हिब्रू 11 - ह्योल्मोतेहपा 1 तेहपा पेहकेन म़ेदी माक्यो तामगी तेहन्दादी च्यि यिहम्बा मासीमाना रेहवा पेहक्योकी तामला सेम तेहमु पेहती तेहकें दाङ मी़गी माहथोङबाकी से़हला सेम तिहङ यिहन्ज्युराङ यिह-छ्य़े पेहकें यिहम्बा। 2 ताहङबोगी मिहया़गीॱआङ यिह-छ्य़े पेहक्यो सोङबे किन्ज्यो खुङया़ ङ्याम्बु थु काहसो जे नाङसीन। 3 तेहपा लाहमलेॱराङ ओहराङगी ह्अ कोह ख़ूएँ किन्ज्योगी सुङ लाहमले जाम्बुलीङ रेबेॱराङ छ्या़ च्य़ू नाङसीन ओहले मिहरोगीॱराङ थोङगेन से़हया़, मेहथोङगेन से़हया़ लाहमले छ्या़ च्य़ू नाङसीन। 4 तेहपा लाहमलेॱराङ हाबिलगी किन्ज्योला कयिनगी म़ेदी जेन या़हस्यो मार्च्ये फुल्सीन। हाबिलगी फुल्ग्योगी मार्च्येला किन्ज्योगी थु काहसो जे नाङसीन ओहले तेहपा लाहमलेॱराङ खो मिह टाहङबु सी़ह ख़ूसीन। खो स्यिदी डोनाॱआङ तेहपा लाहमले ताहन्दा खो ओहराङ ङ्याम्बु ताम माएँराङ येह। 5 हनोकगी तेहपा पेहक्यो सोङबेॱराङ किन्ज्योगी खोला माहस्यीबालाॱराङ स्यिहङगामला नोम फेप्सीन ओहले सुज्यीगीॱआङ खोला च्य़ेह माहसीहन। हनोकला किन्ज्योगी क्या़दी नोम फेप नाङगे म़ेदी तोहङले खोगी किन्ज्योकी थु काहसो ज़ोक्यो येहकें म़ेदी छ्य़ेला प्री़हदी येहबा। 6 तेहपा माहबेबा पेहती सुज्यीगीॱआङ किन्ज्योकी थु काहसो ज़ो मी़हखुएँ च्यिबेमाना किन्ज्योसाला डोएँ मिहया़गी “किन्ज्यो येहॱराङ येहबा ओहले किन्ज्योला छोल्गेया़ला मिहरोगी च्याहगा नाङज्ये येह” म़ेदी यिह-छ्य़े पेह कोहएँ। 7 तेहपा लाहमलेॱराङ नोआगी ओ़ह ती़हजी थु मी़गी थोङॱराङ माहथोङबा से़हया़गी तेहन्दाला किन्ज्यो लाहमले ज़्योरक्यो काला तेहपा पेहती राहङ खाङबा म़ेहमे थाम्ज्यीला थार च्य़ूज्येला छ्यु-टुह च्यी़ ज़ोसीन। दि ल़ेहमु पेहती नोआगी जाम्बुलीङगी मिह रेबेॱराङ तिहक्च्येम्बा यिहन म़ेदी तेन तेर्सीन ओहले खो राहङदी तेहपा लाहमले किन्ज्योगी दिनला मिह टाहङबु सी़ह ख़ूसीन। 8 किन्ज्योगी अब्राहामला क़े क्याहप नाङदी राहङगी ताहम्ज्या ज़्या़ नाङग्योकी क्याहल-खापला सोङ म़ेदी सुङ नाङसीन। अब्राहाम राहङ का़हला डो कोहएँ यिहम्बा म़ेदी खोला क्यी़ह म़ेहबा येहकें यिहॱनाङ खोगी किन्ज्योला तेहपा पेहती राहङ क्याहल-खाप क्युर ज़्या़दी थेन्दी काहल्सीन। ओ़ह ग्या़दी खोगी फास्यी ल़ेहमु पेहती तिङला ज्योरॱटाङ ज्योर्च्ये येहकें। 9 तेहपा लाहमलेॱराङ खो फि क्याहल-खापकी मिह ल़ेहमु पेहती किन्ज्योगी ताहम्ज्या ज़्या़ नाङग्योकी क्याहल-खापला काहल्दी पा़ल क्याहङदी तेहसीन। ओ़ह ताहम्ज्या इसहाक दाङ याकूब ङ्याम्बुॱआङ येहकें ओहले खुङॱआङ ओ़हठीॱराङ पेहती तेहसीन। 10 च्यिबेमाना खोगी नाहम्स्यी किन्दु लिहकें ब्रामला ज़ोक्योकी क्याहसाला कू़हदी तेहक्यो येहकें ओहले ओ़ह क्याहसाला ज़ो तेन्दी ज़ो नाङगेन्दी किन्ज्योॱराङ यिहम्बा। 11 अब्राहाम केहपु काहल सिहन्दी येहकें ओहले साराॱआङ छार्क्यीन म़ेहबा पेहतीराङ क़ेहमु काहल सिहन्दी येहकें यिहॱनाङ किन्ज्योगी राहङगी ज़्या़ नाङग्योगी तोहदाम तेहन्दा डुप्च्यु नाङगे म़ेदी अब्राहामगी तेहपा पेहसीन। 12 केहपु काहल्दी स्यिज्ये पेहक्यो मिह च्यी़ लाहमले नामगी कार्माया़ जेबा माहङबु ओहले टाहङमा क्याहप मी़हखुएँ छो-क्याहम्जो सुहरला येहकेन्गी पेहमा जेबा छार्क्यीनया़ फेल्दी ओहङसीन। 13 दि थाम्ज्यी मिहया़ यिह छ्य़ेदीॱराङ स्यिसीन। किन्ज्योगी “नाङगे” सुङदी ज़्या़ नाङग्योकी ताहम्ज्या खुङया़गी माहन्ज्योर। यिहॱनाङ किन्ज्योगी ज़्या़ नाङग्योकी ताहम्ज्याला खुङया़गी था़-रिहङबुलेगीॱराङ थोङसीन ओहले फेप स्युहसीन। खुङया़गी राहङला दि जाम्बुलीङला ङ्यिहमा ङ्यी़गी डोम्बु दाङ मिह युहलगी मिह ल़ेहमुज्यी ऩेसीन। 14 दि ल़ेहमु ताम माएँ मिहया़गी राहङगी तेहन्दाला क्याहल-खाप च्यी़ ताएँॱराङ येह माएँ ताम ओहराङगी या़हबु पेहती ह्अ कोह ख़ूएँ। 15 राहङगी क्युर ज़्या़दी ओहङग्यो तोहङमागी क्याहल-खापला खुङया़गी टेहम्बा मा़हसाल। का़हलेॱआङ खुङगी ओ़ह क्याहल-खापला टेहम्बा साल्ग्यो यिहन्सीमानानी खुङ येहपाराङॱआङ लो़हदी ओ़हला डो ख़ूज्ये येहकें। 16 यिहॱनाङ खुङया़गीनी दि म़ेदीॱआङ या़हबु स्यिहङगामला येहकेन क्याहल-खापदी चा़ पेहक्यो येहकें। ओ़ह सोङबे किन्ज्योगी राहङला “ङाह ख्याया़गी किन्ज्यो यिहम्बा” म़ेदी सुङ नाङज्येला मिहरोगी ङोहजा जे माहनाङ च्यिबेमाना मिहरोगी खुङया़गी तेहन्दाला क्याहसा च्यी़ ठाबे ज़ो नाङदी येह। 17 किन्ज्योगी अब्राहामला खोक्पा ज़ी़ नाङगेमु तेहपा लाहमलेॱराङ खोगी राहङगी पुह इसहाकला मार्च्ये फुल्ज्येला ठाबे काहल्सीन। अब्राहामगी किन्ज्यो लाहमले तोहदाम ज़्योरक्यो येहकें यिहॱनाङ अब्राहामगी राहङगी च्यी़मे च्यी़ पुहला मार्च्ये फुल्ज्येला ठाबे पेहसीन। 18 किन्ज्योगी खो ङ्याम्बु दि ल़ेहमु सुङदी तोहदाम ज़्या़ नाङग्यो येहकें, “इसहाक लाहमलेॱराङ ख्येती छार्क्यीनया़ फेल्दी डोज्ये येह।” 19 किन्ज्योगी मिहया़ला स्यिक्योलेगीॱआङ येहपाराङ सोम्बो ज़ो थुप नाङगे माएँ तामला अब्राहामगी यिह छ्य़ेसीन ओहले ओ़ह ताम तेहम्बाराङ इसहाक स्यी़दीॱआङ येहपाराङ सोम्बो लो़हदी ओहङग्यो ल़ेहमुज्यी काहल्सीन। 20 तेहपा लाहमलेॱराङ इसहाकगी याकूब दाङ एसावला खुङया़गी मिहजीला ओहङज्ये पेहक्यो केच्याया़गी तेहन्दाला मेलाम क्याहप्सीन। 21 तेहपा लाहमलेॱराङ स्यिएँ ती़हजीला याकूबगी राहङगी प्रेहकाकी च्योदोला खेप्चु क्याहप्ती किन्ज्योला छ्येपा फुल्सीन, ओहले योसेफकी पुह ङ्यी़ला मेलाम क्याहप्सीन। 22 तेहपा लाहमलेॱराङ योसेफगी राहङ स्यिएँ म़ेदी तोहङले इस्राएलीया़ मिश्र क्याहल-खापलेगी थेन्दी डोएँगी तेहन्दाला स्य़ेसीन, ओहले खो राहङगी फुङबुला च्यि पेह कोहएँ यिहम्बा ओ़हगी तेहन्दालाॱआङ योसेफगी पुहया़ला स्य़ेक्यो येहकें। 23 मोशा क्येएँमु खोगी आबा-आमागी खोला ज्यिबुराङ या़हबु थोङसीन, ओहले तेहपा लाहमलेॱराङ दावा सुम थु खोला पे़हदी ज़्या़सीन, ओहले क्याहल्बुगी नाङग्यो का गोम्ज्येलाॱआङ खुङया़ मा़हन्ज्यी। 24 तेहपा लाहमलेॱराङ मोशा छ्यिम्बु काहल फान्ज्यो खोगी “ङाह क्याहल्बु फारोकी पोहमोगी पुह यिहम्बा” म़ेदी माज्येला मा-लोक पेहसीन। 25 तिहक्पा पेहती ङ्यिहमा ङ्यी़ सुमगी खाम्साङ-ङ्याहम्साङ पेहकें म़ेदीनी किन्ज्योगी मिहया़ ङ्याम्बु तुहक्पु खुर्केन्दीॱराङ खोगी दाम्सीन। 26 मिश्र क्याहल-खापगी थाम्ज्यी क्युह-नोहर ज्योर्केन म़ेदीनी बरु थार्पा नाङगेन मास्यीकाकी तेहन्दाला मिहगी ङेन्ज्येन पेहक्योदी ना़गेन्दीॱराङ चा़ छ्यिम्बु क्युह-नोहर यिहम्बा म़ेदी खोला ऩेसीन। च्यिबेमाना किन्ज्योगी नाङगेन च्याहगा ङो़ले खोगी त़ेदी तेहक्यो येहकें। 27 तेहपा लाहमलेॱराङ खोगी क्याहल्बुगी थुयाललाॱआङ नाङदा माहबेबा पेहती मिश्र क्याहल-खापले थेन्दी काहल्सीन ओहले थोङ मी़हखुएँ किन्ज्योला थोङग्यो ल़ेहमुराङ पेहती खोगी सिपाज्यीॱआङ क्याहप लो़हदी मा़हते। 28 तेहपा लाहमलेॱराङ खोगी थार्पा छ्येपा ताङसीन, खाङबाकी कोहला मार्च्ये फुल्ग्यो सेम्ज्येनया़गी ठा़ तोर्सीन। तोहङस्यो क्येक्यो पुह पेहजाया़ला तोङ च्य़ूगे स्यिहङगामकी स्याहप्च्यीगी दे़ मा़हखुज्यु म़ेदी खोगी दि ल़ेहमु पेहक्यो येहकें। 29 तेहपा लाहमलेॱराङ इस्राएलीया़गी सा काम्बुला डोएँ ल़ेहमु, माहर्मु छो-क्याहम्जो च्ये ख़ूसीन। यिहॱनाङ मिश्र क्याहल-खापगी मिहया़गी खुङ ल़ेहमुराङ पेहती छो-क्याहम्जो च्येच्ये पेहकेमु खुङ छोला नुहप्ती स्यिसीन। 30 तेहपा पेहतीराङ इस्राएलीया़गी ङ्यिहमा तिहन थु यरीहो क्याहसाकी चिक्पागी फि-फिदा कोरा क्याहप्सीन, ओहले ङ्यिहमा तिहन ङ्यिहमुदी ओ़ह क्याहसाकी चिक्पा रोहम्सीन। 31 राहाब माएँ पी़हमी बान्डन यिहन्दीॱआङ मोहगी किन्ज्योला तेहपा पेहक्यो सोङबे किन्ज्योगी का मिहङ्यीहन्गे मिहया़ ङ्याम्बु स्यि मा़हकेह च्यिबेमाना मोहगी ओ़हला ङ्याहम च्ये ओहङग्योगी इस्राएली मिहया़ला फेप स्युहक्यो येहकें। 32 ता़हनी दि म़ेदी ल्हाक्पु च्यि माज्ये? गिदोन, बाराक, शिमशोन, यिप्ता, क्याहल्बु दाऊद, शमूएल दाङ लुहङतेम्बाया़गी तेहन्दालानी ङाहला स्येती तेह-लुहङ म़ेह। 33 तेहपा लाहमलेॱराङ खुङया़गी क्याहल-खाप थाम्ज्यी क्याहल्सीन ओहले सुलाॱआङ ङ्येम्बा-ङ्य़ेहरी माहबेबा पेहती ओङ छ्य़ेसीन। किन्ज्योगी ज़्या़ नाङग्योकी ताहम्ज्याॱआङ खुङया़गी ज्योर्सीन। ओहले तेहपा लाहमलेॱराङ खुङया़गी सिङग्यी-ता़या़गी खा छ्येबे तेह च्य़ूसीन। 34 जाङ-जाङ ती़हदी तेहक्यो मेह-बुङया़ला स्यि च्य़ूसीन। टाहगी पादाङलेगीॱआङ खुङ थार ख़ूसीन। खुङ मा-फाम्बु येहकें यिहॱनाङ ता़ह स्युक छ्यिम्बु काहल्दी येह। मा़ क्याहप्केमु खुङया़गी छ्यि-क्याहपा टाहया़ला क्याहल्सीन। 35 तेहपा लाहमलेॱराङ पी़हमी-पेहजाया़गी राहङ ङयेहवाया़ला स्यिक्योलेगी सोम्बो लो़हक्यो थोङसीन। लेहमेन काहजे मिहया़गीदी स्यिदीले येहपाराङ सोम्बो लो़हदी जेन या़हबु मिहली ज्योर्च्येकी तेहन्दाला, ताहन्दा तुहक्पु खुर्ते स्यिज्येला ठाबे पेहसीन। 36 लाहलाला मिहया़गी स्ये़हन्डील पेहती ताक्स्यु क्याहप्सीन ओहले लाहलालादी मिहया़गी ताहम्दी चोन-खाङला लू़सीन। 37 मिहया़गी खुङया़ला तोहगी क्याहप्सीन, आरागी स्या़सीन ओहले पादाङगी सेसीन। ओहले लाहला ङ्याम्बुदी केहन्ज्येला राह दाङ ल़ूहगी को़बा मिहम्बा लेहमेन च्यिॱआङ म़ेहबा येहकें। खुङ ज्यिबुराङ प्राङबु येहकें। खुङला मिहया़गी ज्यिबुराङ ङ्येन्ज्येन पेहसीन ओहले खुङ तुहक्पु ङ्युहङदी फार छुर य़ूह कोहसीन। 38 जाम्बुलीङ खुङया़गी तेहन्दाला या़हबु म़ेहबा येहकें। खुङ रिह काम्बु, लाहया़, फुक्पाया़ दाङ ओमया़ला युहदी डो कोहसीन। 39 तेहपा पेहक्यो सोङबेॱराङ किन्ज्योगी खुङया़ला ची़नाङ जे नाङसीन। यिहॱनाङ किन्ज्योगी ज़्या़ नाङग्योकी ताहम्ज्या सुज्यीगीॱआङ माहन्ज्योर। 40 च्यिबेमाना किन्ज्योगी ओहराङगी तेहन्दाला जेन या़हबु राहङगी ज़ो नाङग्योगी च्याहम्दा ज़्या़ नाङदी येह, ओहराङ ङ्याम्बुराङ खुङॱआङ याहङ-ताहक्पा डोज्यु म़ेदी किन्ज्योगी थु-सेम जे नाङगे। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.