हिब्रू 7 - ह्योल्मोगो-छ्येवा पूजाहारी मल्कीसेदेक 1 दि मल्कीसेदेक शालेम क्याहसाकी क्याहल्बु दाङ गो-छ्येवा किन्ज्योकी पूजाहारी येहकें। अब्राहामगी क्याहल्बु ज़्यिला मा़ क्याहप्ती क्याहल्दी लो़ह ओहङगेमु लाहमला मल्कीसेदेकला थ़ूसीन, ओहले मल्कीसेदेकगी अब्राहामला मेलाम क्याहप नाङसीन। 2 अब्राहामगी थाम्ज्यीराङ क्युहया़दी बो च्युला बो च्यी़ मल्कीसेदेकला फी़ फुल्सीन। मल्कीसेदेक छेनकी तेहन्दादी “टाहङदेनकी क्याहल्बु” यिहम्बा ओहले खो शालेम क्याहसाकी क्याहल्बु यिहन्गे सोङबे खोला “स्य़िहदेकी क्याहल्बु” म़ेदीॱआङ ङोह स्य़ेएँ। 3 मल्कीसेदेककी आबा, आमा दाङ चावाया़गी तेहन्दाला च्यिॱआङ स्येच्ये म़ेह। ओहले खोगी क्ये़कार ङ्यिहमा दाङ स्यिवाकी तेहन्दालाॱआङ च्यिॱआङ क्यी़ह म़ेह। किन्ज्योगी स़ेबु ल़ेहमुराङ खोॱआङ नाहम्स्यी किन्दु लिहकेन्गी पूजाहारी यिहम्बा। 4 ता़ह ख्यागी नोम्साङ ताङदोङ, खो काहजे छ्यिम्बु मिह येहकें यिहन्डो? ओहराङगी चावा अब्राहामगी सुतानी मा़ क्याहप्ती क्याहल्दी ख्योङग्यो क्युहगी बो च्युला बो च्यी़ फी़ खोला फुल्सीन। 5 पूजाहारी पदला येहकें लेवीगी क्यिहगी राहङदीराङ इस्राएली आदा-नो़हया़ ङ्याम्बु बो च्युला बो च्यी़ फी़ तुहएँगी का छ्य़े-ठिम लाहमले ज़्योरक्यो येहकें। खुङॱआङ अब्राहामगी छार्क्यीनया़राङ यिहन्गे। 6 पूजाहारी मल्कीसेदेकनी लेवीगी छार्क्यीन मिहम्बा यिहन्गे यिहॱनाङ खोगी अब्राहाम ङ्याम्बु बो च्युला बो च्यी़ फी़ लेहन्सीन ओहले खोगी किन्ज्योगी ताहम्ज्या ज्योर्केन अब्राहामला मेलाम क्याहप्सीन। 7 दिला लोहङटी पेह कोहएँगी ताम च्यिॱआङ म़ेह, मिह फेमागी मिह छ्यिम्बु लाहमले मेलाम ज्योर्के। 8 मिहया़ ङ्याम्बु बो च्युला बो च्यी़ फी़ तुहएँगी पूजाहारीया़ स्यिदी डोएँ यिहॱनाङ छ्य़ेगी मल्कीसेदेकती सोम्बोराङ ज़्य़ू नाङदी येह म़ेदी सुङ नाङगे। 9 सुज्यीगी दि ल़ेहमुॱआङ मारो, बो च्युला बो च्यी़ फी़ तुहएँ लेवीया़गीॱआङ राहङगी चावा अब्राहाम लाहमले मल्कीसेदेकला बो च्युला बो च्यी़ फी़ फुल्सीन। 10 च्यिबेमाना मल्कीसेदेकगी अब्राहामला थ़ूगेमु लेवी राहङ आबाकी ज़ुबु नाहङलाराङ येहकें। 11 पूजाहारीगी पद ज्योर्च्येलाती लेवी क्यिहपाकी छार्क्यीनॱराङ ओहङ कोहएँ म़ेदी छ्य़े-ठिमगी सुङ नाङगे। यिहॱनाङ दि पूजाहारीया़गीदी मिहया़ला याहङ-ताहक्पा ज़ो मी़हखुएँ सोङबे हारूनगी छार्क्यीन ङो़ले मिहम्बा पेहती मल्कीसेदेक ल़ेहमुराङ लेहमेन पूजाहारी च्यी़ फेप कोहच्ये येहकें। 12 च्यिबेमाना पूजाहारीकी पद च्येहप्सीन माना छ्य़े-ठिमॱआङ च्येहपॱराङ कोहएँ। 13 च्यिबेमाना ओहराङगी चो़वो, मिहरोगी तेहन्दाला दि स्याहलया़ सुङदी येह, मिहरोगी छाङ लेहमेनॱराङ यिहम्बा। मिहरोगी छाङला सुज्यीगीॱआङ पूजाहारीगी छ्या़ले जे माहनाङ। 14 च्यिबेमाना ओहराङगी चो़वो यहूदागी छाङ लाहमले ठुङ नाङग्यो यिहन म़ेदी मिह थाम्ज्यीला क्यी़ह येहॱराङ येह। यहूदागी छाङ लाहमले पूजाहारी दाम्गेन्गी तेहन्दाला मोशागी च्यिॱआङ सुङ नाङदी म़ेह। मल्कीसेदेक ल़ेहमुराङ लेहमेन पूजाहारी 15 ता़ह मल्कीसेदेक ल़ेहमुराङ लेहमेन पूजाहारी फेप नाङ फान्ज्यो दि केच्याया़ ओहराङगी छ्यिसाल-नाहङसाल पेहती ह्अ कोहच्ये येह। 16 किन्ज्योगी मिहया़ला नाङग्यो का दाङ पे-ठिम लाहमले मिहरो पूजाहारी काहल्ग्यो मिहन, यिहॱनाङ मिहरो नाहमॱआङ मिहस्यीएँगी मिहलीकी ओङ लाहमले पूजाहारी काहल्ग्यो यिहम्बा। 17 च्यिबेमाना छ्य़ेला दि ल़ेहमु प्री़हदे येहबा, “मल्कीसेदेक ल़ेहमुराङ ख्ये नाहम-माना लिहकेन्गी पूजाहारी ओहङज्ये येह।” 18 च्यिबेमाना ओ़ह तोहङस्यो कादी मा-फाम्बु दाङ फेन मे़हथोएँ काहल्ग्यो सोङबे किन्ज्योगी ओ़ह का च्ये नाङसीन। 19 च्यिबेमाना मोशागी तेरक्यो छ्य़े-ठिमगी सुलाॱआङ याहङ-ताहक्पा ज़ो मा़हखु। यिहॱनाङ ता़ह किन्ज्योगी ओहराङला ओ़ह म़ेदीॱआङ या़हबु रेहवा नाङदी येह, ओ़ह लाहमले पेहती ओहराङ किन्ज्यो पोहला लेप ख़ूएँ। 20 लेहमेनया़ला पूजाहारी ज़ो नाङगेमु किन्ज्योगी ना क्याल माहनाङ यिहॱनाङ येशूला पूजाहारी ज़ो नाङगेमुदी मिहरोगी ना क्याल नाङसीन। 21 यिहॱनाङ किन्ज्योगी ना क्याल्दीराङ येशूला पूजाहारी ज़ो नाङसीन, ओहले मिहरोगी तेहन्दाला किन्ज्योगी छ्य़ेला दि ल़ेहमु सुङ नाङदी येहबा, “चो़वो छ्येवागी ना क्याल नाङदी येह, ओहले मिहरोगी थु नाहमॱआङ ग्युर्च्ये म़ेह, ‘ख्ये नाहम-मानागी तेहन्दाला पूजाहारी ओहङज्ये येह’।” 22 किन्ज्योगी दि ना क्याल नाङग्यो सोङबेॱराङ येशू थाम्ज्यी म़ेदी या़हस्यो ताहम्ज्यागी पाङबु काहल्सीन। 23 ओहले लेहमेन ख्येपार च्यि येहबा माना, तोहङमा पूजाहारीया़ टाहङजीला माहङबु येहकें, च्यिबेमाना खुङ स्यिदी डोएँगी मिहया़ यिहन्गे सोङबे खुङगी पूजाहारीगी ल़ेह पेहती तेह मा़हखु। 24 यिहॱनाङ येशू नाहम-माना सोम्बो ज़्य़ू नाङगे सोङबे मिहरोगी पूजाहारीकी छ्या़लेॱआङ नाहम्स्यी किन्दु लिहकें। 25 ओ़ह सोङबे मिहरोला यिह छ्य़ेदी किन्ज्यो पोहला ओहङगेया़ला मिहरोगी ताहन्दा दाङ नाहम माॱनाङ थार्पा थोप च्य़ू थुप्कें। च्यिबेमाना खुङया़गी तेहन्दाला किन्ज्यो ङ्याम्बु सोल्वाङ ताप नाङज्येला मिहरो नाहम्स्यी किन्दु ज़्य़ू नाङगे। 26 ओहराङला कोहक्योगी गो-छ्येवा पूजाहारीती येशूॱराङ यिहन्गे। मिहरो नाम्पार-ताहक्पा, च्यिॱआङ क्येन म़ेहबा दाङ चाङमा येहबा ओहले किन्ज्योगी मिहरोला तिहक्च्येम्बा मिहया़गी पाहरक्यीले खा फे़ नाङदी थाम्ज्यी म़ेदी थो़स्यो स्यिहङगामला ज़्या़ नाङसीन। 27 लेहमेन गो-छ्येवा पूजाहारीया़गी पेहक्यो ल़ेहमु येशूगी राहङदी ओहले लेहमेन मिहया़गी तिहक्पा ता़ह च्य़ू नाङज्येला ङ्यिहमा-टाहङमाराङ मार्च्ये फुल-नाङ मेहकोहएँ च्यिबेमाना मिहरोगी नाहम-माना लिहकेन्गी दाङवा जेती लेहमा च्यी़लाॱराङ राहङला मार्च्ये फुल नाङसीन। 28 च्यिबेमाना छ्य़े-ठिमगी मा-फाम्बु मिहया़ला गो-छ्येवा पूजाहारी ज़ो नाङसीन, यिहॱनाङ छ्य़े-ठिम म़ेदी तिङले किन्ज्योगी ना क्याल्दी ज़्या़ नाङग्योकी तोहदामगी नाहम-मानाकी तेहन्दाला स़ेबुला याहङ-ताहक्पा दाङ गो-छ्येवा पूजाहारी ज़ो नाङसीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.