हिब्रू 2 - ह्योल्मोथार्पा छ्यिम्बुगी तेहन्दाला 1 ओ़ह सोङबे ओहराङगी ज़्योरक्यो किन्ज्योकी तेहन्दामला या़हबु पेहती ङ्यिहन्दी पेह कोहएँ, मिहन्सीमाना ओहराङ ओहलेगी लाहम जोल्ज्ये येह। 2 ताहङबो स्यिहङगामकी स्याहप्च्यीया़गी ओहराङ चावाया़ला स्य़ेक्यो किन्ज्योकी लुहङ तेहम्बा-तेहन्सुम सी़हसीन ओहले ओ़ह लुहङ मी़हचीएँ दाङ मिहङ्यीहन्गेनया़ला फो़ कोहएँगी ङ्य़ेहबा फो़सीन। 3 देजे छ्यिम्बु थार्पाला नोम्साङ मेहताङसीमानानी जेन काह-ठि पेहती ओहराङ थार ख़ूज्ये ले? दि थार्पा तोहङस्यो चो़वोगीॱराङ प्रा साल नाङसीन। मिहरोगी प्रा साल नाङग्योकी लुहङ ङ्यिहन्गेया़गी दि तेहम्बा यिहन म़ेदी ङ्यिहला पाङबु तेर्सीन। 4 किन्ज्योगीॱआङ ताक्छेनया़ तेन नाङदी माहङबुराङ याहम्जेन छ्यिम्बु दाङ वाङज्या छ्यिम्बुकी छ्या़लेया़ जे नाङसीन ओहले राहङ थु-सेम जे-नाङदी क्य़ेहदी नाङग्यो नाम्पार-ताहक्पा थुगी काबापया़ लाहमले दि केच्यागी तेहन्दाला पाङबु नाङसीन। थार्पा नाङगेन्दी मास्यीकाॱराङ यिहम्बा 5 ङ्यिहगी म़ेदी ओहङग्यो, ओहङगेन्गी जाम्बुलीङला किन्ज्योगी स्यिहङगामकी स्याहप्च्यीया़गी ओङ चो़ला ज़्या़ नाङज्ये म़ेह। 6 छ्य़ेला ग्या़ च्यी़ला दि ल़ेहमु म़ेदी प्री़हदे येहबा, “मिह च्यि यिहम्बा, ओहले राहङ खोला वास्ता जे नाङगे? मिहगी पुह सु यिहम्बा, ओहले राहङ खोगी तेहन्दाला तुहङाल जे नाङगे? 7 राहङगी खोला याहम्बीज्यीगी तेहन्दाला च्यी़राङ स्यिहङगामकी स्याहप्च्यीया़ म़ेदी फेमा ज़ो नाङसीन। राहङगी खोला ज़िज्यिद दाङ ची़नाङ जेती पेस्यो केन नाङसीन। 8 ओहले रेबेॱराङ से़हया़ खोगी ओङ चो़ला ज़्या़ नाङसीन।” देला दि ल़ेहमु सुङदी येहबा, “किन्ज्योगी रेबेॱराङ से़हया़ मिहगी ओङ चो़ला ज़्या़ नाङसीन। दिगी तेहन्दा दि ल़ेहमु यिहम्बा खोगी ओङ चो़ला म़ेहबा से़हया़ च्यि स़ेह च्यिॱआङ म़ेह।” यिहन्ज्येनी ताहन्दा ना थाम्ज्यी मिहगी ओङ चो़ला छ्यिक्यो ओहराङगी मेहथोङगे। 9 यिहॱनाङ ओहराङगी येशूला थोङ ख़ूएँ। किन्ज्योगी येशूला याहम्बीज्यीगी तेहन्दाला च्यी़राङ स्यिहङगामकी स्याहप्च्यीया़ म़ेदी फेमा ज़ो नाङसीन। किन्ज्योगी काटीन लाहमले मिह थाम्ज्यीगी तेहन्दाला येशू टोहङ नाङसीन। दि तुहक्पु येशूगी खुर नाङग्यो सोङबे किन्ज्योगी मिहरोला ज़िज्यिद दाङ ची़नाङ जेती पेस्यो केन नाङसीन। 10 ना थाम्ज्यीराङ किन्ज्योदीॱराङ यिहम्बा, रेबेॱराङ से़हया़ किन्ज्योगीॱराङ ज़ो नाङग्यो यिहम्बा। मिहरोगीॱराङ माहङबुराङ छार्क्यीनया़ला ज़िज्यिदला नोम फेप नाङज्येला खुङया़ला थार्पा नाङगेन्गी येशूला तुहक्पुया़ लाहमले याहङ-ताहक्पा ज़ो नाङसीन। 11 च्यिबेमाना नाम्पार-ताहक्पा ज़ो नाङगेन्दी ओहले नाम्पार-ताहक्पा ज़ोक्योया़ॱआङ थाम्ज्यी खाङबा च्यी़गी मे़हमेया़ यिहम्बा। ओ़ह सोङबे खुङया़ला नो़ह सुङज्येला येशू स्याहल स्युह मेहनाङगे। 12 “ङाहगी नो़हया़गी दिनला राहङगी छेन प्रा साल्ज्ये येह, छो़बाया़गी दिनला ङाह राहङला क्या़ज्ये येह” म़ेदी येशूगी सुङ नाङगु दु। 13 येहपाराङ येशूगी सुङ नाङसीन, “ङाह किन्ज्योलाॱराङ म़ेहबा पेहकें।” ओहले येहपाराङ येशूगी सुङ नाङसीन, “त़ेदोङ, ङाह दाङ किन्ज्योगी ङाहला नाङग्यो दि पुह पोहमोया़।” 14 च्यिबेमाना ओ़ह पुह पोहमोया़ स्या दाङ ठा़गी ज़ुबु यिहन्गे सोङबे येशूगीॱआङ खुङ ल़ेहमुराङ स्या दाङ ठा़गी ज़ुबु नोम नाङसीन। ओहले मिहरो राहङॱआङ टोहङ नाङदी दि स्यि च्य़ूएँगी ओङ थो़क्यो ती़ह गो-छ्येवाला तोङ च्य़ू नाङसीन 15 ओहले स्यि कोहएँ म़ेदी छे काहङ ज्यिक्पा खुर्ती तेहकेन्गी मिहया़ला ओ़ह ज्यिक्पालेगी खा फे़ नाङसीन। 16 किन्ज्योगी तेहम्बाराङ दि स्यिहङगामकी स्याहप्च्यीया़गी तेहन्दाला जे नाङग्यो मिहम्बा। दिनी अब्राहामगी छार्क्यीनया़गी तेहन्दालाराङ जे नाङग्यो यिहम्बा। 17 ओ़ह सोङबे राहङगी नो़हया़ काहन्डुमु येहबा येशू राहङॱआङ थाम्ज्यी से़हया़ला ओ़ह ल़ेहमुराङ डो कोहसीन, ओहले मिहया़गी तिहक्पा ता़ह च्य़ू नाङज्येला येशू किन्ज्योगी छ्या़लेला यिह-छ्य़ेबु दाङ च्याहम्बु पूजाहारी छ्यिम्बु काहल्सीन। 18 च्यिबेमाना मिहरो राहङगीॱआङ छेताला छ्यिक्यो ती़हजीला तुहक्पु खुर नाङसीन ओ़ह सोङबे ङ्याहम्छेला छ्यिकेया़ला मिहरोगी रो़हराम जे नाङ थुप्कें। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.