ज्याल्गा 1 - ह्योल्मो1 दि छ्य़ेकी केच्या येशू मास्यीकागी तेन नाङग्यो यिहम्बा। राहङ स्याहप्च्यीया़गी ग्यो़बाराङ बाप ओहङज्ये पेहक्यो केच्याया़गी तेहन्दाला ङोह स्य़े ख़ूज्यु म़ेदी किन्ज्योगी येशूला दि ज्याल्गा नाङग्यो येहकें। येशूगी दि केच्या प्रा साल नाङज्येला स्यिहङगामकी स्याहप्च्यी च्यी़ला राहङला स्याहप्तो स्युएँगी यूहन्नासाला ताङ नाङसीन। 2 राहङगी थोङग्यो केच्या थाम्ज्यीराङ यूहन्नागी प्रा साल्दी येह। ओहले खोगी स्येक्यो किन्ज्योकी लेहङगु दाङ येशू मास्यीकागी तेन नाङग्यो तेहन्दामकी तामया़ दिया़राङ यिहम्बा। 3 दि छ्य़े टा़हगेन दाङ तिङला बाप ओहङज्ये पेहक्यो केच्याया़गी तेहन्दाला प्रुह नाङग्योकी सुङला ङ्यिहन्दी ची़गेया़ काहजे सोनाम-साक्पु। च्यिबेमाना दि केच्याया़ ग्यो़बाराङ तेहन्दा डुप्च्ये येह। छेन्छोक तिहनला यूहन्नाकी टास्यी-देले स्युह नाङग्यो 4 एशिया क्याहल-खाप छ्यिम्बुला येहकेन छेन्छोक तिहन्गालाॱराङ ङाह यूहन्नागी टास्यी-देले स्युहउ येह: साज्या-नाम्ज्या छ्या़ च्य़ू नाङगे म़ेदी तोहङलेराङ किन्ज्यो ज़्य़ू नाङदी येहकें ओहले ताहन्दाॱआङ ज़्य़ू नाङदी येह ओहले नाहम्स्यी किन्दुॱराङ ज़्य़ू नाङज्ये येह, ओहले मिहरोगीॱराङ ख्याया़ला काटीन दाङ स्य़िहदे नाङज्यु। ज़्य़ू-ठि दिनला ज़्य़ू नाङगेन्गी थु तिहन लाहमले, 5 ओहले यिह-छ्य़ेबु पाङबु दाङ टोहङग्योलेगी सोम्बो ज़्याङ नाङगेया़ला तोहङस्यो ज़्याङ नाङगे जाम्बुलीङकी क्याहल्बुया़गी क्याहल्बु, येशू मास्यीका लाहमलेॱआङ ख्याया़ला काटीन दाङ स्य़िहदे ओहङज्यु। ओहराङला चेवा जे नाङगे येशू मास्यीकागी मिहरो राहङगी ठा़ लाहमले ओहराङला तिहक्पालेगी खा फे़ नाङदी येह। 6 मिहरोगी राहङगी किन्ज्यो दाङ याहपला स्याहप्तो स्युहज्येला ओहराङला पूजाहारीकी ओङ नाङदी येहबा। ओहले येशू मास्यीकाकी चा़ दाङ ओङ नाहम्स्यी किन्दु लिहच्यु। आमेन। 7 त़ेदोङ, मिहरो मुक्पाला फेप नाङगेराङ येह, ओहले मिह थाम्ज्यीगी मिहरोला थोङज्ये येह ओहले मिहरोला दुङगी चो़क्योया़गीॱआङ थोङज्ये येह। थाम्ज्यी मी़गी मिहरोला थोङज्ये येह। ओहले जाम्बुलीङकी थाम्ज्यी क्यिहपाया़गी मिहरोगी तेहन्दाला ङ्याहङेन पेहच्ये येह। दि ल़ेहमुराङ ओहङज्यु। आमेन। 8 “अल्फा दाङ ओमेगा ङाहराङ यिहन,” सुङदी ओङज्या छ्यिम्बु नोम नाङगेन चो़वो छ्येवा किन्ज्योगी सुङ नाङगु दु, “मिहरो साज्या-नाम्ज्या छ्या़ च्य़ू नाङगे म़ेदी तोहङ यिहन्ज्युराङ ज़्य़ू नाङदी येहकें ओहले ताहन्दाॱआङ ज़्य़ू नाङदी येह ओहले फेप नाङज्ये येह।” चो़वो येशू मास्यीकाकी ज्याल्गा 9 ङाह ख्याया़गी आदा यूहन्ना यिहम्बा। ओहले येशूकी तुहक्पु, क्याहल्सी दाङ ना़स्यीङला ङाहॱआङ ख्या ङ्याम्बु-ङ्याम्बुराङ येहकें। किन्ज्योकी सुङ दाङ येशू मास्यीकाती पाङबु तेहक्यो सोङबे ङाह पत्मोस माएँ छोलिङला येहकें। 10 चो़वोकी ङ्यिहमाला ङाह नाम्पार-ताहक्पा थुगी काहङदी येहकें, ओहले रोहवा-लीङती ल़ेहमु छ्यिम्बु सुङ-क़ेला ङाहगी क्याहप ङो़ले ङाहला दि ल़ेहमु सुङगेनॱराङ जेक्यो ङाहगी थ़ेसीन, 11 ख्येगी थोङग्योकी तामया़ ता़ह यिहगी च्यी़ला प्री़हदीॱमाराङ एफिसस, स्मुर्ना, पर्गामम, थिआटीरा, सार्डिस, फिलाडेल्फिया दाङ लाउडिकिया क्याहसाला येहकेन्गी छेन्छोक तिहन्गालाॱराङ ताङदोङ। 12 ओहले ङाह ङ्याम्बु स्याहल सुङगेन्दी सु यिहम्बा नि म़ेदी क्याहप लो़हदी ताएँमु ङाहगी सेरकी छ्येकुङ तिहन थाल थोङसीन। 13 ओहले ओ़ह छ्येकाङकी पाहरक्यीला मिहगी स़ेबु ल़ेहमु स्याहप थुराङ नाहम्सा नोम्ग्यो दाङ ते़ला स्याहङ छ्यिम्बु येहकें सेरकी कारा नोम्ग्यो थोङसीन। 14 मिहरोगी उ दाङ उटानी पाहल दाङ खावा ल़ेहमु कार्पु येहकें ओहले मिहरोगी च्येनदी मेहबुङ ल़ेहमु येहकें। 15 मिहरोकी स्याहपती मेहबुङला लू़दी ताहर्ती ज़्या़क्योकी पिताल ल़ेहमु येहपा छ्या़क्यो येहकें। ओहले मिहरोकी सुङ-क़ेदी छ्युम्ग्यारकी क़े ल़ेहमु थे़उ येहकें। 16 मिहरोगी योबा छ्या़ला कार्मा तिहन नोम्दी येहकें। मिहरोकी स्याहललेगी लेहप ङ्यिकाराङ ङो़ले खा नुम्बु थो़क्यो पादाङ थेन्ग्यो येहकें। ओहले मिहरोकी स्याहल्दोङदी ङ्यिहमा छान्दी स्यार्केमु मी़ छाएँ ल़ेहमु येहकें। 17 मिहरोला थोङगेमु ङाह मिहरोकी स्याहप पोहला स्यिक्यो मिह ल़ेहमु पेहते रिहल्सीन। यिहॱनाङ मिहरोकी योबा छ्या़ ङाह थो़ला ज़्या़दी दि ल़ेहमु सुङ नाङसीन, “मा़हन्ज्यी, तोहङस्यो दाङ तिङस्यो ङाहराङ यिहन। 18 ओहले सोम्बो येहकेन्दीॱआङ ङाहराङ यिहन। ङाह स्यिक्यो येहकें, यिहॱनाङ ता़ह त़ेदोङ, ङाह नाहम्स्यी किन्दुॱराङ सोम्बो काहल्दी येह, स्यिवा दाङ साप्स्यी तिहङकी दिमीया़ ङाह ङ्याम्बु येहबा। 19 ओ़ह सोङबे ख्येगी च्यि थोङगे, ओहले च्यि येहबा, ओहले दि तिङले च्यि बाप ओहङज्ये येहबा ओ़ह प्री़हदोङ। 20 ङाहगी योबा लाहक्पाला ख्येगी थोङग्यो दि कार्मा तिहन दाङ सेरकी छ्येकुङ तिहनकी तेहन्दादी दिराङ यिहम्बा: कार्मा तिहनदी छेन्छोक तिहनला चारा पेहकेन्गी स्यिहङगामकी स्याहप्च्यीया़ यिहम्बा ओहले सेरकी छ्येकुङ तिहनदी छेन्छोक तिहन यिहम्बा।” |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.