हिब्रू 6 - ह्योल्मो1 ओ़ह सोङबे ओहराङ मास्यीकाकी गो़ तोहङस्यो लुहङया़ला च्यी़राङ माहतेहपा पेहती ता़हनी ओहराङ मास्यीकाकी तिहङ रिहङबु दाङ रिहक्स्यीकी लुहङया़ ङो़ले याहरक्यी पेहती डो कोहएँ। स्यिवा ङो़ले ख्येर्केन ल़ेहया़ लाहमले स्या़बा दाङ किन्ज्यो थो़ला तेहपा पेहकें तामगी ब्राम येहपाराङ माहतिङ। 2 नामे नाजोकी बप्तिस्मागी तेहन्दाला लुहङ, सुज्यी थो़ला लाहक्पा ज़्या़गेन्की ल़ेह, स्यिदीले सोम्बो लो़हगेन्गी केच्या दाङ था़ म़ेहबा ङ्य़ेहबा काल्गेन तामया़गी ब्राम येहपाराङ माहतिङ। 3 ओहराङ याहरक्यी पेहती डो कोहएँ, का़हलेॱआङ किन्ज्योगी थुला येहसीमाना ओहराङ दि ल़ेहमुराङ पेहच्ये येह। 4 च्यिबेमाना लेहमा च्यी़ किन्ज्योगी क्या-साङे ज्योर्ती स्यिहङगामकी काबापदीॱआङ प्रे़ह ङ्याहम सिहन्ग्योया़, ओहले नाम्पार-ताहक्पा थु ङ्याम्बुॱआङ च्यी़राङ डी़ सिहन्ग्योया़, 5 किन्ज्योगी सुङदीॱआङ प्रे़ह स्यिहम्बु ङ्याहम सिहन्ग्योया़, ओहले ओहङगेन काल्बाला किन्ज्योगी जे नाङगेन वाङज्या छ्यिम्बुगी छ्या़लेन थोङ सिहन्ग्योगी मिहया़ 6 खुङ मास्यीकाला तेहपा लो़हदी तोङदी डोसीमानानी खुङला येहपाराङ स्या़बा पेह च्य़ूदी मास्यीका ङो़ले ख्योङ मी़हखुएँ। च्यिबेमाना खुङगी राहङदीराङ तेहन्दाला किन्ज्योगी स़ेबुला येहपाराङ क्याहङस्यीङला च्याङगे, ओहले खुङगी मिह थाम्ज्यीगी दिनला मास्यीकाला आब्रु तेन्गे। 7 का़हन्दी सासागी नामगी छ्यु थिम्गे ओ़ह सासागी सा-ल़ेह पेहकेन मिहला कोहएँगी डुया़ तेर्के। ओ़ह सासाला किन्ज्योगी मेलाम नाङगे। 8 यिहॱनाङ ओ़ह सासाला छेर्मा तोहङबो दाङ देर्स्या च्यी़राङ क्येसीन मानानी ओ़ह स्यिती काम्बु डोएँ, ओहले किन्ज्योगी मे़मु सू़ह ख़ूएँ। तिङस्योला ओ़ह मेहला सा़ज्ये येह। 9 ए ङाहगी निङज्यी पेहक्योकी रो़हया़, ङ्यिहगी दि ल़ेहमु पेहती ताम माॱनाङ ख्याया़गी तेहन्दालाती ङाहगी निङ थाक्पा यिहन्ज्युराङ यिह छ्य़ेदी येहबा। ख्यागी ज़्योरक्यो थार्पा लाहमले जेन या़हस्यो मेलाम ज्योर्च्ये येह म़ेदी ङ्यिहला क्यी़ह येहबा। 10 किन्ज्योकी मिहया़ला ख्याया़गी रो़हराम पेहसीन ओहले ताहन्दाॱआङ पेहकेनॱराङ येह। किन्ज्योगी सुॱलाङ ङ्येम्बा-ङ्य़ेहरी जे मेहनाङगे। ख्याया़गी पेहक्यो दि रो़हराम दाङ निङज्यीला किन्ज्योगी नाहमॱआङ थु नाल नाङज्ये म़ेह। 11 दि ल़ेहमु सेम्बा ख्याया़दी तिङ थुराङ ओहङज्यु ओहले ख्याया़गी रेहवा तेहन्दा डुप्च्ये येह दिराङ ङ्यिहती सेम्बा यिहम्बा। 12 ओ़हठी पेहसीनमाना ख्याया़गी ल़ेहमी-लाहम पेहच्ये म़ेह यिहॱनाङ तेहपा दाङ ना़स्यीङ छ्यिम्बु पेहती किन्ज्योकी ताहम्ज्या तेहन्दा डुप च्य़ूगेन्गी मिहया़ ल़ेहमु डोज्ये येह। किन्ज्योगी ताहम्ज्याया़ तेहम्बा-तेहन्सुमॱराङ तेहन्दा डुप्च्ये येह 13 किन्ज्योगी अब्राहाम ङ्याम्बु तोहदाम ज़्या़ नाङगेमु राहङ म़ेदी छ्येस्यो लेहमेन सुॱआङ म़ेहबा सोङबे मिहरोगी राहङगी छेनला दि ल़ेहमु सुङदी ना क्याल नाङसीन, 14 “ङाह ख्येला तेहम्बा-तेहन्सुमॱराङ मेलाम क्याहप्च्ये येह, ओहले ख्येगी छार्क्यीनया़ माहङबुराङ फेल च्य़ूज्ये येह।” 15 अब्राहामगी ना़स्यीङ छ्यिम्बु पेहती कू़हदी तेहसीन ओहले किन्ज्योगी ताहम्ज्या ज़्या़ नाङग्योकी मेलामया़ खोगी ज्योर्सीन। 16 मिह सुज्यीगी ना क्याल्गेमु राहङगी माक्यो ताम थिउ-निउ ओहङज्यु म़ेदी राहङ म़ेदी मिह छ्यिम्बुगी मिहनला ना क्याल्गे, स्येपा तुहर्केन्गी तामया़लाॱआङ ना क्याल्दी डी़ च्य़ूएँ। 17 किन्ज्योकी तोहदाम ज्योर्के मिहया़ला राहङगी ज़्या़ नाङग्योकी तोहदाम च्येॱराङ च्येच्ये म़ेह ओहले तेहन्दा डुप च्य़ू नाङज्ये येह सुङदी थिउ-निउ जे नाङज्येला मिहरोगी ना क्याल नाङसीन। 18 किन्ज्योगी ओहराङला ताम ङ्यी़ नाङदी येहबा। ता़ह दि ताम ङ्यी़ नाहमॱआङ याहर-माहर डोज्ये म़ेह, च्यिबेमाना किन्ज्योगी नाहमॱआङ चिहन क्याहप मेहनाङगे। ओ़ह सोङबे मिहरोगी कुम्देनला डोएँ ओहराङया़गी दिनला ज़्या़ नाङग्यो रेहवाला सान्दी पेहती ज़ुङदी ज़्या़ज्येला ओहराङला आ़र क्येएँ। 19 दि रेहवागी ओहराङगी मिहलीला युहङ च्य़ूज्ये म़ेह। दि रेहवा योल्बा नाहङगी नाम्पार-ताहक्पा ग्या़ थु स्य़ूहगे। 20 ओहराङगी तेहन्दाला येशू ओहराङ म़ेदी तोहङलेराङ ओ़ह ग्या़ला फेप्ती ज़्य़ू नाङदी येह। मल्कीसेदेक पूजाहारी ल़ेहमुराङ मिहरो नाहम-माना लिहकेन्गी गो-छ्येवा पूजाहारी काहल्दी येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.