यूहन्ना 11 - ह्योल्मोलाजरस स्योरक्यो 1 बेथानिया युहलला लाजरस मिहन थो़क्योगी मिह च्यी़ नेहपा काहल्दी येहकें। ओ़ह युहलला खोगी आज्यी मरियम दाङ मार्थाॱआङ तेहको येहकें। 2 ओ़ह मरियमगी लेहमा च्यी़ येशूगी स्याहपला टिहमा स्यिहम्बु खाएँगी नुम की़दी राहङगी टागी फी़क्यो येहकें, ओहले नेहपा काहल्ग्यो लाजरसती ओ़ह आज्यी-नुहमु ङ्यी़गी नो़ह यिहन्गे। 3 ओ़ह आज्यी-नुहमु ङ्यी़गी येशूला दि ल़ेहमु म़ेदी लेहङगु ताङसीन, “चो़वो, राहङगी चेवा जे नाङग्योकी मिह, ताहन्दा ने़हदी येहबा।” 4 दि लेहङगु सेन्दी येशूगी सुङ नाङसीन, “लाजरस ने़हदी येहॱनाङ ओ़ह नाहजागी खोला स्यिवाला मे़हक्याल्गे, यिहॱनाङ दि किन्ज्योगी ज़िज्यिदगी तेहन्दाला यिहम्बा दि लाहमलेॱराङ किन्ज्योगी स़ेबुला ज़िज्यिद ओहङज्यु।” 5 येशूगी मार्था, मोहती नोहमो मरियम दाङ लाजरसला माहङबुराङ च्याहम्बा जे नाङगो येहकें। 6 यिहॱनाङ येशूगी लाजरस नाहक्यो केच्या सेन नाङदीॱआङ मिहरो राहङ ज़्य़ू नाङग्योकी ग्या़ला तोहरोङॱआङ ङ्यिहमा ङ्यी़ ज़्य़ू नाङसीन। 7 ओ़ह तिङले येशूगी स्याहप्च्यीया़ला सुङ नाङसीन, “लो डो, ता़ह ओहराङ येहपाराङ यहूदीया लुहङबाला लो़ह डोएँ।” 8 ओहले स्याहप्च्यीया़गी येशूला मासीन, “लोबेन ला़ह, दाङस्या च्यी़राङ राहङला ओ़ह ग्या़गी यहूदीया़गी तोहगी क्याहप्ती सेच्ये छोल्ग्यो येहकें। येहपाराङ च्यिबे राहङ ओ़ह ग्या़लाराङ फेप्च्ये जेकें?” 9 येशूगी सुङ नाङसीन, “ङ्यिहमाला छ्युजी च्यिङ्यी़ ओहङगे, मिहम्बा ले? ङ्यिहमाला डोएँया़ नार्तो मेहक्याहप्कें च्यिबेमाना खोगी जाम्बुलीङकी येहसेर थोङगे। 10 यिहॱनाङ कुहङमु डोएँया़ नार्तो क्याहप्कें च्यिबेमाना कुहङमुनी खो ङ्याम्बु क्या-साङे मेहयोहङगे।” 11 ओ़ह तिङले येशूगी खुङया़ला सुङ नाङसीन, “ओहराङगी रो़ह लाजरस ङ्यि लो़हदे येह, ता़ह ङाह खोला ङ्यी़-छे च्य़ूज्येला ओ़हला डोएँ।” 12 ओहले स्याहप्च्यीया़गी येशूला स्युहसीन, “चो़वो, खो ङ्यि लो़हक्यो यिहनानी टा़हज्ये येह।” 13 येशूगी सुङ नाङग्यो स्याहलकी तेहन्दादी “ता़ह लाजरस स्यि सिहन्सीन” म़ेदी सुङ नाङग्यो यिहन्गे, यिहॱनाङ स्याहप्च्यीया़गीदी लाजरस तेहम्बाराङ ङ्यि लो़हक्यो च्यी़राङ यिहन्डो म़ेदी ने़क्यो येहकें। 14 ओ़ह सोङबे येशूगी थेका सिरे सुङ नाङसीन, “लाजरस स्यि सिहन्दी येह। 15 ख्याया़गी यिह छ्य़ेज्यु म़ेदी ख्याया़गी तेहन्दाला ङाह ओ़हला मे़हबादीॱराङ या़हबु काहल्सीन। ता़ह च्यि यिहॱनाङ डो, ओहराङ खोसाला डोएँ। यिहॱनाङ ख्याया़गी ङाहला जेन माहङबु यिह-छ्य़े ख़ूज्यु म़ेदीराङ ङाह ओ़हला लाहम्साङराङ माहकाहल्बा यिहम्बा। ओ़ह सोङबे ङाहला ज्यिबुराङ क़ेहनाङ लाहङदी येहबा।” 16 ओहले स्याहप्च्यीया़ नाहङगी दिदुमस माएँ थोमागी राहङगी लेहमेन रो़हया़ला मासीन, “लो, ता़ह ओहराङॱआङ लोबेन ङ्याम्बुराङ डोएँ ओहले मिहरो ङ्याम्बुराङ स्यिएँ।” येशूगी लाजरसला सोम्बो लो़ह च्य़ू नाङग्यो 17 येशू बेथानिया युहलला लेप नाङगेमु लाजरसकी फुङबु फुक्पाला ज़्या़क्योदी ङ्यिहमा ज़्यि काहल सिहन्दी येहकें। 18 बेथानिया माएँ युहल यरूशलेम क्याहसा यिहन्ज्यु नेसा सुमजे था़-रिहङबु येहकें। 19 यहूदी मिहया़ माहङबुराङ, मरियम दाङ मार्था साला नो़ह स्यिक्योगी तुहक्पुला सेम सो ओहङदी येहकें। 20 ओहले येशू फेप नाङगेराङ येह माएँ ताम थ़े फान्ज्यो मार्था लाहमलाराङ थु काहल्सीन। यिहॱनाङ मरियमदी खाङबालाराङ तेहसीन। 21 ओहले येशूला थू़दी मार्थागी स्युहसीन, “चो़वो, राहङ देला ज़्य़ू नाङग्यो यिहनानी ङाहती नो़ह स्योर्च्ये म़ेहबा येहकें। 22 यिहॱनाङ ताहन्दाॱआङ राहङगी किन्ज्यो ङ्याम्बु च्यि लाङ सुङगे, ओ़ह किन्ज्योगी राहङला नाङज्ये येह म़ेदी ङाहला क्यी़ह येहबा।” 23 ओहले येशूगी मोहला सुङ नाङसीन, “ख्येती नो़ह येहपाराङ सोम्बो लो़हज्ये येह।” 24 ओहले मार्थागी येशूला स्युहसीन, “यिहन्ज्येनी यिहम्बा चो़वो, जाम्बुलीङगी तिङस्यो ङ्यिहमाला स्यिक्यो मिहया़ थाम्ज्यीराङ सोम्बो लो़हगेमु खोॱआङ सोम्बो लो़हज्ये येह माएँ ताम ङाहला क्यी़ह येह।” 25 ओहले येशूगी मोहला सुङ नाङसीन, “स्यिक्योया़ला सोम्बो लो़ह च्य़ूगे दाङ मिहली ज़ाङबु तेर्केन्दी ङाहराङ यिहन। ङाहला यिह छ्य़ेगेया़ स्यिॱना़ङ खो सोम्बो लो़हज्ये येह। 26 ओहले ङाहला यिह छ्य़ेदी थार फान्ज्यो खो येहपाराङ नाहमॱआङ स्यिज्ये म़ेह। च्यि ख्ये दि तामला यिह छ्य़ेगे?” 27 ओहले मार्थागी येशूला स्युहसीन, “लाहसो लाह चो़वो, राहङराङ जाम्बुलीङला फेप नाङगेन्गी किन्ज्योगी स़ेबु मास्यीका यिहम्बा म़ेदी ङाह यिह छ्य़ेगे।” 28 ओहजे म़ेदी मार्था खाङबाला लो़ह काहल्सीन ओहले मोहती नोहमो मरियमला खाजुम्बाला क़े क्याहप्ती मासीन, “लोबेन लेप नाङसीन, ओहले ख्येला लोबेनगी क़े क्याहप नाङगेराङ येह।” 29 दि केच्या थे़-लुहङ म़ेहबा मरियम ह्ओप लाहङदी येशूला थु काहल्सीन। 30 ओहजेला येशू युहलला लेप माहनाङबा येहकें। येशू मार्थागी थ़ूक्यो ग्या़लाराङ ज़्य़ू नाङदी येहकें। 31 खाङबाला खुङला सेम सो ओहङग्यो यहूदीया़गी मरियमला ह्ओप लाहङदी फिला छारा पेहती डोएँ थोङ फान्ज्यो, मोह तुहर्साला ङुह काहल्ग्यो यिहम्बानी ने़दी, मोहगी तिङदा तिङ काहल्सीन। 32 ओहले येशू येहकें ग्या़ला लेप-लुहङ म़ेहबा मरियमगी येशूकी कुम्देनला खेप्चु क्याहप्ती स्युहसीन, “चो़वो, राहङ देला ज़्य़ूदी येहकें यिहनानी ङाहगी नो़ह स्योर्च्ये म़ेहबा येहकें।” 33 ओहले येशूगी मरियम दाङ मोहगी तिङदा तिङ ओहङग्योगी यहूदीया़ॱआङ ङी़हदी तेहक्यो ज़ी़ नाङ फान्ज्यो येशूकी थु ङ्युङसीन ओहले ज्यिबुराङ छाबा-छुबे जे नाङसीन। 34 येशूगी खुङया़ला टी़ह नाङसीन, “ख्याया़गी लाजरसकी फुङबु का़हला ज़्या़दी येहबा?” ओहले खुङया़गी येशूला स्युहसीन, “चो़वो, फेप्ती ज़ी़-नाङदोङ लाह।” 35 ओहजेला येशूॱआङ स्युम नाङसीन। 36 ओ़ह सोङबे यहूदीया़गी मासीन, “त़ेदोङ, येशूगी लाजरसला काहजे चेवा जे नाङगु दुबा।” 37 यिहॱनाङ लाहलागी मासीन, “च्यि मी़ मेहथोङगे मिहला मी़ थोङगेन ज़ो थुप्के मिहगी दि लाजरसॱलाङ स्यिवालेगी थार च्य़ू ख़ूज्ये म़ेहबा येहकें ले?” 38 ओहले येशू येहपाराङ ज्यिबुराङ थु नाहमु जेती लाजरसकी फुङबु ज़्या़क्योगी तुहर्सा ङो़ले फेप नाङसीन। ओ़ह तुहर्सादी फुक्पा च्यी़ला ज़ोक्यो येहकें ओहले ओ़ह फुक्पागी कोहला तोह छ्यिम्बु च्यी़गी का़क्यो येहकें। 39 ओहले येशूगी सुङ नाङसीन, “ओ़ह तोहला फार फुल्दोङ।” ओहले लाजरसकी आज्यी मार्थागी स्युहसीन, “चो़वो, खोला फुक्पाला ज़्या़क्यो तिहरीङनी ङ्यिहमा ज़्यि काहल सिहन्सीन, ता़हनी टिहमा खा सिहन येहटो।” 40 येशूगी मोहला सुङ नाङसीन, “ख्येगी यिह छ्य़ेसीन माना किन्ज्योगी ओङ छ्यिम्बु ज़िज्यिद थोङज्ये येह” म़ेदी ङाहगी ख्येला माक्यो मिहम्बा ले? 41 ओहले खुङया़गी फुक्पागी कोह खा फ़ेसीन। ओहले येशूगी स्यिहङगाम ङो़ले ज़ी़दी सुङ नाङसीन, “ओ़ याहप, ङ्यिह राहङला थुज्यी-छ्ये़ फुल्गे, च्यिबेमाना ङाहगी ओहर-छ्य़े स्युहक्यो राहङगी सेन नाङसीन। 42 ङाहगी ओहर-छ्य़े स्य़ूहक्योदी राहङगी नाहम-माना सेन नाङगे म़ेदी ङाहला क्यी़ह येह। यिहॱनाङ राहङगी ङाहला ताङ नाङग्यो यिहम्बा म़ेदी खुङया़गी यिह-छ्य़े ख़ूज्यु म़ेदीराङ देला लाहङदी तेहक्यो मिह मिह-माहङया़गी तेहन्दाला ङाहगी दि माक्यो यिहम्बा।” 43 दे़ज्ये सुङ छर फान्ज्यो येशूगी सुङ-क़े छ्यिम्बुच्यी तेन्दी लाजरसला क़े क्याहप नाङसीन, “ए लाजरस, फिला थेन्दी स्यो।” 44 ओ़हजेलाराङ ओ़ह स्यिक्योगी लाजरस फिला थेन्दी ओहङसीन। खोगी लाहक्पा काङबा रे़हगी टिल्दी येहकें ओहले तोहङबाॱआङ रे़हगी तुम्दी येहकें। ओहले येशूगी मिहया़ला सुङ नाङसीन, “रे़हया़ स्यी़दी खोला डो च्य़ूदोङ।” येशूला ज़ुङज्ये छोल्ग्यो 45 मरियम साला ओहङग्योकी माहङबुराङ यहूदीया़गी येशूगी जे नाङग्योकी छ्या़लेया़ थोङदी यिह छ्य़ेसीन। 46 यिहॱनाङ खुङया़ नाहङगी लाहला मिहया़ फरिसीया़साला काहल्दी येशूगी जे नाङग्योकी छ्या़लेगी तेहन्दाला स्येसीन। 47 ओहले पूजाहारी छ्यिम्बु दाङ फरिसीया़गी छो़बा छ्यिम्बुगी मिहया़ला क़े क्याहप्ती मासीन, “ता़ह ओहराङगी च्यि पेहच्ये? च्यिबेमाना दि मिहगीनी माहङबुराङ याहम्जेन छ्येवागी ल़ेहया़ पेहकेनॱराङ येह। 48 का़हलेॱआङ ओहराङगी खोला आहन्डाराङ ले ताङसीन मानानी मिह थाम्ज्यीगी खोला यिह छ्य़ेज्ये येह ओहले रोमीया़गी ओहङदी ओहराङगी छ्योखाङ दाङ ओहराङगी क्यिहपा ङ्यिकालाराङ तोङ च्य़ूज्ये येह।” 49 खुङ नाहङला कैयाफा मिहन थो़क्यो मिह च्यी़ येहकें। ओ़ह लोहगी गो-छ्येवा पूजाहारी खोराङ यिहन्गे। ओहले खोगी मासीन, “ख्याया़ च्यिॱआङ ङोह मे़हस्ये दु। 50 लुहङबाकी मिह थाम्ज्यी तोङदी डोएँ म़ेदीनी मिह थाम्ज्यीगी छापला मिह च्यी़ स्यिएँदीॱराङ क्याहल्गे ओहले ओ़हदीॱराङ ख्याया़गी तेहन्दाला या़हबु यिहम्बा म़ेदी ख्या ङोह मे़हस्ये दु।” 51 दि ताम खोगी राहङ ङो़ले माक्यो मिहम्बा येहकें, यिहॱनाङ ओ़ह लोहगी गो-छ्येवा पूजाहारी यिहन्गे सोङबे यहूदी क्यिहपागी तेहन्दाला येशू टोहङ कोहएँ म़ेदी खोगी तिङले ओहङगेन्गी केच्या स्येक्यो येहकें। 52 यहूदीया़की तेहन्दाला च्यी़राङ मिहम्बा, यिहॱनाङ फेतोर कोहतोर काहल्ग्योगी किन्ज्योगी मिहया़ला ग्या़ च्यी़ला रुहप पेहच्येला दि ताम माक्यो येहकें। 53 ओ़ह सोङबे ओ़ह ङ्यिहमा यिहन्ज्यु यहूदी गोबाया़गी येशूला सेच्ये म़ेदी लाहम तासीन। 54 ओ़ह सोङबे येशू येहपाराङ यहूदीया़की पाहरक्यीला मिहया़गी थोङदाङला फार छुर कोरा क्याहप माहनाङ। यिहॱनाङ येशू ओ़ह ग्या़ले रिह काम्बु पोहला येहगेन्गी एफ्राइम माएँ क्याहसाला फेप नाङसीन ओहले येशू राहङगी स्याहप्च्यीया़ ङ्याम्बु ओ़हलाराङ ज़्य़ू नाङसीन। 55 यहूदीया़की थार्पा छ्येपा लेप्च्ये पेहती येहकें। ओ़ह सोङबे युहल युहलगी मिहया़ माहङबुराङ राहङ-राहङला चाङमा ज़ोज्ये म़ेदी थार्पा छ्येपा छ़ूगे म़ेदी तोहङलेराङ यरूशलेमला काहल्सीन। 56 ओहजेला खुङया़गी “येशू फेप नाङगे यिहम्बानी?” म़ेदी लाहम त़ेदी तेहक्यो येहकें। छ्योखाङला जोम्गेमु खुङया़गी राहङ नाहङदुङ दि ल़ेहमु मासीन, “ख्याया़ला च्यि ने़उ दुबा, च्यि खो छ्येपाला ओहङडो ले?” 57 पूजाहारी छ्यिम्बु दाङ फरिसीया़गीदी येशूला ज़ुङज्ये म़ेदी “खोला सुज्यीगी थोङसीमाना ङ्यिहला लेहङगु ख्येर-स्यो” म़ेदी का़ तेरक्यो तेहकें। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.