लूका 17 - ह्योल्मोतिहक्पा दाङ कोहङदा ( मत्ती १८:६-७ , २१-२२ ; मर्क ९:४२ ) 1 ओहले येशूगी राहङगी स्याहप्च्यीया़ला सुङ नाङसीन, “मिहया़ला तिहक्पा पेह च्य़ूएँगी ङ्याहम्छेया़नी ओहङॱराङ ओहङगे। यिहॱनाङ, ओ़ह ल़ेहमु तिहक्पा पेह च्य़ूएँगी मिहगी च्याहवा ज्यिबुराङ चोक्पा ओहङज्ये येह। 2 सुगी दि फेमा म़ेदी फेमाया़ला तिहक्पाला छ्यि च्य़ूगे, ओ़हदीलानी ज्यिङबाला ला़हवोर च्याङदी छो-क्याहम्जोला क्युर चाहङना या़हबु ओहङज्ये येहकें। 3 ओ़ह सोङबे ख्यागी दिगी तेहन्दाला जेम्बु पेहतोङ!” “ओहले येहपाराङ, ख्येगी आदा नो़हगी तिहक्पा पेहसीमाना खोला लोप्ताम क्याहप्तोङ, ओहले खोगी सेमगी स्या़बा पेहती तिहक्पा पाङसीमाना खोला कोहङदा तेर्तोङ। 4 ख्येगी नो़हगी ख्ये थो़ला ङ्यिहमा च्यी़ला लेहमा तिहन थु तिहक्पा पेहसीनमाना ओहले खो लेहमा तिहन थुराङ ख्येसाला लो़ह ओहङदी ‘ङाहगी राहङगी तेहन्दाला तिहक्पा पेहसीन दु ङाहला कोहङदा नाङदोङ म़ेदी मासीमाना’ ख्येगी खोला कोहङदा तेर्तोङ।” 5 ओहले ल़ेह-पेनया़गी, “चो़वो ला़ह, ङ्यिहगी यिह-छ्य़ेला याहरक्यी डो च्य़ू नाङदोङ” म़ेदी स्युहसीन। 6 ओहले चो़वोगी सुङ नाङसीन, “ख्या ङ्याम्बु राइ-सेन जेबा तेहपा येहसीमाना ख्यागी दि लार्ची ङ्या़हलाङ तोहङबोला, ‘ख्ये पो़हदी छो-क्याहम्जोला क्ये सोङ’ म़ेदी माॱनाङ ओ़ह तोहङबोगी ङ्यिहन्ज्ये येह।” योक्पुगी पेह कोहएँगी ल़ेहया़ 7 “ख्याया़ सुज्यीदीॱआङ राहङगी योक्पु, स्यिहङला लाङगो म़ेदी क्यिनी राह-ल़ूह छे़दी खाङबाला लो़ह ओहङगेमु ख्यागी, ‘लो ग्यो़बा ओहङदीमाराङ तो सोह’ म़ेदी माएँ ले? 8 मिहम्बा ख्यागी दि ल़ेहमु गा मारो, ‘तोहङला योप्ता क्याहप्ती ङाहला ख्येर-स्यो, ओहले च्यी़राङ ख्ये सोह’ म़ेदी माएँ। 9 ख्येगी माक्योगी ताम ङ्यिहन्गे योक्पुला ख्येगी थुज्यी-छ्ये़ फुल्गे ले? 10 ओ़ह ल़ेहमुराङ पेहती ख्यागीॱआङ किन्ज्योगी कुल नाङग्योकी ल़ेह थाम्ज्यीराङ पेह सिहन फान्ज्यो, ‘ङ्यिहनी योक्पुज्यीराङ यिहम्बा, ङ्यिहगी पेह कोहएँगी ल़ेह पेहती येह’ म़ेदी ख्यागी सेमला ने़दोङ!” म़ेदी येशूगी सुङ नाङसीन। जे-ने़ह थेन्ग्यो मेहन्दा च्युला टा़ह च्य़ू नाङज्ये 11 येशू यरूशलेम ङो़ले फेप्नाङगेमु सामरिया दाङ गालील साने़की सा-छेन्जामलेगी फेप नाङसीन। 12 ओहले येशू युहल च्यी़ला लेप्च्ये जेकेमु जे थेन्ग्यो मिह मेहन्दा च्यु ङ्याम्बु थ़ूसीन ओहले खुङया़गी था़-रिहङबुलेॱराङ लाहङदी 13 क़े तेन्दी मासीन, “ओ़ चो़वो येशू, ङ्यिहला थुज्यी ज़ी़-नाङदोङ!” 14 ओहले येशूगी खुङया़ला सुङ नाङसीन, “सोङ, काहल्दी पूजाहारीसाला राहङला तेन्दोङ।” ओहले खुङ डोडोपा काहङला चाङमा काहल्सीन। 15 ओहले मेहन्दा च्यी़गी राहङ टा़हक्यो क्यी़ह ज्योर फान्ज्यो क़े छ्यिम्बुच्यी तेन्दी किन्ज्योला त़ेरा फुल्गेराङ लो़ह ओहङसीन। 16 ओहले खो येशूगी स्याहपला ज्याल्दी थुज्यी-छ्ये़ फुल्सीन। ओहले खोदी सामरिया साने़की मिह यिहन्गे। 17 ओहले येशूगी सुङ नाङसीन, “मिह च्युगाराङ चाङमा काहल्ग्यो मिहम्बा ले? राहङसा मेहन्दा कू़हदी का़हला येहबा ले? 18 दि सामरी मिह च्यी़राङ लो़ह ओहङसीन लो़हलो मिहया़दी च्यिबे किन्ज्योला थुज्यी-छ्ये़ फुल्ज्येला माहयोहङबा?” 19 ओ़ह तिङला येशूगी ओ़ह सामरिया साने़की मिहला सुङ नाङसीन, “ता़ह सोङ, ख्येगी तेहपागीॱराङ ख्येला टा़ह च्य़ूक्यो यिहन।” किन्ज्योगी क्याहल्सी ( मत्ती २४:२३-२८ , ३७-४१ ) 20 ङ्यिहमा च्यी़ फरिसीया़गी किन्ज्योगी क्याहल्सी नाहम ओहङगे म़ेदी येशूला स्युहसीन। ओहले येशूगी खुङया़ला सुङ नाङसीन, “किन्ज्योगी क्याहल्सीनी थोङगे पेहती मेहयोहङगे। 21 सुगीॱआङ, ‘किन्ज्योगी क्याहल्सी देला येह, ओ़हला येह’ म़ेदी मा मी़हखुएँ च्यिबेमाना किन्ज्योगी क्याहल्सीनी ख्यागी पाहरक्यीलाराङ येह” म़ेदी येशूगी सुङ नाङसीन। 22 ओ़ह तिङला येशूगी राहङगी स्याहप्च्यीया़ला सुङ नाङसीन, “दि ल़ेहमु ती़हजी च्यी़ॱआङ ओहङज्ये येह, ओ़ह ङ्यिहमाला ‘किन्ज्योगी ताङ नाङग्योकी मिहगी स़ेबुला थोङ ङ्युहङॱनाङ ओहङज्ये येहकें’ म़ेदी ख्यागी सेमला ने़ज्ये येह, यिहॱनाङ, ख्यागी थोङ ङ्युहङज्ये म़ेह। 23 मिहया़गी, ‘देला त़ेदोङ’ क्यिनी ‘ओ़हला त़ेदोङ’ म़ेदी माज्ये येह। ओहजे काहङला ख्या मिहया़गी ताम ङ्यिहन्दी तिङदा तिङ माहन्डो। 24 च्यिबेमाना चिलाम क्याहप्केमु नामगी छ्यो़ च्यी़ यिहन्ज्यु राहङसा छ्यो़ थु क्या-साङे डोएँ, मिहगी स़ेबुॱआङ राहङगी ङ्यिहमाला ओ़ह ल़ेहमुराङ ओहङज्ये येह। 25 यिहॱनाङ, ओ़ह ङ्यिहमा लेप्कें म़ेदी तोहङले दि मिहदोगी मिहया़गी ङाहला मा-लोक पेहच्ये येह, ओहले ङाहगी तुहक्पु माहङबुराङ ना़ कोहज्ये येह। 26 ओ़ह ङ्यिहमाला नोआगी ती़हजीला काहल्ग्यो ल़ेहमुराङ ओहङज्ये येह। 27 नोआ छ्यु-टुहला स्युहएँ थु मिहया़ से़हदी थुङदी पा़हमा पेहती तेहती येहकें। ओहले स्योलो ओहङसीम्बाराङ खुङ थाम्ज्यीराङ छ्युला नुप्ती स्यिसीन। 28 ओहले लोतकी ती़हजीॱलाङ ओ़ह ल़ेहमुराङ काहल्ग्यो येहकें। मिहया़ साहएँ थुङगेन, ङ्योहएँ, चोङगे, तेन्दो ताप्के दाङ खाङबा ज़ोएँगी ल़ेहया़ पेह तेहती येहकें। 29 लोत सदोम क्याहसाले थेन्दी डोएँ ङ्यिहमा थु खुङगी ओ़ह रोहवा पेह तेहती येहकें। ओहले लोत थेन्दी काहल फान्ज्यो नामले माहर मेह दाङ मेहबुङ क्याहप्ती खुङ थाम्ज्यीराङ स्यिसीन। 30 ङाह मिहगी स़ेबुॱआङ थेन ओहङगे ती़हजीला ओ़ह ल़ेहमुराङ ओहङज्ये येह।” 31 “ओ़ह ती़हजीला खाङबा थो़ला येहकेन्गी मिहया़ राहङगी पेला ल़ेहन डोज्ये म़ेदी खाङबा नाहङला मा़हस्युहज्यु! ओ़ह ल़ेहमुराङ, स्यिहङला ल़ेह पेहती तेहकेनया़ खाङबाला लो़ह माहन्डोज्यु। 32 लोतकी पी़हमीला टेहम्बा साल्दोङ! 33 राहङगी मिहली सी़ज्ये छोल्गेन्दीगी मिहली तोर च्य़ूज्ये येह, ओहले राहङगी मिहली तोर च्य़ूगेन्दीगी मिहली ज्योर्च्ये येह। 34 ङाहगी ख्याला माएँ, ओ़ह नुहङमु तेङगो च्यी़लाॱराङ ङ्याहल्ग्यो मेहन्दा ङ्यी़ पाहरक्यीला च्यी़ ख्येर्च्ये येह, लेहमेनदी क्युर ज़्या़ज्ये येह। 35 ङ्याम्बुराङ ला़हवोर था़दी तेहक्यो पी़हमी ङ्यी़ पाहरक्यीला च्यी़ ख्येर्च्ये येह, लेहमेनदी क्युर ज़्या़ज्ये येह 36 ओहले मेहन्दा ङ्यी़ स्यिहङला ल़ेह पेह तेहक्यो ओहङज्ये येह, च्यी़ ख्येर्च्ये येह, लेहमेनदी क्युर ज़्या़ज्ये येह” म़ेदी येशूगी सुङ नाङसीन। 37 ओहजेला स्याहप्च्यीया़गी, “का़हला चो़वो ला़ह?” म़ेदी स्युहसीन। ओहले येशूगी, “का़हला खाराल येहबा, ओ़हला च्याहर्कोया़ स्याहम्गे!” म़ेदी सुङ नाङसीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.