याकूब 1 - ह्योल्मोयाकूबगी प्रुहक्योकी यिहगी 1 किन्ज्यो दाङ चो़वो येशू मास्यीकाला स्याहप्तो स्युहएँगी स्याहप्च्यी ङाह याकूबगी दि यिहगी जाम्बुलीङगी माहङबु ग्या़ ग्या़ला फेतोर कोहतोर काहल्ग्यो इस्राएलगी छाङ च्यिङ्यी़ला प्रुहउ येहबा। ख्या थाम्ज्यीला ङाहती टास्यी-देले येहबा। यिह-छ्य़े दाङ रिहक्स्यी 2 ए ङाहगी आदा-नो़ह दाङ आज्यी-नुहमुया़, नामे-नाजो तुहक्पु-तुहङालया़ ओहङगेमु सेम काहसो पेहतोङ। 3 च्यिबेमाना ख्याया़ला क्यी़ह येहबा ख्याती तेहपाला ङ्याहम च्येकेमु ख्यागी ना ख़ूएँगी स्युक छ्यिम्बु पेहती डोएँ। 4 ख्याला च्यि से़हदीॱआङ कोम्बु माहयोहङज्यु ओहले ख्या याहङ-ताहक्पा दाङ छाङबु डो ख़ूज्यु म़ेदी ना़स्यीङला खोती ल़ेह थाम्ज्यीराङ पेह च्य़ूदोङ। 5 ओहले ख्याया़ नाहङला सुलाॱआङ रिहक्स्यीती कोम्बु येहसीमाना किन्ज्यो ङ्याम्बु लाङदोङ ओहले ख्येगी रिहक्स्यी ज्योर्च्ये येह च्यिबेमाना किन्ज्योगी थु ज़ाङबु जेती थाम्ज्यीलाराङ बोलो-छ्योलो नाङज्ये येह। 6 यिहॱनाङ ख्यागी लाङगेमु सिपाज्यीॱआङ थेचुम माहबेबा पेहती तेहपा पेहती लाङ कोहएँ। थेचुम पेहकेन मिहनी छो-क्याहम्जोला ल्हा़बागी फार छुर याप्केन्गी छ्यु पाहलाप ल़ेहमुराङ यिहम्बा। 7 ओ़ह ल़ेहमु मिहगीनी चो़वोलेगी च्यिॱआङ ज्योर्केनी म़ेदी सेमला मे़हनेॱनाङ टी़हएँ। 8 च्यिबेमाना दि ल़ेहमु थेचुम पेहकेन दाङ सेम ङ्यी़ थो़क्यो मिहनी का़हन्दी ल़ेहलाॱआङ थिक-चि मेहयोहङगे। प्राङबु दाङ क्युह 9 प्राङबु यिह छ्य़ेबा आदा-नो़ह दाङ आज्यी-नुहमुया़, किन्ज्योगी ख्याला याहर क्या़ नाङगेमु ख्या सेम काहसो पेहतोङ। 10 ओ़ह ल़ेहमुराङ पेहती छ्युक्पु मिहया़गीॱआङ राहङ प्राङबु डो कोहएँमु सेम काहसो पेहतोङ च्यिबेमाना खोगी क्युहनी येहदी डोएँ रिहगी मेहन्दो ल़ेहमुराङ यिहम्बा। 11 च्यिबेमाना ङ्यिहमा छान्दी स्यार्ती काहर्नाङ डोएँमु मेहन्दो येहदी डोएँ ओहले ज़ोप्ताॱआङ तोर्ती डोएँ। ओ़हठीॱराङ पेहती छ्युक्पु मिहॱआङ राहङगी ल़ेहया़ला कोहल्दी राहङ मिहजी तोङदी डोएँ। 12 तुहक्पु-काहबुगी ती़हजीलाॱआङ ना़दे थिर पेहती तेहकें मिह काहजे सोनाम-साक्पु। च्यिबेमाना किन्ज्योगी मिहरोला चेवा पेहकेनया़ला मिहलीगी च्याहगा तेर्के सुङदे ताहम्ज्या ज़्या़ नाङदी येह। ओ़ह च्याहगादी सु, तुहक्पुगी ती़हजीलाॱआङ थिर पेहती तेह ख़ूएँ खोगी ज्योर्च्ये येह। 13 ङ्याहम्छे ओहङगेमु सुज्यीगीॱआङ दि ल़ेहमु मा मा़हच्यु, “किन्ज्योगीॱराङ ङाहला ङ्याहम्छे ओहङ च्य़ू नाङग्यो यिहम्बा।” च्यिबेमाना चोक्पा ल़ेहया़गी किन्ज्योला छेताला छ्यि च्य़ू मी़हखुएँ ओहले मिहरोगी लेहमेन मिहया़ॱलाङ ङ्याहम्छेला छ्यि च्य़ू मेहनाङगे। 14 यिहॱनाङ मिह थाम्ज्यी राहङगी सेमला चोक्पा ह्अम्बाया़ क्ये़दी खो ङ्याहम्छेला छ्यिकें। 15 ओ़ह सोङबे राहङ सेमला चोक्पा-चोक्पा सेम्बाया़ ओहङ फान्ज्यो ओ़ह लाहमले तिहक्पा ठुङगे। ओहले तिहक्पा माहङदे काहल फान्ज्यो ओ़हगी मिहला स्यिवाला क्याल्गे। 16 ङाहगी निङज्यी पेहक्योगी आदा-नो़हया़ दाङ आज्यी-नुहमुया़, ख्या राहङगी राहङला गो़-कोहर मा़हच्यु 17 ना थाम्ज्यी या़हबु दाङ याहङ-ताहक्पा काबाप स्यिहङगामलेगी ओहङगे। नामला येहकेन्गी रेबेॱराङ येहसेरया़ छ्या़ च्य़ू नाङगे किन्ज्यो याहप लाहमलेॱराङ दि काबापया़ ओहङगे यिहम्बा। मिहरो नाहमॱआङ ग्युर मेहनाङगे ओहले मिहरोगी लो़हदे येहपाराङ ना़-जुबे ज़ो मेहनाङगे। 18 किन्ज्योगी थुला ठुङग्यो सोङबे तेहन्दामकी सुङ लाहमले मिहरोगी ओहराङला ज़ो नाङसीन च्यिबेमाना मिहरोगी छ्या़ च्य़ू नाङग्योकी से़हया़ नाहङला ओहराङ तोहङस्यो सेदो ल़ेहमुराङ डो ख़ूज्यु म़ेदी यिहम्बा। ङ्यिहन्दोङ ओहले पेहतोङ 19 ए ङाहगी निङज्यी पेहक्योगी आदा-नो़ह दाङ आज्यी-नुहमुया़, दि केच्या टेहम्बा साल्दी ज़्या़दोङ। ख्या ङ्यिहन्ज्येला ग्यो़बा ओहले ताम माज्ये दाङ स्यिहताङ पेहच्येलाती कुहल्बा ओहङ कोहएँ। 20 च्यिबेमाना मिह स्यिहताङगी किन्ज्योला यिह छ्य़ेएँगी ल़ेह नाहमॱआङ पेह मी़हखुएँ। 21 ओ़ह सोङबे ख्यागी दि रोहवा चोक्पा दाङ नाम्दो लाहङज्ये ल़ेहमु पेहताङया़ थाम्ज्यीराङ क्युर्तोङ। किन्ज्योगी राहङगी सुङ ख्यागी सेमला ज़्या़ नाङदी येहबा ओ़हदीला ख्यागी स्यिहवा पेहती लेहन्दोङ च्यिबेमाना दिगीॱराङ ख्याला थार च्य़ूएँ। 22 किन्ज्योगी सुङला ख्यागी ची़दोङ, ङ्यिहन्दी च्यी़राङ पेहसीनमाना ख्यागी राहङगी राहङला गो़ कोर च्य़ूगे। 23 किन्ज्योगी सुङ ङ्यिहन्ज्येनी ङ्यिहन्गे यिहॱनाङ मी़हचीगेन मिहनी राहङगी तोहङबा मेहलोङला ताएँगी मिह ल़ेहमु यिहम्बा। 24 खोगी राहङ तोहङबा मेहलोङला ताएँमु च्यी़राङ राहङ तोहङबा थोङगे ओहले मेहलोङ ता सिहन-लुहङ म़ेहबा खोगी राहङ तोहङबा काह-ठि येहकें म़ेदी टेहम्बा फोक च्येहके। 25 यिहॱनाङ का़हन्दीगी, मिहया़ला ना थाम्ज्यीले खा फ़ेगेन याहङ-ताहक्पा ठिम ङो़ले राहङ मी़ क्या़दी ताएँ ओहले ची़गे, ङ्यिहन्दी टेहम्बा च्येहके मिहम्बा ल़ेहॱआङ पेहकें, खोगी राहङ ल़ेहला मेलाम ज्योर्च्ये येह। 26 का़हलेॱआङ सुज्यीगी राहङगी राहङला ङाह मिह टाहङबु यिहन म़ेदी ने़गे यिहॱनाङ खोगी राहङ च्येलेला टिहला मे़हज़्यासी माना खोगी राहङला गो़ कोर च्य़ूगे ओहले खोगी छ्य़े पेहक्योदी थोरो फुङे डोएँ। 27 तुहक्पुला छ्यिक्यो ह्युग्मो दाङ टो़टेया़ला रो़हराम पेहकेन ओहले जाम्बुलीङकी चोक्पा से़हया़ यिहन्ज्यु राहङ था़-रिहङबु तेहकेंॱराङ किन्ज्यो याहपला थु ङ्य़ेबु ओहङगेन्गी चाङमा दाङ नाम्पार-ताहक्पा छ्य़े यिहम्बा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.