मर्कूस 14 - ह्योल्मोयेशूला सेच्ये छोल्ग्यो ( मत्ती २६:१-५ ; लूक २२:१-२ ; यूह ११:४५-५३ ) 1 खमिर मा़हलुबागी खुरा साहएँगी थार्पा छ्येपा लेप्च्येला ङ्यिहमा ङ्यी़ च्यी़राङ येहकें। ओहजेला पूजाहारी छ्यिम्बु दाङ छ्य़े-ठिमकी लोबेनया़गी येशूला खाजुम्बाला ज़ुङदी सेच्ये म़ेदी क़ूह तेहती येहकें। 2 यिहॱनाङ खुङगी दि ल़ेहमु साम्लु च्यी़ ताङसीन, “दि छ्येपाकी ती़हजीलादी दि ल़ेहमु ल़ेह पेहच्ये मेहयोहङगे, मिहन्सीमाना नि मिहया़गी पाहरक्यीला ठ़ूस्यी सिहङदा ओहङडो।” पी़हमी च्यी़गी येशूला नुम क्यी़ तेरक्यो ( मत्ती २६:६-१३ ; यूह १२:१-८ ) 3 येशू बेथानिया युहलला सिमोनगी खाङबाला फेप नाङसीन। खोला तोहङले जे नाहजा थेन्ग्यो येहकें ओहले येशू छ्येच्येला ज़्य़ू नाङगेमु पी़हमी च्यी़गी ज़ाप्केन्गी स्येल्बुङ काहङग्याराङ जटामसीदी रिहन माहङबु डोएँगी टिहमा स्यिहम्बु खाएँगी नुम ख्योङदी ओहङसीन। ओहले ओ़ह पी़हमीगी स्येल्बुङ रोप्ती टिहमा स्यिहम्बु खाएँगी जटामसी तोहङबोगी टिहमा स्यिहम्बु खाएँगी नुम येशूगी उला ल़ू तेर्सीन। 4 यिहॱनाङ लाहला मिहया़गी स्यिहङताङ पेहती राहङ नाहङदुङ दि ल़ेहमु माज्ये छ़ूसीन, “दि टिहमा स्यिहम्बु खाएँगी नुम च्यिबे दि ल़ेहमु पेहती थोरो ताङग्यो? म़ेदी मासीन। 5 बरु दि नुम चोङदी ओहङग्योगी टाङगा प्राङबुया़ला के़ह तेर्पा येहना नि ओहङज्ये स़ेह! दि नुम चोङबा येहना सुम्ग्या म़ेदीॱआङ ल्हाक्पु ङुलगी डापाल ज्योर्च्ये येहकें।” दि ल़ेहमु म़ेदी खुङगी ओ़ह पी़हमी-पेहजाला क़े तेन्सीन। 6 यिहॱनाङ येशूगी सुङ नाङसीन, “ता़ह टी़हसीन ले, च्यिबे ख्या मोहला नाहप्सा पेह तेहकें? मोहगी ङाहगी तेहन्दाला या़हबु ल़ेह पेहक्यो यिहम्बा। 7 प्राङबु मिहया़ नि ख्या ङ्याम्बु नाहम्माॱनाङ ओहङगे ओ़ह सोङबे ख्यागी खुङया़ला काहजेला रो़हराम पेहच्ये सेम क्येएँ ओ़हजेलाराङ ख्यागी रो़हराम पेह ख़ूएँ! यिहॱनाङ ङाह नि ख्या ङ्याम्बु नाहम्स्यी किन्दु मेहयोहङगे। 8 मोहगी च्यि पेह ख़ूएँ ओ़हदीॱराङ पेहसीन। दि टिहमा स्यिहम्बु खाएँगी नुम की़ तेर्ती मोहगी ङाहगी ज़ुबुला ङाह स्यिएँ म़ेदी तोहङलेराङ तो़हज्येला ठाबे पेहक्यो यिहन। 9 तेहम्बाराङ ङाह ख्याला माएँ, जाम्बुलीङ थाम्ज्यीला का़ह-का़हला दि या़हबु लेहङगु प्रा साल्गे, ओ़ह ग्या़या़ला मोहगी पेहक्योगी दि ल़ेहॱआङ टेहम्बा साल्ज्ये येह।” यहूदा येशूला ज़ुङ च्य़ूज्येला ठाबे काहल्ग्यो ( मत्ती २६:१४-१६ ; लूक २२:३-६ ) 10 येशूगी स्याहप्च्यी च्यिङ्यी़ नाहङगी यहूदा इस्करियोत माएँ स्याहप्च्यी च्यी़ पूजाहारी छ्यिम्बुया़ साला काहल्दी येशूला ज़ुङदी चि क्याहप्केन्गी तेहन्दाला ताम मासीन। 11 यहूदागी ताम थे़दी पूजाहारी छ्यिम्बुया़ ज्यिबुराङ क़ेहनाङ लाहङदी खोला टाङगा तेर्के म़ेदी ताहम्ज्या ज़्या़सीन। ओ़ह ती़हजी यिहन्ज्यु यहूदागी येशूला ज़ुङ च्य़ूज्येला लाहम ताज्ये छ़ूसीन। चो़वोकी डेन ( मत्ती २६:१७-३० ; लूक २२:७-२३ ; यूह १३:२१-३० ; १ कोर ११:२३-२५ ) 12 खमिर मा़हलुबागी खुरा साहएँगी थार्पा छ्येपागी तोहङस्यो ङ्यिहमा लेप सिहन्ग्यो येहकें। ओ़ह ङ्यिहमालाराङ इस्राएलीया़गी ल़ूह पी़हरुला मार्च्ये ताङगो येहकें। येशूगी स्याहप्च्यीया़गी येशूला, “ङ्यिह का़ह ग्या़ला काहल्दी राहङगी तेहन्दाला डेन ठाबे पेहतोङ ले लोबेन लाह?” म़ेदी स्युहसीन। 13 ओहले येशूगी स्याहप्च्यी ङ्यी़ला सुङ नाङसीन, “ख्या क्याहसाला सोङ, ओ़हला ख्यागी साहङबुङला छ्यु खुर्ती ओहङ तेहक्यो मिह च्यी़ च्य़ेह सिहन्ज्ये येह। ओ़ह मिहगी तिङदा तिङ सोङ ओहले खो का़हन्दी खाङबाला स्य़ूहगे, 14 ओ़ह खाङबागी ताहक्पुला ‘लोबेनगी सुङ नाङगु दु, ङाहगी स्याहप्च्यीया़ ङ्याम्बु थार्पा छ्येपाकी डेन साहएँ ग्या़ का़हला येहबा?’ 15 ओहले खोगी ख्याला खाङबागी थो़ तेङला थाम्ज्यी से़हया़ ठाबे पेहती डी़दी ज़्या़क्यो कोठा छ्यिम्बुच्यी तेन्ज्ये येह। ओ़हलाराङ ओहराङगी तेहन्दाला डेन ठाबे पेह” म़ेदी येशूगी सुङ नाङसीन। 16 ओहले स्याहप्च्यी ङ्यी़ क्याहसाला डोएँमु थाम्ज्यी तामया़ येशूगी सुङ नाङग्यो ल़ेहमुराङ च्य़ेह सिहन्सीन ओहले खुङगी ओ़ह ग्या़ला थार्पा छ्येपाकी डेन ठाबे पेहसीन। 17 से़-ह्रुप काहल फान्ज्यो येशू स्याहप्च्यी च्यिङ्यी़ ङ्याम्बुराङ फेप नाङसीन। 18 डेन छ्येके छ्ये़एँमुॱराङ येशूगी सुङ नाङसीन, “तेहम्बाराङ ङाह ख्याला माएँ, ख्या नाहङलेॱराङ ङाह ङ्याम्बु साहएँ मेहन्दा च्यी़गी ङाहला ज़ुङ च्य़ूज्ये येह।” 19 दि स्याहल थे़दी स्याहप्च्यीया़गी सेम नाहसीन ओहले स्याहप्च्यीया़गी ऱेह-ऱेह पेहती, “लोबेन लाह, तेहम्बाराङ राहङगी ङाहला नि सुङ नाङग्यो मिहन?” म़ेदी स्युहसीन। 20 ओहले येशूगी सुङ नाङसीन, “ख्या मेहन्दा च्यिङ्यी़ नाहङला नाहरे ङाह ङ्याम्बुराङ तेहर्मा च्यी़ला खुरा पा़दी साहएँदीगी ङाहला ज़ुङ च्य़ूज्ये येह। 21 सुङरापला प्रुहक्यो ल़ेहमुराङ मिहगी स़ेबु नि डोॱराङ कोहएँ, यिहॱनाङ ओ़ह मिहला क्येवा क्येमु, का़हन्दीगी मिहगी स़ेबुला ज़ुङ च्य़ूगे! खोगी नि केवाॱराङ माहलेहम्बा यिहन या़हबु ओहङज्ये येहकें।” 22 छ्येकेॱराङ जेकेमु येशूगी खुरा नोम्दी किन्ज्योला थुज्यी-छ्ये़ फुल नाङसीन। ओहले खुरा राल्दी स्याहप्च्यीया़ला नाङगेराङ सुङ नाङसीन, “दि लेहन्दोङ, दि ङाहगी ज़ुबु यिहम्बा।” 23 ओ़ह तिङले येशूगी स्याहलुॱआङ नोम्दी किन्ज्योला थुज्यी-छ्ये़ फुल नाङसीन। ओहले येशूगी स्याहप्च्यीया़ला नाङसीन। ओहले खुङ थाम्ज्यीगी ओ़ह स्याहलुलेगी थुङसीन। 24 ओहले येशूगी सुङ नाङसीन, “दि साम्बा ठिमगी ङाहगी ठा़ यिहम्बा, ओ़ह ठा़ मिह माहङबुगी तेहन्दाला स्याहल च्य़ूज्ये येह। 25 तेहम्बाराङ ङाह ख्याला माएँ, किन्ज्योगी क्याहल्सीला साम्बा पेहती मा़हथुङ थु ङाह येहपाराङ कुहन्डुमकी-निङगु थुङज्ये म़ेह” म़ेदी येशूगी सुङ नाङसीन। 26 ओहले खुङ फे़बेया़गी छ्ये़-लु च्यी़ लेहन्दी ओहलेगी थेन्दी जैतून काहङला फार फेप नाङसीन। येशूगी पत्रुसला लोप्ताम क्याहप नाङग्यो ( मत्ती २६:३१-३५ ; लूक २२:३१-३४ ; यूह १३:३६-३८ ) 27 ओहजे ती़हजीला येशूगी स्याहप्च्यीया़ला सुङ नाङसीन, “ख्या थाम्ज्यीगी ङाहला क्युर ज़्या़दी प्रे़हदी डोज्ये येह च्यिबेमाना सुङरापला दि ल़ेहमु म़ेदी प्री़हदी येहबा– ‘ङाह कोहरोवाया़ला सेच्ये येह ओहले ल़ूहया़ फेतोर कोहतोर डोज्ये येह।’ 28 यिहॱनाङ स्यिदीले सोम्बो लोह फान्ज्यो ङाह ख्या म़ेदीॱआङ तोहङले गालीलला डोज्ये येह।” 29 ओहजे ती़हजीला पत्रुसकी येशूला, “थाम्ज्यीगी राहङला क्युर ज़्या़दी डोॱनाङ ङाह राहङला नाहमॱआङ क्युर ज़्या़ज्ये म़ेह” म़ेदी मासीन। 30 येशूगी पत्रुसला सुङ नाङसीन, “तेहम्बाराङ ङाह ख्येला माएँ, नाहङबार ङाटु च्याहबु लेहमा ङ्यी़ क़े तेन्गे म़ेदी तोहङले ख्येगी ङाहला ङोह मे़हस्येएँ म़ेदी लेहमा सुम थु माज्ये येह।” 31 यिहॱनाङ पत्रुसकी दि ल़ेहमु म़ेदी मासीन, “राहङ ङ्याम्बुराङ स्यि कोहॱनाङ ङाह राहङला ङोह मे़हस्येएँ म़ेदी मेहमाएँ।” ओहले लेहमेन स्याहप्च्यीया़गीॱआङ ओ़ह ल़ेहमुराङ मासीन। गेतसमनीला येशूगी सोल्वाङ ( मत्ती २६:३६-४६ ; लूक २२:३९-४६ ) 32 ओ़ह तिङले येशू राहङगी स्याहप्च्यीया़ ङ्याम्बु गेतसमनी माएँ तुहम्राला फेप नाङसीन। ओ़हला लेप्ती येशूगी स्याहप्च्यीया़ला सुङ नाङसीन, “ङाह सोल्वाङ ताप्कें थु ख्या देलाराङ तेह।” 33 यिहॱनाङ पत्रुस, याकूब दाङ यूहन्नालादी येशूगी राहङ ङ्याम्बुराङ नोम फेप्सीन। ओहजेला येशूगी थु तुहङालगी ज्यिबुराङ छाबा-छुबे काहल्सीन। 34 ओहले येशूगी स्याहप्च्यीया़ला सुङ नाङसीन, “ङाहगी सेम तुहङालगी छाबा-छुबे काहल्दी निङ फोङज्ये ल़ेहमु काहल्सीन। ख्या देला ङ्यि मा़हलोहबा पेहती तेहतोङ” म़ेदी सुङ नाङसीन। 35 ओहले येशू फाच्चीला फेप्ती साला खेप्चु क्याहप नाङदी “ओहङ ख़ूएँ यिहन्सीमानानी ओहङज्ये पेहक्योगी तुहक्पुगी ती़हजी ङाहलेगी था़-रिहङबु जे नाङदोङ” म़ेदी सोल्वाङ ताप नाङसीन। 36 ओहले येशूगी सुङ नाङसीन, “ओ़ह याहप, ओ़ ङाहगी किन्ज्यो याहप, राहङगी थाम्ज्यी से़हया़ जे थुप्केन। ता़ह दि तुहक्पुगी स्याहलु ङाहलेगी था़-रिहङबु ज़्या़ नाङदोङ। यिहॱनाङ ङाहगी सेमला ने़क्यो ल़ेहमु मिहम्बा, राहङगी थुला ठुङग्यो ल़ेहमु तेहन्दा डुप्च्यु।” 37 येशू ज़्याङदी स्याहप्च्यी सुम येहकें ग्या़ला लो़हदी फेप नाङगेमु खुङ ङ्यि लो़हदी तेहक्यो ज़ी़ नाङसीन। ओहले येशूगी पत्रुसला “ए सिमोन, ख्ये ङ्यि लो़हक्यो? ख्ये छ्युजी च्यी़ॱआङ ङ्यि मा़हलोहबा पेहती तेह मा़हखुबा? म़ेदी टी़ह नाङसीन। 38 ङ्याहम्छेला माहछ्यीज्यु म़ेदी ख्या ङ्यि मा़हलोहबा पेहती सोल्वाङ ताप्तोङ। सेम नि तेहम्बाराङ ठाबे दु, यिहॱनाङ ज़ुबुदी मा-फाम्बु दु” म़ेदी येशूगी सुङ नाङसीन। 39 येहपाराङ फेप्ती येशूगी तोहङला ताप नाङग्यो सोल्वाङॱराङ ताप नाङसीन। 40 ओहले येहपाराङ स्याहप्च्यीया़ येहकें ग्या़ला लो़हदी फेप नाङगेमु खुङ येहपाराङ ङ्यि लो़हदी तेहक्यो येशूगी ज़ी़ नाङसीन। खुङगी मी़राङ खा फे़ मा़हखु ओहले येशूला च्यि ल़ेहन क्याहप्कें यिहम्बा म़ेदी खुङगी सेमला ताम च्यिॱआङ माहयोहङ। 41 लेहमा सुम खाला स्याहप्च्यीया़ येहकें ग्या़ला लो़ह फेप्ती येशूगी सुङ नाङसीन, “ख्या तोहरोङॱआङ ङ्यि लो़हदी थाङ स़े तेहक्यो? ता़ह ङ्याहल्दी तेहकेन्गी ती़हजी काहल सिहन्सीन। ङाह मिहगी स़ेबुला ज़ुङदी तिहक्च्येम्बागी लाहक्पाला चि क्याहप्केन्गी ती़हजी लेप सिहन्सीन। 42 ता़ह लोहङ, ओहले डो! त़ेदोङ, ङाहला ज़ुङ च्य़ूगेन्गी मिह ओहङ सिहन्दी येह” म़ेदी येशूगी सुङ नाङसीन। येशूला ज़ुङग्यो ( मत्ती २६:४७-५६ ; लूक २२:४७-५३ ; यूह १८:३-१२ ) 43 येशूगी स्याहल सुङगेनॱराङ जेकेमु स्याहप्च्यी च्यिङ्यी़ नाहङगी यहूदा माएँ स्याहप्च्यी च्यी़ ओ़हला लेप्सीन। खो ङ्याम्बु पूजाहारी छ्यिम्बु, छ्य़े-ठिमकी लोबेनया़ दाङ गोबाया़गी ताङग्योगी मिह बा़ल च्यी़ पादाङ दाङ प्रेहका थो़दी ओहङग्यो येहकें। 44 ज़ुङ च्य़ूगे यहूदागी ओ़ह मिहया़ला दि ल़ेहमु म़ेदी ता़स्यी तेरक्यो येहकें, “का़हन्दीला ङाहगी च्युक पेहकें, ओ़हदीॱराङ येशू यिहम्बा, खोला ज़ुङदी या़हबु पेहती सुङदी ख्येर्तोङ।” 45 ओहले थेका सिरेराङ यहूदा येशूसाला ओहङदी, “लोबेन लाह!” म़ेदी च्युक पेहसीन। 46 ओ़हजेलाराङ खुङगी येशूला ज़ुङसीन। 47 येशू पोहला लाहङदी तेहक्योगी मिह च्यी़गी राहङगी पादाङ तेन्दी पूजाहारी गो-छ्येवागी योक्पुला क्याहप्सीन ओहले खोगी नाम्ज्यो रेहप च्ये तेर्सीन। 48 ओहले येशूगी खुङया़ला सुङ नाङसीन, “च्यि ङाह च्याहक्पा यिहम्बा ले ख्या प्रेहका दाङ पादाङ थो़दी ङाहला जु़ङज्येला ओहङग्यो? 49 ङाहगी ङ्यिहमा-टाहङमाराङ ख्या ङ्याम्बुराङ छ्योखाङला तेहती छ्ये़-लुहङ तेर्केमु के ङाहला माहजु़ङ ले! यिहॱनाङ सुङरापला प्रुहक्योगी स्याहल तेहन्दा डुपॱराङ कोहएँ!” म़ेदी येशूगी सुङ नाङसीन। 50 ओहजेला स्याहप्च्यी थाम्ज्यीराङ येशूला क्युर ज़्या़दी प्रे़हदी काहल्सीन। 51 राहङ ज़ुबुला ऱेहगी योल्सेन च्यी़ॱराङ योल्ग्यो स्यारा मिह च्यी़ ओहला येहके, ओहले खो येशूला तिङ ङ्य़ेदी काहल्सीन। ओहले खुङया़गी खोॱलाङ ज़ुङज्ये छोल्सीन। 52 यिहॱनाङ खोगी राहङगी योल्सेनॱराङ क्युर ज़्या़दी च्येहन्डामुॱराङ छ्योङसीन। छो़खाङ छ्यिम्बुगी दिनला येशू ( मत्ती २६:५७-६८ ; लूक २२:५४-५५ , ६३-७१ ; यूह १८:१-१४ , १९-२४ ) 53 ओहले खुङगी येशूला पूजाहारी गो-छ्येवागी खाङबाला ख्येर्सीन। ओहले पूजाहारी छ्यिम्बु, छ्य़े-ठिमकी लोबेनया़ दाङ गोबाया़ जोम ओहङसीन। 54 पत्रुसती येशूला क्याहङलेगीॱराङ तिङदा तिङ ओहङदी पूजाहारी गो-छ्येवागी खाङबागी यिल्दोला लेप्सीन ओहले कोह सुङगेन मिहया़ ङ्याम्बुराङ तेहती मेह तू़हदी तेहसीन। 55 पूजाहारी छ्यिम्बु दाङ छो़बा थाम्ज्यीगीराङ येशूला से कोहएँ म़ेदी दास्यी छोल्सीन। यिहॱनाङ खुङगी दास्यी च्यी़ॱआङ च्य़ेह सिहन मा़हखु। 56 मिह माहङबुगीराङ येशूला ताम फातुर च़ूसीन। यिहॱनाङ खुङगी च़ूक्योगी ताम फातुर च्यी़ॱआङ मा़हन्डी। 57 ओ़ह तिङले लाहला मिहया़ लाहङदी येशूला टाह पेहती दि ल़ेहमु ङ्य़ेहबा काल्ज्ये छ़ूसीन, 58 “मिहगी ज़ोक्योगी दि छ्योखाङला रोम्दी मिहगी माहजे़बागी छ्योखाङ ङाह ङ्यिहमा सुमलाराङ ज़ोएँ म़ेदी खोगी माक्यो ओहराङगी थ़ेसीन।” 59 यिहॱनाङ खुङगी माक्योगी ताम च्यिॱआङ मा़हन्डी। 60 ओहले पूजाहारी गो-छ्येवा मिह थाम्ज्यीगी दिनला लाहङदी येशूला दि ल़ेहमु म़ेदी टी़हसीन, “ए, ताहन्दा च्यिबे खाजुम तेहकें? दि मिहया़गी ख्येला टाह पेहती माक्योगी तामया़गी तेहन्दाला च्यिरा मा कोहज्ये म़ेह?” 61 यिहॱनाङ येशू खाजुम्बाॱराङ ज़्य़ू नाङसीन। येशूगी च्यिॱआङ ल़ेहन क्याहप माहनाङ। येहपाराङ पूजाहारी गो-छ्येवागी येशूला टी़हसीन, “च्यि ख्ये तेहम्बा-तेहन्सुमॱराङ नाम्पार-ताहक्पा किन्ज्योगी स़ेबु मास्यीकाॱराङ यिहम्बा ले?” 62 ओहले येशूगी सुङ नाङसीन, “यिहम्बा, ङाह यिहम्बा ओहले ङ्यिहमा च्यी़ ख्या फे़बेया़गी मिहगी स़ेबुला थाम्ज्यी म़ेदी ओङ छ्यिम्बु किन्ज्योगी योबा ङो़गी ज़्य़ू-ठिला तेहक्यो दाङ स्यिहङगामले माहर मुक्पाला ओहङगेॱराङ पेहक्यो थोङज्ये येह!” 63 ओहले पूजाहारी गो-छ्येवागी राहङगी काप्च्या राल्दी, “ता़ह ओहराङला लेहमेन च्यि दास्यी कोहसीन ले? 64 खोगी किन्ज्योला स्ये़हन्डील पेहक्योदी ओहराङगी थ़े सिहन्दी येहबा। लो ता़ह म़ेदोङ, ख्यागी साम्लु च्यि येहबा?” ओहले खुङ थाम्ज्यीगी येशूला सेॱराङ कोहएँ म़ेदी मासीन। 65 ओहले खुङ नाहङदी लाहला मिहया़गी येशूला थुक्स्याल क्याहप्सीन, ओहले येशूगी च्येन उप्ती डाम्ज्या क्याहप्ती, “लो म़ेदोङ ले, ख्येला सुगी तुहङबा?” म़ेदी टी़हसीन। छो़बागी माक्मीया़गीॱआङ येशूला ओ़दुम क्याहप्केनराङ ख्येर्ती काहल्सीन। पत्रुसकी येशूला ङोह मे़हस्येएँ म़ेदी माक्यो ( मत्ती २६:६९-७५ ; लूक २२:५६-६२ ; यूह १८:१५-१८ , २५-२७ ) 66 पत्रुस यिल्दोलाॱराङ तेहती येहकें। ओहजेला पूजाहारी गो-छ्येवागी यो़मुया़ नाहङगी यो़मु च्यी़ ओहङसीन ओहले मोहगी पत्रुसला मेह तू़हदी तेहक्यो थोङसीन। 67 ओहले मोहगी पत्रुसगी तोहङबाला छ्यारे त़ेदी, “ख्येॱआङ नासरतकी येशू ङ्याम्बुराङ येहकें, मिहम्बा ले?” म़ेदी टी़हसीन। 68 ओहले पत्रुसगी मासीन, “मिहम्बा, ख्येगी दि काहन्डुमु ताम माक्यो यिहम्बा, ङाहगी नि च्यिॱआङ ह्अ मेहकोह दु।” ओ़ह तिङले पत्रुस यिल्दोगी कोह पोहला फार काहल्सीन ओ़हजेलाराङ च्याहबुॱआङ क़े तेन्सीन। 69 ओहले पत्रुसला लाहङ तेहक्यो थोङदी ओ़ह यो़मुगी ओ़हला येहकेन्गी मिहया़ला येहपाराङ मासीन, “दि मिहॱआङ येशूगी स्याहप्च्यी यिहम्बा!” 70 यिहॱनाङ पत्रुसगी येहपाराङ मिहम्बा म़ेदी मासीन। यिहॱनाङ याहम्बी तिङले साहर-सुहरला लाहङदी तेहक्यो मिहया़गी येहपाराङ पत्रुसला मासीन, “तेहम्बाराङ, ख्ये खुङया़ नाहङगी मिहराङ यिहम्बा, च्यिबेमाना ख्ये गालीलगी मिह यिहम्बा।” 71 येहपाराङॱआङ पत्रुसगी क्याहल्दी मासीन, “ङाहगी स्योप क्याहप्क्यो यिहन्सीमाना किन्ज्योगी ङाहला ङ्य़ेहबा काल नाङज्यु, राहङगी सुङ नाङग्यो मिहला नि ङाह ङोह मे़हस्येएँ।” 72 ओ़ह मालुङ मे़हबाराङ येहपाराङ च्याहबु क़े तेन्सीन ओहले “च्याहबु लेहमा ङ्यी़ क़े तेन्गे म़ेदी तोहङले ख्येगी ङाहला लेहमा सुम थु ङोह मे़हस्येएँ म़ेदी माज्ये येह।” म़ेदी येशूगी सुङ नाङग्योकी स्याहल पत्रुसगी टेहम्बा साल्सीन ओहले खो ज्यिबुराङ सेम नाहमु पेहती ङुहसीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.