फिलिप्पी 2 - ह्योल्मोमास्यीकाकी स्यिहवा 1 च्यि मास्यीकाला येहकेन्गी ख्याती मिहलीगी ख्याया़ला आ़र क्ये च्य़ूदी येहबा? च्यि मिहरोगी निङज्यीगी ख्याया़ला सेम लो तेहमु नाङदी येहबा? च्यि ख्यागी नाम्पार-ताहक्पा थु लाहमले छोक्पा पेहती येहबा? च्यि ख्यागी च्यी़गी च्यी़ला चेवा दाङ च्याहम्बा पेहती येहबा? 2 ओ़हठी यिहन्सीमाना ख्याया़ सेम च्यी़, लो च्यी़ डी़दी तेहतोङ ओहले चेवा च्यी़ला तेहतोङ ओहले तेहन्दा च्यी़लाॱराङ डी़दी ङाहला क़ेहनाङ लाहङ च्य़ूदोङ म़ेदी ङाह ख्याया़ला ओहर-छ्य़े स्युहउ येह। 3 ख्या राहङला च्यी़राङ ख्येप्साङ ओहङगे दाङ छ्य़ेन्दो तेन्ज्येला च्यिॱआङ ल़ेहया़ माहबे यिहॱनाङ स्यिहवा पेहती राहङ म़ेदी लेहमेन छ्यिम्बु यिहन म़ेदी सेमला ने़दोङ। 4 ख्या थाम्ज्यीगी राहङला च्यी़राङ मिहम्बा, यिहॱनाङ लेहमेन मिहया़लाॱआङ या़हबु ओहङज्यु माएँ सेम थो़दोङ। 5 ख्याया़गी सेम येशू मास्यीकाती ल़ेहमुराङ ओहङज्यु। 6 येशू मास्यीका तेहम्बाराङ किन्ज्यो यिहन्गे, यिहॱनाङ मिहरोगी राहङला किन्ज्यो ङ्याम्बा यिहन म़ेदी थुला नोम माहनाङ। दि ओहराङगी नोम्साङ ताङ कोहएँगी ताम यिहम्बा। 7 यिहॱनाङ मिहरोगी राहङदीराङ थु-सेमगी जेती दि थाम्ज्यी क्युर ज़्या़ नाङसीन ओहले मिहगी मिहली नोम्दी योक्पु ल़ेहमुराङ जेती ठुङ नाङसीन। 8 मिहरोगी मिहगी मिहली नोम्दे राहङगी राहङला फेमा ज़ो नाङसीन, ओहले स्यिवा थुराङ, पे यिहॱना़: क्याहङस्यीङला च्याङदी टोहङगे थुराङ मिहरोगी किन्ज्योगी का ची़ नाङसीन। 9 ओ़ह सोङबे किन्ज्योगी मिहरोला थाम्ज्यी म़ेदी थो़ला क्या़ नाङसीन, ओहले मिहरोला छेन नाङसीन, ओ़ह छेन थाम्ज्यी म़ेदी चा़ छ्यिम्बु यिहन। 10 ओ़ह सोङबे स्यिहङगाम, जाम्बुलीङ दाङ जाम्बुलीङ म़ेदी चो़ला येहकेन थाम्ज्यी सेम्ज्येनया़गी येशूकी छेनला पी़मु च़ूज्ये येह। 11 किन्ज्योकी ज़िज्यिदगी तेहन्दाला थाम्ज्यीगी येशू मास्यीकाॱराङ चो़वो यिहन म़ेदी खागी माज्ये येह। जाम्बुलीङला येहसेर क्याहप्केन्गी क्या-साङे 12 ए ङाहगी च्याहम्बु रो़हया़, ङाह ख्या ङ्याम्बु येहकेंमु ख्याया़गी नाहम-माना ङाहती तामया़ ङ्यिहन्सीन, यिहॱनाङ ता़ह ङाह ख्यालेगी था़-रिहङबु येह ङाह ख्या ङ्याम्बु मे़हॱनाङ ङाहती तामया़ जेन माहङबु पेहती ची़दोङ ओहले किन्ज्योकी ज्यिक्पा खुर्तोङ, दार्ती राहङगी ज़्योरक्यो थार्पाकी ल़ेह छाङबु पेहच्येला तुहक्पु पेहतोङ। 13 च्यिबेमाना किन्ज्योगी ख्यागी पाहरक्यीला नाहम-माना छ्या़ले जे-नाङदी येह। मिहरोगी थु-सेम जे नाङग्योकी छ्या़लेया़ तेहन्दा डुप च्य़ूज्येला मिहरोगीॱराङ ख्याया़ला सेम्बा दाङ ओङ नाङगे। 14 च्यि ल़ेह पेहॱनाङ ङ्येहर्स्यी माहबेबा पेहती ओहले लोहङडी माहबेबा पेहती पेहतोङ, 15 ओ़हठी पेहसीनमाना ख्या तिहक्च्येम्बा दाङ नोहङग्यो मिहया़गी पाहरक्यीला च्यिॱआङ ङ्य़ेहबा-छ्यू़बा म़ेहबा किन्ज्योकी पेहजा ल़ेहमुराङ क्येन माहफो़बा दाङ चाङमा ओहङज्ये येह। खुङया़गी पाहरक्यीला ख्या नामदी कार्माया़ ल़ेहमुराङ येहसेर क्याहप कोहएँ। 16 मिहली तेर्केन्की सुङला सान्दी पेहती ज़ुङदी ज़्यो़। च्यिबेमाना ङाह स्यिती काम्बुला माहछ्यो़ङ ओहले ङाहगी स्यिती काम्बुला ल़ेह तुहक्पु माहबे म़ेदी मास्यीका फेप नाङगेन्गी ङ्यिहमाला ङाहगी छ्य़ेन्दो तेन ख़ूज्यु। 17 का़हलेॱआङ ख्यागी फुल्ग्यो यिह-छ्य़ेकी मार्च्येला ङाहतीॱआङ ठा़ मार्च्ये ल़ेहमुराङ पेहती फुल्दी स्याहल च्य़ू कोहॱनाङ ङाहला काहसो येह, ओहले ङाह ख्या थाम्ज्यी ङ्याम्बु क़ेहनाङ पेहकें। 18 ओ़हठीॱराङ पेहती ख्याया़ॱआङ सेम काहसो पेहतोङ ओहले ङाह ङ्याम्बुराङ क़ेहनाङ पेहतोङ। तिमोथी दाङ इपाफ्रोडिटस 19 चो़वो येशूकी थुला येहसीमाना ङाहला रेहवा येह, ङाह ग्यो़बाराङ तिमोथीला ख्यासाला ताङगेराङ येह। ओहले ख्याती लेहङगु ज्योर्केमु ङाहला ज्यिबुराङ क़ेहनाङ लाहङज्ये येह। 20 च्याहङज्यु सेम्बा थो़दी ख्याला तुहङाल पेहकें तिमोथी मिहम्बानी ङाह ङ्याम्बु लेहमेन सुॱआङ म़ेह। 21 लेहमेनया़नी राहङला च्यी़राङ फेन्दोप ओहङगेन्की ल़ेहला स्य़ूहज्येलाराङ ठाबे दु, येशू मास्यीकाकी तेहन्दाला तुहङाल पेहकेन सुज्यीॱआङ म़ेह। 22 यिहॱनाङ तिमोथी मिह काह-ठि यिहम्बा म़ेदीनी ख्याया़ला क्यी़ह येह। पुहगी आबाला स्याहप्तो स्युहक्यो ल़ेहमु खोगी ङाह ङ्याम्बु या़हबु लेहङगु स्येकेन्गी ल़ेहला रो़ह पेहसीन। 23 ता़ह ङाहला च्यि ओहङगु दु ताएँ, ओहले क्यी़ह ज्योर लुहङ मे़हबाराङ तिमोथीला ख्यासाला ताङगे माएँ रेहवा पेहती येहबा। 24 चो़वोकी थुला येहसीमाना, ङाहॱआङ ग्यो़बाराङ ओहङज्ये म़ेदी रेहवा पेहती येह। 25 यिहॱनाङ ताहन्दादी ओहराङ नो़ह इपाफ्रोडिटसला ख्यासाला ताङ कोहच्ये ल़ेहमु ङाहगी थोङसीन। ङ्यिह फे़बे ङ्यी़गी ङ्याम्बुराङ ल़ेह पेहसीन ओहले या़हबु लेहङगु स्येकेन्गी ल़ेहलाॱआङ ङ्याम्बुराङ तुहक्पु पेहसीन। खो ख्यागी लेहङगुया़ फार छुर क्याल्ज्येला रो़हराम पेहकेन्की मिह यिहम्बा, ङाहला रो़हदी पेहच्येला ख्यागी खोला ङाहसाला ताङसीन। 26 खोगी ख्याया़ला थू़ज्ये म़ेदी ज्यिबुराङ सेम्बा पेहती येहकें। खो ने़हदी येह माएँ लेहङगु ख्यागी थे़क्यो सोङबे खो ज्यिबुराङ तुहङाल लाहङग्यो येहकें। 27 तेहम्बाराङ खो ज्यिबुराङ ने़हदी स्यिज्येॱराङ पेहती येहकें। यिहॱनाङ किन्ज्योगी खोला थुज्यी ज़ी़ नाङसीन। खोला च्यी़राङ मिहम्बा, यिहॱनाङ ङाहगी तुहङाल थो़ला लेहमेन तुहङाल खुर माहकोहज्यु म़ेदी किन्ज्योगी ङाहॱलाङ थुज्यी ज़ी़ नाङसीन। 28 ओ़ह सोङबे ङाह खोला ख्यासाला ताङज्येला ज्यिबुराङ सेम काहसो काहल्दी येह, खोला येहपाराङ थोङदी ख्याया़ क़ेहनाङ पेहच्ये येह, ओहले ङाहती सेमगी तुहङालया़ॱआङ याहङदी डोज्ये येह। 29 चो़वोकी छेनला सेम काहसो पेहती खोला फेप स्यी़हदोङ। दि ल़ेहमु मिहया़ला ची़नाङ पेहतोङ। 30 च्यिबेमाना, मास्यीकाकी छ्या़लेकी तेहन्दाला स्याहप्तो स्युहएँमु नो़ह याहम्बीज्यीगी मिहम्बा स्यिवागी खाला छ्यि सिहन्ग्यो येहकें। ख्यागी ङाहती तेहन्दाला छाङबु पेह मा़हखुबाकी रो़हराम खोगी छाङबु पेहसीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.