लूका 2 - ह्योल्मोयेशू ठुङ नाङग्यो ( मत्ती १:१८-२५ ) 1 ओहजे काहङला रोमी क्याहल-खामगी गो-छ्येवा क्याहल्बु अगस्टसगी राहङगी ओङ छ्य़ेक्यो क्याहल-खापया़गी मिहया़ला मिहगी टाहङजी ज़्या़ कोहएँ म़ेदी का नाङसीन। 2 दि रोहवा पेहती मिह टाहङजी ज़्या़ च्य़ूक्योदी कुरेनियस सिरिया क्याहल-खापदी स्युहङ-पेन छ्यिम्बु येहकेमु तोहङस्यो पा़लो पेहक्यो यिहन्गे। 3 ओहले गो-छ्येवा क्याहल्बु अगस्टसगी का नाङग्यो ल़ेहमुराङ पेहती राहङ-राहङगी क्याहसाला काहल्दी मिहया़गी राहङ-राहङगी मिहन प्रुह च्य़ूसीन। 4 ओ़ह ती़हजीला योसेफ गालील साने़की नासरत माएँ क्याहसाला तेहको येहकें यिहॱनाङ खोगी फायुदी क्याहल्बु दाऊदगी क्येसा फायु यहूदीया लुहङबागी बेथलेहेम क्याहसा यिहन्गे। ओ़ह सोङगोराङ खो राहङगी मिहन प्रुह च्य़ूज्येला बेथलेहेमला काहल्सीन, च्यिबे मासीमाना खो क्याहल्बु दाऊदकी क्यिह दाङ छार्क्यीन यिहन्गे। 5 ओहले योसेफगी राहङ ङ्याम्बु लाङज्याङ पेहक्यो मरियमलाॱआङ राहङ ङ्याम्बुराङ मिहन प्रुह च्य़ूज्येला ख्येर्ती काहल्सीन। ओहले ओ़ह ती़हजीला मरियमदी ज़ुबु ङ्यिहपा येहकें। 6 ओहले खुङ ङ्यी़ बेथलेहेमला येहकेमुराङ मरियमदी ज़ुबु या़हबु डोज्ये पेहसीन। 7 ओहले बेथलेहेमलाॱराङ मोहगी स़ेबु च्यी़ ठुङसीन ओहले ओ़ह स़ेबु छ्येस्योला ल़ेहदेनगी टिल्दी कोहरेला येहकेन ज्य़ोङबाला ङ्याल ज़्या़सीन, च्यिबेमाना खुङया़ला बा़सा तेहच्येला ने़जाङला ग्या़ माहन्ज्योर्पा येहकें। ल़ूह-कोहरोवाया़ येशूला ता काहल्ग्यो 8 ओ़ह ती़हजी ओ़ह ग्या़गी पोहगी थाङगाला कोहरोवाया़ कुहङमु राहङगी ल़ूह बा़लया़ सुङदी तेहती येहकें। 9 ओहले ल़ूह-कोहरोवाया़गी स्यिहङगामकी स्याहप्च्यी च्यी़ थोङसीन ओहले चो़वो छ्येवागी येहसेर खुङगी छ्यो़ ज़्यिलाराङ क्याहप्सीन। ओहले कोहरोवाया़ ज्यी़दी दार्सीन। 10 ओ़ह ती़हजीला स्यिहङगामकी स्याहप्च्यीगी सुङ नाङसीन, “ख्याया़ मा़हन्ज्यी, च्यिबेमाना ङाहगी मिह थाम्ज्यीला ज्यिबुराङ सेम काहसोगी लेहङगु या़हबु ख्योङदी ओहङदी येह। 11 तिहरीङ दाऊदगी क्येसा फायु बेथलेहेमला ख्याया़ला थार्पा थोप च्य़ू नाङगेन मास्यीका ठुङदी येह। ओ़ह स़ेबुराङ किन्ज्योगी ताङ नाङग्योकी चो़वो छ्येवा मास्यीका यिहन। 12 ख्यागी ओ़ह स़ेबुला ल़ेहदेनगी टिल्दी ज्य़ोङबाला ङ्याल ज़्या़क्यो च्य़ेह सिहन्ज्ये येह, ओ़हदीॱराङ थार्पा थोप च्य़ू नाङगेन मास्यीका यिहम्बा।” 13 ओहले याहङमे-याहङराङ ओ़ह स्यिहङगामकी स्याहप्च्यी ङ्याम्बु राहङसा क्याहक्चेराङ स्यिहङगामकी स्याहप्च्यीया़ थोङसीन ओहले किन्ज्योला दि ल़ेहमु पेहती त़ेरा फुल्सीन, 14 “स्यिहङगामला ज़्य़ू नाङगेन्गी किन्ज्योला ज़िज्यिद ओहङज्यु, ओहले जाम्बुलीङला किन्ज्योगी थु-सेम जे नाङग्योकी मिहया़ला स्य़िहदे ओहङज्यु!” 15 ओहले स्यिहङगामकी स्याहप्च्यीया़ स्यिहङगामला लो़ह फेप फान्ज्यो कोहरोवाया़गी राहङ नाहङला मासीन, “लो डो, चो़वो छ्येवा किन्ज्योगी ओहराङला सुङ नाङग्योकी स्याहल बेथलेहेमला ता डोएँ।” 16 ओहले खुङया़ छारा पेहती ता काहल्सीन। ओहले ओ़हला लेप्ते खुङगी मरियम दाङ योसेफ ओहले ल़ेनु स़ेबुला ज्य़ोङबाला ङ्याल ज़्या़क्यो थोङसीन। 17 ल़ेनु स़ेबुला थोङदी ल़ूह-कोहरोवाया़गी स्यिहङगामकी स्याहप्च्यीगी स़ेबुगी तेहन्दाला च्यि च्यि मे़बा ओ़ह थाम्ज्यीराङ स्येसीन। 18 ओहले कोहरोवाया़गी ताम थे़गेन मिह थाम्ज्यीराङ ह्अ ल़ेहसीन। 19 यिहॱनाङ मरियमगी दि केच्याया़ साम्लु ताङदे सेम नाहङलाराङ ज़्या़सीन। 20 ओहले ल़ूह-कोहरोवाया़गी स्यिहङगामकी स्याहप्च्यीगी स्येक्यो ल़ेहमुराङ थे़क्यो दाङ थोङग्यो स्याहलगी तेहन्दाला किन्ज्योला ज़िज्यिद दाङ त़ेरा फुल्दी लोह काहल्सीन। स़ेबुला छेन ता़क्यो 21 ओहले मोशागी छ्य़े-ठिमला ल़ेहमुराङ ओ़ह स़ेबु ठुङदी ङ्यिहमा क्ये़ह डोएँ ङ्यिहमु स्या-ताक पेहसीन, ओहले ओ़ह स़ेबुला येशू माएँ छेन ता़सीन। ओहले ओ़ह छेनदी मरियम ज़ुबु ङ्यिहपा डोएँ म़ेदी तोहङलेराङ स्यिहङगामकी स्याहप्च्यीगी नाङग्यो येहकें। छ्योखाङला येशू च्योल्ग्यो 22 मोशागी नाङग्यो छ्य़े-ठिमला ल़ेहमुराङ खुङया़दी ज़ुबु चाङमा ज़ोएँ ङ्यिहमा लेप फान्ज्यो मरियम दाङ योसेफगी येशूला यरूशलेमकी छ्योखाङला किन्ज्योगी कुम्देनला ख्योङसीन। 23 च्यिबे मासीमाना चो़वो छ्येवा किन्ज्योगी छ्य़े-ठिमला तोहङस्यो क्येक्योगी पुह-पेहजा चो़वो छ्येवाकी तेहन्दाला नाम्पार-ताहक्पा म़ेदी माज्ये येह। 24 ओहले चो़वो छ्येवा किन्ज्योगी छ्य़े-ठिमला सुङ नाङग्यो ल़ेहमुराङ दुङगुकुर छ्या़ च्यी़ कि-माना छारक्यो पुहर्कानी छ्या़ ङ्यी़ मार्च्ये ताङ कोहउ येहकें। 25 ओ़ह ती़हजीला यरूशलेम क्याहसाला शिमियोन माएँ मिह च्यी़ तेहको येहकें। खो टाहङबु पेहकेन दाङ छ्य़ेसेम पेहकेन मिह यिहन्गे। ओहले खो किन्ज्योगी इस्राएल क्यिहपाया़ला थार च्य़ू नाङगेन्गी मास्यीकाकी लाहम त़ेदी तेहको येहकें। ओहले नाम्पार-ताहक्पा थु खो ङ्याम्बुराङ ज़्य़ूदी येहकें। 26 ओहले “चो़वो छ्येवागी ताङ नाङगे थार्पा थोप च्य़ू नाङगेन मास्यीकाला माहथोङ थु ख्ये स्यिज्ये म़ेह” म़ेदी नाम्पार-ताहक्पा थुगी तोहङलेराङ खोला क्यी़ह ज्योर च्यु नाङग्यो येहकें। 27 ओहले नाम्पार-ताहक्पा थुगी ठिती शिमियोनला छ्योखाङला नोम फेप्सीन। ओ़ह ती़हजीलाराङ छ्य़े-ठिम डुप च्य़ूज्येला मरियम दाङ योसेफ येशूला ख्योङदी छ्योखाङला लेप्सीन। 28 ओहले शिमियोनगी स़ेबुला राहङगी फाङबाला लेहन्दे किन्ज्योला तेपा फुल्दी मासीन, 29 “ए चो़वो छ्येवा, राहङगी ज़्या़ नाङग्योकी ताहम्ज्या तेहन्दा डुप च्य़ू नाङसीन, ता़ह राङगी योक्पुला सेम लो तेहमु पेहती दि जाम्बुलीङ क्युर ज़्या़दी डो च्य़ू नाङदोङ। 30 च्यिबे मासीमाना, राहङगी ताङ नाङग्योकी थार्पा नाङगेन्दीला ङाह राहङगी मी़गीराङ थोङ ङ्युहङसीन। 31 दि स़ेबुला क्यिहपा-क्यिहपागी मिहया़गी थोङज्यु म़ेदी राहङगी ताङ नाङग्यो यिहम्बा, 32 मिह-रो़हराङ लेहमेन क्यिहपागी मिहया़ला राहङगी लाहम तेन नाङगेन येहसेर यिहम्बा, ओहले मिह-रो़हराङ राहङगी इस्राएली क्यिहपाया़गी तेहन्दाला ज़िज्यिद यिहम्बा।” 33 ओहले शिमियोनगी स़ेबुगी तेहन्दाला माक्यो तामया़ थे़दे येशूगी आबा-आमाला याहम्जेनज्यी ऩेसीन। 34 शिमियोनगी खुङया़ला मेलाम क्याहप्ती स़ेबुगी आमा मरियमला मासीन, “ङ्यिहन्दोङ, इस्राएलला मिह माहङबुगीराङ थार्पा थोप्च्यु कि-माना तोङदी डोज्यु म़ेदीराङ चो़वो छ्येवागी ख्येगी स़ेबुलाॱराङ दाम नाङदी येह। मिह-रो़हराङ चो़वो छ्येवागी तेन नाङगेन्गी ताक्छेन यिहम्बा, ओ़हदीला मिह माहङबुगीराङ टाह पेहच्ये येह। 35 ओहले खुङया़गी सेमला ऩेक्योगी तामया़ फिला तेन्ज्ये येह। नुम्बु पादाङगी चो़क्यो ल़ेहमुराङ ख्येगी निङ ज्यिबुराङ सुह क्याहप्च्ये येह।” 36 किन्ज्योगी छ्योखाङला हन्ना माएँ लुहङतेम्बा क़ेहमु च्यी़ येहकें। मोह आशेर माएँ छाङकी फनुएलगी पोहमो यिहन्गे। ओहले मोह पा़हमा पेहक्यो लोह तिहनलाराङ मोहगी ख्योवा स्यिसीन। 37 यिहॱनाङ मोह राहङसा ख्योवाला माहकाहल्बा पेहती किन्ज्योगी छ्योखाङलाॱराङ तेहको येहकें। ओहजेला मोहगी लोह के़ह-ज़्यि काहल सिहन्दी येहकें। ओहले मोह छ्योखाङ क्युर मा़हज्याबा पेहती ङ्युङने तेहते ङ्यिहन-नुहप किन्ज्योला सोल्वाङ ताप्ते स्याहप्तो स्युहउ येहकें। 38 ओ़ह ती़हजीला मोहॱआङ मरियम दाङ योसेफगी पोहला ओहङदी किन्ज्योला थुज्यी-छ्ये़ फुल्सीन। ओहले किन्ज्योगी यरूशलेम दाङ इस्राएलगी मिहया़ला थार च्य़ू नाङगेन म़ेदी क़ूह तेहक्यो मिहया़ला येशूगी तेहन्दाला मोहगी स्येसीन। 39 चो़वो छ्येवागी छ्य़े-ठिमला पेह कोहएँ म़ेदी प्रुहक्योगी ल़ेह थाम्ज्यीराङ पेह सिहन फान्ज्यो योसेफ दाङ मरियम स़ेबुला ख्येर्ती गालील साने़की राहङगी युहल नासरतला लो़ह फेप्सीन। 40 ओहले स़ेबु रिहक्स्यीगी काहङदी स्युक छ्यिम्बु जेती कुसोला छार्सीन, ओहले किन्ज्योगी काटीन स़ेबु थो़ला येहकें। ल़ेहवोर च्यी़ डोएँमु येशू छ्योखाङला ज़्य़ू नाङग्यो 41 येशूगी आबा-आमा लोह टाहङमाराङ यहूदीया़की थार्पा छ्येपा ताङज्येला यरूशलेमला फेप्को येहकें। 42 ओहले येशू लोह च्यिङ्यी़ डोएँमु फामागी थार्पा छ्येपा ताङज्येला राहङ ङ्याम्बुराङ यरूशलेमला नोम फेप्सीन। 43 ओहले ओ़ह छ्येपा सिहन फान्ज्यो खुङ मे़हमेया़ खाङबाला लो़ह डोएँ म़ेदी लाहम स्य़ूहसीन। ओहले येशूदी यरूशलेमलाराङ ज़्य़ू नाङसीन। यिहॱनाङ, फामाला येशू यरूशलेमलाराङ ज्यू़सीन म़ेदी क्यी़ह म़ेहबा येहकें। 44 येशू ऩे कोर्के मिहया़ ङ्याम्बु फेप्केराङ येहटो म़ेदी खुङ फ़ेबेॱया ङ्यिहमा काहङगी सा फेप नाङसीन। ओहले नाहम सोज्ये पेहकेमु ङ्येन्जेन-ङ्येहवाया़गी पाहरक्यीला छोल्ज्ये छ़ूसीन। 45 यिहॱनाङ स़ेबुला का़हॱलाङ च्य़ेह माहसीहन फान्ज्यो येशूगी आबा-आमा छोल्दे-छोल्देराङ यरूशलेम ङो़ले लो़ह काहल्सीन। 46 छोल-छोल्बा काहङला आबा-आमागी ङ्यिहमा सुम तिङले येशूला छ्योखाङला च्य़ेह सिहन्सीन। येशूनी छ्य़े-ठिमकी लोबेनया़गी पाहरक्यीला ज़्य़ूदी खुङया़गी ताम सेन्गेनॱराङ टी़हबा टी़हदी ज़्य़ू नाङग्यो च्य़ेह सिहन्सीन। 47 ओहले येशूगी रिहक्पा-रिहक्स्यी दाङ येशूगी ल़ेहन क्याहप्के थे़गे मिह थाम्ज्यीराङ ह्अ ल़ेहसीन। 48 ओ़ह ल़ेहमु पेहती येशू ज़्य़ूक्यो थोङदी येशूगी आबा दाङ आमाॱआङ ह्अ ल़ेहसीन। ओहले येशूगी आमागी स्युहसीन, “पुह, ख्येगी ङ्यिहला दि च्यि पेहक्यो? त़ेदोङ, ख्येगी आबा दाङ ङाह काहजे का क्याहल्दी ख्येला छोल तेहक्यो येहकें!” 49 ओहजेला येशूगी सुङ नाङसीन, “ङाहला च्यिबे छोल नाङग्यो ले? ङाह राहङगी याहपगी खाङबाला ओहङ कोहकें माएँ ताम च्यि राहङया़ला थुयी़ म़ेहबा लाह?” 50 यिहॱनाङ येशूगी सुङ नाङग्योकी स्याहल मरियम दाङ योसेफगी ह्अ मा़हकेह। 51 ओ़ह तिङले येशू आबा-आमा ङ्याम्बु नासरतला लो़ह फेप्सीन, ओहले फामागी लोप्तामया़ सेन्दी ज़्य़ू नाङसीन। मरियमगीदी दि तामया़ टेहम्बा माहच्येहप्पा पेहती सेमला ज़्या़सीन। 52 ओहले येशू किन्ज्योगी काटीन दाङ मिहगी रो़हराम ज्योर्ती कुसो दाङ रिहक्स्यीला छार्ती फेप नाङसीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.