हिब्रू 3 - ह्योल्मोमोशा म़ेदी येशू छ्यिम्बु 1 ओ़ह सोङबे किन्ज्योगी क़े क्याहप नाङग्यो नाम्पार-ताहक्पा आदा-नो़ह दाङ आज्यी-नुहमुया़, ङ्यिहगी ल़ेह-पेन दाङ गो-छ्येवा पूजाहारी म़ेदी ची़नाङ पेहक्यो येशू ङो़ले सेम ताङदोङ। 2 मोशा किन्ज्योगी ज़िम्गाङला स्याहप्तो स्य़ूहज्येला यिह-छ्य़ेबु येहकें ल़ेहमुराङ येशू राहङला कुल नाङगे छ्या़लेला किन्ज्योगी तेहन्दाला यिह-छ्य़ेबु येहकें। 3 खाङबा म़ेदी खाङबा ज़ोएँ मिहदी चा़ छ्यिम्बु ओहङगे ल़ेहमुराङ मोशा म़ेदी येशू माहङबु चा़ छ्यिम्बु सी़हसीन। 4 च्यिबेमाना खाङबा थाम्ज्यी सुज्यीगीनी ज़ोक्यो ओहङगे। यिहॱनाङ रेबेॱराङ से़हया़ ज़ो नाङगेन्दीनी किन्ज्योॱराङ यिहम्बा। 5 ता़ह तिङला ओहङगेन्गी केच्याया़ प्रा साल्ज्येगी तेहन्दाला मोशा किन्ज्योगी ज़िम्गाङला यिह-छ्य़ेबु स्याहप्तो स्युहएँगी मिह येहकें। 6 यिहॱनाङ मास्यीकाती किन्ज्योगी ज़िम्गाङला यिह-छ्य़ेबु स़ेबु येहकें। ओहराङगी रेहवाला ओहराङगी तिङ थुराङ स्युक छ्यिम्बु दाङ म़ेहबा पेहसीनमाना ओहराङ किन्ज्योगी ज़िम्गाङ यिहम्बा। मास्यीकाला यिह मे़हछ्येएँ मिहया़ला ज्यी़-ङोर 7 ओ़ह सोङबे नाम्पार-ताहक्पा थुगी सुङ नाङग्यो ल़ेहमुराङ, “तिहरीङ ख्यागी किन्ज्योगी सुङ-क़े थ़ेसीन माना, 8 ख्यागी आख्ये मे़हमेया़गी किन्ज्योला टाह पेहती सेम सान्दी पेहक्यो ल़ेहमु ख्या ओ़हठी माहबे। खुङगी रिह-काम्बुला किन्ज्योगी खोक्पा तासीन ओहले टाह पेहसीन। 9 ओ़ह ग्या़ला ख्यागी आख्ये मे़हमेया़गी लोह ज़्यिप-च्यु थु ङाहगी पेहक्यो ल़ेह थोङदीॱआङ यिह मा़हछ्ये ओहले ङाहला खोक्पा तासीन। 10 ओ़ह सोङबे ओ़ह मिहया़ ङ्याम्बु ङाहला स्यिहताङ लाहङसीन ओहले ङाहगी मासीन, ‘खुङगी सेम नाहम पेहॱनाङ ङाहलेगी था़-रिहङबु काहल्दी येह, खुङगी ङाहगी लाहमला डोज्ये माहङ्यीहन।’ 11 ओ़ह सोङबे ङाहगी स्यिहताङ लाहङगेमु ना क्याल्दी मासीन, ‘ङाहगी थाङ सोएँ ग्या़ला खुङ नाहमॱआङ स्युह ङ्युहङज्ये म़ेह’।” 12 आदा-नो़ह दाङ आज्यी-नुहमुया़, जेम्बु पेह। ख्या सुज्यीॱआङ ङ्येहम्बा दाङ यिह मे़हछ्येएँ सेम्बागी ख्याला सोम्बो किन्ज्योलेगी था़-रिहङबु माहख्येर्ज्यु। 13 नाहम थु “तिहरीङगी ङ्यिहमा” माएँ ताम येहबा, ओ़ह थु च्यी़गी च्यी़ला लोप्ताम क्याहप्तोङ। मिहन्सीमाना तिहक्पाकी गो़-कोर च्य़ूदी ख्यागी सेमला सान्दी जे-तेर्वा। 14 तोहङस्यो ओहराङगी मास्यीकाला यिह छ्य़ेगेमु पेहक्योगी म़ेहबा तिङ थुराङ सान्दी पेहती ज़ुङदी ज़्या़सीन माना, ओहराङ मास्यीका ङ्याम्बु च्यी़ काहल्दी येह। 15 छ्य़े-ठिमगी दि ल़ेहमु सुङ नाङगे, “तिहरीङ ख्यागी किन्ज्योकी सुङ-क़े थ़ेसीन माना ख्यागी आख्ये मे़हमेया़गी किन्ज्योला टाह पेहती सेम सान्दी पेहक्यो ल़ेहमु माहबे।” 16 थे़गेनया़ सु येहकें, खुङगी थे़दीॱआङ टाह पेहसीन? मोशागी मिश्र क्याहल-खापलेगी तेन्दी ख्योङग्यो मिहया़राङ यिहन्गे मिहम्बा ले? 17 सु ङ्याम्बु किन्ज्यो लोह ज़्यिप-च्यु थु थुराङ ज़्याङ नाङबा? च्यि ओ़ह तिहक्पा पेहकेनया़ ङ्याम्बुराङ मिहम्बा ले? खुङ रिह-काम्बुला स्यिदी काहल्सीन। 18 किन्ज्योगी का मी़हची़एँया़ॱराङ मास्यीकागी थाङ सो नाङगेन्गी ग्या़ला नाहमॱआङ स्युह ङ्युहङज्ये म़ेह सुङदी किन्ज्योगी ना क्याल नाङग्यो मिहम्बा ले? 19 ओ़ह सोङबे ओहराङगी थोङ ख़ूएँ, खुङगी यिह मा़हछ्येबा सोङबेॱराङ खुङ थाङ सोएँ ग्या़ला स्युह माहङ्युहङ। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.