मर्कूस 15 - ह्योल्मोयेशू पिलातसकी दिनला ( मत्ती २७:१-२ , ११-२६ ; लूक २३:१-५ , १३-२५ ; यूह १८:२८–१९:१६ ) 1 नाहम लाहङ-लुहङ मे़हबाराङ पूजाहारी छ्यिम्बु, गोबा दाङ छ्य़े-ठिमकी लोबेनया़ ओहले छो़बा छ्यिम्बुगी मिह थाम्ज्यीराङ टे़ह क्याहप्सीन ओहले येशूला ताहम्दी खुङगी रोमी स्युहङ-पेन छ्यिम्बु पिलातससाला चि क्याहप काहल्सीन। 2 ओहले पिलातसगी येशूला, “च्यि ख्ये यहूदीया़की क्याहल्बु यिहम्बा?” म़ेदी टी़हसीन। ओहले येशूगी, “ओ़ह नि राहङगीराङ सुङ नाङगु दु ले” म़ेदी ल़ेहन क्याहप नाङसीन। 3 ओहले पूजाहारी छ्यिम्बुया़गी येशूला माहङबुराङ तामया़गी फातुर च़ूसीन। 4 ओ़ह सोङबे पिलातसगी येशूला येहपाराङ टी़हसीन, “च्यि ख्येला राहङगी तेहन्दाला च्यिरा ताम मा कोहच्ये म़ेह? त़ेदोङ, खुङया़गी ख्येला काहजे माहङा तामया़गी ङ्य़ेहबा काल्गेॱराङ येहबा।” 5 यिहॱनाङ येशूगी च्यिॱआङ ल़ेहन क्याहप माहनाङ। दि थोङदी पिलातसला याहम्जेनज्यी ऩेसीन। 6 थार्पा छ्येपागी ङ्यिहमाला पिलातसगी मिहया़गी दाम्ग्यो चोन-खाङला छ्यिक्यो मेहन्दा च्यी़ला ताङ ङ्युहङगेन्गी ठिम येहकें। 7 ठ़ूस्यी सिहङदा पेहकेन्की ती़हजीला मिह सेकें मिहया़ चोन-खाङला येहकें। खुङया़ नाहङला बारब्बा मिहन थोक्योकी मेहन्दा च्यी़ॱआङ ओ़हला येहकें। 8 ओहले मिह मिह-माहङया़ पिलातससाला ओहङदी “तोहङमा लोहया़ला ल़ेहमु पेहती दि लोहॱलाङ चोन-खाङला छ्यिक्योगी मेहन्दा च्यी़ ताङ नाङदोङ” म़ेदी स्य़ूहज्ये छ़ूसीन। 9 ओहले पिलातसगी, “ओ़हठी यिहन्सीमानानी यहूदीया़की क्याहल्बु माएँदीला ख्यागी तेहन्दाला ताङदोङ ले?” म़ेदी मासीन। 10 पूजाहारी छ्यिम्बुया़गी ठादो पेहती येशूला राहङसाला च्योल्ज्येला ख्योङग्यो यिहन म़ेदी खोला क्यी़ह येहकें। 11 यिहॱनाङ पूजाहारी छ्यिम्बुया़गी मिहया़ला क्या़दी, “येशूला मिहम्बा, बारब्बाला ताङ नाङदोङ” म़ेदी मा च्य़ूसीन। 12 पिलातसगी येहपाराङ मिहया़ला, “ख्याया़गी यहूदीया़की क्याहल्बु माएँदीलाती ङाह च्यि पेहतोङ ले?” म़ेदी टी़हसीन। 13 खुङया़गी क़े तेन्गेॱराङ मासीन, “खोला क्याहङस्यीङला च्याङ नाङदोङ।” 14 ओहले पिलातसगी, “खोगी च्यि ल़ेह चोक्पा पेहक्यो येहबा ले?” म़ेदी टी़हसीन। यिहॱनाङ खुङया़गी जेनॱराङ क़े तेन्दी मासीन, “खोला क्याहङस्यीङला च्याङ नाङदोङ।” 15 पिलातसगी मिह मिह-माहङया़ला क़ेहनाङ लाहङ च्य़ूज्येला खोगी बारब्बालाराङ ताङ तेर्सीन। ओहले येशूलादी खोगी ताक्स्यु क्याहप्ती क्याहङस्यीङला च्याङज्येला चि क्याहप्सीन। माक्मीया़गी येशूला स्ये़हन्डील पेहक्यो ( मत्ती २७:२७-३१ ; यूह १९:२-३ ) 16 ओहले माक्मीया़गी येशूला स्युहङ-पेन छ्यिम्बुकी क्याहल-गाङ नाहङला ख्येर्सीन ओहले लेहमेन माक्मी थाम्ज्यीलाराङ क़े क्याहप्ती ख्योङसीन। 17 ओहले खुङया़गी येशूला क्याहल्बुदी ल़ेहमुराङ मुहक्पु छेगी नाहम्सा केन तेर्सीन ओहले छेर्मागी थ़े जे़दी उला केन तेर्सीन। 18 ओ़ह तिङले खुङया़गी येशूला “यहूदीया़की क्याहल्बुला छ्याक-छालो!” म़ेदी स्ये़हन्डील पेहसीन। 19 खुङया़गी ङ्युङमा प्रेहकागी येशूगी उला क्याहप्सीन, ओहले थुक्स्याल क्याहप्ती पी़मु च़ूदी येशूला ज्याल्सीन। 20 दि ल़ेहमु पेहती स्ये़हन्डील पेह सिहन फान्ज्यो खुङया़गी मुहक्पु छेगी नाहम्सा पिती येहपाराङ येशूगी नाहम्साॱराङ केन तेर्सीन। ओ़ह तिङले खुङया़गी येशूला क्याहङस्यीङला च्याङज्येला फिला ख्येर्सीन। येशूला क्याहङस्यीङला च्याङग्यो ( मत्ती २७:३२-४४ ; लूक २३:२६-४३ ; यूह १९:१७-२७ ) 21 लाहमला डोडोपा काहङला खुङया़गी कुरेनी लुहङबागी सिमोनला युहललेगी क्याहसाला फार ओहङगेॱराङ पेहक्यो थ़ूसीन। खो अलेक्जेन्डर दाङ रुफस माएँ मिहगी आबा यिहन्गे। माक्मीया़गी खोला उर्चु पेहती येशूगी क्याहङस्यीङ खुर च्य़ूसीन। 22 ओहले खुङया़गी येशूला गल्गथा माएँ ग्या़ला ख्येर्सीन। गल्गथा माक्योदी “काब्लीगी ग्या़” म़ेदी माक्यो यिहम्बा। 23 ओ़हला लेप्ती खुङया़गी येशूला मूर्र स़ेक्योगी कुहन्डुमकी-निङगु तेर्सीन। यिहॱनाङ येशूगी ओ़ह छ्ये माहनाङ। 24 ओ़ह तिङले खुङया़गी येशूला च्या़जार तिहप्ती क्याहङस्यीङला च्याङसीन। ओहले येशूगी नाहम्सा सु सुगी बोला थोप्कें यिहम्बा म़ेदी खुङया़गी गिन क्याहप्ती कोहसीन। 25 येशूला क्याहङस्यीङला च्याङगेमु ङाटुगी छ्युजी कुह काहल्दी येहकें। 26 येशूला फातुर च़ूक्योगी ताम क्याहङस्यीङला दि ल़ेहमु म़ेदी प्री़हदी येहकें– “यहूदीया़की क्याहल्बु।” 27 येशूला क्याहङस्यीङला च्याङगेमु खुङया़गी च्याहक्पा ङ्यी़ॱलाङ येशूगी योबा दाङ योमा ङो़ले क्याहङस्यीङला च्याङसीन। [ 28 दि ल़ेहमु पेहती छ्य़ेला प्रुहक्योगी दि स्याहल तेहन्दा डुप्सीन– “येशू मिह ङ्येहम्बाया़ ङ्याम्बु टाहङजी काहल्सीन।”] 29 ओ़ह लाहमले पेहती डोएँ मिहया़गी क्याहप लो़हदी येशूला स्ये़हन्डील पेहती दि ल़ेहमु मासीन “लो त़ेदोङ! छ्योखाङ रोम्दी येहपाराङ ङ्यिहमा सुमलाराङ ज़ो ख़ूएँ माएँ मिहला! 30 क्याहङस्यीङले माहर फाप्ती स्यो, ओहले राहङला थार च्य़ूदोङ!” 31 ओ़ह ल़ेहमुराङ पेहती पूजाहारी छ्यिम्बु दाङ छ्य़े-ठिमकी लोबेनया़गीॱआङ येशूला स्ये़हन्डील पेहसीन। खुङया़गी राहङ नाहङदुङ, “दि खोगी लेहमेन मिहया़ला नि थार च्य़ूसीन, यिहॱनाङ राहङलादी थार च्य़ू मा़हखु” म़ेदी मासीन। 32 “ए इस्राएलीया़गी क्याहल्बु मास्यीका! क्याहङस्यीङले माहर फाप्ती स्यो, ङ्यिह ताएँ! ओहले गा ङ्यिहगी यिह-छ्य़े पेहकें!” येशू ङ्याम्बुराङ च्याङग्योया़गीॱआङ येशूला स्ये़हन्डील पेहसीन। येशू टोहङ नाङग्यो ( मत्ती २७:४५-५६ ; लूक २३:४४-४९ ; यूह १९:२८-३० ) 33 छ्युजी च्यिङ्यी़ यिहन्ज्यु छ्युजी सुम थु लुहङबा थाम्ज्यीलाराङ ना़-जुबे काहल्सीन। 34 छ्युजी सुमजेला येशूगी दि ल़ेहमु सुङदी क़े तेन नाङसीन, “इलोई, इलोई लामा सबखथनी?” दि माक्यो तेहन्दादी, “ओ़ ङाहगी किन्ज्यो, ओ़ ङाहगी किन्ज्यो राहङगी ङाहला च्यिबे क्युर ज़्या़ नाङग्यो?” म़ेदी माक्यो यिहम्बा। 35 येशूगी दि ल़ेहमु जेती सुङ-क़े तेन नाङग्यो थे़दी ओ़हला लाहङदी तेहक्यो लाहला मिहया़गी दि ल़ेहमु मासीन, “ते़ नाह! दि मिहगी नि एलियाला गा क़े क्याहप्को दुबा!” म़ेदी मासीन। 36 ओहले मेहन्दा च्यी़ छ्योङदी काहल्दी काप्च्या ल्हेम्बा च्यी़ निङगु क्युर्पुला पा़दी प्रेहका च्योदोला केन्दी येशूगी स्याहलला ज़्या़दी मासीन, “याहम्बी कू़हदोङ, कू़हदोङ, नाह एलिया ओहङदी दि खोला क्याहङस्यीङले माहर पाप्के यिहम्बा नि, ताज्यें!” 37 यिहॱनाङ ओ़हजेलाराङ येशूगी सुङ-क़े छ्यिम्बुच्यी तेन नाङदी टोहङसीन। 38 ओ़ह ती़हजीला छ्योखाङ नाहङला का़क्योगी योल्बा थो़ यिहन्ज्यु चो़ थु बो ङ्यी़ पेहती राहल्सीन। 39 येशू दि ल़ेहमु जेती टोहङग्यो थोङदी क्याहङस्यीङगी पोहला लाहङदी तेहक्यो रोमी माक्पेनगी, “तेहम्बाराङ दि मिह नि किन्ज्योगी स़ेबुराङ यिहम्बा छे दु” म़ेदी मासीन। 40 लाहला पी़हमी पेहजाया़गीॱआङ था़-रिहङबुलेगीॱराङ लाहङदी त़ेदी तेहक्यो येहकें। ओ़ह पी़हमी-पेहजाया़दी मरियम मग्दलिनी ओहले फेमा याकूब दाङ योसेफगी आमा मरियम दाङ सलोमी यिहन्गे। 41 येशू गालीलला ज़्य़ू नाङगेमु खुङया़गी येशूला तिङ ङ्ये़दी येशूला स्याहप्तो स्युहक्यो येहकें ओहले येशू ङ्याम्बुराङ यरूशलेम थु ओहङग्योगी लेहमेन माहङबुराङ पी़हमी-पेहजाया़ॱआङ ओ़हला येहकें। येशूगी कुबुर तो़हक्यो ( मत्ती २७:५७-६१ ; लूक २३:५०-५६ ; यूह १९:३८-४२ ) 42 ओ़ह ङ्यिहमादी थाङ सोएँ ङ्यिहमागी तोहङमा ङ्यिहमा यिहन्गे। 43 कुहङॱसेला फार योसेफ मिहन थो़क्यो अरिमाथिया क्याहसाकी मिह च्यी़ ओहङदी मा़हन्ज्यीबा पेहती पिलातसगी दिनला काहल्दी येशूगी कुबुर लाङसीन। खो छो़बा छ्यिम्बुगी ज्यिबुराङ चा़ छ्यिम्बुगी मिह यिहन्गे। ओहले खोगी किन्ज्योगी क्याहल्सीगी लाहम त़ेदी तेहक्यो येहकें। 44 येशू टोहङ सिहन्सीन माएँ ताम थे़दे पिलातस ह्अ ल़ेहसीन। ओहले खोगी रोमी माक्पेनला क़े क्याहप्ती, “येशू तेहम्बाराङ टोहङ सिहन्ग्यो यिहम्बा ले” म़ेदी टी़हसीन। 45 ओहले रोमी माक्पेनगी तेहम्बाराङ येशू टोहङ सिहन्ग्यो यिहम्बा माएँ ताम स्ये फान्ज्यो पिलातसकी योसेफला येशूगी कुबुर ख्येर च्य़ूसीन। 46 ओहले योसेफगी रे़ह कार्पु च्यी़ ङ्ये़ह ख्योङदी येशूगी कुबुरला क्याहङस्यीङले माहर पाप्ती ओ़ह रे़ह कार्पुगी टिल्दी च्यार्काला फुक्पा क्ये़दी ज़्या़क्योगी ग्या़ला ज़्या़सीन। ओ़ह तिङले तोह छ्यिम्बुच्यी ख्योङदी फुक्पागी कोहला का़ ज़्या़सीन। 47 मरियम मग्दलिनी दाङ योसेफगी आमा मरियमगी येशूगी कुबुर तो़हगेन्दी त़ेदी तेहक्यो येहकें। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.