हिब्रू 8 - ह्योल्मोओहराङगी येशू गो-छ्येवा पूजाहारी 1 ता़ह ङ्यिहगी माज्ये छोल्ग्यो तामदी दिराङ यिहम्बा: ओहराङ ङ्याम्बु दि ल़ेहमु गो-छ्येवा पूजाहारी ज़्य़ू नाङदी येह, मिहरो स्यिहङगामला चा़ छ्यिम्बु किन्ज्योगी योबा ङो़गी ठिला ज़्य़ू नाङदी येहबा। 2 मिहरो नाम्पार-ताहक्पा ग्या़ला ज़्य़ू नाङदी पूजाहारीगी छ्या़लेन जे नाङगे। दि नाम्पार-ताहक्पा ग्या़दी मिहगी ज़्याङग्यो मिहम्बा, दि किन्ज्योगीॱराङ ज़्याङ नाङग्यो तेहन्दामगी पा़ल यिहम्बा। 3 च्यिबेमाना थाम्ज्यी गो-छ्येवा पूजाहारीया़ डेल्बा दाङ मार्च्ये फुल्ज्येगी तेहन्दाला दाम्ग्यो ओहङगे। ओ़ह सोङबे ओहराङ गो-छ्येवा पूजाहारीगीॱआङ किन्ज्योला च्यिरा फुलॱराङ कोहएँ। 4 मिहरो दि जाम्बुलीङलाॱराङ ज़्य़ू नाङग्यो यिहनानी पूजाहारीॱराङ डोज्ये म़ेहबा येहकें च्यिबेमाना छ्य़े-ठिमगी सुङगे ल़ेहमु डेल्बा फुल्गे पूजाहारीया़नी तोहङ यिहन्ज्यु येहॱराङ येह। 5 पूजाहारीया़गी स्यिहङगामकी नाम्पार-ताहक्पा ग्या़ला पे त़ेदी ओ़हदीला स्याहप्तो स्युहएँ, च्यिबेमाना मोशागी नाम्पार-ताहक्पा ग्या़ ज़ोज्ये पेहकेमु किन्ज्योगी खोला दि ल़ेहमु सुङ नाङग्यो येहकें, “ङाहगी ख्येला लाहला तेन्ग्योकी से़हया़ला पे त़ेदी रेबेॱराङ से़हया़ जे़दोङ।” 6 किन्ज्योगी येशूला नाङग्यो पूजाहारीगी छ्या़ले ओ़ह लेहमेन गो-छ्येवा पूजाहारीगी छ्या़ले म़ेदीॱआङ जेन चा़ छ्यिम्बु येह। ओ़हठीॱराङ पेहती किन्ज्यो दाङ मिहरोगी मिहया़गी पाहरक्यीला येशूगी लाहम्बा जे नाङग्योकी साम्बा ताहम्ज्याॱआङ तोहङले ज़्या़ नाङग्योकी ताहम्ज्या म़ेदी चा़ छ्यिम्बु येह च्यिबेमाना दि ताहम्ज्यागी ब्राम या़हबु ताहम्ज्याया़ थो़ला छ्या़दे येहबा। 7 च्यिबेमाना तोहङमागी ताहम्ज्याला च्यिॱआङ क्येन म़ेहबा येहकें यिहनानी येहपाराङ साम्बा ताहम्ज्या ज़्या़ कोहच्ये म़ेहबा येहकें। 8 च्यिबेमाना किन्ज्योगी ओ़ह मिहया़गी ङ्य़ेहबा तेन नाङगेराङ दि ल़ेहमु सुङ नाङसीन, “चो़वो छ्येवागी सुङ नाङगे, ओ़ह ङ्यिहमा ओहङज्ये येह, ओहजेला ङाह इस्राएल दाङ यहूदागी खाङबा मे़हमेया़ ङ्याम्बु साम्बा ताहम्ज्या ज़्या़ज्ये येह। 9 खुङया़गी आख्ये मे़हमेया़ ङ्याम्बु ङाहगी ताहम्ज्या ज़्या़क्यो ल़ेहमु दि ओहङज्ये म़ेह, ङाहगी खुङला लाहक्पाला ज़ुङदी मिश्र क्याहल-खाप यिहन्ज्यु तेन्दी ख्योङग्यो येहकें। चो़वो छ्येवागी सुङ नाङसीन, खुङ ङाहगी ताहम्ज्याला थिक-चि पेहती माहतेह, ओ़ह सोङबे ङाहगी खुङया़ला नाङदा माहबे। 10 चो़वो छ्येवागी सुङ नाङसीन, ओ़ह ङ्यिहमा तिङले ङाह इस्राएलगी खाङबा म़ेहमे ङ्याम्बु दि ताहम्ज्या ज़्या़ज्ये येह, ङाह खुङया़गी सेमला ङाहती छ्य़े-ठिम ज़्या़ तेर्च्ये येह, ओहले ङाह खुङया़गी सेमला ओ़ह छ्य़े-ठिम प्री़ह तेर्च्ये येह, ओहले ङाह खुङया़गी किन्ज्यो ओहङज्ये येह, ओहले खुङ ङाहती मिहया़ ओहङज्ये येह। 11 ओ़ह ती़हजीला सुज्यीगीॱआङ राहङ आदा-नो़ह दाङ टोहङरोया़ला ‘चो़वो छ्येवाला ङोह स्ये़दोङ’ म़ेदी लोप कोहच्ये म़ेह च्यिबेमाना मिह फेमा छ्यिम्बु थाम्ज्यीगी ङाहला ङोह स्ये़ज्ये येह। 12 च्यिबेमाना खुङया़गी तिहक्पा ङाह ता़ह च्य़ूज्ये येह, ओ़ह तिहक्पाया़ ङाहगी येहपाराङ नाहमॱआङ टेहम्बा साल्ज्ये म़ेह।” 13 दि ताहम्ज्याला “साम्बा ताहम्ज्या” सुङ नाङग्यो सोङबे तोहङमागी ताहम्ज्याला मिहरोगी निङबा ज़ो नाङसीन। ओहले ओ़ह ताहम्ज्या बिन्दु पेहती डोएँ, ओहले तोङदी डोज्ये येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.