मत्ती 25 - ह्योल्मोपोहमो स्यार्मा याहङबा च्युगी पे 1 “ओहले स्यिहङगामगी क्याहल्सी पोहमो स्यार्मा याहङबा च्यु ङ्याम्बु तुहर ख़ूएँ। खुङया़गी राहङ-राहङगी लो ख्येर्ती माहक्पा साम्बाला थू़ज्येला काहल्सीन। 2 ओ़ह पोहमो स्यार्मा याहङबा च्यु नाहङला मेहन्दा ङादी रिहक्पा येहकें दाङ लेहमेन ङादी रिहक्पा म़ेहबा येहकें। 3 ओहले रिहक्पा म़ेहबा पी़हमी ङागी लोॱनी ख्येर्ती काहल्सीन, यिहॱनाङ ल्हाक्पु नुमदी माहख्येर। 4 ओहले रिहक्पा येहकें पी़हमी ङागीदी ल्हाक्पु नुमॱआङ ख्येर्ती काहल्सीन। 5 ओहले खुङ कू़हदे तेहकेमु माहक्पा साम्बा ओहङज्ये फिमु काहल्ग्यो सोङबे खुङ थाम्ज्यीराङ ङ्यिचु क्याहप्ती ङ्यि लो़हसीन।” 6 “ओहले नुहप फे़ले फार खुङया़गी ‘त़ेदोङ, ता़ह माहक्पा साम्बा ओहङज्ये पेहती येह, फेप स्य़ूहज्येला लोहङ’ म़ेदी माक्यो के़ज्यी थ़ेसीन। 7 ओहले ओ़ह पोहमो स्यार्माया़ ह्अप-ह्ओप लाहङदी राहङ-राहङगी लोया़ ठाबे पेहसीन। 8 ओहले रिहक्पा म़ेहबागी पी़हमीया़गी रिहक्पा येहकेन्गी पी़हमीया़ला, ‘ङ्यिहगी लो स्यिज्ये पेहसीन, ङ्यिहला नुम सिपाज्यी लाङ नाह!’ म़ेदी मासीन। 9 यिहॱनाङ रिहक्पा येहकेनया़गी, ‘ख्याया़ॱलाङ दाङगे थुगी नुमनी ङ्यिह ङ्याम्बु म़ेह, ख्याया़ छोङखाङला काहल्दी ङ्ये़हदी ख्येर-स्यो नाह’ म़ेदी मासीन।” 10 “ओहले ओ़ह रिहक्पा म़ेहबागी पी़हमी ङा नुम ङ्योह डोएँमु माहक्पा साम्बा लेप्सीन। ओहले ठाबे पेहती तेहक्योगी पी़हमी ङादी माहक्पा साम्बा ङ्याम्बुराङ पा़हमागी डेन साहज्येला खाङबा नाहङला स्य़ूहसीन, ओहले खाङबागी कोहॱआङ क्याहप्सीन।” 11 “याहम्बी तिङले रिहक्पा म़ेहबागी पी़हमी ङाॱआङ थेन ओहङदी, ‘चो़वो ला़ह, ङ्यिहॱआङ नाहङला ओहङज्ये कोह खा फे़ नाङदोङ नाह ला़ह!’ म़ेदी स्युहसीन। 12 यिहॱनाङ माहक्पा साम्बागी खाङबा नाहङलेॱराङ, ‘अहँ, तेहम्बाराङ ङाह ख्याया़ला माएँ ङाह ख्याया़ला ङोह मे़हस्येएँ!’ म़ेदी मासीन।” 13 “ओ़ह सोङबे ख्याया़ टिहम्बु पेहती तेहतोङ च्यिबेमाना मिहगी स़ेबु का़हन्दी ङ्यिहमा दाङ ती़हजीला फेप नाङज्ये येह माएँ ताम, ओ़ह ख्याया़ला क्यी़ह ज्योर्च्ये म़ेह।” योक्पु सुम ( लूक १९:११-२७ ) 14 येशूगी येहपाराङ सुङ नाङसीन, “किन्ज्योगी क्याहल्सीनी दि ल़ेहमु यिहम्बा– मिह च्यी़ फि-युहलला डोएँमु खोगी राहङगी योक्पुया़ला क़े क्याहप्ती राहङगी थाम्ज्यी क्युहया़ खुङला चि क्याहप्सीन। 15 ओहले ताहक्पुगी योक्पुया़गी टिहम्दाङला त़ेदी च्यी़ला सेर-टाङ कोहर्मु ङा, च्यी़ला सेर-टाङ कोहर्मु ङ्यी़ दाङ लेहमेन च्यी़दीला सेर-टाङ कोहर्मु च्यी़ तेर्ती खो काहल्सीन। 16 सेर-टाङ कोहर्मु ङा ज्योर्केन्दीगी लाहम्साङराङ काहल्दी छोङ क्याहप्ती लेहमेन सेर-टाङ कोहर्मु ङा ख्येप्साङ तेन्सीन। 17 ओहले सेर-टाङ कोहर्मु ङ्यी़ ज्योर्केन्दीगीॱआङ लेहमेन सेर-टाङ कोहर्मु ङ्यी़ ख्येप्साङ तेन्सीन। 18 ओहले सेर-टाङ कोहर्मु च्यी़ ज्योर्केन्दीगीदी सा ओम फ्रिदी नाहङला पे़ह ज़्या़सीन।” 19 “ओहले लोह माहङबुराङ तिङले ओ़ह योक्पुया़गी ताहक्पु लो़ह ओहङदी खोगी खुङया़ ङ्याम्बु चिदुङ लाङसीन। 20 ओहले सेर-टाङ कोहर्मु ङा लेहन्गेन्दीगी ओहङदी ताहक्पुला मासीन, ‘ज़ी़-नाङदोङ, राहङगी ङाहला सेर-टाङ कोहर्मु ङा नाङग्यो येहकें, ङाहगी ओहलेगी लेहमेन सेर-टाङ कोहर्मु ङा ख्येप्साङ तेन्दी येह।’ 21 ताहक्पुगी खोला, ‘ख्येगी या़हबु पेहसीन दु! ख्ये यिह छ्ये़बु योक्पु दुबा। ख्ये ङ्ये़हमु से़हया़ॱलाङ यिह-छ्य़ेबु काहल्ग्यो सोङबे ङाह ख्येला लेहमेनॱआङ माहङबुराङ से़हया़ चि क्याहप्के। ता़ह, ख्ये ङाह ङ्याम्बु ओहङदी डेन से़हदी क़ेहनाङ पेहतोङ!’ 22 ओ़ह तिङले सेर-टाङ कोहर्मु ङ्यी़ लेहन्गेन्दीगी ओहङदी मासीन, ‘ज़ी़-नाङदोङ, राहङगी ङाहला सेर-टाङ कोहर्मु ङ्यी़ नाङग्यो येहकें। ङाहगी ओहलेगी लेहमेन सेर-टाङ कोहर्मु ङ्यी़ ख्येप्साङ तेन्दी ख्योङदी येहबा।’ 23 ओहले ताहक्पुगी खोला मासीन, ‘ख्येगी या़हबु पेहसीन दु! ख्ये यिह-छ्य़ेबु योक्पु दुबा। ख्ये फेमा से़हया़ॱलाङ यिह-छ्य़ेबु काहल्ग्यो सोङबे ङाह ख्येला लेहमेन माहङबुराङ से़हया़ चि क्याहप्के। ख्येॱआङ ङाह ङ्याम्बु ओहङदी डेन से़हदी क़ेहनाङ पेहतोङ’।” 24 “ओ़ह तिङले सेर-टाङ कोहर्मु च्यी़ लेहन्गेन्दीगी ओहङदी मासीन, ‘ज़ी़-नाङदोङ, राहङगी सेम सान्दी येहबा म़ेदी ङाहला क्यी़ह येहकें, राहङगी मा़हचुबागी स्यिहङलेगी डुया़ ट़ूह नाङगे ओहले माहताप्पागी डुया़ रु-नाङगे। 25 ओ़ह सोङबे ङाह ज्यी़सीन, ओहले काहल्दी राहङगी सेर-टाङ कोहर्मु ङाहगी सा नाहङला पे़ह ज़्या़सीन। ता़ह नोम नाङदोङ ला़ह, राहङगी सेर-टाङ कोहर्मु।’ 26 ओहजेला ताहक्पुगी खोला मासीन, ‘ए ङ्येहन्दा दाङ ल़ेहमी-लाहम योक्पु! ङाहगी मा़हचुबागी ग्या़ला टू़हगे दाङ माहताप्पागी डुया़ रूगे म़ेदी ख्येगी ह्अ कोहक्यो यिहन्सीमानानी, 27 ख्येगी ङाहगी क्युह चोगीला च्यिबे माहताङबा ले? ओहले ङाह लो़हदी ओहङगेमु ङाहगी च्यिॱआङ मेहन्ज्योरनाॱआङ चोगी येहॱनाङ ज्योर्च्ये येहकें! 28 ओ़ह सोङबे खो ङ्याम्बु ओ़ह सेर-टाङ कोहर्मु फ्रो़दी ओ़ह सेर-टाङ कोहर्मु च्यु येहकेन्दीला तेर। 29 च्यिबेमाना का़हन्दी ङ्याम्बु येहबा, खोला लेहमेनॱआङ तेर्च्ये येह, ओहले खो ङ्याम्बु माहङबुराङ ओहङज्ये येह। यिहॱनाङ का़हन्दी ङ्याम्बु म़ेहबा, खो ङ्याम्बु येहकेन्दीॱआङ फ्रो़ज्ये येह। 30 ता़ह दि फेन मे़हथोएँ योक्पुला फिला ख्येर्ती ना़-जुबेला क्युर चोहङ। ओ़हला खो सो मुहर्ती ङी़हदी तेहच्ये येह’।” ठिम ताङगेन्गी तेहन्दाला 31 “मिहगी स़ेबु थाम्ज्यीराङ स्यिहङगामगी स्याहप्च्यीया़ ङ्याम्बु राहङगी ज़िज्यिद छ्यिम्बुला फेप्ती राहङगी ज़्य़ू-ठिला ज़्य़ू नाङज्ये येह। 32 ओ़ह ती़हजीला जाम्बुलीङगी थाम्ज्यी क्यिहपागी मिहया़ मिहरोगी दिनला जोम्ज्ये येह ओहले कोहरोवाया़गी राह दाङ ल़ूहया़ला खा फ़ेगे ल़ेहमुराङ मिहरोगी ओ़ह मिहया़ॱलाङ खा फे़ नाङज्ये येह। 33 खोगी ल़ूहया़ला राहङगी योबा ङो़ले ओहले राहया़लादी राहङगी योमा ङो़ले खा फ़ेदी ज़्या़ नाङज्ये येह। 34 ओहले क्याहल्बुगी राहङगी योबा ङो़गी मिहया़ला दि ल़ेहमु माज्ये येह, ‘ए ङाहगी किन्ज्यो याहपगी मेलाम थोप्क्यो मिहया़! ओहङदी जाम्बुलीङ छ्या़गे यिहन्ज्युराङ ख्याया़गी तेहन्दाला ठाबे पेहती ज़्या़क्यो क्याहल्सीला तेह 35 च्यिबेमाना ङाह तो़गेमु ख्याया़गी ङाहला साहज्ये तेर्सीन, ओहले खा कोम्गेमु ख्याया़गी ङाहला छ्यु तेर्सीन। ङाहला सुगीॱआङ ङोह मे़हस्येएँ येहकें यिहॱनाङ ख्याया़गी खाङबाला ङाहला फेप स्युहसीन। 36 ङाह च्यिहन्डामु येहकें, ख्याया़गी ङाहला काप्च्या केन तेर्सीन। नेहपा येहकें, ख्याया़गी ङाहला ता ओहङसीन। चोन-खाङला येहकें, ख्याया़ ङाहला थ़ू ओहङसीन’।” 37 “दि थे़दी किन्ज्योगी का ची़दी ओहङग्यो टाहङबु मिहया़गी खोला टी़हज्ये येह, ‘चो़वो छ्येवा, ङ्यिहगी राहङला नाहम छ्याल टे़क्यो थोङदी छ्येच्ये से़हया़ तेर्पा ले? ओहले ङ्यिहगी राहङला नाहम राहङगी स्याहल कोम्ग्यो थोङदी छ्यु तेर्पा ले? 38 राहङला सुगीॱआङ ङोह मे़हस्येएँमु नाहम ङ्यिहगी राहङला खाङबाला फेप स्यिहबा ले? नाहम ङ्यिहगी राहङला च्यिहन्डामु थोङदी नाहम्सा केन तेर्पा ले? 39 नाहम ङ्यिहगी राहङला ङ्युङगे थोङदी राहङला चारा पेहपा ले? ओहले नाहम ङ्यिहगी राहङला चोन-खाङला थोङदी थ़ू ओहङबा ले?’ 40 ओहजेला ज़्य़ू-ठिला ज़्य़ू नाङगे क्याहल्बुगी दि ल़ेहमु सुङदी ल़ेहन क्याहप नाङज्ये येह, ‘तेहम्बाराङ ङाह ख्याया़ला माएँ, ङाहगी नो़ह-नुहमुया़ नाहङला थाम्ज्यी म़ेदी फेमाला ख्याया़गी च्यि पेहपा, ओ़ह ङाहलाराङ पेहक्यो यिहम्बा’।” 41 “ओ़ह तिङले खोगी राहङगी योमा ङो़ले तेहक्यो मिहया़ला दि ल़ेहमु सुङ नाङज्ये येह, ‘ए किन्ज्योगी मे़मु सू़हक्यो मिहया़, देलेगी ग्यो़बाराङ थेन्दी सोङ! ती़ह गो-छ्येवा दाङ खोगी स्याहप्च्यीया़गी तेहन्दाला ठाबे पेह ज़्या़क्यो नाहमॱआङ मिहस्यीएँगी मेहला सोङ! 42 च्यिबेमाना ङाह तो़गेमु ख्याया़गी ङाहला साहज्ये माहतेर। खा कोम्गेमु, ख्याया़गी ङाहला छ्यु माहतेर। 43 ङाहला सुगीॱआङ ङोह मे़हस्येएँ येहकें ओहजेला ख्याया़गी ङाहला तेहसा ग्या़ च्यिॱआङ माहतेर। च्यिहन्डामु येहकें, ख्याया़गी ङाहला काप्च्या केन माहतेर, नेहपा येहकेंमु ओहले चोन-खाङला येहकेंमु ख्याया़गी ङाहला थु माहयोहङ’।” 44 “ओहले खुङया़गीॱआङ टी़हज्ये येह, ‘चो़वो, ङ्यिहगी नाहम राहङला छ्याल टे़क्यो दाङ राहङगी स्याहल कोम्ग्यो थोङबा ले? नाहम ङ्यिहगी राहङला सुगीॱआङ ङोह मा़हस्येबा पेहती ज़्य़ूक्यो थोङबा ले? नाहम ङ्यिहगी राहङला च्यिहन्डामुॱराङ ज़्य़ूक्यो थोङबा ले? नाहम ङ्यिहगी राहङला ङ्युङग्यो थोङबा ले? नाहम ङ्यिहगी राहङला चोन-खाङला छ्यिक्यो थोङदीॱआङ स्याहप्तो मा़हस्युहबा ले?’ 45 ओ़ह ती़हजीला ज़्य़ू-ठिला ज़्य़ू नाङगेन क्याहल्बुगी खुङया़ला दि ल़ेहमु सुङ नाङज्ये येह, ‘तेहम्बाराङ ङाह ख्याया़ला माएँ, ङाहगी नो़ह-नुहमुया़ नाहङला थाम्ज्यी म़ेदी फेमाला ख्याया़गी च्यि च्यि माहबेबा, ओ़ह ख्याया़गी ङाहलाराङ माहबेबा यिहम्बा।’ 46 ओहले खुङया़गीदी नाहम्स्यी किन्दुॱराङ ङ्य़ेहबा खुर कोहच्ये येह, यिहॱनाङ टाहङबु मिहया़गीदी नाहमॱआङ मिहस्यीएँगी मिहली ज़ाङबु ज्योर्च्ये येह।” |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.