हिब्रू 13 - ह्योल्मोकिन्ज्योकी थु काह-ठि पेहती काहसो ज़ो ख़ूएँ माएँगी तेहन्दाला 1 च्यी़गी च्यी़ला आदा-नो़हला ल़ेहमु पेहती चेवा पेहतीराङ तेहतोङ। 2 राहङ खाङबाला ओहङग्यो टोहम्बोया़ला या़हबु पेहती फेप स्यी़हदोङ, च्यिबेमाना दि ल़ेहमु पेहती लाहलागी ङोह मा़हस्येबा पेहती स्यिहङगामकी स्याहप्च्यीया़ॱलाङ फेप स्युहक्यो येहकें। 3 राहङॱआङ खुङ ङ्याम्बुराङ चोन-खाङला छ्यिक्यो ने़दी चोन-खाङला येहकेनया़ला चारा पेहतोङ, ओहले राहङगीराङ तुहक्पु ङ्युहङग्यो ने़दी तुहक्पु ङ्युहङग्योया़ला टेहम्बा साल्दोङ। 4 पा़हमा, मिह थाम्ज्यीगी ची़नाङ पेहच्ये सी़हगेन्दी ओहङ कोहएँ, ख्योवागी राहङगी पी़हमी क्याहपला लेहमेन पी़हमी छोल्ज्ये मेहयोहङगे, पी़हमीगीॱआङ राहङगी ख्योवा क्याहपला लेहमेन ख्योवा छोल्ज्ये मेहयोहङगे। च्यिबेमाना छारा ल़ेह पेहकें दाङ छ्येउ-छ्येंमु पेहकेनया़ला किन्ज्योगी ङ्य़ेहबा काल नाङज्ये येह। 5 क्युह-नोहरकी थो़ला सेम च्याङदी माहतेह। राहङ ङ्याम्बु च्यि येहबा ओ़हदीलाॱराङ सेम काहसो पेहती तेहतोङ। च्यिबेमाना किन्ज्योगी दि ल़ेहमु सुङ नाङदी येह, “ङाह ख्याला नाहमॱआङ क्युर ज़्या़दी डोज्ये म़ेह, ङाह ख्याला नाहमॱआङ क्युर्च्ये म़ेह।” 6 ओ़ह सोङबे ङ्यिह थाक-ताङदी माएँ, “चो़वोगीॱराङ ङाहला रो़हराम जे नाङगे। ङाह नाहमॱआङ ज्यी़ज्ये म़ेह। मिहगी ङाहला च्यि पेह ख़ूएँ?” 7 ख्याया़ला तोहङस्यो किन्ज्योकी लुहङ तेर्के लोबेनया़ला टेहम्बा साल्दोङ। खुङया़गी राहङगी मिहलीला पेहक्योगी या़हबु ल़ेहया़की तेहन्दाला ख्यागी नोम्साङ ताङदोङ ओहले खुङगी यिह-छ्य़े पेहक्यो ल़ेहमुराङ ख्याया़गीॱआङ पेहतोङ। 8 येशू मास्यीका तोहङले काह-ठि येहकें, ताहन्दाॱआङ ओ़हठीॱराङ ज़्य़ू नाङदी येह ओहले नाहम्स्यी किन्दु ना च्यी़राङ ज़्य़ू नाङज्ये येह। 9 यिहन्जेराङ याहम्जेम्बाकी लोप्च्युङया़गी ख्याया़ला तेहन्दामकी लाहमलेगी चोक्पा लाहम ङो़ले माह-ठिच्यु। च्यिबेमाना साहएँ दाङ थुङगे ठिमगी मिहम्बा, यिहॱनाङ किन्ज्योगी काटीनगीॱराङ सेम सान्दी काहल्ग्योदी या़हबु यिहम्बा। दि ल़ेहमु पे-ठिम ची़दी नाहमॱआङ सुज्यीलाॱआङ फेन्दोप काहल्दी म़ेह। 10 ओहराङदी छ्येकाङ च्यी़ येहबा, ओ़ह छ्येकाङला फुल्ग्यो सेम्ज्येनया़ नाम्पार-ताहक्पा ग्या़ला ल़ेह पेहकेन्गी पूजाहारीया़गी साहज्ये मेहयोहङगो येहकें। 11 इस्राएली गो-छ्येवा पूजाहारीगी चा़ छ्यिम्बु नाम्पार-ताहक्पा ग्या़ला तिहक्पाकी तेहन्दाला मार्च्ये फुल्ज्येला सेम्ज्येनकी ठा़ ख्योङदी ओहङगे। यिहॱनाङ सेम्ज्येनगी ज़ुबुदी पा़ल फिला ख्येर्ती साहउ येहकें। 12 ओ़हठीॱराङ पेहती येशूगीॱआङ राहङदी ठा़गी मिहया़ला तिहक्पालेगी नाम्पार-ताहक्पा ज़ो नाङज्येला मिहरो क्याहसाकी फिला तुहक्पु खुर्ते टोहङ नाङसीन। 13 ओ़ह सोङबे ओहराङॱआङ पा़ल फिला येशूसाला डो, ओहले मिहया़गी येशूला आब्रु तेन्ग्यो ओहराङगीॱआङ ना़दोङ। 14 च्यिबेमाना दि जाम्बुलीङला नाहम्माॱनाङ लिहकें ओहराङगी तेहन्दाला क्याहसा म़ेह। ओहराङनी तिङले ओहङगेन क्याहसाकी लाहम कू़हदी तेहकें। 15 ओ़ह सोङबे ओहराङगी नाहम पेहॱनाङ येशूकी छेनला किन्ज्योला त़ेरा तेच्या फुल्दोङ। दिनी मिहरोकी छेन लेहन्गेया़गी खागी फुल्ग्योकी डेल्बा यिहम्बा। 16 च्यी़गी च्यी़ला या़हबु ल़ेह दाङ रो़हराम पेहच्येला टेहम्बा माहच्येह। च्यिबेमाना किन्ज्योला थु ङ्ये़एँगी मार्च्ये दिराङ यिहम्बा। 17 ख्या गोबाया़गी माक्योगी ताम ङ्यिहन्दोङ। ओहले खुङगी ओङ चो़ला तेहतोङ। च्यिबेमाना चिदुङ तेर कोहएँ माएँ ताम ङोह स्य़ेदीॱराङ खुङया़गी ख्याती नाम्स्यीदी कुहर्ची पेहकें। दि ल़ेह खुङया़गी सेम काहसो पेहती पेहच्यु। तुहक्पु ने़दी मिहम्बा, मिहन्सीमाना ओहलेगी ख्याया़ला च्यिॱआङ खेप्साङ मेहयोहङगे। 18 ङ्यिहगी तेहन्दाला सोल्वाङ ताप्तोङ। ङ्यिहला तेहपा येहबा, ङ्यिहती नावा चाङमा येहबा, ओहले ङ्यिह ल़ेह थाम्ज्यी च्याहङज्यु सेम्बा थो़दी पेहकें माएँ ङ्यिहती सेम्बा येहबा। 19 किन्ज्योगी ङाहला ग्यो़बाराङ ख्याया़ ङ्याम्बु थुज्येला लोहङ नाङज्यु म़ेदी सोल्वाङ ताप तेर म़ेदी ङाह ख्याया़ला ओहर-छ्य़े स्युहउ येह। ज्युक्स्योलकी सोल्वाङ 20 ता़ह ल़ूहया़गी चा़ छ्येस्यो कोहरोवा ओहराङ चो़वो येशूला था़ म़ेहबा ताहम्ज्याकी ठा़ लाहमले स्यिवालेगी सोम्बो ज़्याङ च्य़ू नाङगे स्य़िहदे नाङगे किन्ज्योगी 21 ख्याया़ला नामे-नाजो या़हबु गीनया़गी छाङबु ज़ो नाङज्यु, ओहले ख्याया़गी मिहरोगी थु-सेम तेहन्दा डुप च्य़ू ख़ूज्यु। ख्याया़गी मिहरोला थु ङ्ये़एँगी ल़ेह पेह ख़ूज्यु म़ेदी येशू मास्यीका लाहमले मिहरोगी ख्याया़गी सेमला छ्या़ले जे नाङज्यु। नाहम्स्यी किन्दु येशू मास्यीकाकी ज़िज्यिद ओहङज्यु। 22 आदा-नो़ह दाङ आज्यी-नुहमुया़, ङाहगी लोप्ताम क्याहप्क्योगी केच्याया़ या़हबु पेहती ङ्यिहन्दी पेह म़ेदी ङाह ख्याया़ला ओहर-छ्य़े स्युहउ येह, च्यिबेमाना ङाहगी ख्याया़ला दि यिहगी ङ्युहङसे़ च्यी़राङ प्री़हदी येहबा। 23 ओहराङगी नो़ह तिमोथी चोन-खाङले थेन सिहन्दी येह म़ेदी ङाह ख्याया़ला लेहङगु तेर्को येह। का़हलेॱआङ खो ग्यो़बाराङ देला ओहङसीमाना ङाह ख्यासाला ओहङगेमु खोलाॱआङ ङ्याम्बुराङ ख्योङदी ओहङज्ये येह। 24 ख्यागी थाम्ज्यी गोबाया़ दाङ किन्ज्योगी मिहया़ला ङ्यिहगी टास्यी-देले माउ दु म़ेदी स्ये तेर। इटालिला येहकेन्गी नो़हया़गीॱआङ ख्याया़ला टास्यी-देले म़ेदी येहबा। 25 किन्ज्योकी काटीन ख्या थाम्ज्यी ङ्याम्बु ज़्य़ू नाङज्यु। आमेन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.