लूका 10 - ह्योल्मोयेशूगी स्याहप्च्यी तिहन-ङ्यी़ला ताङ नाङग्यो 1 ओहले येशूगी लो़हलो स्याहप्च्यी तिहन-ङ्यी़ला दाम नाङसीन, ओहले खुङया़ला ङ्यी़ ङ्यी़ जेती राहङ फेप्च्ये जेक्योगी क्याहसा दाङ युहलया़ला राहङ म़ेदी तोहङले ताङ नाङसीन। 2 ओहले येशूगी खुङया़ला, “तुह कोहकेन्गी तेन्दोया़नी माहङबुराङ येह, यिहॱनाङ ल़ेहमीया़नी ङ्ये़हमु दु। तेन्दोगी ताहक्पु ङ्याम्बु तेन्दो तुहएँगी ल़ेहमीया़ ताङ चाहङ नाङदोङ म़ेदी स्यी़हदोङ। 3 ता़हनी ख्या सोङ! त़ेदोङ, ङाहगी ल़ूहया़ला फाराया़गी पाहरक्यीला ताङग्यो ल़ेहमुराङ ख्याला मिहया़गी पाहरक्यीला ताङगो येह। 4 ख्यागी काहल्दा, टाङगा, लेकाम लेहमेन च्यिॱआङ मा़हथो। ओहले लाहमला मिह थुसीमाना ताम म़ेदी याहङदी माहतेहपा स्यारा स्यार सोङ।” 5 “ख्या तोहङस्यो का़हन्दी खाङबाला स्य़ूहगे ‘ओ़ह खाङबागी मे़हमेया़ला दि खाङबाला स्य़िहदे ओहङज्यु’ म़ेदी मेलाम क्याहप्तोङ। 6 का़हलेॱआङ ओ़ह खाङबाला स्य़िहदे ज्योर्च्येला सी़हगे मिह येहसीमाना ख्यागी स्य़िहदे खुङ ङ्याम्बु लिहच्ये येह, ओहले सी़हज्ये मे़हसीमाना ख्यागी मेलाम ख्या सालाराङ लो़ह ओहङज्ये येह। 7 ख्याया़ ओ़ह खाङबालाराङ तेहतोङ ओहले खुङया़गी च्यि साहज्ये थुङज्ये तेर्के ओ़हदीॱराङ सोह च्यिबेमाना ल़ेहमीगी ले़गा ज्योरॱटाङ कोहकें। खाङबा-खाङबाला स्य़ूहदी माहन्डो।” 8 “ओ़हठीॱराङ पेहती क्याहसाकी मिहया़गी ख्याला स्यो म़ेदी साहज्ये थुङज्ये च्यि च्यि तेर्कें, ओ़हदीॱराङ सोह। 9 ओ़ह क्याहसाला येहकेन्गी नेहपाया़ला टा़ह च्य़ूदोङ ओहले किन्ज्योगी क्याहल्सी लेप्च्ये पेह सिहन्दी येह म़ेदी स्येतोङ। 10 ओहले ख्या क्याहसा नाहङला स्य़ूहगेमु ख्याला सुगीॱआङ फेप मिहस्युहसीमाना लाहमया़ला थेन्दी 11 ‘ङ्यिहगी काङबाला गोक्योगी ख्या क्याहसागी थाल्बी, ख्याला टा़ह पेहती प्रू़ ज़्या़एँ। यिहॱनाङ दि ताम ङोह स्ये़दोङ, किन्ज्योगी क्याहल्सी पोहलाराङ लेप सिहन्दी येह’ म़ेदी ओ़ह मिहया़ला स्येतोङ। 12 ङाह ख्याला माएँ, किन्ज्योगी ठिम ताङ नाङगे ङ्यिहमाला सदोम क्याहसाकी मिहया़ला म़ेदीॱआङ ओ़ह क्याहसाकी मिहया़ला ङ्य़ेहबा छ्यिम्बु काल नाङज्ये येह!” म़ेदी येशूगी सुङ नाङसीन। यिह मे़हछ्येएँगी क्याहसाया़ ( मत्ती ११:२०-२७ ; १३:१६-१७ ) 13 “ए खोराजीन दाङ बेथसेदा क्याहसाकी मिहया़, ख्या काहजे छा़ तुहवा! च्यिबेमाना ख्यागी पाहरक्यीला पेहक्योगी याहम्जेन छ्येवाया़गी ल़ेहया़ टुरोस दाङ सीदोन क्याहसाला पेहपा यिहनानी, ओ़ह क्याहसाकी मिहया़गी सेमगी स्या़बा पेहती तिहक्पा पाङज्ये येहकें। ओहले फाजी केहन्दी गो़ला थाला कुज्ये येहकें। 14 किन्ज्योगी ठिम ताङ नाङगे ङ्यिहमाला टुरोस दाङ सीदोन क्याहसाकी मिहया़ला म़ेदीॱआङ ख्याया़ला ङ्य़ेहबा छ्यिम्बु काल नाङज्ये येह। 15 ए कफर्नहुम क्याहसाकी मिहया़, च्यि ख्या स्यिहङगामला लेप ख़ूएँ म़ेदी सेमला ने़उ दुबा? तोहरोङ ख्याया़नी ङ्याल्वाला गा छ्यिच्ये येह!” 16 ओहले येशूगी स्याहप्च्यीया़ला सुङ नाङसीन, “ख्यागी ताम ङ्यिहन्गेन्दीगी ङाहगी ताम ङ्यिहन्गे, ख्याला मिहङ्यीहन्गेया़गी ङाहॱलाङ मिहङ्यीहन्गे, ओहले ङाहला मिहङ्यीहन्गेया़गी ङाहला ताङ चाहङ नाङगेन किन्ज्योॱलाङ मिहङ्यीहन्गे” म़ेदी येशूगी सुङ नाङसीन। स्याहप्च्यी तिहन-ङ्यी़ लो़ह ओहङग्यो 17 ओहले येशूगी ताङ चाहङ नाङग्यो ओ़ह स्याहप्च्यी तिहन-ङ्यी़ लो़ह ओहङदी क़ेहनाङ पेहती येशूला स्युहसीन, “चो़वो ला़ह, राहङगी छेनला ङ्येहम्बा नाम्स्यीया़ ङ्यिहगी ओङ चो़ला ओहङसीन।” 18 ओहले येशूगी सुङ नाङसीन, “ङाहगी ती़ह गो-छ्येवाला नामले माहर चिलाम ल़ेहमु पेहती ताहप्केन थोङसीन। 19 ङ्यिहन्दोङ, ङाहगी ख्याला प्रुहल दाङ तिहक्पा-राचाला नेम्दी डो ख़ूएँगी स्युक दाङ, टाहगी थाम्ज्यीराङ स्युकला क्याहल्गेन्गी ओङ तेर्ते येह, च्यि से़हगीॱआङ ख्याया़ला ने क्याल ख़ूज्ये म़ेह। 20 यिहॱनाङ, ङ्येहम्बा नाम्स्यीया़ ख्यागी ओङ चो़ला छ्यिसीन म़ेदी क़ेहनाङ माहबे, यिहॱनाङ ख्यागी मिहन स्यिहङगामला प्री़हदी येह म़ेदी काहसो पेहतोङ” म़ेदी येशूगी सुङ नाङसीन। 21 ओहजेला येशू नाम्पार-ताहक्पा थुगी काहङदे काहसो जेकेॱराङ सुङ नाङसीन, “ओ़ याहप, स्यिहङगाम दाङ जाम्बुलीङगी चो़वो छ्येवा, ङाह राहङला थुज्यी-छ्ये़ फुल्गे, च्यिबेमाना राहङगी दि केच्या रिहक्स्यी छ्यिम्बु दाङ मिह टिहम्बुया़ ङो़ले पे़हदी पेहजाया़ला ङोह स्य़े च्य़ू नाङसीन। च्यिबेमाना याहप, राहङला दि ल़ेहमु जेच्ये सुङदी थुला ठुङसीन।” 22 “ङाहती याहपगी ङाहला थाम्ज्यीराङ चि क्याहप नाङदी येह। स़ेबु सु यिहम्बा म़ेदी याहपगी मिहम्बा, लेहमेन सुगीॱआङ ङोह मे़हस्येएँ। ओ़ह ल़ेहमुराङ, स़ेबु दाङ खोगी तेन्ग्योकी मिहया़गी च्यी़राङ याहपला ङोह स्य़ेएँ लेहमेन सुगीॱआङ याहपला ङोह मे़हस्येएँ” म़ेदी येशूगी सुङ नाङसीन। 23 ओहले येशूगी राहङगी स्याहप्च्यी ङो़ले लो़हदी मिहया़गी माहथ़ेज्यु म़ेदी खुङया़ला लोप्से जेती सुङ नाङसीन, “ख्यागी दि थाम्ज्यी थोङ ङ्युङग्यो सुङबे ख्या काहजे सोनाम-साक्पु। 24 ङाहगी ख्याया़ला माएँ, लुहङतेम्बाया़ दाङ क्याहल्बुया़गी ख्यागी थोङग्योकी दि ल़ेहया़ ताज्ये दाङ ङ्यिहन्ज्ये सेम पेहक्यो येहकें यिहॱनाङ खुङया़गी थोङॱआङ माहङ्युहङ ओहले थे़ॱआङ माहङ्युहङ!” म़ेदी येशूगी सुङ नाङसीन। ख्यिम्जी या़हबुगी पे ( मत्ती २२:३४-४० ; मर्क १२:२८-३१ ) 25 ङ्यिहमा च्यी़ येशूगी थु ताज्येला छ्य़े-ठिमकी लोबेन च्यी़गी लाहङदी दि ल़ेहमु म़ेदी टी़हसीन, “लोबेन ला़ह, नाहमॱआङ मिहस्यीएँगी मिहली थोप्च्येला ङाहगी च्यि पेह कोहएँ?” 26 ओहले येशूगी सुङ नाङसीन, “दिगी तेहन्दाला छ्य़े-ठिमला च्यि प्री़हदी येहबा? ख्येगी ओ़हला च्यि टा़हबा?” 27 ओहले ओ़ह छ्य़े-ठिमकी लोबेनगी स्युहसीन, “ख्येगी चो़वो छ्येवा राहङगी किन्ज्योला थाम्ज्यी यिहगी, थाम्ज्यी सोगी, थाम्ज्यी रिहक्स्यीगी, निङ थाक्पा यिहन्ज्युराङ चेवा डुप्तोङ ओहले राहङगी ख्यिम्जीला राहङला ल़ेहमुराङ चेवा पेहतोङ।” 28 ओहले येशूगी, “यिहम्बा, ख्येगी ठाबेराङ मासीन। ओ़हठीॱराङ पेहतोङ ओहले ख्ये थार्च्ये येह” म़ेदी ल़ेहन क्याहप्नाङसीन। 29 ओहले छ्य़े-ठिमकी लोबेनगी ङाह मिह टाहङबु यिहन म़ेदी तेन्ज्येला, “आहन्डा यिहन्सीमाना ङाहगी ख्यिम्जीदी सु यिहम्बा ले लाह?” म़ेदी येशूला स्युहसीन। 30 ओहले येशूगी ओ़ह छ्य़े-ठिमकी लोबेनला दि पे लाहमले प्रा साल नाङसीन, “मिह च्यी़ यरूशलेमलेगी यरीहो क्याहसाला डोॱराङ येहकें। ओहले खोला लाहमला ज्याक्पाया़गी तुहङदीमाराङ स्यिला-माहला जे़दी लाहमला क्युर ज़्या़सीन 31 ओहले ओ़ह लाहमले पूजाहारी च्यी़ डोएँमु खोगी ओ़ह नाहन्दी काहल्ग्यो मिहला थोङदीॱआङ माहथोङबा ल़ेहमु पेहती लाहम क्यो़दी काहल्सीन। 32 ओ़ह ल़ेहमुराङ पेहती लेवी च्यी़ ओ़ह लाहमलेगीराङ ओहङसीन, ओहले खोगीॱआङ लाहम क्यो़दी काहल्सीन। 33 ओ़ह तिङले सामरी मिह च्यी़ ओ़ह लाहमले ओहङगेमु ओ़ह नाहन्दी काहल्दी ऊ छ्येच्ये पेहक्यो मिह येहकें ग्या़ला लेप्सीन, ओहले ओ़ह नाहन्दी काहल्ग्यो मिहला थोङदी खोला निङ च्येहसीन। 34 ओहले ओ़ह नाहन्दी काहल्ग्यो मिह पोहला काहल्दी ओ़ह मिहगी नाहन्दीया़ला जैतूनगी नुम दाङ कुहन्डुमकी-निङगु की़दी काप्च्यागी ताहम तेर्सीन, ओहले ओ़ह नाहन्दी काहल्ग्यो मिहला राहङगी पुहङगुला काल्दी ने़जाङला ख्येर्ती नुहप काहङ राहङगीराङ चारा पेहसीन। 35 ओहले नाहङबार च्युङ खो डोएँ ती़हजीला नेजाङगी ताहक्पुला ङुल-टाङ ङ्यी़ तेर्ती मासीन, ‘दि मिहला या़हबु पेहती चारा पेह तेर ओहले टाङगा मेहन्दाङसी माना ङाह लो़हदी ओहङगेमु च्याल तेर्कें’।” 36 ओहले दि पे स्ये छार फान्ज्यो छ्य़े-ठिमकी लोबेनला येशूगी टी़ह नाङसीन, “ता़ह ख्येगी सेमला च्यि ने़उ दुबा, ओ़ह मेहन्दा सुम नाहङला ज्याक्पाया़गी लाहक्पाला छ्यिक्यो मिहला का़हन्दीगी राहङगी ख्यिम्जीला ल़ेहमुराङ रो़हराम पेहपा?” 37 ओहले छ्य़े-ठिमकी लोबेनगी येशूला स्युहसीन, “ओ़ह नेहपाला निङज्यी पेहकें मिहदी खोगी ख्यिम्जी यिहम्बा।” ओहले येशूगी सुङ नाङसीन, “ता़ह ख्येॱआङ सोङ, ओहले ख्येगीॱआङ ओ़ह ल़ेहमुराङ पेहतोङ” म़ेदी येशूगी सुङ नाङसीन। येशूगी मार्था दाङ मरियमला थ़ू नाङग्यो 38 ओहले येशू दाङ स्याहप्च्यीया़ फेप-फेप्पा काहङला युहल च्यी़ला लेप नाङसीन। ओहले ओ़हला मार्था माएँ पी़हमी च्यी़गी खुङ फे़बेया़ला राहङगी खाङबाला फेप स्युहसीन। 39 मोहती मरियम माएँ नुहमु च्यी़ येहकें। मरियमती येशूगी स्याहप पोहला तेहती मिहरोगी सुङदेन ङ्यिहन्दी तेहसीन। 40 मार्थागी, “डोम्बोला छ्येच्ये से़हया़ ज़ो कोहएँ” म़ेदी ल़ेह माहङबुराङ पेहसीन। ओहले मोहगी येशू पोहला ओहङदी स्युहसीन, “ओ़ चो़वो ला़ह, ल़ेह थाम्ज्यीराङ ङाह च्यी़गीराङ पेह कोहएँ, नुहमुगी च्यिॱआङ पेह मेहतेर दु, च्यि राहङगी ज़ी़ माहनाङबा? आज्यीला रो़ह पेह सोङ म़ेदी सुङ नाङदोङ नाह ला़ह।” 41 ओहले येशूगी ल़ेहन क्याहप्ती मार्थाला सुङ नाङसीन, “ए मार्था, मार्था, ख्ये ल़ेह माहङबुगी तेहन्दाला तुहङाल दाङ छाबा-छुबे पेहकु दु। 42 यिहॱनाङ कोहकें ल़ेहनी च्यी़राङ येहबा, ओ़हदीनी मरियमगी दाम्दी येह, ओ़हदी मोहलेगी सुगीॱआङ फ्रो़दी ख्येर्च्ये म़ेह!” म़ेदी येशूगी सुङ नाङसीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.