हिब्रू 9 - ह्योल्मोसाम्बा दाङ निङबा 1 तोहङमागी ताहम्ज्याला किन्ज्योला छ्येपा फुल्गेन्गी तेहन्दाला ठिमया़ ज़्या़दी येहकें। ओहले मिहया़गीराङ ज़ोक्योगी छ्येपा फुल्गेन्गी नाम्पार-ताहक्पा ग्या़ च्यी़ॱआङ येहकें। 2 नाम्पार-ताहक्पा पा़ल च्यी़ क्याहङग्यो येहकें। ओ़ह पा़लला कोठा ङ्यी़ येहकें। दिन ङो़ले येहकेन्की कोठालादी छ्येकुङ, सोल्ज्यु दाङ किन्ज्योला फुल्ग्योगी खुराया़ ज़्या़क्यो येहकें। ओहले ओ़ह कोठाला नाम्पार-ताहक्पा ग्या़ म़ेदी माउ येहकें। 3 पाहरक्यीला योल्बा च्यी़ ज़्या़दी माॱराङ कोठा ङ्यी़ ज़ोक्यो येहकें। ओहले ओ़ह योल्बा क्याहप ङो़ले येहकेन्गी कोठालादी थाम्ज्यी म़ेदी चा़ छ्येस्यो नाम्पार-ताहक्पा ग्या़ म़ेदी माउ येहकें। 4 ओहले ओ़ह ङ्याहल-खाङला सेरकी ज़ोक्योगी स्युक्पा च्य़ूएँगी साङबुर दाङ किन्ज्योगी ताहम्ज्या ज़्या़ नाङग्योकी सेरगी तुम्ग्योगी काहम च्यी़ॱआङ येहकें। ओ़ह काहम नाहङला मन्न लू़क्योगी सेरकी स्याहलु, मेहन्दो बुगुल थेन्ग्यो हारूनगी प्रेहका दाङ किन्ज्योकी काया़ प्रुहक्योकी तोह-यामा ङ्यी़ येहकें। 5 किन्ज्योॱराङ ओ़ह ग्या़ला ज़्य़ू नाङदी येह म़ेदी तेन नाङज्येला ओ़ह काहम थो़ला येहसेर क्याहप्केन स्यिहङगामकी स्याहप्च्यीगी स्योक्पाया़ तिहक्पा ता़ह च्य़ूगेन्गी ग्या़या़ थो़ला क्याहङदी येहकें। यिहॱनाङ ताहन्दादी ओ़ह रेबेॱराङ से़हया़ ऱेह-ऱेह पेहती स्य़े मी़हखुएँ। 6 दि ल़ेहमु पेहती थाम्ज्यीराङ च्याहम्दाया़ ठाबे पेह सिहन फान्ज्यो पा़लगी दिन ङो़ले येहकेन्की नाम्पार-ताहक्पा ग्या़लादी पूजाहारीया़ ङ्यिहमा-टाहङमाराङ छ्येपा फुल्ज्येला ओहङगे-डोएँ पेहको येहकें। 7 यिहॱनाङ नाहङ ङो़ले येहकेन्की चा़ छ्येस्यो नाम्पार-ताहक्पा ग्या़लादी लोहला लेहमा च्यी़ गो-छ्येवा पूजाहारी च्यी़राङ डो ङ्युहङगो येहकें ओ़हदीॱआङ ठा़ माहख्येर्पा पेहती डो मिहङ्युहङ येहकें। ओ़ह ठा़दी खो राहङगी पेहक्योगी तिहक्पा दाङ मिहया़गी ङोह मा़हस्येबा पेहती पेहक्यो तिहक्पाकी तेहन्दाला फुल्गो येहकें। 8 दिन ङो़ले येहकेन्गी नाम्पार-ताहक्पा ग्या़ लिहकें थु चा़ छ्येस्यो नाम्पार-ताहक्पा ग्या़ नाहङला स्य़ूहगेन्गी लाहम खा फ़ेज्ये म़ेह म़ेदी नाम्पार-ताहक्पा थुगी दि थाम्ज्यी केच्याया़ लाहमले लोप नाङगे। 9 दिनी ताहन्दागी ती़हजीला पे च्यी़ ल़ेहमु च्यी़राङ यिहम्बा। किन्ज्योला फुल्ग्यो डेल्बा दाङ मार्च्येया़गी छ्येपा फुल्गे मिहती नोम्साङला चाङमा ज़ो मी़हखुएँ म़ेदी दिगी तेन्गे। 10 ओ़हनी माज्येराङ माना साहएँ, थुङगे दाङ चाङमा डोज्येगी तेहन्दाला यिहन्ज्येॱराङ ठी़ क्याहप्केन्गी ठिमया़ च्यी़राङ यिहन। किन्ज्यो लाहमले ठिम साम्बा च्यी़ माहयोहङ थु ओ़हदी ज़ुबुगी तेहन्दाला ज़ोक्योगी पे-ठिम च्यी़राङ यिहम्बा। 11 यिहॱनाङ मास्यीकानी देला येहकेन्गी रेबेॱराङ या़हबु से़हया़दी गो़ छ्येस्यो पूजाहारी जेती फेप नाङ सिहन्दी येह। मिहरो जेन छ्यिम्बु दाङ याहङ-ताहक्पा छ्योखाङला पूजाहारी ज़्य़ू नाङदी येह। ओ़ह छ्योखाङदी मिहगी ज़्याङग्योॱआङ मिहम्बा, ओहले दि जाम्बुलीङला छ्या़क्योगी से़हॱआङ मिहम्बा। 12 राह दाङ पिहउ पी़हरुया़की ठा़गी मिहम्बा, यिहॱनाङ राहङदीराङ ठा़ लाहमले नाहमॱआङ मिहस्यीएँगी मिहली नाङज्येला नाहम मानागी तेहन्दाला लेहमा च्यी़लाॱराङ मिहरो चा़ छ्येस्यो नाम्पार-ताहक्पा ग्या़ नाहङला स्य़ूह नाङसीन। 13 राहबु दाङ लाङगोया़की ठा़ दाङ पाहलाङ स्ये़मु सा़क्योगी थाला लेहन्दी मेहचाङा काहल्ग्यो मिहया़ थो़ला टाम्देमाराङ ज़ुबु चाङमा ज़ोउ येहकें। 14 मास्यीकाकी ठा़गीनी जेन माहङबु ख्यागी नोम्साङला तिहक्पाकी ल़ेहया़लेगी चाङमा ज़ोज्ये येह, ओहले ख्यागी सोम्बो ज़्य़ू नाङगेन किन्ज्योला स्याहप्तो स्युह ख़ूज्ये येह। च्यिबेमाना मिहरोगी नाहम्स्यी किन्दु ज़्य़ू नाङगे किन्ज्योगी थु लाहमले च्यिॱआङ क्येन म़ेहबा पेहती राहङगी राहङला किन्ज्योला मार्च्ये फुल नाङसीन। 15 किन्ज्योगी ताहम्ज्या ज़्या़ नाङग्यो नाहम्स्यी किन्दु लिहकेन्गी मेलामया़ मास्यीका लाहमले क़े क्याहप नाङग्यो मिहया़गी ज्योर ख़ूज्यु म़ेदी दि साम्बा ताहम्ज्या ङ्याम्बु लाहम्बा जे नाङगेन्दी मास्यीकाॱराङ यिहम्बा। तोहङस्यो ताहम्ज्याकी ती़हजीला मिहया़गी पेहक्यो तिहक्पालेगी खुङया़ला खा फे़ नाङज्येला मास्यीका टोहङ नाङसीन। 16 ता़ह स्यिएँ मिहगी राहङ स्यिएँ म़ेदी तोहङले खाज्येम ज़्या़सीन माना खो स्यिक्योकी दास्यी तेन कोहएँ। 17 खो स्यि फान्ज्यो च्यी़राङ ओ़ह खाज्येम ज़्या़क्योदी पक्का डोएँ, च्यिबेमाना ओ़ह खाज्येम ज़्या़गे मिह सोम्बो येहकें थु ओ़ह पक्का मेहन्डोएँ। 18 ओ़ह सोङबे तोहङले ज़्या़ नाङग्योकी ताहम्ज्याॱआङ ठा़गीॱराङ पक्का पेहक्यो येहकें। 19 मोशागी छ्य़े-ठिमला प्रुहक्योगी थाम्ज्यीराङ काया़ मिहया़ला प्रा साल सिहन फान्ज्यो, खोगी राह दाङ पाहलाङ पी़हरुगी ठा़, छ्यु ङ्याम्बु से़दी हिसप तोहङबो दाङ पाहल माहर्मु लेहन्दी सुङरापकी छ्य़े दाङ मिह थाम्ज्यी थो़ला दि ल़ेहमु म़ेदी तोर्सीन, 20 “ख्याया़गी ची़ज्येला किन्ज्योगी ज़्या़ नाङग्योकी ताहम्ज्याला पक्का पेहकेन्गी ठा़ दिराङ यिहम्बा।” 21 ओ़हठीॱराङ पेहती खोगी नाम्पार-ताहक्पा ग्या़ दाङ छ्येपा पेला थाम्ज्यीराङ थो़ला ठा़ तोर्सीन। 22 तेहम्बाराङ सुङरापला तासीमाना ठा़गी ना थाम्ज्यीराङ से़हया़ला चाङमा ज़ोएँ, ओहले ठा़ माहस्याहल थु तिहक्पा ता़ह मी़हखुएँ। 23 स्यिहङगामला येहकेनया़ला पे त़ेदी मिहया़गी ज़ोक्यो से़हया़ला दिठीॱराङ पेहती चाङमा ज़ो कोहउ येहकें। यिहॱनाङ स्यिहङगामलाराङ येहकें से़हया़लानी जेन या़हस्यो मार्च्ये फुल कोहसीन। 24 स्यिहङगामला येहकेन तेहन्दामला पे त़ेदी मिहगी ज़ोक्योगी नाम्पार-ताहक्पा ग्या़ नाहङला मास्यीकानी फेप माहनाङ, यिहॱनाङ मिहरो स्यिहङगामलाराङ फेप नाङसीन, ओहले ताहन्दा मिहरो ओहराङ छ्यो़ले किन्ज्योगी दिनला ज़्य़ू नाङदी येह। 25 इस्राएलीया़गी गो-छ्येवा पूजाहारीनी लो़ह टाहङमाराङ राहङदी मिहम्बा, सेम्ज्येनया़गी ठा़ ख्येर्ती चा़ छ्यिम्बु नाम्पार-ताहक्पा ग्या़ नाहङला स्य़ूहगे। यिहॱनाङ मास्यीकानी येहपा-येहपाराङ राहङला मार्च्ये फुल्ज्येला फेप माहनाङ। 26 का़हलेॱआङ नाहम-माना डो कोहक्यो यिहन्सीमानानी जाम्बुलीङ छ्या़गे यिहन्ज्यु मास्यीकागी येहपा-येहपाराङ तुहक्पु खुर नाङ कोहच्ये येहकें। यिहॱनाङ दि तिङस्यो ङ्यिहमाया़ला मास्यीका नाहम-मानागी तेहन्दाला लेहमा च्यी़ फेप नाङसीन ओहले तिहक्पा टोहल च्य़ू नाङज्येला राहङगी कुसोला मार्च्ये फुल नाङसीन। 27 मिह लेहमा च्यी़ स्यिएँ ओहले स्यि फान्ज्यो किन्ज्योगी खोला ठिम ज़ी़ नाङगे। 28 ओ़हठीॱराङ पेहती मिह माहङबुगी तिहक्पाया़ खुर नाङज्येला मास्यीकागी लेहमा च्यी़ राहङगी राहङला मार्च्ये फुल नाङसीन। ओहले मास्यीका येहपाराङॱआङ लेहमा च्यी़ फेप नाङज्ये येह। ओहजे काहङला मिहया़गी तिहक्पाया़ ता़ह च्य़ू नाङज्येला मिहम्बा यिहॱनाङ सेम काहसो पेहती मिहरो फेप नाङगेन्गी फेप-लाहम कू़हदी तेहकेनया़ला थार्पा नाङज्येला फेप नाङज्ये येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.