याकूब 2 - ह्योल्मोसुलाॱआङ ङ्येम्बा-ङ्य़ेहरी माहबे 1 ए ङाहगी आदा-नो़ह दाङ आज्यी-नुहमुया़, ज़िज्यिदगी काहङग्यो चो़वो छ्येवा येशू मास्यीकाला ख्याया़गी तेहपा पेहक्यो सोङबे ख्यागी फिगी छ्यालु त़ेदी सुलाॱआङ ङ्येम्बा-ङ्य़ेहरी माहबे। 2 का़हलेॱआङ सुज्यी सेरकी सितुप च्य़ूदी या़हबु-या़हबु काप्च्याया़ केहन्दी ख्या छो़सा ग्या़ला ओहङसीन, ओहले लेहमेन प्राङबु मिह च्यी़ॱआङ बन्दा-बिन्दु काप्च्याया़ केहन्दी ओहङसीमाना, 3 ख्यागी ओ़ह या़हबु काप्च्या केहन्दी ओहङगेन्दीला चा पेहती, “दि या़हबु ग्या़ला ज़्य़ू नाङदोङ” म़ेदी मासीन, ओहले ओ़ह प्राङबु मिहलादी “ख्ये ओ़हलाराङ लाहङदी तेह” कि-माना “ङाहती काङबा पोहला तेह” म़ेदी मासीमाना, 4 च्यि ख्यागी राहङ नाहङदोङराङ ङ्येम्बा-ङ्य़ेहरी माहबे ले? च्यि ख्या सेम चोक्पा थो़दी फिच्र्या ठिम ताङगेन्गी ठिम-पेनया़ माहकाहल ले? 5 ङाहगी च्याहम्बु आदा-नो़ह दाङ आज्यी-नुहमुया़, या़हबु पेहती ङ्यिहन्दोङ, च्यि किन्ज्योगी जाम्बुलीङकी प्राङबु मिहया़ला तेहपाला छ्युक्पु ज़ोज्ये दाङ ताहम्ज्या ज़्या़ नाङग्योकी क्याहल-खाप मिहरोला चेवा पेहकेनया़ला नाङज्येला दाम नाङग्यो मिहम्बा ले? 6 यिहॱनाङ ख्याया़गीनी प्राङबुया़ला स्ये़हन्डील पेहसीन। च्यि छ्युक्पुया़गी ख्याला ङ्येन्ज्येन मेहबेकें ले? च्यि ख्याला ठिम-खाङला ख्येर्केन्दीॱआङ खुङया़ॱराङ मिहन ले? 7 ख्याया़लानी किन्ज्योगी येशू मास्यीकाकी छेनला क़े क्याहप नाङग्यो यिहम्बा, ओहले ता़ह येशू मास्यीकाकी छेन या़हबुला स्ये़हन्डील पेहकेन्दीॱआङ खुङया़ॱराङ मिहम्बा ले? 8 तेहम्बाराङ ख्याया़गी, “राहङ टोहङरोला राहङला ल़ेहमुराङ चेवा पेहतोङ” म़ेदी नाम्पार-ताहक्पा सुङरापला प्रुहक्योगी किन्ज्योगी क्याहल्सीकी ठिमला ची़सीमाना ख्याया़गी या़हबुॱराङ ल़ेह पेहक्यो यिहम्बा। 9 यिहॱनाङ ख्यागी फिगी ज़ोप्ता त़ेदी मिहया़ला ङ्येम्बा-ङ्य़ेहरी पेहसीनमाना ओ़ह ख्यागी तिहक्पा पेहक्यो यिहम्बा ओहले ख्यागी छ्य़े-ठिम गोम्ग्यो सोङबे ख्याला ङ्य़ेहबा फोएँ। 10 च्यिबेमाना का़हन्दीगी किन्ज्योगी छ्य़े-ठिम थाम्ज्यीराङ ची़गे यिहॱनाङ छ्य़े-ठिम नाहङदी ठिम च्यी़ गोम्सीमाॱनाङ थाम्ज्यीराङ छ्य़े-ठिम गोम्ग्योगी ङ्य़ेहबा फो़ज्ये येह। 11 च्यिबेमाना का़हन्दीगी, “छ्येउ-छ्येंमु माहबे” म़ेदी सुङ नाङबा मिहरोगीॱराङ, “मिहॱआङ माहसे!” म़ेदी सुङ नाङसीन। ओ़ह सोङबे ख्येगी छ्येउ-छ्येंमु मेहबेॱनाङ मिह सेसीन माना रेबेॱराङ छ्य़े-ठिम गोम्ग्यो यिहम्बा ओहले ख्येला ङ्य़ेहबा फोएँ। 12 ओ़ह सोङबे मिहला राहङवाङ तेर्केन छ्य़े-ठिमगी ओहराङला ठिम ताङगे माएँ ताम ङोह स्ये़दे ताम म़ेदोङ ओहले ल़ेह पेहतोङ। 13 निङज्यी मेहबेकें मिहला किन्ज्योगी थुज्यी ज़ी़ माहनाङबा जेती ठिम ताङ नाङज्ये म़ेह। चेवागी ठिमला क्याहल ख़ूएँ। तेहपा दाङ ल़ेह 14 ए ङाहगी निङज्यी पेहक्योगी आदा-नो़ह दाङ आज्यी-नुहमुया़, का़हलेॱआङ सुज्यीगी “ङाह तेहपा पेहकें” म़ेदी माज्येनी माएँ, यिहॱनाङ ल़ेहदी मेहबेसीमाना, दिगी च्यि फेन थो़बा ले? च्यि ओ़ह ल़ेहमु तेहपागी खोला थार च्य़ू ख़ूएँ ले? 15 का़हलेॱआङ ख्याया़गी पाहरक्यीला आदा-नो़ह दाङ आज्यी-नुहमुया़ला काप्च्या केहन्ज्ये दाङ ङ्यिहमा टाहङमागी साहप्च्याया़ कोम्बु काहल्ग्यो येहसीमाना 16 यिहॱनाङ ख्याया़ नाहङला सुज्यीगी खुङला, “सेम लो तेहमु पेहती सोङ, काप्च्या क्यिपु केहन्दी तेहतोङ ओहले टेहपा काहङगे थु सोह” च्यी़राङ माएँ, यिहॱनाङ खुङ ज़ुबुगी तेहन्दाला कोहकेन्गी से़हया़दी मेहतेर्सीमाना, ओ़ह मिहया़ला च्यि फेन थोएँ ले? 17 ओ़ह ल़ेहमुराङ, यिह-छ्य़े च्यी़राङ पेहती ल़ेहदी मेहबेसीमाना ओ़ह यिह-छ्य़े पेहक्योदी स्यिक्यो यिह-छ्य़े यिहम्बा। 18 यिहॱनाङ लाहला मिहगी दि ल़ेहमुॱआङ मारो, “ख्येगी तेहपा पेहकें। यिहॱनाङ ङाहनी ल़ेह पेहकें।” लु ओ़हठी यिहन्सीमाना ल़ेह माहबेबा पेहती ख्येगी तेहपा पेहक्यो ङाहला तेन्दोङ ले! ङाहनी ल़ेह पेहती ङाहती तेहपा तेन्गे। 19 किन्ज्योनी च्यी़मे च्यी़राङ येह म़ेदी ख्यागी यिह छ्य़ेगे। ओ़ह या़हबु यिहम्बा। ओ़हदीनी ल्हेन्डीया़गीॱआङ यिह छ्य़ेगे, ओहले ज्यी़दी दार्कें! 20 ए उल्दुम्बाया़, ल़ेह माहबेबा पेहती तेहपा च्यी़राङ पेहती तेहसीन माना ओ़ह च्यिॱआङ फेन मे़हथोएँ माएँ ताम च्यि ख्याया़ला दास्यी तेन कोहएँ ले? 21 ओहराङ चावा अब्राहामगी तेहन्दालाराङ नोम्साङ ताङदोङ नाह। च्यि खोगी राहङगी पुह इसहाकला छ्येकाङला फुल्गेन्गी ल़ेह पेहती माॱराङ किन्ज्योगी दिनला खो मिह टाहङबु सी़हक्यो मिहन ले? 22 खोगी तेहपा ङ्याम्बु-ङ्याम्बुराङ ल़ेहॱआङ पेहसीन ओहले खोगी पेहक्योगी ल़ेह लाहमलेॱराङ तेहपा तेहन्दा डुप्सीन, ओ़ह च्यि ख्यागी मेहथोङ दु? 23 नाम्पार-ताहक्पा छ्य़ेगी दि ल़ेहमु सुङ नाङग्योकी स्याहल तेहन्दा डुप्सीन, “अब्राहामगी किन्ज्योला तेहपा पेहसीन, ओहले ओ़ह तेहपागी पेहतीराङ खो किन्ज्योगी दिनला मिह टाहङबु सी़ह ख़ूसीन” दि ल़ेहमु पेहती अब्राहाम किन्ज्योगी छ्येटो काहल्सीन म़ेदी माक्यो येहबा। 24 ता़ह ख्यागी ङोह स्य़ेसीन? तेहपा च्यी़राङ पेहती मिहम्बा खोगी पेहक्योगी ल़ेह लाहमले किन्ज्योगी दिनला मिह टाहङबु सी़ह ख़ूएँ। 25 ओ़हठीॱराङ पेहती बान्डन राहाबलाॱआङ त़ेदोङ, काह-ठि पेहती मोह राहङगी ल़ेह लाहमले किन्ज्योगी दिनला मिह टाहङबु सी़हखुबा। ङ्याहम च्ये ओहङग्योगी इस्राएली मिह ङ्यी़ला मोहगी फेप स्युहसीन ओहले खुङ ङ्यी़ला थार च्य़ूज्येला लेहमेनॱराङ लाहमले पेहती ताङ चाहङसीन। 26 ओहराङगी ज़ुबु, नाम्स्यीले खा फ़ेगेमु स्यिक्यो ओहङगे ओ़हठीॱराङ पेहती तेहपाॱआङ ल़ेह यिहन्ज्यु खा फ़ेगेमु स्यिक्यो ओहङगे। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.