याकूब 4 - ह्योल्मोजाम्बुलीङ ङ्याम्बु रो़ह 1 ख्यागी पाहरक्यीला ठाक-ठाक ठुक-ठुक पेहकेन दाङ जिङगेन्गी तामया़ च्यि तेहन्दागी ख्योङगे? च्यि दि थाम्ज्यी ख्ये ज़ुबुगी ओङबुया़गी पाहरक्यीला मा़ क्याहप्केन ह्अम्बाया़ लाहमले ओहङग्यो मिहम्बा ले? 2 ख्यागी सेम्बानी पेहकें, यिहॱनाङ मेहन्ज्योर्कें। ओ़ह सोङबे ख्यागी से-से तुप-तुप पेहकें। ख्यागी ठादो पेहकें यिहॱनाङ च्यिॱआङ मेहन्ज्योर्कें ओ़ह सोङबे ख्या ठाक-ठाक ठुक-ठुक पेहकें ओहले जिङगे। ख्यागी किन्ज्योला मेहलाङगे सोङगोराङ ख्यागी च्यिॱआङ मेहन्ज्योर्कें। 3 लाङनाॱआङ ख्यागी खाम्साङ-ङ्याहम्साङ पेहकेन्गी चोक्पा सेम थो़दी लाङगे ओहले मेहन्ज्योर्कें। 4 ए छ्येउ-छ्येंमु पेहकेन मिहया़! जाम्बुलीङला निङज्यी पेहकें मिह किन्ज्योकी टाह ओहङगे माएँ ताम च्यि ख्याला क्यी़ह म़ेहबा? ओ़ह सोङबे जाम्बुलीङला रोह ज़ोज्ये छोल्गेन्दीगी किन्ज्योला राहङगी टाह ज़ोएँ। 5 “किन्ज्योगी ओहराङ नाहङला ज़्या़ नाङग्योकी यिहगी तेहन्दाला मिहरो ज्यिबुराङ ठादो जे नाङगे” म़ेदी सुङरापला प्रुहक्योगी स्याहल तेहन्दा मे़हबाला प्रुहक्यो यिहन म़ेदी मा़हने। 6 यिहॱनाङ मिहरोगी जे नाङग्योकी काटीन जेन छ्यिम्बु येहबा। ओ़ह सोङबे नाम्पार-ताहक्पा सुङरापला दि ल़ेहमु प्री़हदी येहबा, “छ्य़ेन्दो तेन्गे मिहया़ला किन्ज्योगी टाह जे नाङगे, यिहॱनाङ ङ्येम्ज्युङ पेहकेनया़ला थुज्यी ज़ी़ नाङगे।” 7 ओ़ह सोङबे किन्ज्योगी ओङ चो़ला ज्युल्दी तेह। ती़ह गो-छ्येवाला टाह पेहतोङ ओहले खो ख्यालेगी प्रे़हदी डोज्ये येह। 8 ख्याया़ किन्ज्यो पोहला स्यो, ओहले किन्ज्योॱआङ ख्या पोहला फेप नाङज्ये येह। ए तिहक्च्येम्बाया़! राहङ लाहक्पा ठी़दी चाङमा जे़दोङ। ए सेम ङ्यी़ च्याङगेनया़! राहङ सेम चाङमा जे़दोङ। 9 ख्या सेम नाहमु पेहतोङ, ङुहप्रा तिहङरा पेहतोङ ओहले ङी़हदोङ। ख्या क़ेहमु क्याहप्क्योदी ङुह कोहज्ये येह ओहले ख्यागी क़ेहनाङ तुहक्पुला ग्युर्च्यु। 10 चो़वोगी दिनला ख्या राहङगी राहङला ङ्येम्ज्युङ जे़दोङ ओहले मिहरोगी ख्याला याहर क्या़ नाङज्ये येह। राहङगी यिह छ्य़ेबा नो़हला ठिम माहताङ 11 ए ङाहगी आदा-नो़ह दाङ आज्यी-नुहमुया़, च्यी़गी च्यी़ला टाह पेहती चोक्पा ताम माहमा। का़हन्दीगी राहङ नो़हला टाह पेहती चोक्पा ताम माएँ ओहले ङ्य़ेहबा केन्गे, खोगी छ्य़े-ठिमला टाह पेहती ताम माक्यो यिहम्बा, खोगी छ्य़े-ठिमला ङ्य़ेहबा केन्ग्यो यिहम्बा म़ेदी तेन्गे। यिहॱनाङ ख्येगी छ्य़े-ठिमला क्येन तासीमानानी ख्येगी छ्य़े-ठिम ची़क्यो मिहम्बा, ख्येनी छ्य़े-ठिमला ठिम ताङगेन ठिम-पेन गा काहल्सीन लेह। 12 छ्य़े-ठिम नाङगे दाङ ठिम ताङ नाङगेन्दीनी च्यी़मे च्यी़राङ किन्ज्यो यिहन, मिहरोगीॱराङ मिहया़ला थारॱआङ च्य़ू थुप्के ओहले तोङॱआङ च्य़ू थुप्के। यिहॱनाङ राहङ खिम्जीला ङ्य़ेहबा काल्गे ख्या सु यिहम्बा? छ्य़ेन्दो माहतेन 13 “तिहरीङ क्यिनी नाहङबारॱराङ ओहराङ क्याहसा च्यी़ला काहल्दे ओ़हला लोह च्यिचे छोङ क्याहप्कें ओहले क्युह माहङबु ज़ोएँ” म़ेदी माएँया़गी ङाहगी ताम ङ्यिहन्दोङ। 14 नाहङबारनी च्यि ओहङगे म़ेदी ख्यागी ङोह स्य़े मी़हखुएँ। ख्यागी मिहजीनी याहम्बीज्यी थोङगेन दाङ तोर्ती डोएँगी हु-रुङमा ल़ेहमु यिहम्बा 15 ओ़हगी छापला़नी ख्यागी दि ल़ेहमु गा मा कोहज्ये येहकें, “का़हलेॱआङ किन्ज्योगी थुला ठुङदी येहसीनमाना ओहराङ थार्ती तेहकें ओहले दि पेहकें ओ़ह पेहकें।” 16 यिहॱनाङ ख्यागी छ्य़ेन्दो तेन्गे ओहले ठासाक तेन्गे। दि ल़ेहमु छ्य़ेन्दो तेन्गेन्दी ङ्येहम्बा यिहम्बा। 17 ओ़ह सोङबे या़हबु ल़ेह पेह कोहएँ म़ेदी ङोह स्य़ेदी स्य़ेदीॱआङ का़हन्दीगी मेहबेकें खोला तिहक्पा फो़गे। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.