बाकी ता़स्यी छ्यिम्बु च्यी़ थोङसीन। ओहले पी़हमी-पेहजा च्यी़ॱआङ थोङसीन, मोहगी ङ्यिहमाला काप्च्या ल़ेहमु पेहती योल्ग्यो येहकें ओहले मोहगी काङबा चो़ला दायुम दाङ मोहगी गो़ला कार्मा च्यिङ्यी़गी पेस्यो केहन्ग्यो येहकें। 2 मोह ज़ुबु ङ्यिहपा काहल्दे येहकें ओहले पेहजा क्येएँगी नाहजा क्याहप्ती सुहगी क़े तेन्गेॱराङ येहकें। 3 दि तिङले नामला राहङसा याहम्जेम्बाकी ता़स्यी च्यी़ थोङसीन। गो़ तिहन, रोहवा च्यु दाङ गो़ तिहनगालाॱराङ पेस्यो केहन्ग्योकी छ्यिम्बु डुक माहर्मु च्यी़ येहकें। 4 ओहले ओ़ह डुककी ङामागी नामला येहकेन्की कार्मा बो सुमला बो च्यी़ च्यो़हदी जाम्बुलीङला क्युर चाहङसीन। पेहजा क्ये-लुहङ मे़हबाराङ ओ़ह पेहजाला साहज्ये म़ेदी डुक ओ़ह पी़हमी दिनला लाङदी तेहक्यो येहकें। 5 ओ़ह पी़हमीगी थाम्ज्यी क्यिहपाया़ला च्या़गी प्रेहकागी ओङ छ्य़ेएँगी पुह च्यी़ क्येसीन। ओ़ह पेहजाला किन्ज्यो साला क्या़दी मिहरो ज़्य़ू नाङगेन्गी ज़्य़ू-ठिला ख्येर्सीन। 6 ओहले ओ़ह आमादी रिह-काम्बुला फार प्रे़हदी काहल्सीन। ओ़ह ग्या़दी किन्ज्योगी मोहगी तेहन्दाला ङ्यिहमा तोङरा च्यी़ दाङ ङ्यिहक्या डुप्च्यु थु सो नाङज्येला ठाबे जे नाङग्यो येहकें। 7 दि तिङले स्यिहङगामला मा़ क्याहप्च्ये छ़ूसीन। मिखाएल दाङ खोगी राहङसा स्याहप्च्यीया़गी ओ़ह डुक ङ्याम्बु मा़ क्याहप्सीन। ओहले डुक दाङ खोगी स्याहप्च्यीया़गीॱआङ मा़ क्याहप्सीन, 8 यिहॱनाङ खुङया़ फाम्सीन ओ़ह सोङबे खुङया़ला स्यिहङगामला ग्या़ माहन्ज्योर। 9 दि ल़ेहमु पेहते ओ़ह डुक, खो ताहङबोकी प्रुहल यिहन्गे, खो थाम्ज्यी जाम्बुलीङला गो़ कोर च्य़ूएँगी दियाबलस दाङ ती़ह गो-छ्येवा यिहम्बा। खो दाङ खोगी स्याहप्च्यीया़ला स्यिहङगामले माहर जाम्बुलीङला क्युर ज़ाङग्यो येहकें। 10 ओहले ङाहगी स्यिहङगामला दि ल़ेहमु सुङगेनॱराङ जेक्यो सुङ-क़े छ्यिम्बु च्यी़ थ़ेसीन, “ता़ह ओहराङ किन्ज्योकी थार्पा, स्युक, क्याहल्सी दाङ मिहरोकी मास्यीकागी ओङ छ्य़े नाङगेन्गी ती़हजी लेप्ती येह। च्यिबेमाना ओहराङ आदा-नो़ह दाङ आज्यी-नुहमुया़ला ङ्यिहन-नुहप किन्ज्योकी दिनला फातुर च़ूगेन ती़ह गो-छ्येवाला स्यिहङगामले माहर क्युर चाहङदी येह। 11 ल़ूह स्ये़बुकी ठा़गी, खुङया़गी प्रा साल्ग्यो तेहन्दामकी सुङगी ओहले खुङया़ स्यिज्येलाॱआङ ठाबे काहल्ग्यो सोङबे खुङया़गी खोला क्याहल सिहन्दी येह। 12 ओ़ह सोङबे ए स्यिहङगामला ज़्यू़गेनया़, ख्याया़ क़ेहनाङ पेहतोङ। यिहॱनाङ जाम्बुलीङ दाङ छो-क्याहम्जो काहजे छा तुहवा! च्यिबेमाना खुङया़गी पाहरक्यीला ती़ह गो-छ्येवा च्योम्दी ओहङदी येह ओहले खोगी ती़हजी ता़ह चो़हज्ये पेहती येह म़ेदी खोला क्यी़ह येह।” 13 ओहले ओ़ह डुकगी राहङला जाम्बुलीङला क्युरक्यो दुबा म़ेदी क्यी़ह ज्योर फान्ज्यो खोगी ओ़ह पुह क्येक्यो आमाला ङेच्ये छ़ूसीन। 14 यिहॱनाङ ओ़ह पी़हमीला ओ़ह डुक यिहन्ज्यु थार्ते रिह-काम्बुला उहर्ती डोज्येला छ्यिम्बु ख्युङदी स्योक्पा ङ्यी़ नाङदे येहकें। ओ़ह रिह काम्बु, लोह फेदाङ सुम थु ओ़ह पी़हमीला सोज्ये दाङ थार च्य़ूज्येगी तेहन्दाला ठाबे पेहक्यो येहकें। 15 ओ़ह पी़हमीला रिह-स्योलोगी ख्येर च्य़ू म़ेदी ओ़ह डुकगी राहङ खालेगी चाङबु ल़ेहमुराङ छ्यु तेन्सीन। 16 यिहॱनाङ जाम्बुलीङगी ओ़ह पी़हमीला थार च्य़ूज्येला राहङगी खा क्याहङदी ओ़ह डुकगी खाले थेन्ग्योगी छ्यु ङ्यिहप्सीन। 17 ओहजेला ओ़ह डुक पी़हमी ङ्याम्बु जेन माहङबु स्यिहङताङ लाहङसीन ओहले मोहगी छार्क्यीनया़, किन्ज्योकी का ची़गेया़ दाङ येशूकी लुहङ थो़ला यिह-छ्य़ेबु येहकेनया़ ङ्याम्बु मा़ क्याहप्च्येला काहल्सीन। 18 ओहले ओ़ह डुक छो-क्याहम्जोकी सुहरला लाहङदी तेहसीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.