फिलेमोन 1 - ह्योल्मो1 मास्यीका येशूकी तेहन्दाला चोन-खाङला छ्यिक्यो ङाह पावल दाङ ओहराङगी नो़ह तिमोथी लाहमले, ओहराङ ङ्याम्बुराङ ल़ेह पेहकेन च्याहम्बु रो़ह फिलेमोन 2 ओहराङगी नुहमु अप्फिया, ङ्यिह ङ्याम्बुराङ डी़दी ले़ह पेहक्योगी माक्मी रो़ह अर्खिप्पस दाङ ख्येगी खाङबाला छो़क्यो छेन्छोकला: 3 किन्ज्यो ओहराङगी याहप दाङ चो़वो येशू मास्यीकागी ख्याया़ला काटीन दाङ स्य़िहदे नाङज्यु! थुज्यी-छ्ये़ दाङ सोल्वाङ 4 नो़ह फिलेमोन, ङाहगी सोल्वाङ ताप्केमु ख्येला टेहम्बा साल्दी ङाहगी किन्ज्योला नाहम्माॱनाङ थुज्यी-छ्ये़ फुल्गो येह। 5 च्यिबे मासीमाना चो़वो येशू थो़ला ख्येगी पेहक्योगी तेहपागी तेहन्दाला ओहले थाम्ज्यी किन्ज्योकी मिहला ख्येगी चेवा पेहकु दु माएँ ताम ङाहगी थे़दी येह। 6 ख्येगी तेहपाकी छोक्पागी ओहराङ मास्यीकाला येहकेंमु ओहराङला ओहङगेन्गी ना थाम्ज्यी या़हबु तामया़ सेम तिहङ यिहन्ज्युराङ ङोह स्य़े ख़ूएँगी ओङ नाङज्यु म़ेदी सोल्वाङ ताप्को येह। 7 ङाहगी नो़ह, ख्येती चेवागी ङाहला ज्यिबुराङ सेम काहसो दाङ स्युक क्ये च्य़ूदी येह। च्यिबेमाना ख्येगी पेहती किन्ज्योकी मिहया़ती सेम येहपाराङ खाम्साङे काहल्दी येह। ओनेसिमसकी तेहन्दाला ओहर-छ्य़े स्युहक्यो 8 ख्येगी च्यि पेह कोहकें यिहम्बा, ओ़ह पेहच्येला ख्येला का तेर्च्येला मास्यीकाला ङाहला स्युक येहॱनाङ, 9 चेवा लाहमले ङाह ख्येला ओहर-छ्य़े स्युहउ येह। ता़ह ङाह मिह केहपु ओहले ताहन्दा येशू मास्यीकाकी तेहन्दाला चोन-खाङला छ्यिक्यो ङाह पावल 10 ङाहगी पुह ओनेसिमसकी तेहन्दाला ङाह ओहर-छ्य़े स्युहउ येह, ङाह चोन-खाङला येहकेंमु मास्यीका ङो़ले ङाह ओनेसिमसकी आबा काहल्दी येह। 11 खो ख्येला च्यिॱआङ फेन मे़हथोएँगी मिह काहल्दी येहकें, यिहॱनाङ ताहन्दा ओहराङ ङ्यी़गी तेहन्दाला फेन थो़एँगी मिह काहल्दी येह। 12 ङाह खोला येहपाराङ ख्येसाला लो़ ताङगेराङ येहबा। खो ङाहगी निङ थाक्पाॱराङ यिहम्बा! 13 खोला ङाह ङ्याम्बुराङ ज़्या़ज्येला ङाह क़ेहनाङ लाहङज्ये येहकें, च्यिबेमाना लेहङगु या़हबुगी पेहती ङाह चोन-खाङला छ्यिक्यो ती़हजीला ख्येगी छापला खोगी ङाहला स्याहप्तो स्युह ख़ूज्ये येहकें। 14 यिहॱनाङ, ख्येला मा़हटीहबा पेहती ओ़ह ल़ेहमु पेहच्ये ङाहला या़हबु मा़हने। ङाहला रो़ह पेहॱराङ कोहएँ म़ेदी ख्येला ठाल माह फो़ज्यु, यिहॱनाङ ख्ये राहङगी सेमला क्ये़दी रो़ह पेहच्यु माएँदी ङाहगी सेमला ने़दी येहबा। 15 नाहम-मानागी तेहन्दाला येहपाराङ ओनेसिमस ख्ये ङ्याम्बुराङ तेह ख़ूज्यु म़ेदी ङ्यिहमा तोबाज्यी थु खो ख्ये ङ्याम्बु खा फे़क्यो ओहङ ख़ूएँ। 16 ता़ह खो लाबु मिहम्बा यिहॱनाङ लाबु म़ेदीॱआङ या़हबु निङ च्येहएँगी नो़ह काहल्सीन। खो ङाहगी तेहन्दाला ज्यिबुराङ च्याहम्बु येह यिहॱनाङ ख्येगी तेहन्दालानी तोहरोङ खो ज़ुबु दाङ चो़वोला जेन माहङबु च्याहम्बु येह। 17 ओ़ह सोङबे का़हलेॱआङ ख्येगी ङाहला “ङाह ङ्याम्बु पी़मा यिहन” म़ेदी नोम्साङ क्येसीनमाना ङाहला ल़ेहमुराङ ओनेसिमसॱलाङ लोक पेहतोङ। 18 का़हलेॱआङ खोगी ख्येला च्यिॱआङ ल़ेह चोक्पाया़ पेहक्यो येहसीमाना ओहले खोगी च्यिरा च्याल कोहच्ये येहसीमाना ङाहगी मिहनला ज़्या़दोङ। 19 ङाह पावल, राहङदीराङ लाहक्पागी दि प्रुहएँॱराङ येहबा। ओ़ह खोगी च्याल कोहएँगी पेहलेन ङाहगीराङ ख्येला च्याल तेर्कें। ख्येगी मास्यीकाला मिहली साम्बा ङाह ङो़लेराङ ज़्योरक्यो यिहम्बा म़ेदीनी म़े तेह मेहकोहटो। 20 ओ़ह सोङबे नो़ह, ख्ये ङो़ले चो़वोला च्यिरा खेप्साङ लेहन्ज्ये ङाहगी सेम्बा येहबा। मास्यीकाला ङाहगी सेमला येहपाराङ खाम्साङे जे तेर्तोङ। 21 दि यिहगी प्रुह-प्रुहमुॱआङ ङाह सेम तिहङ यिहन्ज्यु तेहपा पेहको येह, ख्येगी ङाहगी माक्योगी तामया़ पेहच्ये येह ओहले ओ़ह म़ेदीॱआङ माहङबु पेह तेर्च्ये येह। 22 ओहले दि ङ्याम्बु-ङ्याम्बुराङ ङाहगी तेहन्दाला डोम्बो तेहकेन्गी कोठा च्यी़ॱआङ ठाबे पेह ज़्यो़, च्यिबेमाना ख्येती सोल्वाङ लाहमले ङाहॱआङ ख्येसाला ओहङ ख़ूएँनी म़ेदी रेहवा पेहको येह। 23 येशू मास्यीकाला चोन-खाङला छ्यिक्यो ङाहगी रो़ह इपाफ्रासगी ख्येला टास्यी-देले म़ेदी ताङदी येह। 24 ओ़ह ल़ेहमुराङ पेहती ङाह ङ्याम्बु-ङ्याम्बुराङ ल़ेह पेहकेन्गी रो़ह मर्कूस, अरिस्तार्खस, डेमास दाङ लूकागीॱआङ टास्यी-देले ताङदी येह 25 चो़वो येशू मास्यीकाकी काटीन ख्याया़ ङ्याम्बु ज़्य़ू नाङज्यु! |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.