यूहन्ना 8 - ह्योल्मोछ्येउ-छ्येंमु पी़हमी दाङ येशू 1 येशू जैतून काहङला फेप नाङसीन। 2 ओहले नाहङबार च्युङ नाहम्सीमुॱराङ येशू छ्योखाङला लो़हदी फेप नाङसीन। ओहले मिह माहङबुराङ येशूसाला जोम ओहङसीन। ओहले येशू ओ़हला ज्यू़दे मिहया़ला सुङ ख्येप्टा नाङज्ये छ़ूसीन। 3 ओहले पी़हमी च्यी़गी छ्येउ-छ्येंमु पेह तेहकेमु छ्य़े-ठिमकी लोबेनया़ दाङ फरिसीया़गी मोहला ज़ुङदी मिहया़गी दिनला ख्योङदी लाहङ च्य़ूसीन। 4 ओहले खुङया़गी येशूला मासीन “लोबेन ला़ह, दि पी़हमीगी छ्येउ-छ्येंमु पेह तेहक्यो ती़हजीला ङ्यिहगी ज़ुङसीन। 5 छ्य़े-ठिमला मोशागी दि ल़ेहमु पी़हमीया़लानी तोहगी क्याहप्ती से कोहएँ म़ेदी का नाङदी येहबा। राहङ दिगी तेहन्दाला च्यि सुङ नाङगे ले?” 6 यिहॱनाङ खुङया़गी येशूला च्यिरा फातुर च़ू ख़ूएँ यिहम्बा नि म़ेदी ङ्याहम च्येच्येला दि टी़हबा टी़हक्यो येहकें। येशूगी कुहर जेते साला छ्या़-जु़बीगी प्रुह नाङसीन। 7 यिहॱनाङ खुङया़गी येशूला टी़हदेराङ तेहसीन ओहजेला येशूगी ज़्याङदी खुङया़ला सुङ नाङसीन, “ख्या नाहङला तिहक्पा च्यिॱआङ माहबेबा मिह येहसीमाना, ओ़हदीगीराङ थाम्ज्यी म़ेदी तोहङस्यो दि पी़हमीला तोहगी क्याहप्च्यु!” 8 ओहले येहपाराङ कुहर जेते येशूगी साला प्रुह नाङसीन। 9 दि स्याहल थे़दे खुङया़ तोहङस्यो के़हङगेनया़ यिहन्ज्यु छ़ूदी पेहजाया़ थु राहप-ताङ रिहम्बा पेहती ओ़ह ग्या़ले थेन्दी काहल्सीन। ओहले येशू दाङ ओ़ह पी़हमी च्यी़राङ ओ़हला लिहसीन, ओहले ओ़ह पी़हमी येशूगी दिनला लाहङदी तेहसीन। 10 ओहले येशूगी मोहला ज़ी़दी सुङ नाङसीन, “ए नुहमु, के लेह ख्येला ङ्य़ेहबा केन्गेन्गी मिहया़? च्यि सुज्यीगीॱआङ ख्येला ङ्य़ेहबा माहकाल?” 11 ओ़ह पी़हमीगी स्युहसीन, “लाहसो ला़ह चो़वो, ङाहला सुज्यीगीॱआङ ङ्य़ेहबा माहकाहल।” ओहले येशूगी सुङ नाङसीन, “ङाहॱआङ ख्येला ङ्य़ेहबा मेहकाल। ता़ह ख्ये सोङ, ओहले येहपाराङ तिहक्पा माहबे।” जाम्बुलीङगी येहसेर येशू 12 येहपाराङ येशूगी खुङया़ला सुङ नाङसीन, “ङाह जाम्बुलीङगी येहसेर यिहम्बा। ङाहला तिङ ङ्या़गेया़ नाहमॱआङ ना़-जुबेला डो कोहज्ये म़ेह, यिहॱनाङ खोगी मिहली तेर्केन्गी क्या-साङे ज्योर्च्ये येह।” 13 ओहजेला फरिसीया़गी येशूला मासीन, “राहङनी, राहङगी तेहन्दाला गा पाङबु नाङगु दु। ओहले राहङगी नाङग्यो पाङबु तेहन्दाम मिहन।” 14 येशूगी सुङ नाङसीन, “ङाह राहङगी तेहन्दाला पाङबु तेरॱनाङ ङाहगी माक्योकी ताम तेहम्बा यिहन च्यिबे मासीमाना ङाह का़हले ओहङग्यो यिहम्बा ओहले का़हला डोॱराङ येहबा ओ़हदी ङाहला क्यी़ह येह। यिहॱनाङ ख्याया़ला ङाह का़हले ओहङग्यो यिहम्बा ओहले का़हला डोॱराङ येहबा माएँ ताम क्यी़ह म़ेह। 15 ख्यागीनी मिहया़गी साम्लु ताङगे छ्याप्स्यी ल़ेहमु पेहती गा ठिम ताङ दु। ङाह सुॱलाङ ठिम मेहताङ। 16 ङाहगी ठिम ताङ कोहसीनमाना, ङाहती ठिम तेहम्बा थेन्ज्ये येह। च्यिबेमाना ठिम ताङगेन्दी ङाह च्यी़राङ मिहन, यिहॱनाङ ङाहला ताङ नाङगे याहप ङाह ङ्याम्बु ज़्य़ू नाङदी येह। 17 ख्याया़गी छ्य़े-ठिमॱलाङ मेहन्दा ङ्यी़गी तेरक्योदी पाङबु तेहम्बा सी़हगे म़ेदी प्री़हदी येहबा। 18 ङाहगी तेहन्दाला ङाह राहङगीराङ पाङबु तेर्के, ओहले ङाहला ताङ नाङगेन याहपगी ङाहगी तेहन्दाला पाङबु नाङगे।” 19 खुङया़गी येशूला स्युहसीन, “ख्येती याहप का़हला येहबा ले?” येशूगी सुङ नाङसीन, “ख्याया़गी नाह ङाहला ङोह स्य़ेगे नाह ङाहती याहपला। ख्याया़गी ङाहला ङोह स्य़ेक्यो येहसीमानानी ङाहती याहपॱलाङ ङोह स्ये़ज्ये येहकें।” 20 दि स्याहल येशूगी छ्योखाङला डेल्बा फुल्गेन्गी काहम येहकेन ग्या़ला लोप नाङगेमु सुङ नाङसीन। ओहले येशूला सुज्यीगीॱआङ माहजु़ङ, च्यिबेमाना येशूगी ती़हजी तोहरोङॱआङ माहलेप येहकें। येशूगी राहङगी तेहन्दाला सुङ नाङग्यो 21 येशूगी खुङया़ला येहपाराङ सुङ नाङसीन, “ङाह दि ग्या़ले डोज्ये येह, ओहले ख्याया़गी ङाहला छोल्ज्ये येह, यिहॱनाङ ख्याया़ राहङगी तिहक्पाला स्यिज्ये येह। ङाह डोएँगी ग्या़ला, ख्याया़ ओहङ मी़हखु।” 22 ओहले दि थे़दे यहूदी गोबाया़गी राहङ नाहङदुङ मासीन, “दि च्यि माक्यो यिहम्बा नि? खो का़हला डोएँ, ओ़ह ग्या़ला ओहराङ लेप मी़हखु माउ दु! दि खो राहङराङ स्यिज्ये छोल्ग्यो यिहम्बा नि च्यि यिहम्बा?” 23 ओहले येशूगी खुङया़ला सुङ नाङसीन, “ख्यानी माहरकी मिह यिहम्बा, ङाहनी याहरलेगी ओहङग्यो यिहम्बा। ख्यानी दि जाम्बुलीङदी यिहम्बा, ङाहनी दि जाम्बुलीङदी मिहन। 24 ङाहगी ख्याया़ला मासीन, ‘ख्याया़ राहङगी तिहक्पाला स्यिज्ये येह’ च्यिबेमाना ‘ङाह ओ़हदीॱराङ यिहन’ म़ेदी ख्याया़गी यिह मे़हछ्येसीमाना ख्या राहङगी तिहक्पाला स्यिज्ये येह।” 25 खुङया़गी येशूला स्युहसीन, “राहङ सु यिहम्बा ले लाह?” ओहले येशूगी खुङया़ला सुङ नाङसीन, “ङाह ओ़हदीॱराङ यिहन, ओ़ह ङाहगी ख्याया़ला तोहङ यिहन्ज्युराङ माएँराङ येह। 26 ख्याया़गी तेहन्दाला ताम मा कोहच्ये दाङ ठिम ताङ कोहज्ये नि माहङबुराङ येह। यिहॱनाङ ङाहला ताङ नाङगेन्दी तेहम्बा ज़्य़ू नाङदी येह, ओहले मिहरो लाहमले ङाहगी च्यि थे़बा ओ़ह तामया़ॱराङ ङाह जाम्बुलीङला स्येकें।” 27 खुङया़ला याहपगी तेहन्दाला येशूगी सुङ नाङग्यो यिहन माएँ ताम खुङया़गी ङोह मा़हस्ये। 28 ओ़ह सोङबे येशूगी सुङ नाङसीन, “ख्याया़गी मिहगी स़ेबुला क्या़दी क्याहङस्यीङला च्याङ फान्ज्यो, ङाह ओ़हदीॱराङ यिहन म़ेदी ख्याया़गी ह्अ कोहज्ये येह, ओहले ङाह राहङ ओङगी नि च्यिॱआङ पेह मी़हखु, यिहॱनाङ याहपगी लोप नाङग्योकी स्याहलया़ च्यी़राङ माएँ म़ेदी ख्याया़गी ङोह स्ये़ज्ये येह। 29 ङाहला ताङ नाङगेन्दी ङाह ङ्याम्बुराङ ज़्य़ू नाङदी येह, मिहरोगी ङाहला च्यी़राङ क्युर ज़्या़ नाङदी म़ेह च्यिबेमाना ङाह नाहम पेहनाॱआङ मिहरोला थु ङ्य़ेबु ओहङगेन्गी ल़ेहया़ च्यी़राङ पेहकें।” 30 येशूकी सुङ नाङग्यो दि स्याहल ङ्यिहन्दी मिह माहङबुगीराङ मिहरो थो़ला यिह छ्य़ेसीन। अब्राहामकी छार्क्यीन 31 येशूगी राहङ थो़ला यिह छ्य़ेगेन यहूदीया़ला सुङ नाङसीन, “ख्यागी ङाहती सुङदेन ची़दी तेहसीन माना ख्या तेहम्बाराङ ङाहती स्याहप्च्यी यिहम्बा। 32 ओहले ख्याया़गी तेहन्दामला ङोह स्ये़ज्ये येह, ओहले ओ़ह तेहन्दामगी ख्याया़ला योक्पुलेगी राहङवाङ ज़ोज्ये येह।” 33 ओहले खुङया़गी येशूला स्युहसीन, “ङ्यिहनी अब्राहामगी छार्क्यीन यिहन, ङ्यिहगी ताहन्दा थु सुज्यीदीॱआङ योक्पु पेहती म़ेह। ‘ख्याया़ योक्पुलेगी राहङवाङ डोज्ये येह’ म़ेदी काह-ठि पेहती सुङ नाङगे ले?” 34 ओहले येशूगी खुङया़ला सुङ नाङसीन, “तेहम्बाराङ, ङाह ख्याया़ला माएँ, तिहक्पा पेहकेन मिह थाम्ज्यी तिहक्पागी योक्पु यिहम्बा। 35 योक्पु नाहम्स्यी किन्दुॱराङ खाङबाला मी़ह-लिहकें, यिहॱनाङ स़ेबुदी नाहम्स्यी किन्दुॱराङ खाङबाला लिहकें। 36 ओ़ह सोङबे स़ेबुगी ख्याया़ला योक्पुलेगी खा फे़ नाङसीन माना ख्याया़ तेहम्बाराङ राहङवाङ ओहङज्ये येह। 37 ख्या अब्राहामगी छार्क्यीन यिहन म़ेदी ङाहला क्यी़ह येह। यिहॱनाङ ख्या ङाहला सेच्ये छोल्गे च्यिबेमाना ख्याला ङाहती ताम या़हबु मे़हनेगे। 38 ङाह राहङगी याहप ङ्याम्बु तेहकेमु च्यि च्यि थोङबा ओ़हगी तेहन्दालाराङ माएँ ओहले ख्याया़गीॱआङ राहङगी आबा ङ्याम्बु तेहकेमु च्यि च्यि थे़बा ओहराङ पेहकें।” 39 ओहजेला खुङया़गी येशूला मासीन, “ङ्यिहगी आबा नि अब्राहाम यिहम्बा।” ओहले येशूगी खुङया़ला सुङ नाङसीन, “तेहम्बाराङ ख्या अब्राहामगी छार्क्यीन यिहन्गे यिहनानी, अब्राहामगी पेहक्यो ल़ेहमुराङ ल़ेह ख्यागीॱआङ पेहच्ये येहकें। 40 ङाहगी किन्ज्यो लाहमले थे़क्योकी तेहन्दाम ख्याया़ला म़ेदी येह, यिहॱनाङ ताहन्दा ख्यागी ङाहला सेच्ये छोल्गु दु। दि ल़ेहमु ल़ेहनी अब्राहामगी माहबे ले। 41 ख्या आबागी च्यि पेहपा ख्या ओ़ह ल़ेहराङ पेहकु दु।” खुङया़गी येशूला मासीन, “ङ्यिह छ्येउ-छ्येंमु लाहमले क्येक्योकी मिहया़ मिहन! किन्ज्योॱराङ ङ्यिहती च्यिमे च्यी़राङ याहप यिहम्बा।” 42 येशूगी खुङया़ला सुङ नाङसीन, “तेहम्बाराङ, ख्यागी याहप किन्ज्यो यिहन्गे यिहनानी ख्याया़गी ङाहला चेवा पेहच्ये येहकें, च्यिबेमाना ङाह किन्ज्यो लाहमले थेन्दी ओहङसीन ओहले ङाह ताहन्दा देला येहबा। ङाहला ओहङज्ये सेम क़ेदी ङाह ओहङग्यो मिहन, यिहॱनाङ याहपगी ङाहला ताङ नाङसीन। 43 ङाहगी माक्यो ताम ख्याया़गी च्यिबे ह्अ मेहकोहएँ? च्यिबेमाना ङाहगी माक्यो ताम ख्याया़गी ङ्यिहन मी़हखुएँ! 44 ख्या राहङगी आबा दियाबलस यिहम्बा, ओहले ख्या आबागी सेम्बा छाङबु पेहच्येला ख्यागी सेमला ऩे सिहन्दी येह। खोगीनी तोहङ यिहन्ज्युराङ मिहया़ सेको येहकें, ओहले तेहन्दाम ङ्याम्बु खोला च्यिॱआङ नाङदा म़ेह। च्यिबेमाना खोला तेहन्दाम च्यिॱआङ म़ेह। खोगी राहङगी पेहताङला ते़बे नाहम-माना स्योप क्याहप्के च्यिबेमाना खो स्योप्केर यिहम्बा ओहले खो स्योप क्याहप्केनया़गी आबा यिहम्बा। 45 ङाह तेहन्दामकी ताम माएँ, यिहॱनाङ ख्यागी ङाहला यिह मे़हछ्ये दु। 46 ख्या नाहङले सुगी ङाहला तिहक्पागी फातुर च़ू ख़ूएँ? ङाहगी तेहन्दामगी ताम माएँमु च्यिबे ङाहला ख्यागी यिह मे़हछ्येएँ? 47 किन्ज्योकी छार्क्यीनया़गी किन्ज्योगी स्याहलया़ ङ्यिहन्गे, यिहॱनाङ ख्याया़ किन्ज्योगी छार्क्यीन मिहम्बा सोङबे ख्यागी किन्ज्योगी स्याहल मिहङ्यीहन्गे।” येशू दाङ अब्राहाम 48 ओहले यहूदीया़गी येशूला मासीन, “ख्ये सामरी यिहन ओहले ख्येला ल्हेन्डी स्य़ूहदी येह म़ेदी ङ्यिहगी माक्यो ताम च्यि ठाबे मिहम्बा ले?” 49 ओहले येशूगी सुङ नाङसीन, “ङाहला ल्हेन्डी स्य़ूहदी म़ेह। ङाह राहङगी याहपला चा़ पेहकें, यिहॱनाङ ख्याया़गी ङाहला स्ये़हन्डील पेहकु दु। 50 ङाहला मिहया़गी क्या़ज्यु माएँ ङाहती सेमला म़ेह, यिहॱनाङ मेहन्दा च्यी़ ज़्य़ू नाङदी येह ओहले मिहरोगी राहङला मिहया़गी क्या़ज्यु म़ेदी थु-सेम जे नाङगे ओहले ठिम ताङ नाङगे। 51 तेहम्बाराङ ङाह ख्याया़ला माएँ, ङाहगी सुङदेन ङ्यिहन्गेया़ नाहमॱआङ स्यि कोहज्ये म़ेह।” 52 ओहले यहूदीया़गी मासीन, “ता़हनी ङ्यिहगी तेहम्बाराङ ङोह स्य़ेसीन, ख्येलानी ल्हेन्डीराङ स्य़ूहक्यो दुबा! अब्राहाम स्यिसीन, लुहङतेम्बाया़ॱआङ स्यिसीन, यिहॱनाङ ख्येगी माएँ, ‘ङाहगी सुङदेन ङ्यिहन्गेया़ नाहमॱआङ स्यि कोहज्ये म़ेह।’ 53 च्यि ख्ये ङ्यिहगी स्यिदी काहल्ग्योगी चावा अब्राहाम दाङ लुहङतेम्बाया़ म़ेदीॱआङ छ्यिम्बु यिहम्बा ले? ख्ये राहङगी राहङला च्यि ने़उ दुबा?” 54 ओहले येशूगी सुङ नाङसीन, “का़हलेॱआङ ङाहगी राहङगी राहङलाराङ क्या़ज्ये छोल्सीन माना ओ़ह स्यिती काम्बु डोएँ। ङाहला क्या़ नाङगेन्दीनी याहपॱराङ यिहन। ओहले ओ़ह याहपलाराङ ख्यागी ‘ङ्यिहती किन्ज्यो’ म़ेदी माएँ। 55 ख्याया़गी याहपला ङोह स्य़ेदी म़ेह, यिहॱनाङ ङाहगी याहपला ङोह स्य़ेएँ। का़हलेॱआङ ङाहगी याहपला ङोह मे़हस्येएँ म़ेदी माक्यो येहनानी ङाहॱआङ ख्या ल़ेहमुराङ स्योप्केर थेन्ज्ये येहकें। यिहॱनाङ ङाह याहपला ङोह स्य़ेएँ ओहले याहपगी सुङ नाङग्यो स्याहलया़ ङ्यिहन्गे। 56 ख्यागी चावा अब्राहामगी ङाह ओहङगेन्गी ङ्यिहमा ताज्येला ज्यिबुराङ सेम्बा पेहती येहकें, ओहले खोगी थोङदी ज्यिबुराङ क़ेहनाङ पेहसीन।” 57 ओ़ह सोङबे यहूदीया़गी येशूला मासीन, “ख्ये लोह ङाप्च्युॱआङ माहकाहल्बाला काह-ठि पेहती अब्राहामला थोङबा ले?” 58 येशूगी खुङया़ला सुङ नाङसीन, “तेहम्बाराङ, ङाह ख्याया़ला माएँ, अब्राहाम क्येएँ म़ेदी तोहङलेराङ ङाह येहकें।” 59 ओ़हजेलाराङ खुङगी येशूला क्याहप्च्ये म़ेदी तोह तुहसीन, यिहॱनाङ येशू खाजुम्बाला छ्योखाङले थेन्दी फेप नाङसीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.