ज्याल्गा 11 - ह्योल्मोपाङबु ङ्यी़ 1 दि तिङले ताहप्च्येला ङाहला ङ्युङमागी प्रेहका ल़ेहमु च्यी़ तेर्ती येहकें ओहले मेहन्दा च्यी़गी ङाहला दि ल़ेहमु मासीन, “लाहङदी सोङ, किन्ज्योकी छ्योखाङ दाङ ओ़हगी छ्येकाङ ताहप्तोङ ओहले छ्योखाङला छ्येपा फुल्गेया़ला टाहङमा क्याहप्तोङ। 2 यिहॱनाङ छ्योखाङ फिकी यिल्दोलादी माहताहप, च्यिबेमाना ओ़हदी राहङसा क्यिहपाया़ला तेर्ती येह ओहले खुङया़गी दावा ज़्यिप-च्यु ङ्यी़ थु नाम्पार-ताहक्पा क्याहसाला छ्याबा-छ्योबे च्योप्च्ये येह। 3 ओहले फाजीगी काप्च्या केहन्ग्यो ङाहगी पाङबु तेर्के मिह ङ्यी़ला ङ्यिहमा तोङरा च्यी़ दाङ ङ्यिहक्या डुप्च्यु थु किन्ज्योकी सुङ प्रा-साल्ज्येला ताङज्ये येह।” 4 ओ़ह मिह ङ्यी़दी जाम्बुलीङकी चो़वोकी दिनला लाङदे ज़्या़क्योकी जैतूनकी तोहङबो ङ्यी़ दाङ छ्येकुङ ङ्यी़ यिहम्बा। 5 का़हलेॱआङ सुज्यीगी खुङया़ला तोङ च्य़ूज्ये छोल्सीन माना खुङ खाले थेन्ग्यो मेहगी खुङया़गी टाहया़ला तोङ च्य़ूज्ये येह। ओ़हठीॱराङ पेहती खुङया़ला तोङ च्य़ूज्ये छोल्गेया़ थाम्ज्यीला सेच्ये येह। 6 किन्ज्योकी सुङ खुङया़गी स्ये माहसीहन थु नाम माह-क्याहप्च्यु म़ेदी नाम का़ ख़ूएँगी ओङ खुङया़ला तेर्ती येह। ओहले छ्युया़ला ठा़ ज़ोएँ दाङ खुङया़गी सेमला ने़क्यो ती़हजीला जाम्बुलीङला नामे नाजोकी याहमया़ ख्योङगेन्गी ओङॱआङ खुङ ङ्याम्बु येह। 7 ओहले खुङया़गी प्रा साल कोहएँगी ल़ेहया़ सिहन फान्ज्यो साप्स्यी तिहङले थेन्दी ओहङगेन ओ़ह सेम्ज्येनगी खुङ ङ्यी़ ङ्याम्बु मा़ क्याहप्ती खुङया़ला क्याहल्दी सेच्ये येह। 8 खुङकी रो़ह ओ़ह छ्यिम्बु क्याहसा यरूशलेमकी लाहमया़ला आहन्डाराङ लिहच्ये येह। पे यिहॱना़ ओ़ह क्याहसाती “सदोम” दाङ “मिश्र” यिहम्बा। ओ़ह क्याहसालाराङ खुङया़गी चो़वोला क्याहङस्यीङला च्याङग्यो येहकें। 9 ङ्यिहमा फेदाङ ज़्यि थु खुङया़की रो़हला मिहया़, छाङया़, तामया़ दाङ क्यिहपा-क्यिहपाकी मिहया़गी ते़मु ताज्ये येह ओहले ओ़ह रो़हया़ तुह च्य़ूज्ये म़ेह। 10 ओ़ह पाङबु ङ्यी़ स्यिक्यो सोङबे जाम्बुलीङकी मिहया़ क़ेहनाङ पेहच्ये येह ओहले च्यी़गी च्यी़ला क्ये़गाया़ तेर्ते खाम्साङबु पेहच्ये येह। च्यिबेमाना दि लुहङतेम्बा ङ्यी़गी जाम्बुलीङकी मिहया़ला माहङबुराङ तुहक्पु तेरक्यो येहकें। 11 ङ्यिहमा फेदाङ ज़्यि योहल फान्ज्यो किन्ज्यो लाहमले मिहली नाङगेन्गी ऊ ओ़ह मिह ङ्यी़ नाहङला स्य़ूहसीन ओहले खुङ ङ्यी़ राहङगी काङबा पा़दे क्येरे लाहङदी तेहसीन। ओ़हदी थोङदी मिहया़ माहङबुराङ ज्यी़सीन। 12 ओहले ओ़ह लुहङतेम्बा ङ्यी़गी स्यिहङगामले दि ल़ेहमु सुङ-क़े छ्यिम्बुच्यी थ़ेसीन, “देला याहर स्यो।” ओहले थाम्ज्यी टाहया़गी ताएँ ताएँॱराङ ओ़ह मिह ङ्यी़ मुक्पाला क्या़दी स्यिहङगामला काहल्सीन। 13 ओ़हजेलाराङ स्युक छ्यिम्बु साङगुल ओहङसीन ओहले ओ़ह छ्यिम्बु क्याहसाती बो च्यु रोहम्सीन। ओहले दि साङगुल डोएँमु मिह तोङरा तिहन स्यिसीन। ओहले लेहमेन बाँकी लिहक्यो मिहया़ माहङबुराङ ज्यी़सीन ओहले खुङगी स्यिहङगामकी किन्ज्योला त़ेरा तेच्या फुल्सीन। 14 ज्यिक्पा ङ्यिपा काहल्सीन, “त़ेदोङ, सुम्बा ज्यिक्पा ग्यो़बाराङ ओहङज्ये पेहती येह।” तिहम्बा रोहवा-लीङ 15 ओहले तिहम्बा स्यिहङगामकी स्याहप्च्यीगी राहङ ङ्याम्बु येहकेन्की रोहवा-लीङ फुसीन, ओहले स्यिहङगामला छ्यिम्बु-छ्यिम्बु सुङ-क़ेगी दि रोहवा सुङ नाङसीन, “जाम्बुलीङगी क्याहल्सी ओहराङ चो़वो दाङ किन्ज्योकी मास्यीकागी क्याहल्सी काहल्दे येह ओहले मास्यीकागी नाहम्स्यी किन्दु ओङ छ्य़े नाङज्ये येह।” 16 ओहले किन्ज्योकी दिनला राहङ-राहङगी ज़्य़ू-ठिला ज़्य़ू नाङगेन ओ़ह खाल च्यी़ ज़्यि छ्य़ेकी खेम्बुया़गी किन्ज्योगी स्याहपला खेप्चु क्याहप्ती दि ल़ेहमु मासीन, 17 “ओ़ वाङज्या छ्यिम्बु नोम्गेन्गी चो़वो छ्येवा किन्ज्यो, ङ्यिहगी राहङला थुज्यी-छ्ये़ फुल्गो येह। राहङ ताहन्दा ज़्य़ू नाङदे येह ओहले तोहङ यिहन्ज्युराङ ज़्य़ू नाङदी येहकें, च्यिबेमाना राहङगी वाङज्या छ्यिम्बु नोम नाङदी येह ओहले राहङगी क्याहल्सी छ़ू नाङदी येह। 18 ओहले क्यिहपा-क्यिहपाकी मिहया़ स्यिहताङ लाहङदी येह, यिहॱनाङ ता़ह राहङगी थुयाल ज़्याङगेन्गी ती़हजी लेप्सीन। राहङगी ता़ह स्यिक्यो मिहया़ला ठिम ताङ नाङगेन्गी ती़हजी लेप्ते येह। राहङला स्याहप्तो स्युहएँया़, लुहङतेम्बाया़, राहङगी दाम नाङग्योकी मिहया़ ओहले राहङगी छेनकी ज्यिक्पा खुर्के फ़ेमा-छ्यिम्बु थाम्ज्यीला च्याहगा नाङगेन्गी ती़हजी ओहले जाम्बुलीङला तोङ च्य़ूगेया़ला सिहन्दा च्येकेन्गी ती़हजी लेप्ते येह।” 19 ओहले स्यिहङगामला किन्ज्योकी छ्योखाङ खा फ़ेसीन, ओहले छ्योखाङ नाहङला ताहम्ज्या ज़्या़ नाङग्योकी काहम थोङसीन। ओ़ह तिङला येहसेर क्याहप्सीन। ज़ी़ज्ये ल़ेहमु क़ेया़ ओहले गड्याङ-गुडुङ म़ेदी नाम क़े तेन्ग्यो थ़ेसीन। साङगुल ओहङसीन ओहले छ्यिम्बु-छ्यिम्बु सेराया़ क्याहप्सीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.