याकूब 5 - ह्योल्मोमिह छ्युक्पुया़ला ज्यी़-ङोर नाङग्यो 1 ए छ्युक्पु मिहया़, ङाहगी ताम ङ्यिहन्दोङ! ख्या थो़ला बाप ओहङगेन तुहक्पुया़गी तेहन्दाला ङी़हदी ङुहप्रा तिहङरा पेहतोङ। 2 ख्यागी क्युह नोहरया़ ता़ह फेन मे़हथोएँ काहल्दी येह, ख्यागी काप्च्याया़ मुहक्पुगी साह सिहन्दी येह। 3 ख्यागी सेर ङुलया़ला या़ क्याहप सिहन्दी येह। ओ़ह या़ॱराङ ख्याला टाह पेहती पाङबु ओहङज्ये येह, ओहले ओ़ह या़गी मेहगी ल़ेहमुराङ पेहती ख्यागी ज़ुबुला दाक ताङज्ये येह। दि ज्युक्स्योलगी ङ्यिहमाया़ला ख्यागी क्युह नोहरया़ सी़ ज़्या़दी येह। 4 ख्यागी स्यिहङला ल़ेह पेहकेन ल़ेहमीया़ला तेर कोहएँगी ले़गा तेर्ती म़ेह। खुङगी ङ्याहङेन पेहक्योदी ङ्यिहन्दोङ। ख्याती तेन्दो टू़हगे ल़ेहमीया़ ङुहक्योदी वाङज्या छ्यिम्बु नोम नाङगेन चो़वो छ्येवा किन्ज्योगी ङ्येन थु लेप सिहन्दी येह। 5 ख्या जाम्बुलीङला माहङबुराङ खाम्साङ-ङ्याहम्साङ दाङ क्यिपु पेहती तेहती येह। तुप्ती सेकेन ङ्यिहमागी तेहन्दाला ख्यागी राहङगी राहङला क्या़ह च्य़ूदी ठाबे पेहसीन। 6 ख्याला टाह मेहबेकें टाहङदेन मिहलाॱआङ ख्यागी ङ्य़ेहबा केन्दी सेसीन। तुहक्पुगी ती़हजीला ना़स्यीङ छ्यिम्बु पेहती कू़हदी तेह कोहएँ 7 ओ़ह सोङबे आदा-नो़ह दाङ आज्यी-नुहमुया़, चो़वो फेप माहनाङ थु ना़स्यीङ छ्यिम्बु पेहती कू़हदी तेहतोङ। त़ेदोङ, सा-ल़ेह पेहकेन मिहगी चा़ छ्यिम्बु कामेकी रेहवा पेहती सेर्का दाङ यार्कागी नाम माहक्याहप थु ना़स्यीङ छ्यिम्बु पेहती कू़हदी तेहकें। 8 ओ़हठीॱराङ पेहती ख्यागीॱआङ ना़स्यीङ छ्यिम्बु पेहती कू़हदी तेहतोङ। राहङ सेम सान्दी पेहती तेह, च्यिबेमाना चो़वो फेप नाङगेन्गी ती़हजी पोहलाराङ येह। 9 आदा-नो़ह दाङ आज्यी-नुहमुया़, च्यी़गी च्यी़ला टाह पेहती ङ्येहर्स्यी माहबे। मिहन्सीमाना ख्याला ङ्य़ेहबा फो़ज्ये येह। त़ेदोङ, ठिम ज़ी़ नाङगेन किन्ज्यो कोहलाराङ ज़्य़ू नाङदी येह। 10 आदा-नो़ह दाङ आज्यी-नुहमुया़, तुहक्पु खुर्केन दाङ ना़स्यीङ छ्यिम्बुगी पे काहन्डुमु ओहङ कोहकें म़ेदी चो़वोगी छेनला स्याहल सुङ नाङगेन लुहङतेम्बाया़ला त़ेदोङ। 11 ना़स्यीङ छ्यिम्बु पेहती कू़हदी तेहकेनया़ काहजे सोनाम-साक्पु म़ेदी ओहराङगी माएँ। ख्याया़गी अय्यूब ना़स्यीङ छ्यिम्बु पेहती कू़हदे तेहक्योगी तेहन्दाला थे़दी येहबा। ज्युक्स्योलला चो़वोगी काह-ठि पेहती खोला बोलो-छ्योलो मेलाम नाङबा, ओ़हॱआङ ख्याला क्यी़हराङ येह। चो़वोगी मिहया़ला माहङबुराङ निङज्यी दाङ थुज्यी ज़ी़ नाङगे। 12 ङाहगी आदा-नो़ह दाङ आज्यी-नुहमुया़, थाम्ज्यी म़ेदी चा़ छ्यिम्बु ताम स्यिहङगाम दाङ जाम्बुलीङ ओहले लेहमेन च्यि से़हदीॱआङ ना माहक्याल। यिहम्बा यिहन्सीमाना यिहम्बा म़ेदोङ, मिहम्बा यिहन्सीमाना मिहम्बा म़ेदोङ। ओ़हठी पेहसीनमाना किन्ज्योगी ख्याया़ला ङ्य़ेहबा काल नाङज्ये म़ेह। सोल्वाङगी स्युक 13 च्यि ख्या पाहरक्यीला सुलाॱआङ च्यिरा खेन्दा-का़हबु काहल्दी येहबा? खोगी सोल्वाङ ताप्च्यु। च्यि सुॱआङ सेम काहसो काहल्दी येहबा? खोगी त़ेरा तेच्या फुल्गेन्गी छ्ये़-लु लेहन्ज्यु। 14 च्यि ख्या नाहङला सुज्यी ला़ मेहखा काहल्दी येहबा? खोगी छेन्छोकगी एल्डरया़ला क़े क्याहप्च्यु ओहले खुङगी चो़वोगी छेनला नुमगी ठि-सोल पेहती खोगी तेहन्दाला सोल्वाङ ताप्च्यु। 15 तेहपा पेहती ताप्क्यो सोल्वाङगी नेहपा थार च्य़ूज्ये येह ओहले चो़वोगी खोला टा़ह च्य़ू नाङज्ये येह, ओहले का़हलेॱआङ खोगी तिहक्पा पेहक्यो येहसीमाना चो़वोगी खोला कोहङदा नाङज्ये येह। 16 टा़हज्येगी तेहन्दाला ख्या राहङगी पेहक्योगी तिहक्पाया़ च्यी़गी च्यी़ ङ्याम्बु राहङ-राहङगी तिहक्पाया़ लोक पेहतोङ, ओहले च्यी़गी च्यी़ला सोल्वाङ ताप तेर। टाहङदेन मिहगी ताप्क्यो सोल्वाङ स्युक छ्यिम्बु ओहङगे ओहले दिगी याहम्जेम्बागी ल़ेह पेहकें। 17 एलियाॱआङ ओहराङ ल़ेहमुराङ मिह यिहन्गे। खोगी लोह सुम दाङ दावा ट़ूह थु नाम माहक्याहप म़ेदी सोल्वाङ ताप्केमु नाम माहक्याहप। 18 खोगी येहपाराङ सोल्वाङ ताप्सीन, ओहले नामले माहर नाम क्याहप्सीन, ओहले सागी कामे तेर्सीन। 19 ङाहगी आदा-नो़ह दाङ आज्यी-नुहमुया़, ख्याया़ नाहङला सुज्यी तेहन्दामगी लाहमले क्यो़दी काहल्सीन माना खोला लो़दी ख्येर्स्यो। 20 दि केच्या ख्याला क्यी़ह ओहङज्यु, का़हन्दीगी तिहक्च्येम्बा मेहन्दा च्यी़ला खोगी चोक्पा लाहमलेगी लो़दी ख्योङगे, ओ़ह मिहगी खोगी यिहला स्यिवालेगी थार च्य़ूज्ये येह, ओहले खोगी माहङबुराङ तिहक्पाया़ ता़हज्ये येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.