यूहन्ना 13 - ह्योल्मोयेशूगी राहङगी स्याहप्च्यीया़गी काङबा ठु नाङग्यो 1 थार्पा छ्येपा लेप्कें म़ेदी तोहङले दि जाम्बुलीङला क्युर ज़्या़दी याहप्च्येन आबासाला फेप नाङगे मिहरोगी ती़हजी लेप सिहन्सीन माएँ स्याहल येशूला थुयी़ येहकें। ओहले जाम्बुलीङला येहकेन्गी राहङगी मिहया़ला चेवा जे-नाङदी मिहरोगी खुङया़ला तिङस्यो ती़हजी थुराङ चेवा जे नाङसीन। 2 ओहले कुहङॱसेगी सोल छ्येकेन्गी ती़हजीला ती़ह गो-छ्येवागी सिमोनकी पुह यहूदा इस्करियोतकी सेमला येशूला ज़ुङ तेर्केन्गी साम्लु तोहङलेराङ ल़ू सिहन्दी येहकें। 3 याहपगी थाम्ज्यीराङ से़हया़ मिहरोगी छ्या़ला नाङदी येह, ओहले मिहरो किन्ज्यो लाहमलेॱराङ फेप नाङग्यो यिहम्बा, ओहले किन्ज्यो सालाराङ फेप नाङगेराङ येह माएँ स्याहल येशूला थुयी़ येहकें। 4 ओहले येशू सोल छ्येके ग्या़ले ज़्याङदी राहङगी फि ङो़गी नाहम्सा पिते रुमाल च्यी़गी राहङगी क्येपाला टिल नाङसीन। 5 ओ़ह तिङले येशूगी निक्यी च्यी़ला छ्यु पे़दी राहङगी स्याहप्च्यीया़गी काङबा ठु नाङगेराङ क्येपाला टिल्ग्यो रुमालगी फी़ नाङसीन। 6 ओहले येशूगी सिमोन-पत्रुसकी काङबा ठुज्ये जेकेमु, पत्रुसगी स्युहसीन, “चो़वो ला़ह, राहङगी ङाहती काङबा ठुज्ये जे नाङग्यो?” 7 ओहले येशूगी पत्रुसला सुङ नाङसीन, “ङाह च्यि पेहकेनॱराङ येह ख्येगी ताहन्दा ङोह मे़हस्येएँ, यिहॱनाङ तिङले ङोह स्ये़ज्ये येह।” 8 ओहले पत्रुसगी स्युहसीन, “राहङगी ङाहती काङबा नाहमॱआङ ठु नाङज्ये म़ेह।” ओहले येशूगी खोला सुङ नाङसीन, “ङाहगी ख्येगी काङबा मिहठुनानी, ख्ये ङाहती ओहङ मी़हखुएँ।” 9 ओहले सिमोन-पत्रुसगी येशूला स्युहसीन, “ओ़ चो़वो, ङाहती काङबा च्यी़राङ मिहम्बा, यिहॱनाङ ङाहती लाहक्पा दाङ गो़ॱआङ ठु नाङदोङ।” 10 ओहले येशूगी सुङ नाङसीन, “ठी़ क्याहप सिहन्ग्योगी मिहला काङबा म़ेदी लेहमेन च्यिॱआङ ठु मेहकोहएँ, ओ़ह थाम्ज्यीराङ चाङमा काहल सिहन्दी येह। ओहले ख्याया़ चाङमा काहल सिहन्दी येह, यिहॱनाङ थाम्ज्यीनी मिहम्बा।” 11 च्यिबेमाना राहङला सुगी ज़ुङ च्य़ूज्ये पेहक्यो यिहम्बा म़ेदी येशूला थुयी़ येहकें। ओ़ह सोङबे येशूगी “ख्या थाम्ज्यीनी चाङमा म़ेहबा” म़ेदी सुङ नाङग्यो येहकें। 12 येशूगी स्याहप्च्यीया़गी काङबा ठु छार फान्ज्यो राहङगी फि ङो़गी नाहम्सा नोम्दी येशू येहपाराङ ज़्य़ू नाङसीन। ओहले येशूगी खुङया़ला सुङ नाङसीन, “ङाहगी ख्याया़की काङबा च्यिबे ठुक्यो, ओ़ह ख्याया़गी ङोह स्ये़बा? 13 ख्याया़गी ङाहला लोबेन दाङ चो़वो म़ेदी माएँ, ओ़ह ख्यागी ठाबेराङ माक्यो यिहम्बा च्यिबेमाना ङाह ओ़हदीॱराङ यिहन। 14 ङाह ख्याया़गी चो़वो दाङ लोबेन यिहन्देॱआङ ङाहगी ख्याया़गी काङबा ठी़ तेर फान्ज्योनी ख्याया़गीॱआङ च्यी़गी च्यी़ला काङबा ठी़ तेर कोहएँ। 15 च्यिबेमाना ङाहगी ख्याया़ला पे च्यी़ तेन्सीन, ओहले ङाहगी ख्याया़गी तेहन्दाला काहन्डुमु पेहक्यो येहबा ओ़हठीॱराङ ख्याया़गीॱआङ पेहतोङ। 16 तेहम्बाराङ ङाह ख्याया़ला माएँ, योक्पु राहङगी ताहक्पु म़ेदी छ्यिम्बु ओहङ मी़हखुएँ, ओहले लेहङगु ख्येर्केनया़ लेहङगु ताङगे मिह म़ेदी छ्यिम्बु ओहङ मी़हखुएँ। 17 ख्याया़गी दि ताम ङोह स्य़ेदी दिला ते़बे ल़ेह पेहसीमाना, किन्ज्योगी ख्याया़ला मेलाम नाङज्ये येह। राहङला ज़ुङ च्य़ूएँ यहूदागी तेहन्दाला येशूगी सुङ नाङग्यो ( मत्ती २६:२०-२५ ; मर्क १४:१७-२१ ; लूक २२:२१-२३ ) 18 ङाहगी ख्या थाम्ज्यीगी तेहन्दाला माक्यो मिहम्बा, ङाहगी दाम्ग्योया़ला ङाह ङोह स्य़ेएँ। यिहॱनाङ सुङरापगी स्याहल तेहन्दा डुप च्य़ू म़ेदीराङ दि काहल्ग्यो यिहम्बा, ‘ङाह ङ्याम्बु खुरा साहएँ मिहराङ ङाहती टा़ह काहल्सीन’। 19 दि केच्या तेहन्दा डुप्के म़ेदी तोहङलेराङ ङाह ख्याया़ला ताहन्दा माएँराङ येह, ओ़ह केच्या तेहन्दा डुप्केमु ङाह ओ़हदीॱराङ यिहन म़ेदी ख्याया़गी यिह-छ्य़े ख़ूज्यु। 20 तेहम्बाराङ ङाह ख्याया़ला माएँ, ‘का़हन्दीला ङाह ताङगे, खोला लोक पेहकेन्दीगी ङाहॱलाङ लोक पेहकें, ओहले ङाहला लोक पेहकेन्दीगी ङाहला ताङ नाङगेन्दीॱलाङ लोक पेहकें’।” 21 दि स्याहल सुङ छर फान्ज्यो येशू ज्यिबुराङ थु ङ्युङसीन। ओहले राहङगी स्याहप्च्यीया़ला प्रा साल्दी सुङ नाङसीन, “तेहम्बाराङ ङाह ख्याला माएँ, ख्या नाहङले मेहन्दा च्यी़गी ङाहला ज़ुङ च्य़ूज्ये येह।” 22 येशूगी दि स्याहल सुगी तेहन्दाला सुङ नाङग्यो यिहम्बा म़ेदी स्याहप्च्यीया़ ह्अ ल़ेहदी च्यी़गी च्यी़ला तासीन। 23 स्याहप्च्यीया़ नाहङला येशूगी थाम्ज्यी म़ेदी माहङबु चेवा जे नाङग्योकी स्याहप्च्यीदी येशू पोहलाराङ ङ्ये़दी तेहती येहकें। 24 ओहले सिमोन-पत्रुसगी खोला मिताप पेहती मासीन, “टी़हदोङ ले, चो़वोगी दि सुगी तेहन्दाला सुङ नाङग्यो यिहम्बा?” 25 ओहले ओ़ह स्याहप्च्यीगी येशूगी प्राहङगोला च्याहर्ती टी़हसीन, “चो़वो, ओ़ह मिह सु यिहम्बा लाह?” 26 ओहले येशूगी सुङ नाङसीन, “ङाहगी खुरा पा़दी का़हन्दीला तेर्कें ओ़हदीॱराङ यिहम्बा।” ओहले येशूगी खुरा फेमाज्यी पा़दी सिमोनगी पुह यहूदा इस्करियोतला नाङसीन। 27 यहूदागी खुरा लेहन-लुहङ मे़हबाराङ खो नाहङला ती़ह गो-छ्येवा स्य़ूहसीन। ओहले येशूगी खोला सुङ नाङसीन, “ख्येगी च्यि पेहच्ये छोल्ग्यो यिहम्बा ओ़ह ग्यो़बाराङ पेहतोङ।” 28 यिहॱनाङ येशूगी च्यिबे खोला दि स्याहल सुङ नाङग्यो यिहम्बा म़ेदी तो साहज्येला तेहक्योया़गी ङोह स्य़े मा़हखु। 29 टाङगाकी खुमा यहूदा ङ्याम्बु येहकें सोङबे लाहलागी येशूगी खोला छ्येपागी तेहन्दाला कोहकें से़हया़ च्यिरा ङ्योहज्येला ताङग्यो यिहन्डो म़ेदी ऩेसीन ओहले लाहलागीती प्राङबुया़ला च्यिरा तेर्च्येला ताङग्यो यिहन्डो म़ेदी ऩेसीन। 30 ओहले यहूदागी खुरा साह-लुहङ म़ेहबा खो फिला थेन्दी काहल्सीन। ओहजेला नाहम सो सिहन्दी येहकें। पत्रुसगी मा-लोक पेहच्ये येह म़ेदी येशूगी सुङ नाङग्यो 31 यहूदा काहल फान्ज्यो येशूगी सुङ नाङसीन, “ता़ह मिहगी स़ेबुती ज़िज्यिद-च्येन काहल्दी येह, ओहले ओ़ह लाहमले किन्ज्योदीॱआङ ज़िज्यिद काहल्दी येह। 32 मिहकी स़ेबुला किन्ज्योकी ज़िज्यिद ओहङसीमाना किन्ज्यो राहङगीराङ मिहगी स़ेबुदी ज़िज्यिद जे नाङज्ये येह ओहले मिहरोगी दि छ्या़लेन ग्यो़बाराङ जे नाङज्ये येह। 33 ए ङाहगी पेहजाया़, ता़हनी ङाह ख्या ङ्याम्बु ङ्यिहमा तोबा थु च्यी़राङ लिहच्ये येह। ख्याया़गी ङाहला छोल्ज्ये येह, ओहले ङाहगी यहूदी गोबाया़ला माक्यो ल़ेहमुराङ ख्याया़ॱलाङ माएँ ‘ङाह का़हला डोॱराङ येहबा, ओ़हला ख्याया़ ओहङ ख़ूज्ये म़ेह।’ 34 ता़ह ङाह ख्याया़ला का साम्बा च्यी़ तेर्कें ख्याया़ च्यी़गी च्यी़ला चेवा पेहतोङ। ङाहगी ख्याया़ला काह-ठि पेहती चेवा पेहक्यो येहबा ओ़ह ल़ेहमुराङ पेहती ख्याया़गीॱआङ च्यी़गी च्यी़ला चेवा पेहतोङ। 35 ख्यागी च्यी़गी च्यी़ला चेवा पेहसीमाना ख्याया़ ङाहती स्याहप्च्यी यिहम्बा दु म़ेदी मिह थाम्ज्यीगी ङोह स्ये़ज्ये येह।” 36 ओहले सिमोन-पत्रुसगी येशूला टी़हसीन, “ओ़ चो़वो, राहङ का़हला फेप नाङगेराङ येहबा ले?” ओहले येशूगी सुङ नाङसीन, “ङाह डोएँगी ग्या़ला ख्ये ताहन्दा तिङ ङ्यादी ओहङ मी़हखुएँ, यिहॱनाङ तिङलेनी ख्ये ओहङ ख़ूज्ये येह।” 37 ओहले पत्रुसगी येशूला मासीन, “चो़वो, ङाह च्यिबे ताहन्दाॱराङ राहङला तिङ ङ्यादी ओहङ मी़हखुएँ ले? ङाह राहङगी तेहन्दाला स्यि कोहॱनाङ स्यिएँ।” 38 ओहले येशूगी सुङ नाङसीन, “च्यि ख्ये ङाहगी तेहन्दाला स्यि कोहॱनाङ स्यि ख़ूएँ ले? तेहम्बाराङ ङाह ख्येला माएँ, ख्येगी ङाहला लेहमा सुम मा-लोक माहबे थु च्याहबु पेहच्ये म़ेह।” |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.