हिब्रू 1 - ह्योल्मोस्यिहङगामकी स्याहप्च्यीया़ म़ेदी स़ेबु छ्येस्यो 1 काहल्ग्योगी ती़हजीला ओहराङ आख्ये मे़हमेया़ ङ्याम्बु लुहङतेम्बाया़ लाहमले माहङबुराङ ओहले लेहमेन लेहमेन छ्याप्स्यीया़ जेती किन्ज्योगी स्याहल सुङ नाङसीन। 2 यिहॱनाङ ता़ह दि तिङस्यो ङ्यिहमाया़ला मिहरो राहङगी स़ेबु लाहमले ओहराङ ङ्याम्बु स्याहल सुङ नाङदी येह। स़ेबुलाॱराङ मिहरोकी रेबेॱराङ से़हया़दी ताहक्पु ओहङज्येला दाम नाङसीन, ओहले स़ेबु लाहमलेॱराङ मिहरोगी रेबेॱराङ से़हया़ छ्या़ च्य़ू नाङसीन। 3 मास्यीकागी किन्ज्योकी ज़िज्यिदकी क्या-साङे तेन नाङगे ओहले मास्यीकाॱराङ किन्ज्योकी तेहम्बा-तेहन्सुम ङ्य़ेहरी यिहम्बा। ओहले मिहरोगी वाङज्या छ्यिम्बु सुङलाॱराङ रेबेॱराङ से़हया़ छ्या़दे येहबा। मिहया़ला तिहक्पालेगी कोहङदा नाङगेन्गी छ्या़ले छार फान्ज्यो मिहरो वाङज्या छ्यिम्बु नोम्गेन किन्ज्योकी योबा ङो़ले ज़्य़ू नाङसीन। 4 स्यिहङगामकी स्याहप्च्यीया़ म़ेदीॱआङ मास्यीका चा़ छ्यिम्बु ज़्य़ू नाङदी येह च्यिबेमाना किन्ज्योगी मिहरोला स्यिहङगामकी स्याहप्च्यीया़ला म़ेदीॱआङ चा़ छ्यिम्बु छेन नाङदी येह। 5 किन्ज्योगी का़हन्दीॱआङ स्यिहङगामकी स्याहप्च्यीया़ला दि ल़ेहमु सुङ माहनाङ, “ख्ये ङाहती स़ेबु यिहम्बा, तिहरीङ ङाहगी ख्येला क्येदी येहबा।” येहपाराङ च्यि का़हन्दीॱआङ स्यिहङगामकी स्याहप्च्यीगी तेहन्दाला दि ल़ेहमु सुङ नाङदी येहबा ले, “ङाह खोगी याहप ओहङज्ये येह, खो ङाहती स़ेबु ओहङज्ये येह।” 6 किन्ज्योगी राहङदी तोहङस्यो क्येक्योदीला जाम्बुलीङला नोम फेप नाङगेमु मिहरोगी येहपाराङ सुङ नाङसीन, “किन्ज्योकी रेबेॱराङ स्यिहङगामकी स्याहप्च्यीया़गी मिह-रो़हलाॱराङ छ्येपा फुल्ज्यु।” 7 स्यिहङगामकी स्याहप्च्यीया़गी तेहन्दाला मिहरोगी सुङ नाङगे, “मिहरोगी राहङगी स्यिहङगामकी स्याहप्च्यीया़ला ल्हा़बा लुङजी ज़ो नाङगे। ओहले राहङगी योक्पुया़ला मेहगी मेहबुङ ज़ो नाङगे।” 8 यिहॱनाङ ता़ह स़ेबुकी तेहन्दाला मिहरोगी दि ल़ेहमु सुङ नाङसीन, “ओ़ किन्ज्यो, राहङगी ज़्य़ू-ठि नाहम्स्यी किन्दुॱराङ लिहच्ये येह, ओहले राहङगी तेहन्दाम लाहमले ठिम ताङ नाङज्ये येह। 9 राहङगी टाहङबु मिहला चेवा जे नाङगे ओहले तिहक्च्येम्बा मिहला क्युक्टो जे नाङगे। ओ़ह सोङबे किन्ज्यो, राहङ किन्ज्योगी राहङला, राहङगी रो़हया़ म़ेदीॱआङ माहङबु जेती ओहले ची़नाङ जेती नुमगी ठि-सोल जे-नाङदी येह।” 10 मिहरोगी येहपाराङ सुङ नाङसीन, “ओ़ चो़वो छ्येवा, राहङगी थाम्ज्यी म़ेदी तोहङस्यो जाम्बुलीङकी ब्राम तिङ नाङसीन, ओहले राहङगी छ्या़गीराङ नामया़ ज़ो नाङसीन। 11 ओ़ह थाम्ज्यीराङ तोङदी डोज्ये येह, यिहॱनाङ राहङ नाहम्स्यी किन्दुॱराङ लिहच्ये येह। दि थाम्ज्यी काप्च्या ल़ेहमुराङ निङबा डोज्ये येह। 12 राहङगी ओ़हया़ला काप्च्या ल़ेहमुराङ जेती लाप नाङज्ये येह ओहले पो नाङज्ये येह। यिहॱनाङ राहङनी काह-ठि येहबा दार-च्यी़राङ ओ़हठीॱराङ ज़्य़ू नाङगे। राहङ नाहम्स्यी किन्दु सोम्बो ज़्य़ू नाङज्ये येह।” 13 किन्ज्योगी का़हन्दी स्यिहङगामकी स्याहप्च्यीला दि ल़ेहमु सुङ नाङबा ले, “ख्येती टाहया़ला ख्येती काङबा चो़ला छ्यि मा़हच्यु थु ख्ये ङाहती योबा ङो़ले तेह।” 14 च्यि ओ़ह थाम्ज्यी स्यिहङगामकी स्याहप्च्यीया़ थार्पा ज्योर्केया़गी तेहन्दाला स्याहप्तो स्य़ूहज्येला ताङग्यो स्याहप्तो स्युहएँकी नाम्स्यीया़ मिहम्बा ले? |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.