लूका 24 - ह्योल्मोयेशू टोहङदी ङ्यिहमा सुम तिङले सोम्बो ज़्याङ नाङग्यो ( मत्ती २८:१-१० ; मर्क १६:१-११ ; यूह २०:१-१० ) 1 ज़ा-ङ्यिहमा ङाटु क्या-ह्राबा-ह्रिबेला ओ़ह पी़हमी-पेहजाया़ राहङ-राहङगी ठाबे पेहक्योगी टिहमा स्यिहम्बुगी नुम दाङ पेगारया़ थो़दी येशूगी कुबुर तो़ह ज़्या़क्योगी फुक्पाला काहल्सीन। 2 येशूगी कुबुर तो़ह ज़्या़क्योगी फुक्पाला लेप्ते ताएँमु फुक्पाला का़ ज़्या़क्योगी तोह खा फे़क्यो थोङसीन। 3 फुक्पा नाहङला स्य़ूहगेमु खुङया़गी येशूगी कुबुर माहथोङ। 4 ओहले खुङया़ दिगी तेहन्दाला थामा थोमे पेहती तेहकेमु याहङमे-याहङलाराङ येहपा छ्याएँ थुगी नाहम्सा नोम्ग्योगी क्येप-ख्योवा ङ्यी़ खुङया़गी पोहला ज़्याङग्यो थोङसीन। 5 ओहले पी़हमी पेहजाया़ ज्यी़दी साला खेप्चु क्याहप्सीन। ओहजेला ओ़ह क्येप-ख्योवा ङ्यी़गी मासीन, “च्यिबे ख्यागी सोम्बो मिहला स्यिक्योया़गी पाहरक्यीला छोल्गे? 6 येशू देला म़ेह, मिहरोनी टोहङग्योलेगी सोम्बो ज़्याङ नाङदी येह! गालीलला ज़्य़ू नाङगेमु येशूगी ख्याला च्यि सुङ नाङग्यो येहकें ओ़हदी टेहम्बा साल्दोङ, 7 ‘किन्ज्योगी ताङ नाङग्योकी मिह तिहक्च्येम्बागी लाहक्पाला छ्यिती क्याहङस्यीङला च्याङदी स्यि कोहज्ये येह, ओहले ङ्यिहमा सुङ तिङले सोम्बो लो़हज्ये येह’ म़ेदी सुङ नाङग्योकी स्याहल च्यि ख्यागी टेहम्बा मा़हसाल?” 8 ओहजेला पी़हमी-पेहजाया़गी येशूगी सुङ नाङग्योकी स्याहलया़ टेहम्बा साल्सीन। 9 ओहले पी़हमी पेहजाया़ फुक्पाले लो़ह काहल्दी राहङगी थोङग्योकी केच्या स्याहप्च्यी च्यू़ज्यी दाङ लेहमेन थाम्ज्यीराङ स्याहप्च्यीया़ला स्येसीन। 10 ओ़ह पी़हमी-पेहजाया़दी मरियम मग्दलिनी, योअन्ना दाङ याकूबकी आमा मरियम यिहन्गे। ओहले खुङया़ ङ्याम्बु येहकेन्गी लो़हलो पी़हमीया़गीॱआङ दि केच्या ल़ेह-पेनया़ला स्येसीन। 11 यिहॱनाङ “ख्यागी माक्योगी तामनी कोह मे़हछ्येएँगी ताम यिहन!” म़ेदी खुङया़गी पी़हमी-पेहजाया़गी माक्यो तामला यिह मा़हछ्ये। 12 यिहॱनाङ पत्रुस ह्ओप लाहङदी फुक्पाला छ्योङदे काहल्सीन। ओहले कुहर पेहती नाहङला ताएँमुनी रे़ह च्यी़राङ थोङसीन। दि थोङदी खो याहम्जेनज्यी ने़दी लो़ह काहल्सीन। इम्माउसगी लाहमला येशू ( मर्क १६:१२-१३ ) 13 ओ़ह ङ्यिहमुराङ येशूगी स्याहप्च्यी ङ्यी़ यरूशलेमले नेसा च्यू़ज्यी चेगी लाहम था़-रिहङबुला येहकेन्गी इम्माउस माएँ युहलला डोॱराङ येहकें। 14 खुङ ङ्यी़ यरूशलेमला च्यि च्यि काहल्बा माएँगी तामया़ म़ेदी तेहक्यो येहकें। 15 ओहले खुङ ङ्यी़ दि केच्यागी तेहन्दाला ताम म़ेदी स्येती तेहकेमु येशू फेप्ते खुङ ङ्याम्बुराङ फेप्च्ये छ़ूसीन, 16 यिहॱनाङ खुङगी येशूला ङोहस्ये मा़हखु। 17 येशूगी खुङया़ला टी़ह नाङसीन, “ख्या च्यिगी तेहन्दाला ताम म़ेदी डे़ तेहक्यो?” खुङ ङ्यी़ तोहङबा ना-स्यी़ले पेहते थेमे तेहसीन। 18 ओहले खुङ ङ्यी़ नाहङला क्लेओपासगी मासीन, “राहङ यरूशलेमगी लाहमले जेते फेप नाङसीन यिहॱनाङ ओ़हला दाङ-तिहरीङ च्यि काहल्बा राहङला थुयी़ म़ेहबा?” 19 येशूगी खुङ ङ्यी़ला, “च्यि ताम?” सुङदी टी़ह नाङसीन ओहजेला खुङ ङ्यी़गी, “नासरतगी येशूगी तेहन्दाला, येशू लुहङतेम्बा येहकें, ओहले किन्ज्यो दाङ मिह थाम्ज्यीगी दिनला ओङ छ्यिम्बुगी छ्या़ले जे नाङगे दाङ ज्यिबुराङ या़हबु सुङदेन नाङगेन्गी लुहङतेम्बा यिहन्गे। 20 यिहॱनाङ ङ्यिहगी पूजाहारी छ्यिम्बु दाङ पोम्बोया़गी येशूला सेतोङ म़ेदी क्याहङस्यीङला च्याङ च्य़ूसीन। 21 मिहरोगीॱराङ इस्राएलीया़ला थार च्य़ू नाङगेन म़ेदी ङ्यिहगी रेहवा पेहते येहकें। यिहॱनाङ तिहरीङ येशूला क्याहङस्यीङला च्याङदी ङ्यिहमा सुम काहल सिहन्सीन। 22 येहपाराङ ङ्यिहगी लाहला आज्यी-नुहमुया़गी माक्योगी ताम थे़दी ङ्यिहनी ह्अॱराङ ल़ेहसीन। खुङ तिहरीङ ङाटुराङ फुक्पाला ता काहल्ग्यो येहकें, 23 यिहॱनाङ ओ़हला खुङगी येशूगी कुबुरला च्य़ेह माहसीहन लो। ओहले खुङगी ओहङदी ङ्यिहला मासीन, ‘ङ्यिहगी स्यिहङगामगी स्याहप्च्यीला थोङसीन’ ओहले स्यिहङगामकी स्याहप्च्यीगी ‘येशूनी सोम्बोराङ येह’ म़ेदी सुङ नाङसीन लो। 24 दि केच्या थे़दी ङ्यिहगी लाहला रो़हया़ॱआङ फुक्पाला ता काहल्सीन, खुङगीॱआङ ओ़ह पी़हमीया़गी माक्यो ल़ेहमुराङ फुक्पा तोङबा थोङसीन लो, यिहॱनाङ येशूलानी माहथोङ लो।” 25 ओहले येशूगी खुङया़ला सुङ नाङसीन, “ए रिहक्स्यी म़ेहबागी मिह, ख्यागी सेम देजे लो-सेपु काहल्दी येह, लुहङतेम्बाया़गी माक्योगी केच्याया़ ख्याया़गी यिह मे़हछ्येएँ! 26 चा़ दाङ ज़िज्यिद ज्योर्के म़ेदी तोहङले मास्यीकागी तुहक्पु खुर मेहकोएँ ले?” 27 ओहले मोशा दाङ थाम्ज्यीराङ लुहङतेम्बाया़गी सुङरापला येशूगी तेहन्दाला प्रुहक्योगी केच्या खुङया़ला ह्अ कोह च्य़ू नाङसीन। 28 इम्माउस युहलला लेप्च्ये जेकेमु येशू ओ़हलेगीॱआङ फारटाङ फेप्च्ये थु जे नाङसीन। 29 ओहले खुङगी येशूला दि ल़ेहमु म़ेदी उर्चु पेहसीन, “ङ्यिह ङ्याम्बुराङ ज़्य़ू नाङदोङ, च्यिबेमाना नाहम से़ज्ये पेहसीन, ओहले ङ्यिहमा माहङबुराङ योहल सिहन्दी येह।” ओहले येशू खुङ ङ्याम्बुराङ ज़्य़ूज्येला खाङबा नाहङला स्य़ूह नाङसीन। 30 ओहले येशू खुङ ङ्याम्बु छ्येच्येला ज़्य़ू नाङसीन ओहले येशूगी खुरा नोम्दे मेलाम क्याहप्नाङसीन ओहले खुरा च्या़दी खुङया़ला नाङसीन। 31 ओहले गा खुङया़गी मी़ खा फ़ेसीन, ओहले खुङगी येशूला ङोह स्येसीन। ओ़ह तिङले खुङया़गी येशूला माहथोङ। 32 खुङया़गी राहङ नाहङदुङ मासीन, “येशू ओहराङ ङ्याम्बु लाहमला स्याहल सुङ नाङगेमु ओहले ओहराङला सुङरापगी तेहन्दा खा फे़ नाङगेमु च्यि ओहराङगी सेम ज्यिबुराङ काहसो काहल्ग्यो म़ेहबा येहकें ले?” 33 खुङया़ ओ़हजेलाराङ ह्ओप लाङदे यरूशलेमला लो़ह काहल्सीन, ओहले स्याहप्च्यी च्यू़ज्यी दाङ खुङ ङ्याम्बु जोम्दी तेहक्योया़ला थ़ूसीन, 34 ओहले खुङया़ला दि ल़ेहमु मासीन, “चो़वो छ्येवा ताहन्दाॱराङ सोम्बो लो़हदे ज़्याङ नाङग्यो दु ओहले येशू सिमोन साला फेप नाङसीन।” 35 ओहले खुङगी लाहमला डोएँमु च्यि च्यि काहल्बा ओहले खुरा च्या़गेमु काहन्डुमु पेहते येशूला ङोह स्ये़बा, ओ़ह स्ये तेर्सीन। स्याहप्च्यीया़ला येशूगी ज्याल्गा नाङग्यो ( मत्ती २८:१६-२० ; मर्क १६:१४-१८ ; यूह २०:१९-२३ ; ल़ेह १:४-८ ) 36 खुङया़गी दि ताम म़े तेहकेमु येशू याहङमे-याहङलाराङ खुङगी क्यिलला ज़्याङदी सुङ नाङसीन, “ख्याया़ ङ्याम्बु स्य़िहदे ओहङज्यु!” 37 खुङया़ फ्रिक लाङदे ज्यी़सुगी आङसीन, ओहले “ङ्यिहगीनी ल्हेन्डी गा थोङसीन” ऩे तेहक्यो। 38 यिहॱनाङ येशूगी खुङया़ला सुङ नाङसीन, “ख्याया़ च्यिबे दि ल़ेहमु पेहते ज्यी़गे? ख्याया़गी सेमला च्यिबे दि ल़ेहमु थेचुम क्येक्यो? 39 ङाहगी लाहक्पा दाङ काङबाला त़ेदोङ, ङाहराङ यिहन, ङाहला दे़दी त़ेदोङ। च्यिबेमाना ल्हेन्डीदी स्या दाङ रेहको मेहयोहङगे, यिहॱनाङ ख्याया़गी थोङदी येह, ङाहतीनी येह।” 40 ओ़ह ल़ेहमु सुङ फान्ज्यो येशूगी खुङया़ला राहङगी छ्या़ दाङ स्याहप तेन नाङसीन। 41 यिहॱनाङ खुङया़ ज्यिबुराङ क़ेहनाङ लाहङदी याहम्जेनज्यी ने़दी यिह-छ्य़ेॱराङ मा़हखु। ओहले येशूगी, “ख्या ङ्याम्बु च्यिरा साहज्ये स़ेह येहबानी?” सुङदी टी़ह नाङसीन। 42 खुङगी योक्योगी ङ्याह दुम्बु च्यी़ येशूला स्युहसीन। 43 ओहले येशूगी ओ़ह ङ्याह नोम्दे खुङ दिनलाराङ छ्ये नाङसीन। 44 येशूगी खुङया़ला सुङ नाङसीन, “ख्या ङ्याम्बु तेहकेमु ङाहगी ख्याला माक्यो मिहन ले, मोशागी नाङग्योकी छ्य़े-ठिम, लुहङतेम्बा दाङ छ्य़े-लुगी छ्य़ेला ङाहगी तेहन्दाला प्रुहक्योगी थाम्ज्यीराङ केच्याया़ तेहन्दा डुपॱराङ कोहकें।” 45 ओहले सुङरापला प्रुहक्योगी स्याहल ङोह स्य़े च्य़ूज्येला येशूगी खुङया़ला ङोह स्ये़एँगी ओङ नाङसीन। 46 “सुङरापला दि ल़ेहमु प्री़हदी येहबा थार्पा नाङगेन मास्यीका तुहक्पु खुर्ते स्यि कोहज्ये येह, ओहले ङ्यिहमा सुमला टोहङग्योलेगी सोम्बो ज़्याङज्ये येह। 47 ओहले यरूशलेम यिहन्ज्यु छ़ूदी थाम्ज्यीराङ क्यिहपाया़ला येशूगी छेनला राहङगी सेमगी स्या़बा पेहती तिहक्पा पाङसीन माना तिहक्पागी स्या़बा ज्योर्च्ये येह माएँ तामगी तेहन्दाला स्येॱराङ कोहच्ये येह। 48 ख्याया़राङ दि केच्याया़दी पाङबु यिहन। 49 त़ेदोङ, ङाहगी याहपगी ज़्या़ नाङग्योकी ताहम्ज्या ङाह ख्यासाला ताङगे, यिहॱनाङ याहरले ओङ माहन्ज्योर थु ख्यादी क्याहसाला कू़हदी तेहतोङ।” येशू स्यिहङगामला फेप नाङग्यो ( मर्क १६:१९-२० ; ल़ेह १:९-११ ) 50 ओ़ह तिङला येशूगी खुङया़ला बेथानिया थु नोम फेप्सीन, ओहले राहङगी लाहक्पा क्या़दी खुङया़ला मेलाम क्याहप्नाङसीन। 51 येशूगी खुङया़ला मेलाम नाङगेमुराङ, येशू खुङया़ ङ्याम्बु खा फ़ेदी फुर्ती फेप नाङसीन। 52 खुङया़गी येशूला छ्या़ साल्दे ज्यिबुराङ क़ेहनाङ पेहती यरूशलेम क्याहसा ङो़ले लो़ह काहल्सीन। 53 खुङ ङ्यिहमा-टाहङमाराङ छ्योखाङला जोम्गो येहकें ओहले किन्ज्योला त़ेरा फुल्गो येहकें। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.