याकूब 3 - ह्योल्मोच्येलेला टिहला ज़्या़ कोहएँ 1 ए ङाहगी निङज्यी पेहक्योगी आदा-नो़ह दाङ आज्यी-नुहमुया़, ख्याया़ नाहङला मिह माहङबु लोबेन डोज्ये माहछोल, च्यिबेमाना लेहमेन मिहया़ला म़ेदी ङ्यिह लुहङ तेर्केया़ला ठिम छान्दी जेती ज़ी़ नाङज्ये येह माएँदी ख्याला क्यी़ह येह। 2 च्यिबेमाना ओहराङ थाम्ज्यीगी जोल्गे। का़हन्दी मिहगी ताम माएँमु मेहजोल्गे खो तेहम्बाराङ याहङ-ताहक्पा मिह यिहम्बा। ओ़ह ल़ेहमु मिहगीराङ राहङ ज़ुबुला टिहला ज़्या़ ख़ूएँ। 3 राहङगी कुल्ग्यो ल़ेहमु पेहच्यु म़ेदी ओहराङगी ताबुगी खाला च्या़गी खम्देर क्याहप्कें, ओहले ओहराङला का़हला सेम ने़गे ओ़हला लो ख़ूएँ। 4 ओ़हठीॱराङ पेहती छ्यु-टुहॱलाङ ल्हा़बा स्युक छ्यिम्बुगी पेहती चा़ल्ती़एँ, ओ़ह छ्यु-टुहया़ काहजे छ्यिम्बु येहॱनाङ स्यिङगी स्योक्पा फेमाज्यीगी राहङला का़हला सेम ने़गे ओ़हला लो़ ख़ूएँ। 5 च्येलेॱआङ ओ़हठीॱराङ यिहम्बा। दि देजे फेमा येहॱनाङ छ्यिम्बु-छ्यिम्बु तामया़ म़ेदी छ्य़ेन्दो तेन ख़ूएँ। फेमा म़ेदी फेमा मेह लोहमा च्यी़गीॱआङ रिहराङ मे़हरा ताङ ख़ूएँ। 6 च्येलेदी मेह ल़ेहमुराङ यिहम्बा। दि ज़ुबुगी ओङबुया़ नाहङला तिहक्पागी छाङॱराङ यिहम्बा। दिगी ज़ुबु थाम्ज्यीला क्येन फो़ च्य़ूएँ ओहले मिहगी मिहजीलाॱराङ मेह ती़ह च्य़ूगे ओहले ङ्याल्वाकी मेहला ओ़ह छी़गे। 7 नामे-नाजो रिहदाया़, च्याह-च्यिहवाया़, साला स्युहर्ती डोएँगी सेम्ज्येनया़ ओहले छो-क्याहम्जोकी सेम्ज्येनया़ला टिहला ज़्या़ ख़ूएँ, ओहले मिहगीराङ दिया़ला टिहला ज़्या़दी येहबा। 8 यिहॱनाङ च्येलेला सुज्यीगीॱआङ टिहला ज़्या़ मी़हखुएँ। दि ज्यिबुराङ याम-थेर्पु ओहङगे। दि ज्यी़ज्ये ल़ेहमु तू़हगी काहङग्योगी ती़ह यिहम्बा। 9 ओहले दि च्येलेगीराङ ओहराङ चो़वो दाङ याहपला त़ेरा फुल्गे, ओहले दि लाहमलेॱराङ किन्ज्योकी छ्यालुला छ्या़क्यो मिहया़ला ओहराङ मे़मु क्याहप्कें। 10 खा च्यी़लेगीराङ मेलामॱआङ थेन्गे ओहले मे़मुॱआङ थेन्गे। ए ङाहगी आदा-नो़ह दाङ आज्यी-नुहमुया़, दि ल़ेहमु ओहङ मेहकोहच्ये येहकें। 11 च्यि क्येज्यु च्यी़ले छ्यु स्यिहम्बु दाङ खाक्ती थेन ख़ूएँ ले? 12 ङाहगी आदा-नो़ह दाङ आज्यी-नुहमुया़, च्यि माउ तोहङबोला जैतून ओहले कुहन्डुम तोहङबोला माउ या़ह ख़ूएँ ले? छ्यु खाक्ती क्येज्युले छ्यु स्यिहम्बु थेन मी़हखुएँ। ना ङ्यी़गी रिहक्स्यी 13 ख्या नाहङला ख्येम्बा-ताहक्पु दाङ येहन्देन माहङबु येहकेन्दीगी राहङगी डोलु-तेहलुया़ या़हबु पेहच्यु ओहले रिहक्स्यीला ङ्येम्ज्युङ पेहती ल़ेह पेहच्यु। 14 यिहॱनाङ ख्याया़गी सेम नाहङला ठादो पेहकेन दाङ राहङदेन ज़ोएँगी सेम्बा येहसीमाना दि तामला छ्य़ेन्दो माहतेन, ओहले तेहन्दामगी स्याहलला फिर्च्या माहज़ो़। 15 दि ल़ेहमु रिहक्स्यीनी याहर किन्ज्यो लाहमले ओहङग्यो मिहम्बा, दिनी जाम्बुलीङ दाङ मिह ज़ुबुले ओहले ती़ह गो-छ्येवा लाहमले थेन्ग्योगी रिहक्स्यी यिहम्बा। 16 च्यिबेमाना का़हला ठादो पेहकें दाङ राहङदेन ज़ोएँगी सेम्बा ओहङगे ओ़हला फेतोर कोहतोर डोएँ ओहले नामे-नाजो ल़ेह चोक्पाया़ पेहकें। 17 यिहॱनाङ याहर किन्ज्यो लाहमले ओहङग्योगी रिहक्स्यीनी तोहङस्यो क़ेह-चाङमा ओहङगे खोगी स्य़िहदेला यिह छ्य़ेएँ, ओ़ह रिहक्स्यी ज्योर्केन मिह थेका दाङ मिह थाम्ज्यी ङ्याम्बु थिन्गे, खो निङज्यीगी काहङग्यो ओहङगे, खोगी नाहम-माना या़हबु ल़ेह पेहकें, खोगी सुलाॱआङ ङ्येम्बा-ङ्य़ेहरी मेहबेकें, खो यिहन्दो तेन्गे मेहयोहङगे। 18 स्य़िहदेला थिर पेहती ज़्या़गेया़गी स्य़िहदे लाहमलेॱराङ सेन ताप्के, ओहले खुङया़गी टाहङदेनकी कामे टू़हगे। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.